ທະນາຄານ ພັທນາເອເຊັຽ ສົ່ງເສີມໂພຊະນາການ ຢູ່ຫົວພັນ, ຊຽງຂວາງ

ທະນາຄານພັທນາເອເຊັຽ ຫລື ADB ມີໂຄງການຊ່ອຍເຫລືອ ດ້ານສຸຂພາບ ແລະໂພຊະນາການແກ່ປະເທດລາວ ໂດຍການປູກຈິດສໍານຶກ ແລະປັບປຸງສິ່ງສິ່ງອໍານວຍຄວາມສະດວກ ດ້ານສຸຂພາບ, ສຸຂອະນາໄມໃຫ້ 120 ບ້ານຢູ່ 5 ເມືອງຂອງ 2 ແຂວງ ຄື 3 ເມືອງຂອງແຂວງຫົວພັນແລະ 2 ເມືອງຂອງແຂວງຊຽງຂວາງ.                                                                       ໂຄງການທີ່ວ່ານີ້ ຈະດໍາເນີນໄປຮອດປີ 2026, ເປັນໂຄງການສືບຕໍ່ໂຄງການ ຂອງອົງການອາຫານໂລກ ຫລື WFP ແລະອົງການພັທນາຂອງເນເທີແລນດ໌ (SNV) ທີ່ໄດ້ຊ່ອຍເຫລືອ ດ້ານໂພສະນາການແກ່ລາວມາຫລາຍປີ. ຂະນະນີ້ ໂຄງການດັ່ງກ່າວ ກໍາລັງຖືກຈັດຕັ້ງປະຕິບັດ ໂດຍເນັ້ນໃສ່ການສົ່ງ ເສີມສຸຂອະນາມັຍ ແລະປັບປຸງຊີວິດ ການເປັນຢູ່ຂອງປະຊາຊົນ ເປັນຕົ້ນແມ່ນປູກພືດ, ລ້ຽງສັດ.

ດັ່ງເຈົ້າໜ້າທີ່ ທີ່ກ່ຽວຂ້ອງ ຢູ່ເມືອງຊໍາເໜືອ ແຂວງຫົວ ພັນທ່ານນຶ່ງ ກ່າວຕໍ່ວິທຍຸເອເຊັຽເສຣີ ໃນມື້ວັນທີ 1 ມິນານີ້ວ່າ:

“ເວົ້າເຣື່ອງການສົ່ງເສີມ ແລະປັບປຸງ ຊີວິດການເປັນຢູ່ເນາະ ດ້ານການປູກຝັງ ແລະລ້ຽງສັດ ແລະໃຫ້ແນວພັນເນາະ ແລ້ວກໍເວົ້າເຣື່ອງຝຶກອົບຮົມ ເຕັກນິກ ຝຶກອົບຮົມດ້ານການປູກ ໃຫ້ປະຊາຊົນເນາະ ດ້ານອະນາໄມນີ້ ເວົ້າເຣື່ອງນໍ້າລິນເນາະ ແລ້ວກໍຫົວວິດຕ່າງໆນີ້ເນາະ ກໍຖືວ່າເຂົາເຈົ້າກໍມີທຶນ ໃຫ້ປະກອບສ່ວນ ແລ້ວກໍມີທຶນ ກໍເຮັດລະບົບນໍ້າລິນ ລະບົບນໍ້າໃຊ້ຕ່າງໆນີ້ເນາະ.”

ທ່ານກ່າວຕື່ມວ່າ ແນວພັນສັດ ທີ່ທາງໂຄງການສນັບສນູນ ເປັນຕົ້ນກໍແມ່ນ ສັດປີກ, ສ່ວນແນວພັນພືດ ຈະເປັນພືດລົ້ມລຸກ ເຊັ່ນ ຜັກທຽມ, ຜັກບົ່ວ, ແຕ່ກໍຍັງມີຂໍ້ຈໍາກັດ ຄືຍັງບໍ່ມີງົບປະມານ ໃຫ້ທົ່ວທຸກບ້ານ, ເຂົ້າເຖິງພຽງ 30 ບ້ານ ແລະເຈົ້າໜ້າທີ່ ທີ່ກ່ຽວຂ້ອງ ຢູ່ແຂວງຫົວພັນ ອີກຜູ້ນຶ່ງ ກໍເວົ້າວ່າ ໂຄງການນີ້ ຕໍ່ຍອດຈາກໂຄງການ ຊົນລະປະທານ ທີ່ເຮັດໄວ້ແລ້ວ ແຕ່ຍັງບໍ່ທັນໄດ້ຖືກນໍາໃຊ້ ໃຫ້ເກີດປໂຍດພໍປານໃດ ແລະຍັງມີໂຄງການ ປັບປຸງໂຄງຮ່າງພື້ນຖານ ເປັນຕົ້ນ ຂົວ, ຫົນທາງ ເພື່ອຄວາມສະດວກ ໃນການໄປມາ.

“ອັນທີ່ນຶ່ງ ເຂົາເຈົ້າກໍໄປປັບປຸງພື້ນຖານໂຄງຮ່າງ ເປັນຕົ້ນວ່າປັບປຸງລະບົບສົ່ງ ຊົລປະທານ ແລະອໍານວນຄວາມສະດວກ ສ້າງພື້ນຖານໂຄງຮ່າງ ເປັນຕົ້ນວ່າ ເປັນຂົວ ເປັນເສັ້ນທາງໃຫ້ປະ ຊາຊົນສະດວກເຂົ້າສູ່ເຂດທໍາການຜລິດ ແລະກໍສົ່ງເສີມການປູກ ແລະສົ່ງເສີມການຕລາດ ສ້າງເປັນກຸ່ມປູກ ກຸ່ມຮຽນ ຊອກຫາພໍ່ຄ້າມາຊື້ຜົນຜລິດ.”

ທ່ານເວົ້າຕື່ມອີກວ່າ ເຖິງແມ່ນວ່າໂຄງການຈະບໍ່ເຂົ້າເຖິງ ທຸກບ້ານ ແຕ່ຈາກໂຄງການກ່ອນໆ ການຂຍາຍຜົລ ຂອງໂຄງການນັ້ນໄປສູ່ບ້ານອື່ນໆ ກໍຖືວ່າດີຫລາຍ. ຢູ່ແຂວງຫົວພັນ ມີ 3 ເມືອງທີ່ຖືເປັນເມືອງເປົ້າໝາຍຂອງໂຄງການ ຄືເມືອງ ຊໍາເໜືອ, ເມືອງວຽງໄຊ ແລະເມືອງສົບເບົາ.

ຢູ່ແຂວງຊຽງຂວາງ ເຈົ້າໜ້າທີ່ ທີ່ກ່ຽວຂ້ອງທ່ານນຶ່ງ ເວົ້າວ່າ ໂຄງການນີ້ ຈະເຂົ້າໄປສົ່ງເສີມການປູກຝັງ, ລ້ຽງສັດ ແລະລະບົບໂຄງຮ່າງພື້ນຖານ ຮວມທັງຊົລປະ ທານໃນ 2 ເມືອງ ຄືເມືອງຄໍາ ແລະເມືອງແປກ. ໃນນັ້ນ ຈະໄດ້ປັບປຸງລະບົບ ຊົລປະທານ ໃຫ້ໄປເຖິງພື້ນທີ່ປູກຝັງຣະດູແລ້ງ ເຊັ່ນໝາກໂມ, ໝາກຖົ່ວ, ໝາກແຕງ ແລະລ້ຽງສັດ ທີ່ມີທັງງົວ ແລະຄວາຍ ຊຶ່ງມີຜົລດີໃຫ້ປະຊາຊົນຫລາຍ.

“ຖືວ່າມີຜົນດີຕໍ່ປະຊາຊົນ ຫລາຍເນາະ ເພາະວ່າພື້ນຖານໂຄງຮ່າງເນາະ ເຂື່ອນຊົນລະປະທານຊີ້ ມັນກໍເປ່ເພ ມັນກໍບໍ່ໄດ້ລໍາລຽງນໍ້າໄປຮອດເນື້ອທີ່ ມັນກໍບໍ່ສະດວກເນາະ ຫລັງຈາກປັບປຸງແລ້ວ ເອົານໍ້າໄປຫາເນື້ອທີ່ການຜລິດ ກໍສະດວກເນາະ ເຣື່ອງການປູກຝັງລ້ຽງສັດ ຜ່ານມານີ້ເຮັດຢູ່ພື້ນຖານ ເຮົາຮູ້ເຮັດປານໃດເຮັດປານນັ້ນແຫລະ ດຽວນີ້ມີສັດຕະວະແພດເຂົ້າໄປ ມີວິຊາການເຂົ້າໄປ ເຂົາເຈົ້າກໍປູກງ່າຍ ວິທີການຮັກສາງົວຄວາຍຕ່າງໆກໍດີຂຶ້ນ.”

ທ່ານກ່າວຕື່ມວ່າ ຜົລຜລິດທີ່ຈະສົ່ງອອກ ຕ້ອງມີການສົ່ງເສີມ ດ້ານເທັກນິກການເກັບຮັກສາ ຜົລຜລິດ, ການປຸງແຕ່ງເປັນສິນຄ້າ ສໍາເລັດຮູບ ແລະການຄ້າຂາຍໃຫ້ດີນໍາດ້ວຍ. ໃນປັດຈຸບັນ ກໍາລັງຢູ່ໃນຂັ້ນຕອນການຈັດຫາຜູ້ຊື້ ທີ່ໃຫ້ລາຄາສູງຢູ່.

ຊາວບ້ານ ຢູ່ເມືອງຄໍາ ແຂວງຊຽງຂວາງ ເວົ້າວ່າ ທາງຊຸມຊົນ ຢາກໃຫ້ໜ່ວຍງານທີ່ກ່ຽວຂ້ອງ ມາສົ່ງເສີມເຣື່ອງການປູກຝັງ ແລະລ້ຽງສັດ.

ດັ່ງທີ່ທ່ານກ່າວຕໍ່ ວິທຍຸເອເຊັຽເສຣີ ໃນມື້ວັນທີ 1 ມິນານີ້ວ່າ:

“ຄວາມຕ້ອງການ ຂອງຊຸມຊົນມັນຫລາຍເນາະ ກໍຢາກຈະມີໜ່ວຍງານໃດ ທີ່ມາສົ່ງເສີມຊຸກຍູ້ ດ້ານການຜລິດການລ້ຽງສັດ ກໍດີ.”

ອີງຕາມແຜນຍຸທສາດ ແລະການປະຕິບັດງານ ແຫ່ງຊາຕ ດ້ານໂພຊະນາການ ຂອງ ສປປ ລາວ, ແຂວງຫົວພັນ ແລະແຂວງຊຽງຂວາງ ເປັນແຂວງ ທີ່ໄດ້ຮັບບຸລິມະສິດ ຍ້ອນເປັນແຂວງທີ່ມີ ວິກິດຮຸນແຮງ ດ້ານໂພຊະນາການ ແລະສຸຂພິ ບານ.

ທ່ານ ໂທໂມມິ ທານາກະ ຜູ້ອໍານວຍການ ທະນາຄານພັທນາເອເຊັຽ ປະຈໍາ ສປປ ລາວ ກ່າວວ່າ ທະນາຄານ ພັທນາເອເຊັຽ ນໍາໃຊ້ວິທີການຮ່ວມມື ຫລາຍພາກສ່ວນ ແບບຮອບດ້ານ ເພື່ອສນັບສນູນ ສປປລາວ ໃນການຄໍ້າປະກັນສະ ບຽງອາຫານ ແລະການພັທນາຢ່າງຍືນຍົງ.

ໂຄງການດັ່ງກ່າວນີ້ ເປັນນຶ່ງໃນ 4 ຜົລຜລິດຂອງໂຄງການກໍ່ສ້າງໂຄງຮ່າງພື້ນ ຖານຊົນນະບົດ ແບບຍືນຍົງ ແລະການຄຸ້ມຄອງແຫລ່ງນໍ້າ ຊຶ່ງໄດ້ຮັບງົບປະ ມານຊ່ອຍເຫລືອ ຈໍານວນ 51.46 ລ້ານໂດລ້າຣ໌ສະຫະຣັຖ. ໃນນີ້ມີເງິນສນັບ ສນູນຈາກສະຫະພາບຢູໂຣບ 4.46 ລ້ານໂດລ້າຣ໌ສະຫະຣັຖ. ກົມຊົລປະທານ ຂອງກະຊວງກະສິກັມ ແລະປ່າໄມ້ ເປັນຜູ້ຮັບຜິດຊອບໂຄງການ.

ກອງປະຊຸມ ແຫ່ງຊາຕ ດ້ານໂພຊະນາການ ຄັ້ງທີ 2 ແລະກອງປະຊຸມ ຄະນະກັມມະການແຫ່ງຊາຕ ດ້ານໂພຊະນາການ ປະຈໍາປີ 2022 ໄດ້ຖືກຈັດຂຶ້ນໃນມື້ວັນທີ່ 21 ກຸມພາ 2023 ພາຍໃຕ້ຫົວຂໍ້ “ໂພຊະນາການ ເພື່ອການພັທນາ ແບບຍືນຍົງ” ເພື່ອ ສລຸບຣາຍງານ ຜົລສໍາເລັດ ຂໍ້ຄົງຄ້າງ ສິ່ງທ້າທາຍໃນວຽກງານໂພຊະນາການ ແລະບຸລິມະສິດ ໃນປີ 2023.