ຊາວບ້ານນໍ້າຮຸ່ງຈະໄດ້ຄ່າ ຊົດເຊີຍ

ໄຊຍາ
2019-04-17
ອີແມວລ໌
ຄໍາເຫັນ
Share
ພິມ
ຂົວນໍ້າຮຸ່ງ ກໍາລັງກໍ່ສ້າງ ຫາກໍ່ຕັ້ງເສົາ ແລະ ໄດ້ດໍາເດີນວຽກງານໄປແລ້ວ ປະມານ 6 ເປີເຊັນ
ຂົວນໍ້າຮຸ່ງ ກໍາລັງກໍ່ສ້າງ ຫາກໍ່ຕັ້ງເສົາ ແລະ ໄດ້ດໍາເດີນວຽກງານໄປແລ້ວ ປະມານ 6 ເປີເຊັນ
ຮູບພາບຈາກ : ນັກຂ່າວພົລເມືອງ

ທາງການລາວ ຈະຈ່າຍເງິນຊົດເຊີຍ ມຸູນຄ່າ 317 ລ້ານກີບ ໃຫ້ປະຊາຊົນ ທ່ີຈຳເປັນຕ້ອງມ້າງເຮືອນ 5 ຫຼັງເພື່ອໂຄງການສ້າງຂົວຂ້າມ ນໍ້າຮຸ່ງ ຢູ່ບ້ານທ່ານາ ເມືອງແລະ ແຂວງໄຊຍະບູລີ ພາຍໃນ ອາທິດໜ້ານີ້ ເພື່ອໃຫ້ພວກເຂົາເຈົ້າ ໄປຊື້ວັດຖຸ ແລະອຸປກອນເພື່ອກໍ່ສ້າງ ເຮືອນໃໝ່. ອີງຕາມຄຳເວົ້າຂອງເຈົ້າໜ້າທີ່ ແຂວງໄຊຍະບູລີ ເຈົ້າໜ້າທີ່ທ່ານນັ້ນ ໃຫ້ຣາຍລະອຽດກັບ ວິທຍຸເອເຊັຽເສຣີ ຕື່ມ ໃນວັນທີ 17 ເມສາ 2019 ນີ້ວ່າ:

"ຜູ້ທີ່ຖືກຜົລກະທົບນີ້ມັນກໍມີຄອບຄົວ ທີ່ໄດ້ມ້າງເຮືອນພຽງແຕ່ 5 ຄອບຄົວທີ່ໄທເຮົາ ຈະຕ້ອງໄດ້ຊົດເຊີຍຂະເຈົ້າໃນມູນຄ່າ 317 ລ້ານກີບ ເພິ່ນຫາກໍ່ອອກຂໍ້ຕົກລົງກັນ ມາອາທິດແລ້ວນີ້ແລ້ວເບື້ອງ ອາທິດສິມານີ້ ແລ້ວປີໃໝ່ນີ້ສິໄດ້ເອົາໄປ ທົດແທນຂະເຈົ້າຜູ້ນຶ່ງ ຖືກເທົ່າໃດກໍ ເອົາເງິນນັ້ນ ມອບໃຫ້ເຂົາ ທີ່ດິນນັ້ນທາງການເຮົາຈະໄປຊອກໃຫ້ ເຂົາໃໝ່ທີ່ດິນມີແລ້ວ."

ທ່ານກ່າວຕື່ມວ່າສຳລັບຊາວບ້ານ ບ້ານນາຍາວແລະບ້ານນາຕໍໃຫຍ່ 20 ປາຍຄອບຄົວ ທີ່ສູນເສັຽດິນ ກະສິກັມ 4 ເຮັກຕ້າ ໃຫ້ແກ່ໂຄງການ ເພື່ອສ້າງທາງຣົດແລ່ນໄປຫາຂົວ ຈະໄດ້ຮັບຄ່າຊົດເຊີຍ ເປັນທີ່ດິນ. ທາງການລາວ ຈະຈັດທີ່ດິນຢູ່ຫົວບ້ານ ແລະອອກໃບຕາດິນໃຫ້ຊາວບ້ານ ຫລັງຈາກສ້າງຂົວນໍ້າຮຸ່ງແລ້ວ.

ເຈົ້າໜ້າທີ່ແຂວງໄຊຍະບູລີ ອະທິບາຍວ່າທາງການບໍ່ໄດ້ ໃຫ້ຄ່າຊົດເຊີຍແກ່ຊາວບ້ານທັງໝົດ 30 ຄອບຄົວ ແຕ່ເດືອນພຶສພາ ປີ 2018 ເປັນຕົ້ນມາ ເພາະຕ້ອງໃຊ້ເວລາຄິດໄລ່ ຜົລເສັຽຫາຍຢ່າງ ຣະອຽດ ແຕ່ມາຮອດປັດຈຸບັນ ໄດ້ຂໍ້ຕົກລົງແລ້ວ:

"ລະຍະຜ່ານມານັ້ນແມ່ນຍັງບໍ່ທັນໄດ້ຊ່ອຍເຫລືອຂະເຈົ້າ ແຕ່ມາຮອດມື້ນີ້ເພິ່ນໄດ້ມີຂໍ້ຕົກລົງ ວ່າຊິຊ່ອຍເຫລືອຜູ້ຖືກຜົລກະທົບ ເປັນຕົ້ນແມ່ນ ຢູ່ບ້ານທ່ານາ ນີ້ແຫລະ ແຕ່ວ່າລະຍະຜ່ານມາ ທາງເບື້ອງ ຣັຖ ໄທເຮົາກໍ່ຍັງຄິດໄລ່ຄ່າຊົດເຊີຍ ຄ່າອີຫຍັງຕ່າງໆ ຍັງບໍ່ທັນຣະອຽດ ມັນກໍ່ຫາສິລະອຽດວ່າຊັ້ນສະ ຫາສິໄດ້ຂໍ້ມູນສຸດທ້າຍ."

ປັດຈຸບັນການສ້າງຂົວຂ້າມນໍ້າຮຸ່ງສຳເຣັດໄປແລ້ວ ເກືອບ 6% ໂດຍທີ່ຣັຖບານລາວໄດ້ຢືມເງີນ ຈາກທະນາຄານປະເທສ ອອສເຕຣເລັຽ 6 ລ້ານ ຢູໂຣ ຫລື ປະມານ 70 ຕື້ກີບ.

ເຕັມຫນ້າ