ທນາຄານໂລກປະຈໍາລາວ ວ່າເສຖກິຈລາວ ຈະ ຟື້ນໂຕ

ທນາຄານໂລກ ປະຈຳປະເທດລາວ ໄດ້ປະເມີນວ່າ ເສຖກິຈລາວ ຈະຟື້ນໂຕຂຶ້ນ ໃນປີ 2021 ນີ້, ເຊິ່ງລວມຍອດມູລຄ່າຜລິຕພັນ ພາຍໃນ ຫຼື GDP ຈະຂຍາຍໂຕຂຶ້ນເປັນ 4.9% ຈາກທີ່ຕິດລົບ 0.6% ໃນປີທີ່ຜ່ານມາ ໃນເງື່ອນໄຂທີ່ວ່າ ຖ້າຫາກຣັຖບານລາວ ສາມາດຄວບຄຸມຜົລກະທົບ ການຣະບາດ ຂອງໂຄວິດ-19 ໄດ້ ລວມເຖິງເປີດການຄ້າກັບປະເທດຄູ່ຄ້າ ຄືນສູ່ສະພາບປົກກະຕິ.

ກ່ຽວກັບເຣື່ອງນີ້, ເຈົ້າໜ້າທີ່ ກະຊວງແຜນການ ແລະ ການລົງທຶນ ທ່ານນຶ່ງ ກ່າວຕໍ່ຜູ້ສື່ຂ່າວ ວິທຍຸເອເຊັຽເສຣີ ໃນມື້ວັນທີ 14 ມົກກະຣາ ນີ້ວ່າ ຫາກຣັຖບານລາວ ສາມາດຄວບຄຸມ ການຣະບາດ ຂອງໂຄວິດ-19 ໄດ້ ຕາມທີ່ທນາຄານໂລກປະເມີນ ກໍອາຈເຮັດໃຫ້ ເສຖກິຈຟື້ນໂຕໄດ້ດີຂຶ້ນຕື່ມ, ແຕ່ກໍເວົ້າໄດ້ຍາກ ເນື່ອງຈາກວ່າ ຣັຖບານລາວ ກັງວົນເຣື່ອງການ ລັກລອບ ຂ້າມຊາຍແດນ ຂອງຄົນງານລາວ ໃນໄລຍະນີ້, ໂດຍສະເພາະຂ້າມມາຈາກໄທຍ, ເຊິ່ງໂຄວິດ-19 ພວມຣະບາດ ຢ່າງໜັກ ໃນຕອນນີ້.

“ໂຕນີ້ກະຍັງບໍ່ປານໃດແຫຼະ ເພາະວ່າກະຍັງແບບ ເປັນຫ່ວງຫັ້ນເນາະ, ໂດຍສະເພາະແມ່ນທາງດ້ານຊາຍແດນ. ໂດຍຢູ່ແຂວງຕ່າງໆ ເຂົາເຈົ້າກໍພວມເພີ່ມມາຕການ ເຂັ້ມຂົ້ນຫຼາຍຂຶ້ນ, ຫັ້ນນ່າ. ສົມມຸດຢູ່ນະຄອນຫຼວງ ກະເຝົ້າຣະວັງຫັ້ນແຫຼະ. ຊິວ່າໃຄ ກະບໍ່ໃຄ, ຊິວ່າບໍ່ໃຄ ກະຄືວ່າມັນຫາກຜ່ອນຄາຍລົງ, ມັນກະບໍ່ໄດ້ຕຶງຄຽດຫຼາຍປານໃດ ຄືແຕ່ກ່ອນແລ້ວ, ຫັ້ນນ່າ.”

ທ່ານກ່າວຕື່ມວ່າ ມາຮອດປັດຈຸບັນ, ຫຼາຍພາກສ່ວນທຸຣະກິຈ ກໍເຣີ່ມມາເຄື່ອນໄຫວຽກງານ ໄດ້ສ່ວນນຶ່ງແລ້ວ ສົ່ງຜົລໃຫ້ ສະພາບເສຖກິຈພາຍໃນ ເຣີ່ມຜ່ອນຄາຍຂຶ້ນ, ແຕ່ຍັງບໍ່ເຖິງຂັ້ນ ກັບມາເປັນປົກກະຕິ, ໂດຍສະເພາະພາກການທ່ອງທ່ຽວ ທຸຣະກິຈໂຮງແຮມ ແລະ ການບໍຣິການ ທີ່ຕິດພັນກັບ ຄົນຕ່າງປະເທດ ຍັງຟື້ນໂຕໄດ້ຍາກ ຍ້ອນບໍ່ມີ ນັກທ່ອງທ່ຽວພາຍນອກ ສາມາດເດີນທາງເຂົ້າມາໄດ້.

ຂະນະທີ່ຜູ້ປະກອບການໂຮງແຮມ ໃນນະຄອນຫຼວງວຽງຈັນ ທ່ານນຶ່ງ ກ່າວຕໍ່ຜູ້ສື່ຂ່າວ ວິທຍຸເອເຊັຽເສຣີ ໃນມື້ດຽວກັນນີ້ວ່າ ທຸຣະກິຈໂຮງແຮມ ໃນພື້ນທີ່ແຄມຂອງ ໃຈກາງນະຄອນຫຼວງວຽງຈັນ ຖືວ່າຟື້ນໂຕລຳບາກ ແລະ ຍັງຫຍຸ້ງຍາກສົມຄວນ ຫາກທາງການລາວ ຍັງບໍ່ເປີດຊາຍແດນ ໃຫ້ນັກທ່ອງທ່ຽວໄປມາ ແບບປົກກະຕິ.

“ກະບໍ່ປານໃດແຫຼະເນາະ, ບໍ່ມີຄົນເຂົ້າມາເນາະ. ພຸ້ນແລ້ວ ຮອດຈົນເປີດດ່ານພຸ້ນແຫຼະ. ສ່ວນຫຼາຍ ແຄມຂອງນີ້ ມັນກະຕ້ອງອາສັຍ ແຕ່ຄົນຕ່າງປະເທດນ່າ, ແຕ່ກະແຖວໆນີ້ ເຂົາກະເປີດຢູ່, ບາງໂຮງແຮມກະປິດ, ຫຼາຍຢູ່.”

ແມ່ຄ້າໃນຕລາດສົດ ໃນນະຄອນຫຼວງພຣະບາງ ນາງນຶ່ງ ກ່າວຕໍ່ຜູ້ສື່ຂ່າວ ວິທຍຸເອເຊັຽເສຣີ ໃນມື້ດຽວກັນນີ້ວ່າ ບັນຍາກາດ ການທ່ອງທ່ຽວ, ການຄ້າຂາຍ ແລະ ການຂາຍສິນຄ້າ ໃນຕລາດສົດ ຍັງສືບຕໍ່ງຽບເຫງົາ ບໍ່ມີຄົນມາຍ່າງຊື້ເຄື່ອງ ຄືແຕ່ກ່ອນ ເພາະຊາວບ້ານ ຍັງພາກັນກັງວົນ ເຣື່ອງຕິດໂຄວິດ-19.

“ຍາມນີ້ງຽບ, ຄົນໄປຄົນມາ ກະບໍ່ສູ້ມີ, ຕລາດກະຄົນໜ້ອຍໆດຽວ. ຂໍ້ມູນຂ່າວສານ ເຂົ້າຮອດເຖິງ ເຂົາເຈົ້າລະວ່າ ອັນຕະລາຍ, ເຂົາເຈົ້າລະຢ້ານ ບໍ່ກ້າໄປ.”

ຜູ້ປະກອບການ ແລ່ນຣົດໂດຍສານທ່ອງທ່ຽວ ນະຄອນຫຼວງວຽງຈັນ ກ່າວຕໍ່ຜູ້ສື່ຂ່າວ ວິທຍຸເອເຊັຽເສຣີ ໃນມື້ດຽວກັນນີ້ວ່າ ໃນໄລຍະຜ່ານມາ ປະເທດລາວ ຍັງຕ້ອງເພິ່ງພາຣາຍໄດ້ ຈາກຄົນຕ່າງປະເທດ ທີ່ເຂົ້າມາທ່ອງທ່ຽວ, ໂດຍສະເພາະ ກຸ່ມຄົນໄທຍ, ເຊິ່ງເປັນລູກຄ້າຫຼັກ. ເມື່ອປິດປະເທດ ກໍເຮັດໃຫ້ບໍ່ມີຣາຍໄດ້ເລີຍ.

“ທຸຣະກິຈໂຮງແຮມ, ທ່ອງທ່ຽວນີ້ ຖືວ່າຍັງຢຸດຢູ່ ຍັງບໍ່ທັນດຳເນີນໄດ້ ເພາະວ່ານັກທ່ອງທ່ຽວບໍ່ເຂົ້າ, ຍົນ ສາຍການບິນ ບໍ່ເປີດເດ. ລຸ້ນນຳເມືອງໄທຍເຮົາຢູ່, ຖ້າວ່າໄທຍນີ້ ບໍ່ມີຜູ້ຕິດເຊື້ອ ລະສາມາດເປີດດ່ານ ຮ່ວມລາວ-ໄທຍ. ປະເທດເຮົາ OK ແລ້ວ.”

ຜູ້ປະກອບການ ທຸຣະກິຈທ່ອງທ່ຽວ ແລະ ການບໍຣິການ ນະຄອນຫຼວງວຽງຈັນ ກ່າວຕໍ່ຜູ້ສື່ຂ່າວ ວິທຍຸເອເຊັຽເສຣີ ໃນມື້ດຽວກັນນີ້ວ່າ ຫາກທາງການລາວ ຄວບຄຸມໂຄວິດ-19 ພາຍໃນປະເທດໄດ້ ກໍເຊື່ອໝັ້ນວ່າ ຜູ້ປະກອບການ ທຸຣະກິຈພາຍໃນປະເທດ, ໂດຍສະເພາະ ພາກການທ່ອງທ່ຽວ ຈະມີໂອກາດຟື້ນໂຕໄດ້ ຢ່າງແນ່ນອນ.

“ຜູ້ໄດ້ຮັບຜົລກະທົບ ຈາກໂຄວິດ, ແຕ່ມັນກະມີໂອກາດ ແລະ ຜົລກະທົບເຊັ່ນດຽວກັນ. ຖ້າສະຖານະການ ມັນດີຂຶ້ນນີ້, ທ່ອງທ່ຽວນີ້ ມັນກະເປັນອີກໂອກາດນຶ່ງ ເຊັ່ນດຽວກັນ ທີ່ຈະໄດ້ຮັບການຟື້ນຟູ. ໃຫ້ມັນຟື້ນຟູໄວໆຫັ້ນແຫຼະ ເພື່ອວ່າພວກເຮົາ ກະຈະໄດ້ກ້າວໄປ ພ້ອມກັນ ອີກເທື່ອນຶ່ງ.”

ຂະນະທີ່ ເຈົ້າໜ້າທີ່ ຈາກສະຖາບັນຄົ້ນຄວ້າ ເສຖກິຈແຫ່ງຊາຕລາວ ທ່ານນຶ່ງ ທີ່ບໍ່ປະສົງອອກຊື່ ແລະ ສຽງ ໃຫ້ຄວາມເຫັນ ຕໍ່ຜູ້ສື່ຂ່າວ ວິທຍຸເອເຊັຽເສຣີ ໃນມື້ດຽວກັນນີ້ວ່າ ພາຍໃຕ້ເງື່ອນໄຂ ທີ່ທນາຄານໂລກ ໄດ້ກຳນົດວ່າ ຣັຖບານລາວ ຕ້ອງຄວບຄຸມ ການຣະບາດ ຂອງໂຄວິດ-19 ພາຍໃນປະເທດ ໃຫ້ໄດ້ຕໍ່ເນື່ອງ ຈຶ່ງຈະເຮັດໃຫ້ເສຖກິຈ ສາມາດຟື້ນໂຕໄດ້ນັ້ນ, ຣັຖບານລາວເອງ ກໍຕ້ອງເອົາໃຈໃສ່ ອອກນະໂຍບາຍ ທີ່ເປັນຮູບປະທັມ ແລະ ໜ້າເຊື່ອຖື ເພື່ອສົ່ງເສີມພາກທຸຣະກິຈ.

ທ່ານວ່າ: “ສຳລັບພາກຣັຖນີ້ ຕ້ອງເນັ້ນໃສ່ເຣື່ອງ ນະໂຍບາຍສົ່ງເສີມ ເຂົ້າໄປຊ່ອຍ ພາກທຸຣະກິຈ, ໂດຍສະເພາະດຽວນີ້ ຕ້ອງຮູ້ວ່າ ມັນມີຈັກບໍຣິສັດແທ້ ຈັກຫົວໜ່ວຍແທ້ ທີ່ອາຈລົ້ມລະລາຍ ຫຼືພົບຄວາມຫຍຸ້ງຍາກ ຕ້ອງໄດ້ເຂົ້າໄປຊ່ອຍເຂົາເຈົ້າໂດຍຕຣົງ. ຕໍ່ມາ, ກໍຊ່ອຍກຸ່ມຄົນງານ ທີ່ມີສີມືແຮງງານ ທີ່ບໍ່ມີວຽກເຮັດ ວ່າຊິຈັດສັນວຽກງານ ໃຫ້ເຂົາເຈົ້າແນວໃດ?”

ບົດຣາຍງານ ຂອງທນາຄານໂລກ ປະຈຳປະເທດລາວ ທີ່ເຜີຍແຜ່ ເມື່ອວັນທີ 12 ມົກກະຣາ 2021 ນັ້ນ, ຍັງຣະບຸອີກວ່າ ການຣະບາດ ຂອງໂຄວິດ-19 ໄດ້ສົ່ງຜົລກະທົບ ອັນໃຫຍ່ຫຼວງ ຕໍ່ການຂຍາຍໂຕ ດ້ານເສຖກິຈ ໃນທົ່ວປະເທດລາວ, ເຮັດໃຫ້ຣັຖບານລາວ ພົບຄວາມຫຍຸ້ງຍາກ ໃນການເກັບຣາຍຮັບ ເຂົ້າສູ່ງົບປະມານ ແລະ ປະຊາຊົນ ປະສົບກັບ ພັຍເງິນເຟີ້ ຫຼືລາຄາສິນຄ້າແພງຂຶ້ນ.

ນອກຈາກນີ້, ທນາຄານໂລກ ກໍໄດ້ແນະນຳ ໃຫ້ຣັຖບານລາວ ອອກນະໂຍບາຍຫຼາຍຢ່າງ ເພື່ອກະຕຸ້ນ ເສຖກິຈລາວ, ເປັນຕົ້ນແມ່ນ ການຫຼຸດຜ່ອນ ໜີ້ສິນຕ່າງປະເທດ, ປັບປຸງການເກັບຣາຍຮັບ ແລະ ຮັບປະກັນ ບໍ່ໃຫ້ຮົ່ວໄຫຼ, ແລະ ສນອງການຊ່ອຍເຫຼືອ ທຸຣະກິຈ ຂນາດນ້ອຍ ທີ່ໄດ້ຮັບຜົລກະທົບ ຈາກໂຄວິດ-19.