ເຕືອນ ຫ້າມຂຶ້ນລາຄາ ສິນຄ້າ ໄລຍະປີໃໝ່ລາວ

ຜແນກອຸດສາຫະກັມ ແລະການຄ້ານະຄອນຫລວງວຽງຈັນ ໄດ້ອອກແຈ້ງການໃນມື້ວັນທີ 21 ມິນາຜ່ານມາ ບໍ່ໃຫ້ພວກຄ້າຂາຍສວຍໂອກາດ ຂຶ້ນລາຄາສິນຄ້າ ໃນໄລຍະບຸນປີໃໝ່ລາວນີ້ຢ່າງເດັດຂາດ ໃນຂະນະທີ່ປະຊາຊົນລາວຫລາຍຄົນເວົ້າວ່າ ຈະເປັນໄປໄດ້ຍາກ ທີ່ພວກພໍ່ຄ້າແມ່ຄ້າຈໍານວນນຶ່ງຈະປະຕິບັດຕາມ ຍ້ອນວ່າ ໃນປັດຈຸບັນ ລາຄາສິນຄ້າຍັງແພງຂຶ້ນຢູ່ ເຊັ່ນຊີ້ນໝູ ທາງການກໍານົດບໍ່ໃຫ້ຂາຍເກີນ 50,000 ກີບຕໍ່ກິໂລ ແຕ່ໃນຕົວຈິງເຫັນຂາຍກິໂລນຶ່ງ 55,000 ກີບ ແລະຊີ້ນງົວ, ຊີ້ນຄວາຍ ແລະສິນຄ້າອື່ນໆທຸກຢ່າງ ກໍແພງຂຶ້ນເຊັ່ນກັນ.

ດັ່ງຊາວ ນະຄອນຫລວງວຽງຈັນຜູ້ນຶ່ງ ກ່າວຕໍ່ວິທຍຸເອເຊັຽເສຣີໃນມື້ງວັນທີ 8 ເມສານີ້ວ່າ:

“ຊີ້ນໝົດແຫລະ ສິນຄ້າອີ່ຫຍັງນ່າ ຂຶ້ນໝົດຄືເກົ່າ ເປັນເຄື່ອງປຸງແຕ່ງອາຫານຫຍັງນີ້ ກະຂຶ້ນໝົດແຫລະ ອາຫານ, ປູ, ປາ ນີ້ນ່າ, ໝູນ່າ ໂອຍໂລນຶ່ງກໍ 50 ປາຍພັນ, 55 ພັນນັ້ນ ຊີ້ນຄວາຍໂລນຶ່ງ 85 ພັນ.”  

ແລະປະຊາຊົນ ຢູ່ນະຄອນຫລວງວຽງຈັນອີກຜູ້ນຶ່ງ ກໍເວົ້າໃນມື້ດຽວກັນນີ້ວ່າ ໃນໄລຍະບຸນປີໃໝ່ລາວນີ້ ຕົນເຊື່ອວ່າ ພວກພໍ່ຄ້າແມ່ຄ້າຈະສວຍໂອກາດຂຶ້ນ ລາຄາສິນຄ້າແນ່ນອນ, ເຖິງແມ່ນວ່າທາງການຈະກໍານົດລາຄາສິນຄ້າອອກມາ ແຕ່ກໍຍັງບໍ່ເຫັນວ່າ ຈະປະຕິບັດໄດ້ ເພາະລາຄາສິນຄ້າ ກໍຍັງແພງກວ່າທີ່ທາງການກໍານົດຢູ່ ເຊັ່ນຜັກກາດ ແຕ່ກ່ອນຂາຍກິໂລນຶ່ງ 8,000 ກີບ, ແຕ່ດຽວນີ້ຂາຍ 15,000 ກີບ.

ດັ່ງທີ່ທ່ານກ່າວວ່າ:

“ກະແນ່ນອນຫັ້ນແຫລະ ເຂົາຕ້ອງສວຍໂອກາດຂຶ້ນລາຄາດຽວນີ້ຫັ້ນນະ ສິນຄ້າຢູ່ຕາມທ້ອງຕລາດຂຶ້ນລາຄາໝົດ ຄືຜັກກາດ ແຕ່ກີ້ເຄີຍຊື້ມີແຕ່ໂລ 8 ພັນກີບ ດຽວນີ້ຫັ້ນຂຶ້ນໂລນຶ່ງ 15 ພັນແລ້ວເດ ໝີ່ໄວໄວຫັ້ນນະນໍກໍຂຶ້ນລາຄາເດ ເຄີຍຊື້ເປັນແກັດນະ 50 ປາຍ ດຽວນີ້ຫັ້ນ 80 ປາຍ ຄືເບັຍໄຮນິແກນນໍ ປົກກະຕິເຂົາຂາຍແສນແປດ ດຽວນີ້ຫັ້ນຂາຍສອງແສນແລ້ວເດ.”

ກ່ຽວກັບເຣື່ອງທີ່ວ່ານີ້ ເຈົ້າຂອງຮ້ານອາຫານ ຢູ່ນະຄອນຫລວງວຽງຈັນຜູ້ນຶ່ງ ເວົ້າຕໍ່ວິທຍຸເອເຊັຽເສຣີໃນມື້ວັນທີ 8 ເມສານີ້ວ່າ ໃນປັດຈຸບັນ ສິນຄ້າຕ່າງໆແພງຂຶ້ນທຸກຢ່າງ. ເຖິງຈະແພງ ແຕ່ຕົນກໍຈໍາເປັນຕ້ອງໄດ້ຊື້ ໃນຂະນະທີ່ໄດ້ຂາຍອາຫານ ໃຫ້ລູກຄ້າໃນລາຄາເກົ່າ, ຫາກຂຶ້ນລາຄາກໍຈະຂາຍຍາກ, ມີແຕ່ໄດ້ເຮັດໃຫ້ອາຫານນັ້ນໜ້ອຍລົງຕາມສົມຄວນ.

“ຊີ້ນງົວອີ່ຫຍັງກະຂຶ້ນທຸກຢ່າງ ຂຶ້ນໝົດເລີຍນະ ຂຶ້ນຢ່າງລະ 5 ພັນ 10 ພັນ ຫູດັບທຸກຢ່າງເລີຍ ນໍ້າມັນກະຂຶ້ນ ອີ່ຫຍັງກະຂຶ້ນ ຂຶ້ນໝົດເລີຍນະ ເຮັດຫຍັງບໍ່ໄດ້ຄືເກົ່າຢູ່ ຢູ່ຮ້ານອາຫານຄືຂອງພວກຂ້ອຍນີ້ ພວກຂ້ອຍກໍໄດ້ຂາຍລາຄາເກົ່າ ແຕ່ວ່າລົດປະລິມານລົງເອົາ ເພາະວ່າຖ້າເຮົາຂຶ້ນລາຄາ ກະລູກຄ້າກໍບໍ່ມາ ກໍາໄລກໍໜ້ອຍລົງ ຊ່ອຍເຫລື້ອໂຕເອງຄືເກົ່າຫັ້ນແຫລະ.”

ໃນຂະນະດຽວກັນ ແມ່ຄ້າຂາຍໝູຢູ່ຕລາດ ໃນນະຄອນຫລວງວຽງຈັນນາງນຶ່ງເວົ້າ ວ່າ ໃນໄລຍະບຸນປີໃໝ່ນີ້ ຕົນຂາຍຊີ້ນໝູຕາມລາຄາທີ່ທາງການກໍານົດໃຫ້ ຄືໄດ້ຂາຍບໍ່ເກີນ 50,000 ກີບຕໍ່ກິໂລ, ຖ້າຈະຂາຍເກີນລາຄານີ້ ກໍບໍ່ມີໃຜຢາກຊື້. ໃນໄລຍະໂຄວິດ-19 ຣະບາດ ຜູ້ຄົນບໍ່ຢາກຈັບຈ່າຍໃຊ້ເງິນ.

“ເຄື່ອງນີ້ມັນຂຶ້ນມາແຕ່ດົນແລ້ວ ຄືປຽບທຽບຄືຊີ້ນໝູ ຍາມປີໃໝ່ເຂົາເຈົ້າໃຫາວາງຂາຍ 50 ກໍພາກັນຂາຍ 50 ຄີເກົ່າ ຂາຍໝູແພງຫລາຍຂາຍບໍ່ດີ.”

ເພື່ອເຮັດໃຫ້ການກໍານົດ ລາຄາສິນຄ້າຂອງທາງການ ໄດ້ຮັບການຈັດຕັ້ງປະຕິບັດໃນພາກຕົວຈິງ ເຈົ້າໜ້າທີ່ຜແນກອຸດສາຫະກັມ ແລະການຄ້າ ຜູ້ຂໍສງວນຊື່ ແລະຕໍາແໜ່ງທ່ານຶ່ງກ່າວຕໍ່ ວິທຍຸເອເຊັຽເສຣີ ໃນມື້ວັນທີ 8 ເມສານີ້ວ່າ ຕາມລະບຽບການແລ້ວ ໃນໄລຍະບຸນປີໃໝ່ ຈະມີເຈົ້າໜ້າທີ່ທີ່ກ່ຽວຂ້ອງ ໄປກວດກາຕາມຮ້ານຂາຍເຄື່ອງຕ່າງໆ, ບໍ່ໃຫ້ພວກພໍ່ຄ້າແມ່ຄ້າສວຍໂອກາດຂຶ້ນລາຄາສິນຄ້າ, ໃຫ້ຂາຍຕາມລາຄາ ທີ່ທາງການກໍານົດ ແລະຖ້າກວດພົບຜູ້ໃດຝ່າຝືນ ເທື່ອທໍາອິດກໍຈະຖືກຕັກເຕືອນ ແລະເທື່ອທີສອງກໍຈະໃຫ້ປິດຮ້ານຊົ່ວຄາວ.

ດັ່ງທີ່ທ່ານກ່າວວ່າ:

“ພວກເຮົາພົບເຫັນຄັ້ງທີນຶ່ງ ພວກເຮົາຈະໃຫ້ນັກວິຊາການໄປເຕືອນນໍ ຖ້າຫາກວ່າມື້ທີສອງຍັງຂຶ້ນ ພວກເຮົາກໍຈະໄດ້ມີການໂຈະພວກເຂົາ ປິດກິຈການຊົ່ວຄາວ ເພື່ອກວດກາຄວາມເປັນຈິງກ່ອນ ວ່າທີ່ໄປທີ່ມາຂອງຮ້ານນັ້ນ ມັນໄປຊື້ເຄື່ອງຢູ່ຮ້ານໃດມານໍ.”

ແລະຫາກກວດພົບວ່າ ຝ່າຝືນລະບຽບການ ທີ່ທາງການວາງອອກເປັນເທື່ອທີ່ສາມ ກໍຈະຖືກສັ່ງໃຫ້ປິດຮ້ານ ບໍ່ໃຫ້ຂາຍຕໍ່ໄປ.

ຜແນກອຸດສາຫະກັມ ແລະການຄ້າ ນະຄອນຫລວງວຽງຈັນ ໄດ້ກໍານົດລາຄາສິນ ຄ້າຂາຍຍ່ອຍ: ຊີ້ນໝູປະເພດນຶ່ງ ບໍ່ໃຫ້ຂາຍເກີນ 50,000 ກີບຕໍ່ກິໂລ, ປະເພດສອງ ບໍ່ໃຫ້ຂາຍເກີນ 46,000 ກີບຕໍ່ກິໂລ. ສໍາລັບເຂົ້າສານ: ເຂົ້າໜຽວປະເພດສອງ ໃຫ້ຂາຍບໍ່ເກີນ 7,400 ກີບຕໍ່ກິໂລ; ປາກະຊັງ: ປານິນ ບໍ່ໃຫ້ຂາຍເກີນ 20,000 ກີບຕໍ່ກິໂລ.

ພ້ອມກັນນັ້ນ ທາງຜແນກນີ້ຍັງເວົ້າເຖິງສາເຫດ ທີ່ເຮັດໃຫ້ລາຄາສິນຄ້າ ຕາມທ້ອງຕລາດສູງຂຶ້ນວ່າ ເກີດຈາກຫລາຍປັດຈັຍ ຮວມທັງຈາກອັດຕຣາການ ແລກປ່ຽນເງິນຕຣາ ທີ່ເຮັດໃຫ້ລາຄາສິນຄ້າ ມີຕົ້ນທຶນສູງຂຶ້ນນໍາດ້ວຍ.