ນັກທ່ອງທ່ຽວ ມ.ວັງວຽງ ຫຼ້ອຍຫຼໍ

ສຸພັດຕາ
2020-03-12
ອີແມວລ໌
ຄໍາເຫັນ
Share
ພິມ
ສະຖານທີ່ທ່ອງທ່ຽວ ບ້ານພັກຕາກອາກາດ ທີ່ ເມືອງວັງວຽງ ແຂວງວຽງຈັນ
ສະຖານທີ່ທ່ອງທ່ຽວ ບ້ານພັກຕາກອາກາດ ທີ່ ເມືອງວັງວຽງ ແຂວງວຽງຈັນ
ຮູບພາບອຸປຖັມໂດຍ: ນັກຂ່າວພົລເມືອງ

ປັດຈຸບັນ ສະພາບການທ່ອງທ່ຽວ ຢູ່ເມືອງວັງວຽງ ແຂວງວຽງຈັນ ເຊິ່ງເປັນເມືອງທ່ອງທ່ຽວ ລະດັບຕົ້ນໆຂອງລາວ ຍິ່ງໄດ້ຮັບຜົນກະທົບ ຫຼາຍຂຶ້ນ ຍ້ອນການແຜ່ຣະບາດ ຂອງພຍາດໂຄວິດ-19 ເຮັດໃຫ້ນັກທ່ອງທ່ຽວຫຼຸດລົງຢ່າງຕໍ່ເນື່ອງ ສົ່ງຜົນໃຫ້ບັນຍາກາດພາຍໃນເມືອງ ມີຄວາມງຽບເຫງົາ ແລະບັນດາພາກສ່ວນທຸຣະກິຈຕ່າງໆ ກໍໄດ້ຮັບຜົນກະທົບເພີ້ມຂຶ້ນ, ດັ່ງຊາວເມືອງວັງວຽງ ທ່ານນຶ່ງ ກ່າວຕໍ່ວິທຍຸເອເຊັຽ ເສຣີ ໃນວັນທີ 12 ມີນາ ນີ້ວ່າ:

“ມີສ່ວນນ້ອຍໆ ເຮືອນພັກຮ້ານອາຫານ ກະຖືວ່າງຽບສະຫງັດ ລົງໄປຫຼາຍເຕີບແລ້ວ ບໍ່ມີຜົນດີຕໍ່ພາກສ່ວນທຸຣະກິຈປານໃດເນາະ ເບິ່ງແລ້ວ ເຫັນວ່າ ພະນັກງານຮັບໃຊ້ ຢູ່ເປັນໂຮງແຮມ ເປັນຣີສອດ ເຂົາກະບາງຄົນກະຢຸດງານຊົ່ວຄາວ ມັນບໍ່ມີແຂກເດ້.”

ໃນຂນະທີ່ ເຈົ້າຂອງກິຈການຮ້ານອາຫານ ແລະບັງກະໂລ ຢູ່ເມືອງວັງວຽງ ເວົ້າວ່າ ທຸຣະກິຈຂອງຕົນ ໄດ້ຮັບຜົນກະທົບແຮງຂຶ້ນເລື້ອຍໆ ຈາກພຍາດໂຄວິດ-19 ຍ້ອນໃນໄລຍະນີ້ ບໍ່ມີລູກຄ້າ ຈາກນະຄອນຫຼວງວຽງຈັນ ມາໃຊ້ບໍຣິການ ເລີຍມີແຕ່ແຂກພາຍໃນ ເຂົ້າມາຈໍານວນ ໜ້ອຍ ເຮັດໃຫ້ຣາຍຮັບຫຼຸດລົງ, ດັ່ງທ່ານກ່າວວ່າ:

“ລູກຄ້າຫຼຸດລົງ ລູກຄ້າສ່ວນຫຼາຍກະມາຈາກວຽງຈັນເນາະ ແຕ່ຊ່ວງນີ້ ມັນກະບໍ່ມີລູກຄ້າ ມາຈາກວຽງຈັນເລີຍ ມີແຕ່ລູກຄ້າແຖວບ້ານໃກ້ ແຖວອິຫຍັງນີ້ນະ ມັນໄດ້ຮັບຜົນກະທົບ ຢູ່ແລ້ວເນາະ ຈາກພຍາດອັນນີ້ຫັ້ນນະ.”

ທ່ານກ່າວຕື່ມວ່າ ຖ້າຫາກວ່າສະຖານະການ ຂອງພຍາດດັ່ງກ່າວ ຍັງບໍ່ດີຂຶ້ນ ຢ້ານວ່າຈະສົ່ງຜົນກະທົບ ໃຫ້ຮ້ານອາຫານຂອງຕົນ ແລະອີກ ຫຼາຍໆຮ້ານ ໃນເມືອງວັງວຽງ ປະສົບບັນຫາຫຼາຍຂຶ້ນ ແລະມີຄວາມເປັນໄປໄດ້ສູງທີ່ຈະແກ່ຍາວ ໄປຈົນຮອດບຸນປີໃໝ່ລາວ ເຊິ່ງ ປີນີ້ເປັນ ໄປໄດ້ວ່າ ຈະມີນັກທ່ອງທ່ຽວ ເຂົ້າມາທ່ຽວວັງວຽງໜ້ອຍລົງ ຕ່າງຈາກປີຜ່ານໆມາຫຼາຍ.

ກ່ຽວກັບເຣື້ອງທີ່ວ່ານີ້ ເຈົ້າໜ້າທີ່ ທາງການເມືອງວັງວຽງ ທ່ານນຶ່ງ ກ່າວວ່າປັດຈຸບັນ ສະພາບການທ່ອງທ່ຽວ ຢູ່ເມືອງວັງວຽງງຽບເຫງົາແທ້ ຍ້ອນນັກທ່ອງທ່ຽວ ຈາກປະເທດເພື່ອບ້ານ ຫຼຸດລົງຫຼາຍ ເນື່ອງຈາກຖືກທາງການ ຂອງປະເທດ ຂະເຈົ້າ ສັ່ງງົດການເດີນທາງ ສົ່ງຜົນໃຫ້ ບັນດາໂຮງແຮມ, ເຮືອນພັກ, ຮ້ານອາຫານ ແລະຮ້ານບໍຣິການຕ່າງໆ ໄດ້ຮັບຜົນກະທົບ ແບບບໍ່ສາມາດຫຼີກລ່ຽງໄດ້, ດັ່ງທ່ານກ່າວວ່າ:

“ແຕ່ລະປະເທດເນາະ ຢູ່ອ້ອມຂ້າງນີ້ ກະຖືວ່າໄດ້ມີການສັ່ງຢຸດຫັ້ນແຫຼະ ເວົ້າເຣື່ອງນັກທ່ອງທ່ຽວ ຂອງປະເທດຂອງຕົນເອງຫັ້ນນະ ກະຖືວ່າ ເຮັດໃຫ້ ນັກທ່ອງທ່ຽວມັນຫຼຸດລົງຫັ້ນແຫຼະ ສໍາລັບໂຮງແຮມເຮືອນພັກເນາະ ຫຼືວ່າຮ້ານອາຫານ ກະຖືວ່າຍັງເປີດ ບໍຣິການປົກກະຕິຫັ້ນແຫຼະ ແຕ່ວ່າເຣື້ອງແຂກຫັ້ນ ກະຖືວ່າ ນັກທ່ອງທ່ຽວກະຫຼຸດລົງເນາະ.”

ທ່ານກ່າວຕື່ມວ່າ ສໍາລັບບຸນປີໃໝ່ລາວປະຈໍາປີ 2020 ນີ້ທາງການເມືອງວັງວຽງ ຍັງຈະຈັດຂຶ້ນຕາມປົກກະຕິ ໂດຍມີຂະບວນແຮ່ ແລະຫຼີ້ນ ຫົດນໍ້າ ຄືກັບປີຜ່ານມາ ແຕ່ຈະງົດການຈັດງານປະກວດຕ່າງໆ ເພື່ອຫຼີກລ່ຽງບໍ່ໃຫ້ປະຊາຊົນ ໂຮມຊຸມນຸມກັນຫຼາຍເກີນໄປ ແລະ ໄລຍະ ບຸນປີໃໝ່ນີ້ ຈະມີການກວດກາ ແລະ ເຝົ້າຣະວັງພຍາດໂຄວິດ-19 ຢ່າງເຂັ້ມງວດ ເພື່ອຄວາມປອດໄພຂອງຜູ້ມາຮ່ວມງານ.

ສໍາລັບສະຖານະການ ຂອງພຍາດໂຄວິດ-19 ໃນທີ 12 ມີນານີ້ ໂຕເລຂຜູ້ເສັຽຊີວິດມີ 4,615 ຄົນ ແລະມີຜູ້ຕິດເຊື້ອທັງໝົດ 125,865 ຄົນ ໃນນັ້ນ ປິ່ນປົວເຊົາແລ້ວ 67,017 ຄົນ ສ່ວນຢູ່ ສປປລາວ ຍັງບໍ່ພົບຜູ້ຕິດເຊື້ອຈັກ ກໍຣະນີ ມີແຕ່ຜູ້ຕ້ອງສົງໃສ ວ່າຕິດເຊື້ອຈໍານວນ 60 ຄົນ.

ຄໍາເຫັນ (1)
Share

ຈັນພອນ

ຈາກ ວຽງຈັນ

ພັກ ແລະລັດປະກາດວ່າ ທົວປະເທດລາວ ບໍ່ມີພະຍາດ coronavirus ໂຄໂຣນາໄວຮັດຕີດແຜ່ຂະຫຍາຍຢູ່. ປະເທດລາວປະຊາຊົນລາວ ມີຄວາມສຸກທຸກປະການ, ການເຈັບເປັນກໍ່ມີຕາມທຳມະດາ ນີ້ເປັນການປະກາດຂອງ ສປປລາວ


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Mar 23, 2020 09:16 AM

ເຕັມຫນ້າ