ຊາວບ້ານ 106 ຄອບຄົວ ຢູ່ບ້ານຈັດສັນບວມອໍ້ ຕ້ອງການອາຊີບ

ຊາວບ້ານ 106 ຄອບຄົວ ລວມພົນລະເມືອງທັງໝົດ 488 ຄົນ ຢູ່ບ້ານຈັດສັນບວມອໍ້ ເມືອງຊຽງເງິນ ແຂວງຫຼວງພະບາງ ເຊີ່ງເປັນບ້ານທີ່ຖືກຍົກຍ້າຍຈາກໂຄງການກໍ່ສ້າງທາງ ລົດໄຟ ລາວ-ຈີນ ຍັງຕ້ອງການຄວາມຊ່ວຍເຫຼືອຫຼາຍດ້ານໂດຍສະເພາະຕ້ອງການການສົ່ງເສີມດ້ານອາຊີບເປັນຕົ້ນວຽກງານການປູກຝັງ ແລະ ລ້ຽງສັດ ເພື່ອເຮັດໃຫ່ແຕ່ລະຄອບຄົວມີລາຍໄດ້ເປັນຫຼັກແຫຼ່ງ. ການຖືກຍົກຍ້າຍມາຢູ່ມາຈັດສັນຫຼາຍຄອບຄົວກໍ່ບໍ່ມີດິນປູກຝັງ ແລະ ລ້ຽງສັດ. ດັ່ງຊາວບ້ານທີ່ຢູ່ໃນບ້ານຈັດສັນບວມອໍ້ກ່າວຕໍ່ວິທຍຸເອເຊັຽເສຣີໃນວັນທີ 08 ສິງຫາ ນີ້ວ່າ.

“ສະເໜີນໍາເພິ່ນຫັ້ນຢາກໄດ້ໂຄງການຊ່ວຍເຫຼືອປູກຝັງລ້ຽງສັດບໍ່ມີທືນຮອນຊັ້ນເດ້ສະເໜີນໍາເພິ່ນເພິ່ນກາວ່າສະເໜີນໍາທີມງານພະນັກງານງານແຂວງນີ້ແຫຼະຫາລືໂຄງການຊ່ວຍເຫຼືອຫົນທາງໄປສູ່ທຳການຜະລິດນີ້ແດ່.”

ຊາວບ້ານຢູ່ໃນບ້ານຈັດບວມອໍ້ອີກທ່ານໜຶ່ງກໍ່ເຫັນວ່າຕົນເອັງ ແລະ ຊາວບ້ານອີກຫຼາຍຄົນທີ່ຢູ່ນໍາກັນຢາກໃຫ້ມີການສົ່ງເສີມໃຫ້ມີອາຊີບລ້ຽງສັດເພື່ອຫາລາຍໄດ້ເຂົ້າສູ່ຄອບຄົວພ້ອມທັງຢາກໃຫ້ມີແຫຼ່ງທືນຮອນຫຼືແຫຼ່ງໃຫ້ກູ້ຢືມເງິນສຳລັບຊາວບ້ານພ້ອມ. ເນື່ອງຈາກເງິນທີ່ໄດ້ຮັບເປັນຄ່າຊົດເຊີຍຈາກໂຄງການກໍ່ສ້າງທາງລົດໄຟ ລາວ-ຈີນ ແມ່ນບໍ່ພຽງພໍ. ດັ່ງທ່ານກ່າວວ່າ.

“ເອີ ຂະນ້ອຍກາຢາກປູກຝັງລ້ຽງສັດນີ້ແຫຼະ ຄືຕິດຕໍ່ເຂົາຢາກໄດ້ຢາກໃຫ້ລ້ຽງແບ້ບໍ່ລ້ຽງງົວລ້ຽງຄວາຍບໍ່ຫັ້ນນີ້ປະຊາຊົນຢາກຕ້ອງການມີຫ້ອງການມີເງິນບໍ່.”

ຊາວບ້ານຢູ່ໃນບ້ານຈັດສັນບວມອໍ້ອີກທ່ານກໍ່ຢືນຢັນວ່າຫຼາຍຄອບຄົວຢາກໄດ້ການສົ່ງເສີມດ້ານວຽກງານປູກຝັງ ແລະ ລ້ຽງສັດເນື່ອງຈາກຫຼາຍຄອບຄົວກໍ່ມີຄວາມຮູ້ທາງດ້ານນີ້ເປັນຫຼັກຢູ່ແລ້ວແຕ່ຍັງຂາດໂຄງການ ແລະ ທືນຮອນທີີ່ຈະເຈົ້າມາຊ່ວຍເຫຼືອຈຶ່ງເຮັດໃຫ້ຊາວບ້ານຫຼາຍຄອບຄົວຍັງບໍ່ມີວຽກ ແລະ ລາຍໄດ້ເປັນຫຼັກແຫຼ່ງ. ດັ່ງທ່ານກ່າວວ່າ.

“ການຊ່ວຍເຫຼືອຄືວ່າໃຫ້ພໍ່ແມ່ປະຊາຊົນລ້ຽງສັດເນາະຍັງບໍ່ມີໂຄງການຍັງບໍ່ມີທືນເພິ່ຍຍັງຊອກໂຄງການຢູ່ວ້າຊິໃຫ້ພໍ່ແມ່ປະຊາຊົນມາປູກຝັງລ້ຽງສັດຫັ້ນນ່າ. ໂດຍສະເພາະບ້ານເຮົາກໍ່ໄທເຮົາກໍ່ສະເໜີຢູ່.”

ສ່ວນບ້ານທີ່ທ່ານທີ່ມີໝູ່ອາໃສໃນບ້ານຈັດສັນບວມອໍ້ກໍ່ເຫັນວ່າເຖີງແມ່ນວ່າບາງຄອບຄົວທີ່ຢູ່ໃນບ້ານແຫ່ງນັ້ນມີວຽກປູກຝັງ ແລະ ລ້ຽງສັດແລ້ວຈຳນວນໜຶ່ງແຕ່ຍັງເປັນການປູກຝັງ ແລະ ລ້ຽງສັດຂະໜາດນ້ອຍເທົ່ານັ້ນເຊີ່ງຍັງບໍ່ສາມາດສ້າງລາຍໄດ້ໃຫ້ພວກເຂົາເຈົ້າ. ດັ່ງນັ້ນຈຶ່ງເຫັນວ່າຈຳເປັນຕ້ອງໄດ້ຮັບໂຄງການພັດທະນາ ແລະ ສົ່ງເສີມເພື່ອຍົກລະດັບການເປັນຢູ່ຂອງພວກເຂົາເຈົ້າໃຫ້ດີຂື້ນ. ດັ່ງທ່ານກ່າວວ່າ.

“ໂຕນີ້ແທ້ກາບໍ່ຊ່າງຊິເວົ້າຫັ້ນແຫຼະປູກຝັງນີ້ກໍ່ເປັນຈໍານວນໜ້ອຍເນາະລ້ຽງສັດນີ້ກໍ່ລ້ຽງແບບທຳມະດາຄືແບບພື້ນເມືອງລາວສື່ ໆ ຄືແບບຂອງໃນຂອງລາວຫັ້ນແຫຼະເນາະຄືຢູ່ລາວນີ້ມັນບໍ່ຄືຢູ່ຕ່າງປະເທດຄືປະຊາຊົນຜູ້ບໍ່ມີແລ້ວເຂົາເຈົ້າກາບໍ່ລ້ຽງຫັ້ນນ່າ.”

ກ່ຽວກັບເລື່ອງນີ້ວິທຍຸເອເຊັຽເສຣີໄດ້ຕິດຕໍ່ໄປຍັງຫ້ອງວ່າການປົກຄອງເມືອງຊຽງເງິນເພື່ອສອບຖາມເລື່ອງດັ່ງກ່າວເຊີ່ງເຈົ້າໜ້າທີ່ຮັບຜິດຊອບວຽກງານນີ້ທີ່ຂໍສະຫງວນສື່ແລະສຽງກ່າວພຽງແຕ່ວ່າປະຈຸບັນກຳລັງຊອກໂຄງການ ແລະ ແຫຼ່ງທືນເພື່ອມາຊ່ວຍເຫຼືອຊາວບ້ານຢູ່ໃນບ້ານຈັດສັນບວມອໍ້ນັ້ນແຕ່ກໍ່ຍັງບໍ່ທັນໄດ້ຢ່າງຄັກແນ່ເທື່ອ.

ວັນທີ 05 ສິງຫາ ທີ່ຜ່ານມາ ທ່ານ ດຣ ສອນໄຊ ສີພັນດອນ ນາຍົກລັດຖະມົນຕີພ້ອມດ້ວຍຄະນະໄດ້ເດີນທາງໄປຢ້ຽມຢາມຊາວບ້ານທີ່ຢູ່ບ້ານຈັດສັນບວມອໍ້ເຊີ່ງໄດ້ໂອ້ລົມ ແລະ ເໜັ້ນໃຫ້ທາງຂະແໜງການທີ່ກ່ຽວຂ້ອງມີການສືບຕໍ່ໍ່ຊ່ວຍເຫຼືອຊາວບ້ານເປັນຕົ້ນການປູກຝັງ-ລ້ຽງສັດ, ການຝືກວິຊາຊີບສີມືແຮງງານ, ຈັດທີ່ດິນ ແລະ ອາຊີບຄົງທີ່. ພ້ອມກັນນີ້ກໍໄດ້ມອບເງິນຈຳນວນໜຶ່ງເພື່ອເປັນກອງທືນພັດທະນາຂອງບ້ານ.

ເມື່ອວັນທີ 06 ຕຸລາ 2023 ທ່ານ ທອງລຸນ ສີສຸລິດ ປະທານປະເທດພ້ອມດ້ວຍຄະນະໄດ້ເດີນທາງໄປຢ້ຽມຢາມຊາວບ້ານຢູ່ເຂດບ້ານຈັດສັນບວມອໍ້. ເຊີ່ງທ່ານກໍໄດ້ມີຄຳເຫັນຊີ້ນໍາໃນຫຼາຍດ້ານເປັນຕົ້ນໃຫ້ອຳນາດການປົກຄອງ ເມືອງຊຽງເງິນເອົາໃຈໃສ່ສົ່ງເສີມການສ້າງວຽກເຮັດໃຫ້ຊາວບ້ານເປັນຕົ້ນການປູກຝັງ-ລ້ຽງສັດໃຫ້ເປັນສີນຄ້າ, ສືບຕໍ່ປົກປັກຮັກສາ ແລະ ປັບປຸງພື້ນຖານໂຄງລ່າງຕ່າງ ໆ ທີ່ລັດຖະບານຈີນໄດ້ກໍ່ສ້າງໃຫ້.

ສໍາລັບບ້ານຈັດສັນບວມອໍ້ປະກອບດ້ວຍເຮືອນທີ່ຖືກສ້າງຂື້ນໃໝ່ທັງໝົດ 107 ຫຼັງ. ໃນນີ້ມີຫ້ອງການບ້ານ 1 ຫຼັງ, ໂຮງຮຽນອະນຸບານ ແລະ ປະຖົມ, ສຸກສາລາ, ຫ້ອງນໍ້າສາທາລະນະ, ເດີ່ນກິດຈະກຳ, ສະຖານທີ່ເກັບມ້ຽນຂີ້ເຫຍື້ອ, ລະບົບໄຟຟ້າ, ລະບົບນໍ້າລິນ ແຕ່ກໍ່ຍັງບໍ່ພຽງພໍຕໍ່ຄວາມຕ້ອງການຂອງຊາວບ້ານ.  ນອກຈາກບ້ານຈັດສັນບວມອໍ້ແລ້ວກໍຍັງມີບ້ານຈັດສັນທີ່ຖືກກໍ່ສ້າງໃຫ້ຊາວບ້ານທີ່ໄດ້ຮັບຜົນກະທົບຈາກໂຄງການກໍ່ສ້າງທາງລົດໄຟລາວ-ຈີນອີກ 3 ແຫ່ງປະກອບດ້ວຍ ບ້ານຈັດສັນນາຄົກ ເມືອງງາ ແຂວງອຸດົມໄຊຈຳນວນ 23 ຫຼັງ, ບ້ານຈັດສັນນາໝໍ້ ເມືອງນາໝໍ້ ແຂວງອຸດົມໄຊ ຈຳນວນ 60 ຫຼັງ ແລະ ບ້ານຈັດສັນນາເຕີຍ ແຂວງຫຼວງນໍ້າທາຈຳນວນ 159 ຫຼັງ.