ຄົນງານທີ່ເຮັດວຽກໃຫ້ຄອລເຊັນເຕີ້ ໃນສາມຫຼ່ຽມຄຳ ຈະຖືກສົ່ງກັບປະເທດ

ລັດຖະບານລາວ ຈະສົ່ງຄົນງານຕ່າງປະເທດທຸກຄົນ ທີ່ເຮັດວຽກຢູ່ສູນຄອນເຊັນເຕີ ຫຼືສູນສະແກມເມີ ທາງໄຊເບີ ກັບຄືນປະເທດ ໃຫ້ໝົດ.

ສູນສະແກມເມີ ທາງໄຊເບີ ຢູ່ລາວ ສ່ວນໃຫຍ່ ມີຢູ່ແຂວງພາກເໜືອ ຂອງປະ ເທດ ຊຶ່ງທາງການລາວ ແລະທາງການຕ່າງປະເທດ ຮ່ວມມືກັນ ປະກາດໃຫ້ພວກເຂົາ ທີ່ຍັງສືບຕໍ່ເຄື່ອນໄຫວສໍ້ໂກງ ທາງໂທລະຄົມ ຢຸດເຊົາ ແລະທັງຈະຍຶດອຸປະກອນເຕັກນິກຕ່າງໆ ທີ່ໃຊ້ໃນການສໍ້ໂກງນັ້ນ ຕັ້ງແຕ່ວັນທີ 9 ເຖິງວັນທີ 25 ສິງຫາ 2024 ຮວມໄປເຖິງ ໃຫ້ເຈົ້າຂອງກິດຈະການນີ້ ຮັບຜິດຊອບຕໍ່ລູກ ຈ້າງ ໃນການອໍານວຍຄວາມສະດວກ ໃຫ້ໄດ້ກັບຄືນປະເທດຂອງພວກເຂົາເຈົ້ານໍາດ້ວຍ ດັ່ງເຈົ້າໜ້າທີ່ກະຊວງປ້ອງກັນຄວາມສະຫງົບ ທ່ານນຶ່ງກ່າວຕໍ່ວິທຍຸເອເຊັຽເສຣີວ່າ:

“ເຄີຍທັງຄົນ ເຄີຍທັງອຸປະກອນ ອຸປະກອນຂົນອອກ ຄົນກໍຕ້ອງໄດ້ໄປ ແລ້ວກໍຢູ່ປະເທດໃດ ຕ້ອງສົ່ງຄົນຈີນ ສົ່ງຈີນ ຄົນຫວຽດສົ່ງຫວຽດ ພະມ້າກໍ່ສ້າງ ມຽນມ້າ ກໍຕ້ອງມຽນມ້າ ຢູ່ພວກສີລັງກາ ອິນເດັຽ ກໍ່ສົ່ງ ສົ່ງໄປນີ້ເຮົາສິສົ່ງແບບໃດ.”

ທ່ານກ່າວຕື່ມວ່າ ທາງການລາວ ແລສະຖານທູດປະເທດຕ່າງໆ ປະຈໍາລາວ ຈະຮ່ວມມືກັນ ສົ່ງພົນລະເມືອງຂອງຕົນ ທີ່ເຮັດວຽກເປັນສະແກມເມີ ຢູ່ລາວ ກັບຄືນປະເທດ.

“ກໍລະນີວ່າ ຜູ້ກ່ຽວມີເອກກະສານຖືກຕ້ອງ ຍັງບໍ່ທັນໝົດ ມີພາດສະພັອດມີຫຍັງ ເຮົາກໍສົ່ງໃຫ້ ຜັກດັນໄປຕາມທາງທີ່ເຂົາເຈົ້າໄປໄດ້ ໃນກໍລະນີຜູ້ໃດທີ່ວ່າ ເອກກະສານບໍ່ມີ ເປັນຄົນເຖື່ອນເປັນຄົນບໍ່ມີເອກກະສານ ທາງລັດຖະບານເພິ່ນ ທາງກະຊວງການຕ່າງປະເທດ ຫລືທາງອັນນັ້ນ ເພິ່ນສິສົ່ງໃນນາມທາງການ.”

ທາງການລາວ ແລະອິນເດຍ ຮ່ວມມືກັນຊ່ອຍພົນລະເມືອງອິນເດຍ ອອກຈາກສູນສະແກມເມີ ທາງໄຊເບີ (Cyber scam centers) ຫຼືສູນຄອນເຊັນເຕີ ໄດ້ຕື່ມອີກ 14 ຄົນ ໃນທ້າຍເດືອນກໍລະກົດ 2024 ນີ້, ອີງຕາມຄໍາເວົ້າຂອງສະ ຖານທູດອິນເດຍ ປະຈໍາລາວ ຕໍ່ວິທຍຸເອເຊັຍເສຣີ ໃນມື້ວັນທີ 13 ສິງຫານີ້.

ເຈົ້າໜ້າທີ່ສະຖານທູດອິນເດຍ ປະຈໍາລາວໄດ້ກ່າວວ່າ ປັດຈຸບັນ ພົນລະເມືອງອິນເດຍທັງ 14 ຄົນທີ່ວ່ານັ້ນ ໄດ້ກັບຄືນໄປປະເທດອິນເດຍ ຢ່າງປອດໄພແລ້ວ, ທ່ານກ່າວວ່າ:

“ສະຫລູບຄວາມແລ້ວ ໃນດືອນ ກໍລະກົດ  2024 ແຮງງານອິນເດຍ ໄດ້ຂໍຄວາມຊ່ວຍເຫລືອ ແລະໄດ້ຊອ່ຍພວກຂະເຈົ້າ ກັບບ້ານຢ່າງປອດໄພແລ້ວ.”

ນັບແຕ່ປີ 2022 ຮອດວັນທີ 21 ກໍລະກົດ 2024 ທາງການອິນເດຍ ແລະລາວ ຊ່ອຍພົນລະເມືອງອິນເດຍ ອອກຈາກສະນສະແກມເມີ ທາງໄຊເບີ ໄດ້ທັງໝົດ 548 ຄົນ, ອີງຕາມຂໍ້ມູນຂອງສະຖານທູດອິນເດຍ ປະຈໍາລາວ. 

ເຈົ້າໜ້າທີ່ສະຖານທູດອິນເດຍ ກ່າວຕື່ມວ່າ ໃນການຮ່ວມລະຫວ່າງອິນເດຍ ແລະລາວ ໃນລະຫວ່າງກອງປະຊຸມລັດຖະມົນຕີການຕ່າງປະເທດອາຊຽນ ຄັ້ງທີ 57 ທີ່ລາວເປັນເຈົ້າພາບ ແຕ່ວັນທີ 24 ຫາວັນທີ 27 ກໍລະກົດທີ່ຜ່ານມາ ທ່ານ S. Jaishankar ລັດຖະມົນຕີກະຊວງການຕ່າງປະເທດອິນເດຍ ໄດ້ພົບພໍ້ຫາລືກັນກັບທ່ານ ສອນໄຊ ສີພັນດອນ ນາຍົກລັດຖະມົນຕີລາວ ກ່ຽວກັບຫຼາຍຂົງເຂດວຽກງານ. ສ່ວນການຊ່ອຍເຫຼືອພົນລະເມືອງອິນເດຍ ກັບຄືນປະເທດ ແມ່ນເປັນການຮ່ວມມື ລະຫວ່າງເຈົ້າໜ້າທີ່ລາວ ແລະສະຖານທູດອິນເດັຍ ປະ

ຈໍາລາວ.  ທ່ານກ່າວວ່າ:

“ທ່ານລັດຖະມົນຕີ ມາປະຊຸມ ອາຊຽນ ແລະໄດ້ຫາລືກັບ ທ່ານນາຍົກລາວ ສ່ວນການຊ່ວຍເຫລືອຄົນອີນເດຍນັ້ນ ແມ່ນເປັນຄວາມຮ່ວມມືລະຫວ່າງເຈົ້າຫນ້າທີ່ລາວ ກັບສະຖານທູດອິນເດຍ.”

ແລະເຈົ້າໜ້າທີ່ ຢູ່ແຂວງພາກເໜືອຂອງລາວ ກໍເວົ້າວ່າ ຫາກຄົນຕ່າງປະເທດ ທີ່ເດີນທາງເຂົ້າມາລາວ ດ້ວຍວີຊາທ່ອງທ່ຽວ ຫຼືເຂົ້າມາໃນກໍລະນີອື່ນໆ ເພື່ອມາເຮັດວຽກຢູ່ລາວ ແລ້ວມີຄວາມປະສົງຢາກກັບຄືນປະເທດຂອງຕົນ ກໍສາມາດຍື່ນຄໍາຮ້ອງ ຂໍຄວາມຊ່ອຍເຫຼືອ ໄປຍັງສະຖານທູດຂອງຕົນ ປະຈໍາລາວ ດັ່ງທີ່ທ່ານກ່າວວ່າ:

“ຢູ່ຕ່າງປະເທດນ່າ ດຽວນີ້ນ່າ ມາໃນນາມນັກທ່ອງທ່ຽວແລ້ວລັກໄປອອກແຮງງານ ໂຕນີ້ມັນຜິດກົດໝາຍຢູ່ແລ້ວນ້ອງ  ແຕ່ໃນເມື່ອມັນຜິດແນວນັ້ນ ກໍບໍ່ເປັນຫຍັງມີແຕ່ວ່າ ໃຫ້ລາວແຈ້ງທາງສະຖານທູດເພື່ອຂໍການຊ່ວຍເຫລືອເນາະ ແມ່ນ ຮູ້ສຶກຮູ້ຫຍັງ ກໍໃຫ້ເພິ່ນໃສ່ຊື່ຕຶກພ້ອມເນາະ ຢູ່ຊັ້ນໃດແລ້ວກໍຕຶກຊື່ຫຍັງ ແລ້ວກໍເບີໂທ ແລ້ວກໍຊື່ ແລ້ວກໍນາມສະກຸນຂອງລາວ ເປັນພາສາອັງກິດເນາະ ໜ້າປາດສະປັອດຂອງລາວຕົບທ້າຍຫັ້ນ.”

ສໍາລັບອິນເດຍ ເພື່ອປົກປ້ອງພົນລະເມືອງຂອງຕົນ ບໍ່ໃຫ້ຕົກເຂົ້າສູນຫຼອກລວງ ຂອງສະແກມເມີ ທາງໄຊເບີ ແລະວຽກງານອື່ນໆ ໃນລາວຕື່ມອີກ ທາງສະຖານທູດອິນເດຍ ປະຈໍາລາວ ໃຫ້ຄໍາແນະນໍາ ເຕືອນໄພ ຜ່ານ X (Twitter) ແລະເວັບໄຊ ຢ່າງຕໍ່ເນື່ອງ ໃຫ້ລະວັງຂໍ້ສະເໜີງານປອມ ຫຼືການສະແຫວງຫາຜົນປະໂຫຍດ ໃນປະເທດລາວ.

ເມື່ອບໍ່ດົນມານີ້ ຄົນອິນເດຍ ທີ່ຖືກຫຼອກລວງ ເຂົ້າມາຮັດເຮັວຽກຢູ່ປະເທດໄທ ແລ້ວພາຂ້າມມາລາວ ຖືກບັງຄັບໃຫ້ເຮັດວຽກ ເປັນແກ້ງຄອນເຊນເຕີ ແລະສໍ້ໂກງ ສະກຸນເງິນ ດິຈິທັນ ຢູ່ເຂດເສດຖະກິດພິເສດສາມຫຼ່ຽມຄໍາ, ຖືກຈັບເປັນໂຕປະກັນ, ຖືກທໍລະມານ ທາງດ້ານຮ່າງກາຍ ແລະຈິດໃຈ ແລະຖືກສົ່ງໄປ

ແຂວງຕ່າງໆຂອງລາວ ເພື່ອເຮັດວຽກເປັນຄົນງານຢູ່ບໍ່ແຮ່ ແລະໂຮງງານໄມ້.