ຊ່າງພາບຊາວໄທ ຖືກໄວ້ລຸ້ນລາວ ຂັບລົດຕຳຈົນເສຍຊີວິດ

ຊາຍໜຸ່ມລາວ ອາຍຸ 17 ປີ ຂັບລົດຫຼຸ ຍີ່ຫໍ້ Ferrari ສີຂາວ ຕໍາທ້າວ ຊັດຊາຍ ແດງພູມຜົນ ຊ່າງພາບ ແລະນັກອອກແບບງານສິນລະປະ ສັນຊາດໄທ ອາຍຸ 42 ປີ ເສຍຊີວິດ ຢູ່ໃກ້ແຄມແມ່ນໍ້າຂອງ ໃນນະຄອນຫຼວງວຽງຈັນ ໃນມື້ວັນທີ 24 ສິງຫາ 2024 ນີ້.

ເຈົ້າໜ້າທີ່ຕໍາຫຼວດ ກອງບັນຊາການ ປ້ອງກັນຄວາມສະຫງົບ ນະຄອນຫຼວງວຽງຈັນ ທ່ານນຶ່ງ ກ່າວຕໍ່ວິທຍຸເອເຊັຍເສຣີ ໃນມື້ວັນທີ 29 ສິງຫານີ້ວ່າ ປັດຈຸ ບັນ ເຈົ້າໜ້າທີ່ຕໍາຫຼວດນະຄອນຫຼວງວຽງຈັນ ກໍາລັງສອບສວນ ຜູ້ທີ່ຂີ່ລົດຕໍາຄົນໄທຈົນເສຍຊີວິດນັ້ນຢູ່, ຍັງບໍ່ສາມາດໃຫ້ລາຍລະອຽດ ກ່ຽວກັບເຫດການທີ່ໄດ້ເກີດຂື້ນນັ້ນໄດ້ເທື່ອ ໃຫ້ມາພົວພັນຢູ່ຫ້ອງການພີ້ໄດ້ ດັ່ງທີ່ທ່ານກ່າວວ່າ:

“ໂອ໋ ກະຂຶ້ນກັບນະຄອນຫລວງ ຍັງຟູ່ໃນຂັ້ນຕອນດໍາເນີນຢູ່ຕິເບາະ ມາພົວພັນຟູ່ຫ້ອງການໄດ້ເລີຍເດີ ແປະຫໍຄໍານີ້ແຫລະ.”

ແລະໝູ່ຂອງທ້າວ ຊັດຊາຍ ຜູ້ນຶ່ງ ກໍໄດ້ເວົ້າຕໍ່ວິທຍຸເອເຊັຍເສຣີ ໃນມື້ດຽວກັນນີ້ວ່າ ພິທີຊາປະນະກິດສົບ ຂອງທ້າວ ຊັດຊາຍ ໄດ້ຖືກຈັດຂື້ນຢູ່ວັດໂພນສະຫວັນ ຫຼືວັດສາລາແດງ ໃນມື້ວັນທີ 28 ສິງຫານີ້ ໂດຍມີໝູ່ຄູ່ ແລະຜູ້ທີ່ຢູ່ໃນວົງການບັນເທີງຂອງລາວ ມາຮ່ວມຢ່າງຫຼວງຫຼາຍ ແລະ ທາງຄອບຄົວຂອງຜູ້ກໍ່ເຫດ ທີ່ຍັງຂໍສະຫງວນຊື່ ແລະນາມສະກຸນ ກໍໄດ້ມາຮ່ວມພິທີສົ່ງສະການນັ້ນນໍາດ້ວຍ ແລະພ້ອມທີ່ຈະຮັບຜິດຊອບທຸກຢ່າງ ດັ່ງທີ່ໝູ່ຂອງທ້າວ ຊັດຊາຍ ເວົ້າວ່າ:

“ສົ່ງສະການວານນີ້ແລ້ວ ມີແຕ່ໝູ່ຄູ່ສະນິດກັນ ແລ້ວກະເປັນດາລາ ນັກສະແດງເຄີຍຮ່ວມງານນໍາຫັ້ນແຫລະ ໄປຮ່ວມສົ່ງສະການລາວວານນີ້ ເພິ່ນຮັບຜິດຊອບໝົດເດີ້ ເຈົ້າ ເພິ່ນໄປສົ່ງສະການນໍາ ມີພໍ່ຂອງຜູ້ຕໍາຫັ້ນ ແລ້ວກະ 4-5 ຄົນໄປສົ່ງສະການ.”

ແລະຜູ້ທີ່ເຄີຍຮ່ວມງານກັບຜູ້ເສຍຊີວິດ ກໍເວົ້າວ່າ ຫຼັງຈາກທ້າວ ຊັດຊາຍ ຖືກລົດຕໍາເສຍຊີວິດແລ້ວ ບັນດາໝູ່ຄູ່ເພື່ອນຝູງ ແລະຜູ້ທີ່ຊື່ນຊອບຜົນງານຂອງລາວ ຮວມໄປເຖິງຜູ້ໃຊ້ສື່ສັງຄົມອອນລາຍໃນລາວຫຼາຍຄົນ ກໍໄດ້ຮຽກຮ້ອງຂໍຄວາມເປັນທໍານໍາທາງການລາວ ໃຫ້ທ້າວ ຊັດຊາຍ ຜ່ານສື່ສັງຄົມອອນລາຍ ຍ້ອນມີຄວາມກັງວົນນໍາວ່າ ຄະດີຄວາມກ່ຽວກັບກໍລະນີທີ່ວ່ານີ້ ອາດຈະບໍ່ໄດ້ຮັບຄວາມເປັນທໍາ ເນື່ອງຈາກວ່າ ຜູ້ຂັບລົດຕໍາທ້າວ ຊັດຊາຍ ເສຍຊີວິດນັ້ນ ມີອາ ຍຸພຽງແຕ່ 17 ປີ ຄືຍັງບໍ່ທັນບັນລຸນິຕິພາວະ ແລະຜູ້ກ່ຽວກໍເປັນລູກຫຼານຂອງຜູ້ໃຫຍ່ ຢູ່ ສປປລາວ ນໍາດ້ວຍ ດັ່ງທີ່ທ່ານກ່າວວ່າ:

“ແມ່ນໆ ເຫັນເພິ່ນແຊເຫັນຫຍັງຢູ່ ເວົ້າເລື້ອງຄະດີ ເຮົາບໍ່ຮູ້ນ່າ ເພາະວ່າເຮົາກະເປັນເພື່ອນເຟສ ຮູ້ຈັກລາວ ພວກຄະດີພວກຫຍັງນີ້ ແມນບໍ່ຮູ້ເລີຍວ່າເປັນແນວໃດຫັ້ນນ່າ.”

ໃນຂະນະດຽວກັນ ໝູ່ຂອງທ້າວ ຊັດຊາຍ ອີກຜູ້ນຶ່ງກໍເວົ້າວ່າ ການດໍາເນີນຄະດີໃນກໍລະນີທີ່ວ່ານີ້ ຈະມີຂື້ນຢ່າງແນ່ນອນ ຍ້ອນເຫັນພາກສ່ວນທີ່ກ່ຽວຂ້ອງ ຫາລືກັນແລ້ວ ແຕ່ກໍບໍ່ຮູ້ວ່າ ການຕັດສິນຄະດີນີ້ ຈະອອກມາໃນຮູບແບບໃດ, ມີແຕ່ຕ້ອງໄດ້ລໍຖ້າຕິດຕາມເບິ່ງຢ່າງໃກ້ຊິດ ວ່າມັນຈະອອກມາແນວໃດ, ມັນມີຄົນຈັດ ການຢູ່ແລ້ວ ດັ່ງທີ່ທ່ານກ່າວວ່າ:

“ເຂົາເຈົ້າລົມກັນແລ້ວຫັ້ນນ່າ ເລື້ອງຄະດີຫັ້ນ່າ ເຮົາກະເລີຍບໍ່ໄດ້ກ່ຽວຂ້ອງ ບໍ່ໄດ້ຫຍູ້ງ ຄາແຕ່ຈັດງານຂອງລາວຫັ້ນນ່າ ເລີຍບໍ່ໄດ້ສົນໃຈໂຕນີ້ ເພາະວ່າມັນມີຄົນຈັດການຢູ່ແລ້ວ.”

ເວົ້າເລື່ອງການຕັດສິນຄະດີ ກ່ຽວກັບເລື່ອງທີ່ວ່ານີ້ ນັກກົດໝາຍທ່ານນຶ່ງເວົ້າວ່າ ກໍລະນີທີ່ຜູ້ມີອາຍຸຕໍ່າກວ່າ 18 ປີ ຂັບລົດໂດຍປະໝາດ ຈົນເກີດອຸບັດຕິເຫດ ເຮັດໃຫ້ຜູ້ອື່ນ ເຖິງແກ່ຄວາມຕາຍນັ້ນ ຕາມກົດໝາຍຂອງລາວແລ້ວ ຖືວ່າຜູ້ກ່ຽວ ຍັງບໍ່ບັນລຸນິຕິພາວະ ກໍຈະຖືກລົງໂທດຈໍາຄຸກສູງສຸດ ແຕ່ 2 ປີ ຫາ 3 ປີ ຈາກໂທດສູງສຸດ 5 ປີ. ແຕ່ກໍຂື້ນຢູ່ກັບການສັ່ງຟ້ອງຂອງໄອຍະການ ແລະການພິຈາ ລະນາຂອງສານ ດັ່ງທີ່ທ່ານກ່າວວ່າ:

“ຖ້າເດັກຕໍ່າກວ່າ 18 ປີເວລາກະທໍາຜິດມັນກໍລະນີທີ່ວ່າ ມີຄົນເສັຽຊີວິດ ສິຖືກລົງໂທດ 2 ປີເຄິ່ງບໍ່ຫລືວ່າ 3 ປີ ຈະບໍ່ໄດ້ວາງເຕັມ 5 ປີເພາະວ່າມັນເປັນເດັກກະທໍາຜິດ.”

ທ່ານກ່າວຕື່ມວ່າ ກໍລະນີດັ່ງກ່າວນີ້ ຖ້າວ່າ ມີການຂໍປະກັນຕົວຜູ້ກໍ່ເຫດ ທາງຝ່າຍຜູ້ເສັຽຫາຍກໍສາມາດ ແຕ່ງຕັ້ງທະນາຍຄວາມ ໄປຄັດຄ້ານການຂໍປະກັນຕົວໄດ້ ເນື່ອງຈາກວ່າ ຜູ້ກະທໍາຜິດ ເຂົ້າຄ່າຍໄດ້ຮັບໂທດຈໍາຄຸກແຕ່ 2 ຫາ 5 ປີ ຈະບໍ່ສາມາດປະກັນຕົວໄດ້ ຕາມເງື່ອນໄຂ ທີ່ກົດໝາຍໄດ້ກໍານົດໄວ້.

ທ້າວ ຊັດຊາຍ ແດງພູມຜົນ ຫຼືທີ່ຄົນລາວຮູ້ຈັກກັນດີ ໃນຊື່ ອ້າຍຟູ ເປັນຊ່າງພາບ ແລະນັກອອກແບບງານສິນລະປະຊື່ດັງ ຈາກປະເທດໄທ  ທີ່ເຂົ້າມາຢູ່ລາວ ເປັນເວລາຫລາຍປີ ແລະໄດ້ສ້າງຜົນງານ ໃນລາວຫລາຍ ຈົນເປັນທີ່ຮູ້ຈັກແລະຮັກແພງຂອງຄົນ ໃນວົງການຕ່າງໆຢູ່ລາວ.

ທີ່ຜ່ານມາ ກໍມີຫຼາຍເຫດການ ທີ່ລູກຫຼານຂອງຄົນມີຖານະລໍ້າລວຍ ຫລືຜູ້ມີຊື່ສຽງ ໃນລາວ ໄດ້ກໍ່ຄະດີຮ້າຍແຮງ ເຖິງຂັ້ນເຮັດໃຫ້ມີຄົນເສຽຊີວິດນັ້ນ ບາງເຫດການກໍ່ບໍ່ໄດ້ມີລາຍງານ ກ່ຽວກັບການຖືກຕັດສິນຄະດີ, ຄະດີມິດງຽບໄປຊື່ໆ ເປັນຕົ້ນ ຄະດີລູກຊາຍ ຂອງເຈົ້າຂອງບໍລິສັດ ທີ່ມີຊື່ສຽງ ຄົນນຶ່ງ ຢູ່ແຂວງສະ ຫວັນນະເຂດ ທີ່ໃຊ້ປືນສົງຄາມ ຍິງຄົນເສຽຊີວິດ ເມື່ອເດືອນພະຈິກ ປີ 2022 ຈົນມາຮອດມື້ນີ້ ກໍບໍ່ມີຂ່າວວ່າ ໄດ້ມີການຕັດສິນຄະດີແຕ່ຢ່າງໃດ.

ແລະໃນປີ 2022 ຄືກັນນັ້ນ ຫຼານຊາຍ ຂອງອາດີດຜູ້ນໍາລາວ ຄົນນຶ່ງ ກໍໄດ້ກໍ່ເຫດ ໃຊ້ປືນສົງຄາມ ກວາດຍິງຄູ່ກໍລະນີ ຢູ່ຮ້ານບັນເທິງແຫ່ງນຶ່ງ ຢູ່ທາງພາກໃຕ້ຂອງລາວ ເຮັດໃຫ້ລົດຫຼາຍຄັນ ຖືກຍິງເສັຽຫາຍ. ແຕ່ຕໍ່ມາ ເຫດການນີ້ ກໍ່ຖືກສັ່ງໃຫ້ປິດຂ່າວ ໃຫ້ມິດງຽບໄປ ແລະຜູ້ເສຍຫາຍ ກໍບໍ່ໄດ້ຄ່າເສຍຫາຍຫຍັງ.