ເມືອງຊຽງເງິນຮຽກຮ້ອງຄ່າ ຊົດເຊີຍ

ສຸພັດຕາ
2019-01-24
ອີແມວລ໌
ຄໍາເຫັນ
Share
ພິມ
ການກໍ່ສ້າງຂົວ ຂ້າມແມ່ນໍ້າຂອງ ຣະຫວ່າງ ນະຄອນຫຼວງພຣະບາງ ແລະ ເມືອງຈອມເພັດ ໃນໂຄງການ ທາງຣົດໄຟ ລາວ-ຈີນ
ການກໍ່ສ້າງຂົວ ຂ້າມແມ່ນໍ້າຂອງ ຣະຫວ່າງ ນະຄອນຫຼວງພຣະບາງ ແລະ ເມືອງຈອມເພັດ ໃນໂຄງການ ທາງຣົດໄຟ ລາວ-ຈີນ
RFA

ປັດຈຸບັນ ປະຊາຊົນເມືອງຊຽງເງິນ ແຂວງຫຼວງພຣະບາງ ຫຼາຍຄອບຄົວຮຽກຮ້ອງໃຫ້ໂຄງການສ້າງທາງຣົດໄຟລາວ-ຈີນ ເລັ່ງຈ່າຍຄ່າຊົດເຊີຍ ໃຫ້ແກ່ພວກຂະເຈົ້າ ຍ້ອນເສັຍທີ່ດິນປູກຝັງ ໃຫ້ໂຄງການໄປແລ້ວ ຈຶ່ງບໍ່ສາມາດປູກເຂົ້າແລະພຶດອື່ນໆໄດ້. ດັ່ງ ເຈົ້າໜ້າທີ່ທ້ອງຖິ່ນ ທ່ານນຶ່ງ ກ່າວຕໍ່ວິທຍຸເອເຊັຽເສຣີ ໃນວັນທີ 24 ມົກກະຣາ ນີ້ວ່າ:

“ກະບໍ່ເຂົ້າໃຈ ດຽວນີ້ລາວວ່າເດືອນນີ້ເດືອນໜ້າ ເດືອນໃໝ່ຢູ່ ເງິນຊົດເຊີຍຫັ້ນເດ້ ປະຊາຊົນລະວົນວາຍຢູ່ ເຂົາຢາກໄດ້ເງິນດຽວນີ້ ດິນຫັ້ນ ເຂົາດຸດ ເປັນທາງຣົດໄຟໄປແລ້ວ ດິນສວນໝາກນັດ ສວນກ້ວຍ ສວນອ້ອຍ ບໍ່ໄດ້ເຮັດນາ ກະບໍ່ມີເຂົ້າກິນໂອ໋ ດຽວນີ້ ເຮັດແນວໃດ.”

ທ່ານກ່າວຕື່ມວ່າເມື່ອປີກາຍ ເຈົ້າໜ້າທີ່ວິຊາການ ຂອງໂຄງການທາງຣົດໄຟ ໄດ້ລົງເອົາຂໍ້ມູນຄວາມເສັຍຫາຍ ຈາກປະຊາຊົນໄປຄິດໄລ່ເປັນ ມູນຄ່າ ທັງໝົດແລ້ວ ແຕ່ກໍເລື່ອນຈ່າຍຄ່າຊົດເຊີຍມາຕລອດ ເມື່ອຖາມໄປຮອດຫ້ອງການປົກຄອງ ເມືອງຊຽງເງິນ ກໍໄດ້ຮັບຄຳຕອບຈາກ ເຈົ້າໜ້າທີ່ກ່ຽວຂ້ອງ ວ່າຍັງບໍ່ທັນໄດ້ກຳນົດມື້ ຈ່າຍເງິນເທື່ອ ເຮັດໃຫ້ຊາວບ້ານ ທີ່ໄດ້ຮັບຜົນກະທົບ ມີຄວາມອຸກໃຈ.

ກ່ຽວກັບເຣື້ອງນີ້ ວິທຍຸເອເຊັຍເສຣີ ໄດ້ຕິດຕໍ່ໄປຍັງເຈົ້າໜ້າທີ່ ຄນະໄກ່ເກັ່ຽສິ່ງກີດຂວາງ ຂອງໂຄງການທາງຣົດໄຟລາວ-ຈີນ ປະຈຳເມືອງ ຊຽງເງິນ 3 ເທື່ອ ເພື່ອຂໍຮູ້ຄວາມຄືບໜ້າ ຂັ້ນຕອນການຈ່າຍຊົດເຊີຍ ແຕ່ທ່ານຍັງບໍ່ສະດວກໃຫ້ຄຳເຫັນໃດໆເທື່ອ.

ເມືອງຊຽງເງິນເປັນເມືອງນຶ່ງ ໃນແຂວງຫຼວງພຣະບາງ ທີ່ມີປະຊາຊົນໄດ້ຮັບຜົນກະທົບ ຈາກໂຄງການສ້າງທາງຣົດໄຟ ລາວ-ຈີນ ໂດຍບ້ານ ທີ່ໄດ້ຮັບ ຜົນກະທົບຫຼາຍທີ່ສຸດ ແມ່ນບ້ານບວມອໍ້ ມີຈຳນວນ 102 ຄອບຄົວ ຮອງມາແມ່ນບ້ານແອນສະຫວັນ ມີ 30 ຄອບຄົວ ສ່ວນບ້ານ ອື່ນໆ ອີກ 14 ບ້ານ ຍັງບໍ່ມີຂໍ້ມູນ ເມື່ອທ້າຍປີ 2017 ເຈົ້າໜ້າທີ່ເມືອງຊຽງເງິນ ໃຫ້ຂໍ້ມູນກັບວິທຍຸເອເຊັຍເສຣີວ່າ ສາເຫດທີ່ການຊົດເຊີຍ ໃຊ້ເວລາດົນນັ້ນ ຍ້ອນການວັດແທກ ແລວທາງຣົດໄຟໃນແຕ່ລະພື້ນທີ່ ກວມເອົາດິນປະຊາຊົນ ບໍ່ເທົ່າກັນ ເປັນຕົ້ນໃນບາງພື້ນທີ່ ກວມເອົາ ດິນເບື້ອງລະ 30 ແມັດ ແລະໃນບາງພື້ນທີ່ ກວມເອົາດິນເບື້ອງລະ 25 ແມັດ ຈຶ່ງເຮັດໃຫ້ມີຄວາມຫຼ້າຊ້າ ໃນການຄິດໄລ່ຄ່າເສັຍຫາຍນັ້ນ.

ເຕັມຫນ້າ