ໂຄງການໂລກໃໝ່ແຫ່ງວຽງຈັນ

ເມື່ອ ບໍ່ດົນ ມານີ້, ໂຄງການ ໂລກ ໃໝ່ ແຫ່ງ ວຽງຈັນ ທີ່ ນັກ ທຸຣະກິດ ຈີນ ເປັນ ຜູ້ ລົງທຶນ ນັ້ນ ໄດ້ ເລີ່ມເປີດ ໃຫ້ ຈັບຈອງ ເຊົ່າ ຫຼື ຊື້ ສະຖານທີ່ ຂອງ ໂຄງການ ແລ້ວ ພາຍຫຼັງ ທີ່ ໄດ້ເລີ່ມ ປຸກສ້າງ ມາ ແຕ່ ປີ 2014.

ເຈົ້າໜ້າທີ່ ໂຄງການ ເປີດເຜີຍ ວ່າ ຣາຄາ ເຊົ່າ ແລະ ຊື້ ນັ້ນ ມີຢູ່ວ່າ ຖ້າ ຈະຊື້ ແມ່ນຊື້ ຂາດຕົວເລີຍ ໃນ ລະຍະ ສັມປະທານ 90 ປີ ແລະ ຖ້າ ຈະເຊົ່າ ແມ່ນ ໃຫ້ເຊົ່າ ເປັນ ເດືອນ ໄປ. ຄາດວ່າ ໂຄງການ ນີ້ ຈະແລ້ວ ສົມບູນ ແລະ ເປີດ ໃຊ້ໄດ້ ໃນ ອີກ 5 ເດືອນ ຂ້າງໜ້າ ນີ້. ທ່ານກ່າວ ຕໍ່ ຜູ້ສື່ຂ່າວ ພວກເຮົາ ວ່າ:

”ໂອ ໂຕນີ້ ເຮົາຊິ ມີຂາຍ ແລະ ໃຫ້ເຊົ່າ ເນາະ ຣາຄາ ຂາຍ ອັນທາງ ເບື້ອງ ແຄມຂອງ ມັນ ຈະເປັນ 3 ຊັ້ນ ຣາຄາ ແມ່ນ 4000 ໂດລາ ຕໍ່ ແມັດ, ເບື້ອງ ທາງໃນ ບໍ່ ແມ່ນ ແຄມຂອງ ຫັ້ນ ຣາຄາ 2580 ໂດລາ ຕໍ່ ແມັດ. ສຳລັບ ຣາຄາ ເຊົ່າຫັ້ນ ທາງ ແຄມຂອງ ແມ່ນ 50 ໂດລາ ຕໍ່ ແມັດ, ທາງໃນ ແມ່ນ 30 ຫຼຽນ. ສັມປະທານ ແມ່ນ 90 ປີ".

ທ່ານກ່າວ ອີກວ່າ ໂຄງການ ນີ້ ແມ່ນ ໂຄງການ ລົງທຶນ ຂອງ ຈີນ 100 ສ່ວນຮ້ອຍ ແລະ ໄດ້ຮັບ ສັມປະທານ ຈາກ ຣັຖບານ ລາວ, ຖືໄດ້ວ່າ ເປັນ ໂຄງການ ທີ່ ມີມູນຄ່າ ສູງ ໃນ ຣະດັບ ແຖວໜ້າ ຂອງ ການ ລົງທຶນ ຈີນ ໃນລາວ ກໍ ວ່າໄດ້.

ແຕ່ ຊາວລາວ ກັບ ຮູ້ສຶກ ວ່າ ໂຄງການ ລົງທຶນ ສ້າງ ຫ້າງ ຊັພສິນຄ້າ ຫຼື ສູນ ການຄ້າ ຂອງ ນັກລົງທຶນ ຈີນ ໃນລາວ ແມ່ນ ບໍ່ສ້າງ ປະໂຫຽດ ໃຫ້ ກັບ ຄົນລາວ. ກົງກັນ ຂ້າມ ມີແຕ່ຈະ ເຮັດ ໃຫ້ ຄົນລາວ ສູນເສັຽ ດິນດອນ ຕອນຫຍ້າ ຫຼື ທີ່ດິນ ບ່ອນ ສຳຄັນໆ ໃນ ຕົວເມືອງ ໄປ. ນອກນັ້ນ, ມັນ ຍັງບໍ່ໄດ້ ສ້າງ ວຽກເຮັດ ງານທຳ ພໍ ເທົ່າໃດ ໃຫ້ ກັບ ຄົນລາວ, ເພາະ ສ່ວນໃຫຍ່ ໂຄງການ ນີ້ ບໍ່ຈ້າງ ຄົນລາວ, ຕິວ່າ ຄົນລາວ ໃຊ້ການ ບໍ່ໄດ້ ແລະ ນຳເອົາ ຄົນງານ ຈີນ ເຂົ້າມາ. ດັ່ງ ທີ່ ທ່ານນຶ່ງ ໄດ້ ກ່າວວ່າ:

“ການທີ່ວ່າ ລົງມາ ລົງທຶນ ສ້າງ ຫ້າງ ຊັພສິນຄ້າ ຢູ່ ໃນລາວ ນີ້, ຈຸດເສັຍ ຂອງ ມັນ ແມ່ນ ເຮົາ ຊິເສັຍ ເນື້ອທີ່ ຫັ້ນແຫຼະ. ເຂດ ດອນຈັນ ເຂດ ບຶງ ທາດຫຼວງ ບ່ອນມັນ ຊິເອົາ ບ່ອນທີ່ ສຳຄັນໆ. ການ ສ້າງວຽກ ເຮັດ ງານທຳ ດີບໍ່ດີ ມັນບໍ່ຈ້າງ ຊ້ຳ ຄົນລາວ ມັນ ຈ້າງແຕ່ ແຮງງານ ມັນ ເພາະວ່າ ມັນວ່າ ຄົນລາວ ນີ້ ເປັນຄົນ ຂີ້ຄ້ານ ບໍ່ຂຍັນ ຕໍ່ວຽກ ອັນທີ ສອງ ມາ ການຈ້າງ ກະແພງ ຄ່າຈ້າງ ກະແພງ, ມັນຈະເອົາ ຄົນຈີນ ນີ້ ມາເຮັດເອງ ເປັນ ກັມມະກອນ ມັນ ທຸກຢ່າງ".

ໂຄງການ ນີ້ ຢູ່ ໃຈກາງ ເມືອງ, ແຄມຂອງ ກົງກັນຂ້າມ ກັບ ຫາດ ດອນຈັນ ແປະ ກັບ ໂຮງແຮມ ດອນຈັນ ພາເລສ ກວມເອົາ ເນື້ອທີ່ ຫຼາຽກວ່າ 50 ເຮັກຕາ ຊຶ່ງ ບໍຣິສັດ ພັທນາ ອະສັງຫາ ຣິມຊັພ, ແຄ່ມເຊ່ (CAMCE) ຂອງ ຈີນ ເປັນ ເຈົ້າຂອງ.