ຄົນງານ ຂາດລາຍໄດ້, ວ່າງງານ

ຄົນງານລາວ ທີ່ເຮັດວຽກໃນໂຮງງານຫຼາຍແຫ່ງ ຢູ່ນະຄອນຫຼວງວຽງຈັນ ປະສົບກັບບັນຫາຂາດລາຍໄດ້ ແລະ ຈຳນວນນຶ່ງ ວ່າງງານ ໃນໄລຍະລ໊ອກດາວນະຄອນຫຼວງວຽງຈັນ ຢ່າງເຂັ້ມງວດ ເຊິ່ງເຮັດໃຫ້ຄົນງານຫຼາຍຄົນ ຖືກນາຍຈ້າງສັ່ງໃຫ້ພັກວຽກ ເປັນການຊົ່ວຄາວ ເນື່ອງຈາກໂຮງງານຖືກສັ່ງປິດ. ດັ່ງຄົນງານໂຮງງານຕັດຫຍິບ ຢູ່ເມືອງໄຊເສດຖາ ນະຄອນຫຼວງວຽງຈັນ ໄດ້ກ່າວຕໍ່ວິທຍຸເອເຊັຽເສຣີ ເມື່ອວັນທີ 21 ກັນຍາ 2021 ນີ້ວ່າ:

"ກໍຍ້ອນເຂົາບໍ່ໄດ້ຈ່າຍຄ່າແຮງງານ ພັກວຽກແລ້ວ ກໍເຂົາກໍບໍ່ໄດ້ຈ່າຍ ເຮັດວຽກມື້ໃດ ກໍຕ້ອງໄດ້ຈ່າຍມື້ນັ້ນ ກໍຮັບເປັນມື້ ມື້ລະ 40 ພັນ ປາຍກີບ ເຮົາເຮັດວຽກມື້ໃດເຂົາກໍຕ້ອງຈ່າຍມື້ນັ້ນ ຄັນເຮົາບໍ່ໄດ້ເຮັດວຽກ ເຂົາກໍບໍ່ໄດ້ຈ່າຍປີກາຍ ເຂົາກໍບໍ່ໄດ້ຈ່າຍໃຫ້ເຮົາ.”

ໂຮງງານຕັດຫຍິບ ຢູ່ເມືອງໄຊທານີ ບາງແຫ່ງ ຄົນງານຕັດຫຍິບ ປະມານ 1,800 ຄົນ ແລະ ໄດ້ຮັບຄ່າແຮງງານ ປະມານເດືອນລະ 1.5 ລ້ານກີບຕໍ່ເດືອນ. ປັດຈຸບັນທາງໂຮງງານ ຍັງບໍ່ມີນະໂຍບາຍຫຼຸດຄ່າແຮງງານ ແລະ ຈຳນວນຄົນງານຕັດຫຍິບເທື່ອ ອີກທັງຍັງ ຈ່າຍຄ່າຈ້າງແຮງງານ ໃຫ້ແກ່ຄົນງານເປັນຈຳນວນ 50% ຂອງຄ່າຈ້າງແຮງງານແຕ່ລະຄົນໄດ້ຮັບຕໍ່ເດືອນ ເຖິງແມ່ນວ່າພວກເຂົາເຈົ້າ ບໍ່ໄດ້ເຮັດວຽກໃນໄລະຍະລ໊ອກດາວ. ດັ່ງທາງດ້ານພະນັກງານ ປະຈຳໂຮງງານຕັດຫຍິບ ຢູ່ເມືອງ ໄຊທານີ ນະຄອນຫຼວງວຽງຈັນ ໄດ້ ກ່າວໃນວັນທີ 21 ກັນຍາວ່າ:

"ນີ້ເຂົາເຈົ້າລ໊ອກດາວແຕ່ລະບ້ານ ມັນກໍຣົດຮັບສົ່ງມັນມາບໍ່ໄດ້ ຢ່າງວ່າກໍໄດ້ພັກ ປະກາດພັກໃຫ້ເຂົາເຈົ້າຫັ້ນແຫຼະ ຄັນມາ ມັນກາຈະ ບໍ່ມີບັນຫາ ກໍຢ້ານແນ່ຫັ້ນນ່າ ໂຄວິດມັນມາຣະບາດແນ່ ເຮົາກໍຢ້ານໂຕນີ້ແນ່ ມັນກໍຊິມີຄືກັນໃນການຈ່າຍໃຫ້ກັນ ມີແຕ່ລະເທື່ອ ກໍໄດ້ ຈ່າຍໃຫ້ກັນ 50% ຢູ່ປະມານນີ້ແຫຼະ ກໍໃຫ້ຫຼາຍບໍ່ໄດ້ດອກ ເພາະວ່າມັນຂຶ້ນຢູ່ກັບເງິນເດືອນພື້ນຖານຂອງເຂົາເຈົ້າຄືກັນ.”

ໂຮງງານຕັດຫຍິບ ຢູ່ເມືອງສີໂຄດຕະບອງບາງແຫ່ງ ມີຄົນງານຕັດຫຍິບ ປະມານ 1,000 ປາຍຄົນ ແລະໄດ້ຮັບຄ່າແຮງງານປະມານ ເດືອນລະ 1.1 ລ້ານກີບຕໍ່ເດືອນ ເຖິງແມ່ນວ່າຄົນງານ ຈະບໍ່ໄດ້ເຮັດວຽກໃນໄລຍະລ໊ອກດາວ ແຕ່ທາງໂຮງງານຂອງທ່ານ ກໍຍັງຄົງ ຈ່າຍຄ່າຈ້າງແຮງງານ ສະເພາະ ເດືອນກັນຍາ ນີ້ ເຕັມຈຳນວນ. ດັ່ງພະນັກງານ ປະຈຳໂຮງງານຕັດເກີບ ເມືອງ ສີໂຄດຕະບອງ ນະຄອນຫຼວງວຽງຈັນ ໄດ້ກ່າວວ່າ:

"ຕອນນີ້ຄື 14 ວັນ ແຕ່ບໍ່ແນ່ໃຈວ່າ ຖ້າຮອດ 14 ວັນແລ້ວ ຈະມີຕໍ່ອີກບໍ່ນີ້ນ່າ ຕອນນີ້ ຄືສັ່ງໃຫ້ຢຸດພັກກ່ອນ 14 ວັນ ຄືເດືອນນີ້ ເຮົາຈະຈ່າຍປົກກະຕິ ຄືເງິນເດືອນຂອງເດືອນນີ້ ເຮົາຈະຈ່າຍປົກກະຕິ ແຕ່ວ່າເດືອນຕໍ່ໄປ ເຮົາຍັງບໍ່ແນ່ ວ່ານາຍເພິ່ນຈະສັ່ງໃຫ້ຈ່າຍ ພະນັກງານແບບໃດ ຄືທີ່ຜ່ານມາ ຖ້າພະນັກງານເຮັດງານເຕັມເດືອນ ຂະເຈົ້າກໍໄດ້ຕາມທີ່ຂະເຈົ້າເຮັດງານສິນ່າ.”

ໃນໄລຍະລ໊ອກດາວ ຫົວໜ່ວຍໂຮງງານ ຈະຕ້ອງຈ່າຍຄ່າຊົດເຊີຍ ໃຫ້ກັບຄົນງານ ເປັນຈຳນວນ 50% ຂອງຄ່າຈ້າງແຮງງານ. ແຕ່ ຢ່າງໃດກໍຕາມ ທາງໜ່ວຍງານຂອງທ່ານ ກໍຈະ ເລັ່ງລົງພື້ນທີ່ ກວດກາຫົວໜ່ວຍໂຮງງານ ທີ່ບໍ່ຈ່າຍເງິນຄ່າຊົດເຊີຍ ໃນໄລຍະການ ລ໊ອກດາວຕື່ມ. ດັ່ງເຈົ້າໜ້າທີ່ຜແນກພັທນາສີມືແຮງງານ ແລະ ການຈັດຫາງານ ກະຊວງແຮງງານ ແລະ ສວັດດີການສັງຄົມ ຜູ້ບໍ່ ປະສົງອອກຊື່ ແລະ ຕຳແໜ່ງໄດ້ກ່າວວ່າ:

"ຈ່າຍໆ ຕ້ອງຈ່າຍຢູ່ໃນຫັ້ນນ່າບໍ່ໃຫ້ຫຼຸດ 50% ຂອງເງິນເດືອນພື້ນຫັ້ນ ຕາມແຈ້ງການກະຊວງແຮງງານ ຫົວໜ່ວຍທີ່ວ່າ ບໍ່ຈ່າຍເງິນ ເດືອນຕໍ່າກວ່າ 50 ດຽວນີ້ ໃນໄລຍະທີ່ພວກເຮົາລ໊ອກດາວນີ້ ເຮົາບໍ່ສາມາດທີ່ຈະລົງກວດກາໄດ້ເນາະ. ປົກກະຕິພວກເຮົາຈະຕ້ອງໄດ້ ລົງກວດກາ ທີ່ບັນດາຫົວໜ່ວຍ ເຣື່ອງການຈ່າຍເງິນເດືອນເນາະ. ເຣື່ອງຫັ້ນນ່າ ການປະກັນສັງຄົມ ເຣື່ອງການອຳນວຍຄວາມ ສະ ດວກຕ່າງໆຫັ້ນແຫຼະ ແຕ່ວ່າໄລຍະນີ້ ພວກເຮົາລົງກວດບໍ່ໄດ້ເນາະ.”

ໃນຂນະທີ່ປະຊາຊົນ ກໍພຍາຍາມຊອກວຽກເຮັດ ເປັນກັມມະກອນຢູ່ໂຮງງານຕັດຫຍິບ ແຕ່ປັດຈຸບັນກໍຍັງບໍ່ມີວຽກເຮັດ ເມື່ອເກີດເຫດ ການແຜ່ຣະບາດຂອງໂຄວິດ-19 ແລະ ທາງການ ອອກມາຕການລ໊ອກດາວ ນະຄອນຫຼວງວຽງຈັນ ກໍເຮັດໃຫ້ລາວ ມີຄວາມຮູ້ສຶກວ່າ ໂອກາດທີ່ຈະໄດ້ວຽກເຮັດ ມີຄວາມຫຍຸ້ງຍາກຂຶ້ນກວ່າເກົ່າ. ດັ່ງຊາວບ້ານ ເມືອງໄຊເສດຖາ ນະຄອນຫຼວງວຽງຈັນ ໄດ້ກ່າວໃນວັນທີ 21 ກັນຍາວ່າ:

"ພັກວຽກນະເຈົ້າ ພັກຍາວເລີຍເຈົ້າ ໂຄວິດເດ້ ແລ້ວບໍ່ໄດ້ມີການເຮັດວຽກ ເຮັດງານກໍຢາກເຮັດວຽກຢູ່ ແຕ່ວ່າ ກັກໂຕຢູ່ແຕ່ບ້ານ ກໍໄປ ໃສມາໃສບໍ່ໄດ້ເຈົ້າ ແຕ່ຫັ້ນນີ້ກໍຢູ່ແຕ່ເຮືອນ.”

ກ່ອນໜ້ານີ້ວັນທີ 18 ກັນຍາ 2021 ທາງການລາວໄດ້ກວດພົບຜູ້ຕິດເຊື້ອໂຄວິດ-19 ເຊິ່ງເປັນຄົນງານທີ່ເຮັດວຽກຢູ່ໂຮງງານຕັດຫຍິບ ອານປີລາວ ຢູ່ບ້ານໜອງທາເໜືອ ເມືອງຈັນທະບູລີ ນະຄອນຫຼວງວຽງຈັນ ຈຳນວນ 247 ຄົນ ດ້ວຍເຫດນີ້ ເຮັດໃຫ້ຄະນະສະເພາະ ກິຈ ແລະ ນະຄອນຫຼວງວຽງຈັນ ອອກຄຳສັ່ງ ໃຫ້ໂຮງງານທົ່ວນະຄອນຫຼວງວຽງຈັນ ປິດການດຳເນີນການຊົ່ວຄາວ ເປັນໄລຍະ 12 ວັນ ລະຫວ່າງວັນ ວັນທີ 19-30 ກັນຍາ 2021 ອີງຕາມມາຕການຄວບຄຸມໂຄວິດ-19 ຂອງນະຄອນຫຼວງວຽງຈັນ.