ຈ້າວເຫວີ່ຍ ມີສ່ວນກ່ຽວຂ້ອງກັບ ກຸ່ມທຶນຈີນ ສີເທົາໃນໄທຍແທ້ບໍ່

ສື່ມວນຊົນຂອງໄທຍ ຊຶ່ງລວມທັງໂທຣະທັດ ແລະໜັງສືພິມ ໄດ້ອອກຂ່າວໃນໄລຍະ 2-3 ເດືອນທີ່ຜ່ານມາວ່າ ນາຍທຶນຈີນ 5 ຄົນ ທີ່ເປັນຫົວໜ້າ ກຸ້ມຄົນຈີນ ແລະເຮັດທຸຣະກິຈມືດ ຢູ່ໃນປະເທດໄທຍ ມີສ່ວນພົວພັນກັບທ່ານ ຈ້າວເຫວີ່ຍ ປະທານ ຄະນະບໍຣິຫານ ເຂດເສຖກິຈ ພິເສດສາມຫຼ່ຽມຄຳ ຢູ່ແຂວງບໍ່ແກ້ວ ສປປ ລາວ.

ເມື່ອວັນທີ່ 3 ທັນວາ 2022, ນັກຂ່າວໂທຣະທັດ PPTV ຂອງໄທຍ ໄດ້ສັມພາດ ແລະຖາມ ທ່ານ ຊູວິດ ກະມົນວິສິດ ອະດີຕ ນັກການເມືອງໄທຍ ວ່າຫົວໜ້າກຸ່ມ ທຸຣະກິຈມືດຂອງຊາວຈີນ 5 ຄົນໃນໄທຍນັ້ນ ມີສ່ວນພົວພັນກັບ ຈ້າວເຫວີ່ຍ ແນວໃດ?

ທ່ານ ຊູວິດ ກະມົນວິສິດ ຕອບວ່າ:

“ພວກນາຍທຶນຈີນ 5 ຄົນນັ້ນ ຮູ້ຈັກຈ້າວເຫວີ່ຍ ຜ່ານນາຍເຟີຍ ຊຶ່ງເປັນລອງ. ນາຍເຟີຍ ກໍເປັນນາຍທຶນຈີນ ທີ່ສາມາດເຂົ້າອອກໄທຍໄດ້; ຈ້າວເຫວີ່ຍ ເຂົ້າໄທຍບໍ່ໄດ້. ນາຍເຟີຍ ອາຍຸ 70 ປີ ຢູ່ເມືອງໄທຍໄດ້ ໄປລາວໄດ້. ຈ້າວເຫວີ່ຍ ສົ່ງນາຍເຟີຍມາໄທຍ. ນາຍເຟີຍ ກໍລ້ຳລວຍ ມີເງິນເຖິງໝື່ນລ້ານບາທ ເຊັ່ນດຽວກັນ. ຖ້າຕຳຣວດ ກວດກາເສັ້ນທາງການເງິນ ກໍຈະຮູ້ແນ່ນອນວ່າ ນາຍເຟີຍ ມີສ່ວນພົວພັນກັບຈ້າວເຫວີ່ຍ. ພວກນາຍທຶນເຫຼົ່ານີ້ ມີເງິນສົກກະປົກຫຼືຜິດກົດໝາຍ ຢູ່ຕ່າງປະເທດ ແລ້ວເອົາເຂົ້າໄທຍ ມາຟອກ ມາຊື້ຊັບສິນ ເຊັ່ນຊື້ຣົດຫຼູ່ຫຼາ ແລະໂຮງງານ; ແລ້ວເງິນເຂົາກໍກາຍເປັນເງິນຂາວສະອາດ. ຄວາມຈິງແລ້ວ ເຂົາໄດ້ເງິນມາຈາກການຄ້າຢາເສບຕິດ ແລ້ວມາລົງທຶນໃນໄທຍ ຊຶ່ງເປັນການລົງທຶນທີ່ບໍ່ຖືກຕ້ອງ. ສລຸບແລ້ວ ຈ້າວເຫວີ່ຍ ເປັນບຸກຄົນສຳຄັນ ເປັນເຈົ້າຂອງບໍຣິສັດແມ່ ມີເຄືອຂ່າຍຢ່າງຫຼວງຫຼາຍ ລວມທັງຫ້າກຸ່ມຢູ່ເມືອງໄທຍນີ້ນຳ ຊຶ່ງພວກເຂົາ ໄດ້ເຮັດທຸຣະກິຈສີເທົານີ້ມາເປັນເວລາດົນນານແລ້ວ.”

ຕໍ່ມາ ເມື່ອວັນທີ່ 5 ທັນວາ 2022, ໜັງສືພິມຜູ້ຈັດການ ຂອງໄທຍ ກໍລົງຂ່າວວ່າ ທ່ານ ຈ້າວເຫວີ່ຍ ໄດ້ກ່າວຕອບໂຕ້ ຄຳຕູ່ຫາຂອງທ່ານ ຊູວິດ ກະມົນວິສິດ ວ່າ ຕົນເອງເປັນພຽງນັກທຸຣະກິຈ ຄົນນຶ່ງ ທີ່ມີໂອກາດໄດ້ພັທນາ ເຂດເສຖກິຈພິເສດ ສາມຫຼ່ຽມຄຳ ໃນ ສປປ ລາວ, ບໍ່ໄດ້ກ່ຽວກັບໄທຍ ແລະຕົນກໍບໍ່ເຂົ້າໃຈວ່າ ຕົນມີສ່ວນພົວພັນ ກັບການເຮັດທຸຣະກິຈມືດ ຢູ່ໄທຍໄດ້ແນວໃດ ໂດຍສະເພາະບໍ່ເຂົ້າໃຈວ່າ ຕົນເປັນຫົວໜ້າ ກຸ່ມທຶນຈີນ ສີເທົາ ຢູ່ໄທຍໄດ້ແນວໃດ. ຜູ້ໃດມີຫຼັກຖານວ່າ ຕົນມີສ່ວນພົວພັນ ກໍຂໍໃຫ້ເປີດເຜີຍມາ.

ທ່ານ ຈ້າວເຫວີ່ຍ ກ່າວອີກວ່າ ເຂດເສຖກິຈພິເສດ ສາມຫຼ່ຽມຄຳ ທີ່ໄດ້ຮັບການພັທນາ ມາແຕ່ປີ 2007 ບໍ່ແມ່ນເຂດທີ່ເປັນຕາຢ້ານ ແຕ່ຢ່າງໃດ; ປັດຈຸບັນ ກາຍເປັນເຂດທີ່ພັທນາໄປຫຼາຍແລ້ວ ຣັຖບານລາວ ກໍຮູ້ດີ; ມັນຈະກາຍເປັນເຂດສີເທົາໄດ້ແນວໃດ; ຕົນບໍ່ຈຳເປັນຕ້ອງແກ້ຂ່າວຫຍັງ ຈະປ່ອຍໃຫ້ຄວາມຈິງພິສູດເອງ. ເວົ້າໂດຍສະເພາະ ຄຳຕູ່ຫາຂອງທ່ານ ຊູວິດ, ຕົນກໍບໍ່ເຂົ້າໃຈວ່າ ເປັນຫຍັງທ່ານ ຊູວິດ ຈຶ່ງເວົ້າພາດພິງຕົນ ມີໃຜຢູ່ເບື້ອງຫຼັງບໍ່? ເຊັ່ນດຽວກັນກັບຄຳຕູ່ຫາ ຂອງສະຫະຣັຖອະເມຣິກາ, ຕົນກໍບໍ່ສົນໃຈ ເພາະເຫັນວ່າ ພວກເຂົາຄົງຈະຢາກໃຫ້ຄົນອື່ນ ເຂົ້າໃຈຜິດຕົນເທົ່ານັ້ນ.

ເຖິງຢ່າງໃດກໍຕາມ ເມື່ອວັນທີ່ 1 ຕຸລາ 2022, ທາງການລາວ ກໍຈັດພິທີມອບຫຼຽນ ພິລະອາດຫານຊັ້ນ 2 ຢ່າງເປັນທາງການ ແລະຢ່າງສົມກຽດໃຫ້ແກ່ ທ່ານ ຈ້າວເຫວີ່ຍ ພ້ອມທັງຍ້ອງຍໍ ຊົມເຊີຍສັນຣະເສີນແລະຈາຣຶກຜົນງານ ທີ່ທ່ານໄດ້ສ້າງໄວ ໃນປະເທດລາວ ໂດຍມີທ່ານ ບົວຄົງ ນາມມະວົງ ເຈົ້າແຂວງແຂວງບໍ່ແກ້ວ ໄດ້ເຂົ້າຮ່ວມ. ເຈົ້າໜ້າທີ່ທາງການລາວ ໃຫ້ເຫດຜົນວ່າ ທ່ານຈ້າວເຫວີ່ຍ ເຖິງຈະເປັນນັກລົງທຶນ ຕ່າງປະເທດ ແຕ່ກໍໄດ້ເປັນເຈົ້າການ ເອົາໃຈໃສ່ຈັດຕັ້ງປະຕິບັດ ຜັນຂຍາຍແນວທາງ ນະໂຍບາຍ ຂອງພັກ ແລະກົດໝາຍ ຂອງລາວ ກ່ຽວກັບວຽກງານ ປ້ອງກັນຊາຕ ແລະປ້ອງກັນຄວາມສງົບ ໃນຂົງເຂດທົ່ວປະເທດລາວ.

ກ່ອນນີ້ເມື່ອປີ 2018, ກະຊວງການຄັງ ຂອງສະຫະຣັຖອະເມຣິກາ ຣາຍງານວ່າ ບໍຣິສັດດອກງິ້ວຄໍາຂອງທ່ານ ຈ້າວເຫວີ່ຍ ທີ່ບໍຣິຫານກາສິໂນ ຄິງສ໌ ໂຣມັນສ໌ (Kings Romans) ໃນເຂດເສຖກິຈ ພິເສດສາມຫຼ່ຽມຄຳນັ້ນ ເປັນອົງການ ອາຊຍາກັມ ຂ້າມຊາຕ ຊຶ່ງມີການຄ້າ ທີ່ຜິດກົດໝາຍ ຫຼາຍຢ່າງ ເປັນຕົ້ນ ການຄ້າຢາເສບຕິ, ຄ້າມະນຸສ, ຊັກຟອກເງິນ ໃຫ້ສິນບົນ ແລະຄ້າສັດປ່າ.

ເຈົ້າໜ້າທີ່ ທາງການລາວ ທ່ານນຶ່ງ ທີ່ບໍ່ປະສົງບອກຊື່ ກໍເຊື່ອວ່າ ເຂດເສຖກິຈພິເສດ ສາມຫລ່ຽມຄໍານີ້ ມີສ່ວນກ່ຽວຂ້ອງ ກັບກິຈກັມທີ່ຜິດກົດໝາຍແທ້.

"ຂ້າພະເຈົ້າຄິດວ່າໃບອະນຸຍາດນີ້ ຖືກຕ້ອງ ແຕ່ການປະພຶດ ຂອງບໍຣິສັດ ຫລືວ່າສະຖານທີ່ແຫ່ງນີ້ ກະຄົງຈະບໍ່ຖືກຕ້ອງເນາະ ມົ້ວສຸມການ ບໍຣິການ ທາງເພດ ສອງມາກະແມ່ນເຣຶ່ອງພົວພັນ ກັບພໍ່ຄ້າຢາເສບຕິດ ເພາະວ່າຂ້າພະເຈົ້າ ກໍເຄີຍມີມູນຢູ່ວ່າ ເຈົ້າໜ້າທີ່ ເຂົ້າໄປກ່ຽວພັນຢູ່ນະ."

ຫລັງຈາກ ກະຊວງການຄັງ ສະຫະຣັຖອາເມຣິກາ ໄດ້ອອກຖແລງພຽງ 4 ມີື້ ຄືໃນມື້ວັນທີ 3 ກຸມພາ 2018, ທ່ານ ຈ້າວເຫວີ່ຍ ປະທານກຸ່ມບໍຣິສັດ ດອກງິ້ວຄໍາ ກໍໄດ້ຖແລງຂ່າວຕອບໂຕ້ວ່າ ການອອກຂ່າວ ຂອງກະຊວງການຄັງ ສະຫະຣັຖ ນັ້ນ ເປັນການກະຈາຍຂ່າວ ທີ່ມີເຈຕນາບໍ່ດີ ແລະມີຈຸດປະສົງ ຂຍາຍອໍານາດ, ອິດທິພົນ ແລະເຮັດໃຫ້ສາກົນ ເຂົ້າໃຈຜິດ, ໃຫ້ນັກລົງທຶນ ແລະນັກທ່ອງທ່ຽວ ກັງວົນໃຈ. ຄວາມຈິງແລ້ວ ທາງບໍຣິສັດດອກງິ້ວຄຳ ໄດ້ດໍາເນີນທຸຣະກິຈ ທີ່ຖືກຕ້ອງ ໂດຍມີເຈົ້າໜ້າທີ່ ທາງການລາວ ກວດກາ ແລະຕິດຕາມເປັນປະຈຳ ແລະບໍ່ເຄີຍ ໄດ້ສ້າງຄວາມເສັຍຫາຍ ຕໍ່ຜົລປໂຍດ ຂອງປະເທສໃດ ແລະບຸກຄົນໃດ. ເຂດເສຖກິຈພິເສດ ສາມຫລ່ຽມຄໍາ ເປັນເຂດທີ່ຣັຖບານລາວ ອະນຸຍາດໃຫ້ສ້າງຕັ້ງຂຶ້ນ ໂດຍມີຣັຖບານ ແລະອໍານາດ ການປົກຄອງທ້ອງຖິ່ນ ຂອງລາວ ເປັນຜູ້ຄຸ້ມຄອງ, ຕິດຕາມ ແລະກວດກາ ແລະໄດ້ປະຕິບັດ ຕາມລະບຽບກົດໝາຍ ແລະສັນຍາທຸກຢ່າງ.