ແຂວງຢູນນານຂອງຈີນ ສເນີຊື້ງົວ ຈາກລາວ 23,000 ໂຕ ໃນປີນີ້

ທາງການ ແຂວງຢູນນານ ຂອງຈີນ ໄດ້ສເນີຊື້ງົວ ຈາກ ສປປ ລາວ ປະມານ 23,000 ໂຕ ໃນປີ 2023 ນີ້ ພາຍໃຕ້ ຂໍ້ລິເຣີ່ມ ນຶ່ງແລວນຶ່ງເສັ້ນທາງ (Belt and Road Initiatives) ຂອງຈີນ ຊຶ່ງໄດ້ເຣີ່ມປະຕິບັດມາ ແຕ່ທ້າຍເດືອນສິງຫາທີ່ຜ່ານມາ, ອິງຕາມການເປີດເຜີຍ ຂອງ ທ່ານ ອິນປົງ ອິນທະວົງ ຮອງຫົວໜ້າ ຜແນກຮ່ວມມືສາກົລ ກົມແຜນການ ແລະການຮ່ວມມື ກະຊວງກະສິກັມ ແລະປ່າໄມ້ ຂອງລາວ ເມື່ອບໍ່ດົນມານີ້.

ກ່ຽວກັບເຣື່ອງດັ່ງກ່າວນີ້, ວິທຍຸເອເຊັຽເສຣີ ໄດ້ຖາມຜູ້ລ້ຽງງົວ ນາງນຶ່ງ ຢູ່ແຂວງພາກເໜືອຂອງລາວ, ນາງເວົ້າວ່າ ຣັຖບານລາວ ຈະເປີດໃຫ້ຜູ້ລ້ຽງງົວ ປະມູນໂກຕ້າ ການສົ່ງງົວອອກໄປຈີນ ປະຈຳເດືອນກັນຍານີ້ ຈຳນວນ 3,000 ໂຕ.

ດັ່ງທີ່ນາງ ກ່າວໃນມື້ວັນທີ 19 ກັນຍານີ້ວ່າ:

“ຊ່ວງນີ້ເຂົາ ຈີນກຳລັງເປີດດ່ານຢູ່ ກຳລັງຊິວ່າຈະສົ່ງຢູ່ເຈົ້າ ທ້າຍເດືອນ 9 ນີ້. ຊ່ວງແລກໆ ນີ້ເຂົາເຈົ້າເປີດປະມານ 3,000 ໂຕນັ້ນແຫຼະເຈົ້າ. ໂຕນີ້ເປັນຂອງທົ່ວປະເທດລາວ. ງວດທຳອິດນີ້ 3,000 ໂຕ.”

ນາງກ່າວຕື່ມວ່າ ຈຳນວນງົວ ທີ່ຈະສົ່ງອອກໄປຈີນນັ້ນ ບໍ່ມີຫຼາຍພຽງພໍ ຍ້ອນນ້ຳໜັກງົວ ບໍ່ໄດ້ຕາມມາຕຖານ ດັ່ງນັ້ນ ຈຶ່ງຢາກໃຫ້ ພາກສ່ວນທີ່ກ່ຽວຂ້ອງ ສນັບສນູນ ດ້ານເງິນທຶນ ແລະເຕັກນິກວິຊາການ ເພື່ອພັທນາ ການລ້ຽງງົວ ຢູ່ລາວ ໃຫ້ມີຄຸນນະພາບ ແລະມີຈໍານວນຫຼາຍຂຶ້ນ.

ໃນທ້າຍເດືອນທັນວາ 2022, ທາງການຈີນ ໄດ້ປະກາດແຈ້ງການ ກ່ຽວກັບການນຳງົວ-ຄວາຍ ຈາກລາວເຂົ້າຈີນ ໂດຍມີ 12 ເງື່ອນໄຂ ເປັນຕົ້ນແມ່ນ ຕ້ອງມີນ້ຳໜັກໂຕນຶ່ງ 350 ກິໂລຂຶ້ນໄປ ແລະອາຍຸບໍ່ເກີນ 4 ປີ, ຕ້ອງມາຈາກພື້ນທີ່ ທີ່ປອດຈາກພະຍາດ ປາກເປື່ອຍລົງເລັບ, ຕ້ອງຖືກລ້ຽງໄວ້ ຢູ່ໃນເຂດທ້ອນໂຮມຢ່າງໜ້ອຍ 45 ມື້, ຕ້ອງມີການລ້ຽງແຍກເພດ ແລະພາຍໃນ 6 ເດືອນ ຕ້ອງກວດບໍ່ພົບ ເຊື້ອພະຍາດຊຶມເຊື້ອ ທຸກຊະນິດ, ຕ້ອງຂຶ້ນທະບຽນສັດ ກວດການຖືພາ, ສັກຢາກັນພະຍາດ 2 ເຂັມ, ເກັບໂຕຢ່າງ ແລະວິໄຈພະຍາດເປັນປະຈຳ, ຕິດຕາມການນຳໃຊ້ອາຫານ ແລະຢາປິ່ນປົວ, ຄວບຄຸມການເຄື່ອນຍ້າຍ ແລະການຂົນສົ່ງ ຕາມມາຕຖານສາກົລ ແລະຕ້ອງກັກສັດ 30 ມື້ ກ່ອນຈະສົ່ງໄປຈີນ.

ມາຕການທີ່ວ່ານັ້ນ ສ້າງຄວາມຫຍຸ້ງຍາກ ໃຫ້ແກ່ຜູ້ລ້ຽງງົວຂອງລາວ ທີ່ຕ້ອງໄດ້ແບກຮັບຕົ້ນທຶນການລ້ຽງຫຼາຍຂຶ້ນ. ດັ່ງນັ້ນ, ຈຶ່ງເປັນໂອກາດ ໃຫ້ບໍຣິສັດຈີນ ເຂົ້າມາລ້ຽງ ແບບເປັນອຸດສາຫະກັມ ຢູ່ລາວ ເປັນຕົ້ນແມ່ນ ບໍຣິສັດ ຮຸ້ຍຝູ ເຕັກໂນໂລຈີ-ຊີວະພາບ ຈຳກັດ ຂອງຈີນ ໄດ້ລົງນາມໃນບົດບັນທຶກຄວາມເຂົ້າໃຈກັນ ກັບກົມໃຫຍ່ ພະລາທິການ ກອງທັບປະຊາຊົນລາວ ເພື່ອຮ່ວມມືກັນໃນການສົ່ງງົວ ຈາກລາວໄປຈີນ.

ຜູ້ລ້ຽງງົວ ນາງນຶ່ງ ຢູ່ແຂວງພາກເຫນືອ ຂອງລາວ ເວົ້າວ່າ ນອກຈາກມາຕການ ທີ່ມີຄວາມຫຍຸ້ງຍາກ ຂອງຈີນແລ້ວ ກໍຍັງຕ້ອງໄດ້ເຮັດເອກະສານຢັ້ງຢືນງົວ ຍ້ອນທາງການລາວ ໄດ້ອອກແຈ້ງການ ຫ້າມນຳງົວຈາກໄທຍເຂົ້າມາ ເພື່ອສົ່ງອອກໄປຂາຍຢູ່ຈີນ.

“ເຈົ້າ! ຄວາມຕ້ອງການນີ້ມີຫຼາຍຢູ່ ແຕ່ວ່າດຽວນີ້ ເຣື່ອງການດຳເນີນເອກະສານຢູ່ເບື້ອງລາວນີ້ ມັນຫຍຸ້ງຍາກ ເພາະວ່າເຂົາມີແຈ້ງການໂຕນຶ່ງ ຂອງສຳນັກງານນາຍົກ ເຂົາບໍ່ໃຫ້ນຳເຂົ້າງົວຢູ່ໄທຍມາ. ມາປົນຢູ່ລາວ ແລ້ວສົ່ງອອກໄປຈີນນ່າເຈົ້າ. ເຈົ້າ, ເຂົາເຈົ້າບໍ່ຢາກໃຫ້ນຳເຂົ້າ ແບບນັ້ນ ເພາະວ່າເຮັດແບບນັ້ນມັນເປັນການທີ່ບໍ່ສົ່ງເສີມພາຍໃນເນາະ. ອັ່ນພາຍໃນລາວນີ້ ເຮົາຕ້ອງສົ່ງເສີມໃນການລ້ຽງງົວ ຢູ່ລາວ ແລ້ວ ເຮົາຈຶ່ງສາມາດສົ່ງອອກໄປຮັບໂກຕ້າ ເບື້ອງຈີນໄດ້ຫັ້ນນ່າ.”

ຜູ້ລ້ຽງງົວ ອີກຄົນນຶ່ງ ຢູ່ແຂວງພາກເໜືອຂອງລາວ ກໍເວົ້າວ່າ ການລ້ຽງງົວຂອງຊາວບ້ານ ຍັງມີບັນຫາຫຼາຍຢ່າງ ໂດຍສະເພາະ ຫຍ້າລ້ຽງງົວ ບໍ່ພຽງພໍ ເຮັດໃຫ້ງົວ ຈ່ອຍຜອມ ບໍ່ໄດ້ນ້ຳໜັກຕາມທີ່ທາງການຈີນກໍານົດ.

“ບັນຫາກໍຄື ຫຍ້າບໍ່ພໍກິນ ມັນກະມີຫຼາຍບັນຫາ ແຕ່ບັນຫາຫຼັກໆ ກໍຄືຫຍ້າບໍ່ພໍ. ໂອ້, ຫຼາຍເຕີບໄດ໋ ບ້ານເຮົານີ້ລ້ຽງ ເກືອບທຸກຄົວເຮືອນເລີຍ ກໍວ່າໄດ້ ສາຍພັນບ້ານເຮົາເອງ ງົວລາດທົ່ວໄປ ງົວລາດ.”

ທາງການຈີນ ໃຫ້ໂກຕ້າ ຮັບຊື້ງົວຈາກລາວ 500,000 ໂຕຕໍ່ປີ ມາແຕ່ປີ 2019, ແຕ່ທາງຝ່າຍລາວ ຍັງບໍ່ທັນປະຕິບັດໄດ້ ຍ້ອນການແຜ່ຣະບາດ ຂອງໂຄວິດ-19 ແລະພະຍາດຜິວໜັງອັກເສບ ຂອງງົວ-ຄວາຍ ໃນໄລຍະປີ 2019-2021 ທີ່ເຮັດໃຫ້ທາງການຈີນ ຢຸດຊື້ໃນໄລຍະນຶ່ງ ແລະຫຼຸດໂກຕ້າ ນຳເຂົ້າຍັງເຫຼືອພຽງ 50,000 ໂຕ ແລະບັນຫາງົວລາວຈ່ອຍຜອມ ຈຶ່ງສາມາດສົ່ງໄປຈີນໄດ້ພຽງ 8,100 ໂຕ ໃນປີ 2021.

ດຣ. ສ້ອຍຕາວັນ ມຽນມະນີ ນັກວິຊາການອິສຣະ ດ້ານຂແນງກະສິກັມ ແລະປ່າໄມ້ ແລະການພັທນາຊົນນະບົດ ໃຫ້ສັມພາດ ວິທຍຸເອເຊັຽເສຣີ ເມື່ອມໍ່ໆຜ່ານມານີ້ວ່າ ການປ່ຽນແປງຂອງສະພາບ ອາກາດ ໄພແຫ້ງແລ້ງ ໄດ້ສົ່ງຜົລກະທົບ ຕໍ່ການລ້ຽງງົວຢູ່ລາວ ຄືມີຫຍ້າກິນບໍ່ພຽງພໍ ແລະມີສະພາບຈ່ອຍຜອມ ເຮັດໃຫ້ຜູ້ລ້ຽງ ຂາຍງົວບໍ່ໄດ້ລາຄາ.

ດັ່ງທີ່ຍານາງກ່າວວ່າ:

“ແຫ້ງແລ້ງຫຼາຍ ຄືປີນີ້ ທັງຮ້ອນທັງຫຍັງຫຼາຍ. ຮູ້ບໍ່ວ່າ ຂຶ້ນໄປເໜືອ ຫຼືວ່າລົງໄປໃຕ້ ງົວເປັນຈັງໃດ໋ ຈ່ອຍຫຼາຍ ເຫັນແຕ່ກະດູກຂ້າງສວດເລີຍ. ເຮັດໃຫ້ຊາວສວນ ມາຄຶດເບຶ່ງວ່າ ໂອ້! ເຮົາລ້ຽງງົວນີ້ ກະຊິລອດຢູ່ຫວາ. ຫຍ້າກະຕາຍ ແນວນີ້ຫັ້ນນ່າ. ຖືວ່າການປ່ຽນແປງ ດິນຟ້າອາກາດ ເຮັດໃຫ້ຜົລຜລິດ ຫຼືວ່າຜົລໄດ້ຮັບ ຂອງການລ້ຽງສັດ ແບບວ່າມີບັນຫາ ຄື ຊາວສວນຕ້ອງໄດ້ຂາຍງົວອອກ ຍ້ອນວ່າ ບໍ່ມີຫຍ້າໃຫ້ງົວກິນ.”

ເຈົ້າໜ້າທີ່ ກ່ຽວຂ້ອງນາງນຶ່ງ ຜູ້ບໍ່ປະສົງອອກຊື່ ແລະຕຳແໜ່ງ ກໍກ່າວວ່າ ງົວທີ່ສົ່ງອອກໄປຈີນ ຜ່ານດ່ານປາງໄຮ ເມືອງສິງ ແຂວງຫຼວງນ້ຳທາ ຊຶ່ງສ່ວນຫຼາຍ ຈະມີບໍຣິສັດຕ່າງໆ ຕັ້ງສູນກັກກັນກວດພະຍາດງົວ ເອົາມາທ້ອນໄວ້ກ່ອນ ສົ່ງອອກໄປຈີນ.

“ມີບໍຣິສັດເຂົາເຈົ້າ ມາເຮັດສູນກັກກັນຢູ່ຫຼວງນ້ຳທາ ກ່ອນເນາະ. ຖ້າວ່າເຂົາມີໂກຕ້າ ມີໃບໂກຕ້າກໍ ເຂົາກໍຈະໄປເອົານຳເຂົ້າມາແລ້ວກໍມາທ້ອນໄວ້ ແລ້ວກໍຂໍໂກຕ້າຈາກກົມ ຈັ່ງສົ່ງອອກໄປຈີນ. ມີແຕ່ວ່າ ແລ້ວແຕ່ວ່າບໍຣິສັດ ເຂົາຈະເອົາມາທາງໃດກໍມີເຈົ້າ ເອົາມາທ້ອນໄວ້ ປະມານເດືອນສອງເດືອນພຸ້ນແຫຼະ. ບາງຄົນກໍມີລ້ຽງເອງ ຕັ້ງແຕ່ໂຄວິດ ກໍຍັງບໍ່ເອົາອອກໄປເທື່ອ.”

ສຳນັກຂ່າວ ປະສຸສາດ ນິວສ໌ (Pasusart News) ຂອງໄທຍ ເປີດເຜີຍວ່າ ພໍ່ຄ້າງົວຂອງລາວ ໄດ້ນຳງົວຈາກປະເທດພະມ້າ ເຂົ້າມາ ໂດຍຜ່ານທ່າເຮືອ ໃນເຂດເສຖກິຈພິເສດ ສາມຫຼ່ຽມຄຳ ເມືອງຕົ້ນເຜິ້ງ ແຂວງບໍ່ແກ້ວ ເພື່ອທ້ອນໄວ້ລ້ຽງ ໃຫ້ໄດ້ນ້ຳໜັກ ຕາມທີ່ຕ້ອງການ ແລ້ວສົ່ງອອກໄປຈີນ ແລະວຽດນາມ, ເປັນການທົດແທນງົວຈາກໄທຍ ທີ່ທາງການລາວ ຫ້າມບໍ່ໃຫ້ນຳເຂົ້າ ຍ້ອນບັນຫາ ການກວດພົບສານເລັ່ງຊີ້ນແດງ ແລະການສວມສິດງົວໄທຍ ເປັນງົວລາວ.