ເຜີຍແຜ່ຜົລຮ້າຍ ຂອງການຄ້າມະນຸສ ໃຫ້ນັກຮຽນເຂົ້າໃຈ ຍັງບໍ່ທົ່ວເຖິງ

ຜແນກຕຳຣວດສະກັດກັ້ນ ແລະ ຕ້ານການຄ້າມະນຸສ ຢູ່ບັນດາແຂວງຕ່າງໆ ໄດ້ອອກໂຄສະນາເຜີຍແຜ່ ກ່ຽວກັບຜົລຮ້າຍ ຂອງການຄ້າມະນຸສ ໃຫ້ແກ່ບັນດານັກຮຽນມັທຍົມ ຢູ່ຕາມໂຮງຮຽນຕ່າງໆ ໃນທົວແຂວງ ເປັນຕົ້ນແມ່ນ ແຂວງຫຼວງນ້ຳທາ ແລະ ແຂວງສວັນນະເຂດ, ແຕ່ວ່າການອອກໂຄສະນາເຜີຍແຜ່ດັ່ງກ່າວ  ຍັງບໍ່ທັນທົ່ວເຖິງປານໃດ ຍ້ອນວ່າເຈົ້າໜ້າທີ່ກ່ຽວຂ້ອງ ສາມາດເຂົ້າເຖິງສະເພາະ ໂຮງຮຽນໃນເຂດຕົວເມືອງ ຫຼາຍກວ່າໃນເຂດຫ່າງໄກສອກຫຼີກ, ເຊິ່ງນັກຮຽນໃນເຂດຫ່າງໄກສອກຫຼີກ ມີຄວາມສ່ຽງສູງ ທີ່ຈະອອກຮຽນກາງຄັນ ເພື່ອໄປເຮັດວຽກຢູ່ປະເທດເພື່ອນບ້ານ ແລະ ອາດຕົກເປັນເຫຍື່ອ ຈາກຂບວນການຄ້າມະນຸສໄດ້.

ຕໍ່ກັບເຣື່ອງນີ້, ວິທຍຸເອເຊັຽເສຣີ ໄດ້ສອບຖາມໄປຍັງ ຄຣູ-ອາຈານ ໃນໂຮງຮຽນມັທຍົມຕ່າງໆ ຢູ່ປະເທດ, ໂດຍນາຍຄຣູທ່ານນຶ່ງ ຜູ້ບໍ່ປະສົງອອກຊື່ ແລະ ຕຳແໜ່ງ ຢູ່ໂຮງຮຽນມັທຍົມແຫ່ງນຶ່ງ ໃນແຂວງຫຼວງນ້ຳທາ ກ່າວວ່າ ສຳລັບໂຮງຮຽນຂອງທ່ານ ແມ່ນຕັ້ງຢູ່ໃນເຂດຫ່າງໄກ ສອກຫຼີກ ກໍ່ໄດ້ມີເຈົ້າໜ້າທີ່ຕຳຣວດຕ້ານການຄ້າມະນຸສ ຈາກທາງແຂວງ ເຂົ້າມາໃຫ້ຄວາມຮູ້ນັກຮຽນ ໂດຍມີທັງການບັນລະຍາຍ ແລະ ການແຈກຢາຍເອກະສານ ກ່ຽວກັບຜົລຮ້າຍຂອງການຄ້າມະນຸສ.

ດັ່ງທີ່ທ່ານກ່າວໃນມື້ວັນທີ 19 ມິຖຸນານີ້ວ່າ:

“ແມ່ນແຫຼະມາໃຫ້ຄວາມຮູ້ ແມ່ນລະມີແຕ່ເຈົ້າໜ້າທີ່ມາໃຫ້ຄວາມຮູ້ ແລະ ກະເອກະສານ, ເຜີຍແຜ່ທາງດ້ານເອກະສານ.”

ທາງດ້ານ ນາຍຄຣູທ່ານນຶ່ງ ຜູ້ບໍ່ປະສົງອອກຊື່ ແລະ ຕຳແໜ່ງ ຢູ່ໂຮງຮຽນມັທຍົມແຫ່ງນຶ່ງ ໃນແຂວງຊຽງຂວາງ ກ່າວວ່າ ຢູ່ໂຮງຮຽນຂອງທ່ານ ແມ່ນຢູ່ເຂດຫ່າງໄກ ສອກຫຼີກ ເຊັ່ນດຽວກັນ ຍັງບໍ່ທັນມີເຈົ້າໜ້າທີ່ເຂົ້າມາໃຫ້ຄວາມຮູ້ ກ່ຽວກັບເຣື່ອງຜົລຮ້າຍ ຂອງການຄ້າມະນຸສເທື່ອ ເຊິ່ງອາດຈະຍ້ອນວ່າ ໂຮງຮຽນຂອງທ່ານ ຍັງເປັນພຽງໂຮງຮຽນມັທຍົມຕົ້ນ, ແຕ່ເຖິງຢ່າງໃດກໍ່ຕາມ ຖ້າມີເຈົ້າໜ້າທີ່ ລົງມາໃຫ້ຄວາມຮູ້ໄດ້ ກໍ່ຈະເປັນການດີ, ເພື່ອໃຫ້ນັກຮຽນ ມີຄວາມຮູ້ກ່ຽວກັບຜົລຮ້າຍຂອງການຄ້າມະນຸສ ຕັ້ງແຕ່ຫົວທີ.

“ຄືວ່າຍັງບໍ່ທັນເຫັນນ່າ ຍັງບໍ່ທັນມີເທື່ອ, ຈະເປັນໂຮງຮຽນຮອດ ມ.3 ຍັງບໍ່ທັນມີ (ມັທຍົມປາຍ) ນ່າ.”

ການໂຄສະນາເຜີຍແຜ່ ກ່ຽວກັບຜົລຮ້າຍຂອງການຄ້າມະນຸສ ແມ່ນຢູ່ໃນແຜນງານແຫ່ງຊາຕ ວ່າດ້ວຍການຕ້ານການຄ້າມະນຸສ ໄລຍະທີ 3 ແຕ່ປີ 2021-2025 ສະບັບເລຂທີ 027/ຄຕມຊ ລົງວັນທີ 31 ສິງຫາ 2021, ເຊິ່ງແຜນງານດັ່ງກ່າວ ກຳນົດໃຫ້ແຕ່ລະແຂວງ ຈັດການໂຄສະນາເຜີຍແຜ່ ເປັນສ່ວນນຶ່ງ ຂອງແຜນການຈັດຕັ້ງ ເຄື່ອນໄຫວ ວຽກງານຕ້ານການຄ້າມະນຸສ ຂອງຄະນະກັມມະການຕ້ານ ການຄ້າມະນຸສລະດັບແຂວງ ລວມທັງແຜນເຄື່ອນໄຫວ ວຽກງານວິຊາສະເພາະ ຂອງຜແນກຕຳຣວດ ສະກັດກັ້ນ ແລະ ຕ້ານການຄ້າມະນຸສ ຂອງແຂວງນຳດ້ວຍ. ກ່ຽວກັບເຣື່ອງນີ້, ວິທຍຸເອເຊັຽເສຣີ ພະຍາຍາມຕິດຕໍ່ໄປຍັງເຈົ້າໜ້າທີ່ຕຳຣວດ ຜແນກສະກັດກັ້ນ ແລະ ຕ້ານການຄ້າມະນຸສ ທັງຂັ້ນສູນກາງ ແລະຂັ້ນແຂວງ ໃນຫຼາຍແຂວງ ແຕ່ເຈົ້າໜ້າທີ່ບໍ່ສະດວກໃຫ້ຂໍ້ມູນ.

ເຖິງຢ່າງໃດກໍ່ຕາມ, ນາຍຄຣູຢູ່ແຂວງຫຼວງນ້ຳທາ ທ່ານດຽວກັນນີ້ ກ່າວຕື່ມວ່າ ທ່ານຍັງມີຄວາມກັງວົນ ກ່ຽວກັບ ນັກຮຽນຂອງທ່ານ ທີ່ຈຳນວນນຶ່ງ ໄດ້ອອກການຮຽນກາງຄັນ ໄປເຮັດວຽກຢູ່ຕ່າງເຂດ ຫຼື ໃນປະເທດເພື່ອນບ້ານ ລວມທັງອອກໄປສ້າງຄອບຄົວ ທັງທີ່ອາຍຸຍັງບໍ່ເຖິງເກນເໝາະສົມ ເຊິ່ງອາດຈະຖືກຕົກເປັນເຫຍື່ອ ຂອງຂບວນການຄ້າມະນຸສ ໃນອະນາຄົດ.

ດັ່ງທີ່ທ່ານກ່າວຕໍ່ ວິທຍຸເອເຊັຽເສຣີ ວ່າ:

“ມີຢູ່ເຈົ້າ ມີຢູ່, ແຕ່ວ່າບໍ່ຫຼາຍ ສ່ວນຫຼາຍໄປສາມຫຼ່ຽມ. ແມ່ນແຫຼະ, ໄປໄທຍກໍ່ໄປຈຳນວນນຶ່ງ ແລະ ກະນອກຈາກນັ້ນກໍ່ແມ່ນປະເທດຈີນເຈົ້າ. ສ່ວນຫຼາຍນີ້ ມັນຈະມີພວກທີ່ອອກໂຮງຮຽນ ແລ້ວໄປເຮັດວຽກອັນອື່ນ ຕ່າງປະເທດນີ້ກໍ່ມີຫຼາຍ ແຕ່ວ່າຜູ້ທີ່ອອກແລ້ວສ້າງຄອບຄົວ ແບບຍັງບໍ່ຮອດອາຍຸສ້າງຄອບຄົວນີ້ ເຂົາເຈົ້າກໍ່ສ້າງຄອບຄົວ ເປັນແບບນັ້ນກະມີຫຼາຍຢູ່ເຈົ້າ, ແມ່ນ, ຕາມຄວາມສມັກໃຈ.”

ສຳລັບການໂຄສະນາເຜີຍແຜ່ ກ່ຽວກັບເຣື່ອງການຄ້າມະນຸສນີ້ ທາງພາກສ່ວນກ່ຽວຂ້ອງໃນແຕ່ລະແຂວງ ກໍໄດ້ ດຳເນີນການມາຢ່າງຕໍ່ເນື່ອງ ເປັນຕົ້ນແມ່ນ ໃນວັນທີ 25 ພຶສພາ 2023 ທີ່ຜ່ານມາ, ຜແນກຕຳຣວດສະກັດກັ້ນ ແລະ ຕ້ານການຄ້າມະນຸສ ກອງບັນຊາການ ປກສ ແຂວງສວັນນະເຂດ ໄດ້ລົງເຄື່ອນໄຫວໂຄສະນາເຜີຍແຜ່ ກ່ຽວກັບຜົລຮ້າຍຂອງການຄ້າມະນຸສ ໃຫ້ແກ່ນັກຮຽນໂຮງຮຽນມັທຍົມສົມບູນ ໂພນສວັນ ແລະ ໂຮງຮຽນມັທຍົມສົມບູນ ອຸດົມວິໄລ ນະຄອນໄກສອນ ພົມວິຫານ ແຂວງສວັນນະເຂດ.

ຣັຖບານລາວ ໄດ້ອອກກົດໝາຍວ່າດ້ານ ການຕ້ານການຄ້າມະນຸສ ມາແຕ່ປີ 2016 ໂດຍໄດ້ຈັດຕັ້ງຄະນະກັມມະການ ຕ້ານການຄ້າມະນຸສລະດັບຊາຕຂຶ້ນ ເປັນຜູ້ຮັບຜິດຊອບກ່ຽວກັບວຽກງານ ຕ້ານການຄ້າມະນຸສໃນລະດັບຊາຕ ໂດຍມີຮອງນາຍົກຣັຖມົນຕຣີ ເປັນປະທານ, ຣັຖມົນຕຣີກະຊວງປ້ອງກັນຄວາມສງົບ ເປັນຮອງປະທານ ແລະ ທັງເປັນຜູ້ປະຈຳການ ແລະ ຮອງຫົວໜ້າກົມໃຫຍ່ຕຳຣວດ ກະຊວງປ້ອງກັນຄວາມສງົບ ຜູ້ຊີ້ນຳວຽກງານຕ້ານການຄ້າມະນຸສ ເປັນກັມມະການ ແລະ ຫົວໜ້າກອງເລຂາ, ແລະ ກຳນົດໃຫ້ຂແນງການສຶກສາທິການ ແລະ ກີລາ ຮັບຜິດຊອບໃນການຊີ້ນຳ ຄຸ້ມຄອງສະຖານການສຶກສາ ເພື່ອປ້ອງກັນນັກຮຽນ, ນັກສຶກສາ ບໍ່ໃຫ້ຕົກເປັນເຫຍື່ອ ຫຼື ຜູ້ຖືກເຄາະຮ້າຍ ຂອງການຄ້າມະນຸສ, ໂດຍໃນການຄຸ້ມຄອງວຽກງານຕ້ານການຄ້າມະນຸສ ຂອງຂແນງການປ້ອງກັນ ຄວາມສງົບ ແມ່ນຕ້ອງໄດ້ໃຫ້ການໂຄສະນາເຜີຍແຜ່ ແນວທາງນະໂຍບາຍ ແຜນຍຸທະສາດ, ກົດໝາຍ ແລະ ລະບຽບການ ກ່ຽວກັບການຕ້ານການຄ້າມະນຸສ ໃຫ້ແກ່ສັງຄົມ ແລະ ເຍົາວະຊົນລາວ.