ບັນຫາຄ້າມະນຸດໃນລາວ ຍັງແກ້ບໍ່ໄດ້ ມາດຕະຖານຂັ້ນຕ່ຳ

ໃນວັນທີ 24 ມິຖຸນາ ທີ່ຜ່ານມານີ້, ກະຊວງການຕ່າງປະເທດ ສະຫະລັດອາເມຣິກາ ໄດ້ອອກບົດລາຍງານ ດ້ານການຄ້າມະນຸດ ປະຈຳປີ 2024 ພ້ອມລະບຸວ່າ ສະຖານະການ ດ້ານການຄ້າມະນຸດໃນລາວ ແມ່ນຢູ່ໃນຂັ້ນທີ 2 ທີ່ຕ້ອງໄດ້ສິ້ງຊອມເບິ່ງ ຫຼື Tier 2 Watch List, ເຊິ່ງຢູ່ໃນສະຖານະພາບ ທີ່ຫຼຸດລົງ ເມື່ອທຽບໃສ່ປີ 2023 ທີ່ຢູ່ໃນຂັ້ນທີ 2 ຫຼື Tier 2 ເນື່ອງຈາກລັດຖະບານລາວ ຍັງບໍ່ທັນດຳເນີນການເຕັມທີ່ ໃນການແກ້ໄຂບັນຫາ ດ້ານການຄ້າະມຸດ ໃຫ້ເປັນໄປຕາມ ມາດຕະຖານຂັ້ນຕ່ຳ.

ໃນຮອບປີທີ່ຜ່ານມາ, ເຂດເສດຖະກິດພິເສດ 3 ຫຼ່ຽມຄຳ ຖືກກ່າວເຖິງ ເປັນລັກສະນະສະເພາະ ໃນບົດລາຍງານດັ່ງກ່າວ ໃນຖານະທີ່ເປັນ ແຫຼ່ງອາດຊະຍາກຳ ໃນດ້ານຕ່າງໆ, ອີກທັງຍັງເຕັມໄປດ້ວຍ ຂະບວນການຄ້າມະນຸດ,​ ໂດຍສະເພາະ ການຄ້າມະນຸດ ເພື່ອຄ້າປະເວນີ ແລະ ການຄ້າມະນຸດ ດ້ານແຮງງານ. ໃນນີ້, ກວມເອົາການເຮັດວຽກ ເປັນນັກຕົ້ມຕຸ໋ນ ທາງອອນລາຍນ໌ ຫຼືສະແກມເມີ້ ນຳດ້ວຍ. ດັ່ງເຈົ້າໜ້າທີ່ ທີ່ກ່ຽວຂ້ອງ ຜູ້ທີ່ຮູ້ກ່ຽວກັບບັນຫາ ການຄ້າມະນຸດໃນລາວ ກ່າວຕໍ່ວິທຍຸເອເຊັຽເສຣີ ໃນມື້ວັນທີ 25 ມິຖຸນາ 2024 ນີ້ວ່າ:

“ຢູ່ໃນເຂດນີ້ ມັນຈະເປັນລັກສະນະ ການຄ້າແຮງງານ ຫຼາຍກວ່າ​. ການທີ່ສັນຍາແຮງງານ ເຂົ້າມາແລ້ວ ບໍ່ປະຕິບັດ ຕາມສັນຍາແຮງງານ ຄືບໍ່ໃຫ້ເງິນ ຕາມທີ່ໄດ້ສັນຍາກັບເຂົາໄວ້, ແລ້ວເຂົາກໍມາຮ້ອງຂໍ ຄວາມຊ່ອຍເຫຼືອ. ແມ່ນ, ສ່ວນໃຫຍ່ຢູ່ນີ້ ມັນເປັນແຮງງານ ຂອງຕ່າງປະເທດ ທີ່ເຂົ້າມາເຮັດວຽກຢູ່ນີ້ ຢູ່ໃນເຂດນີ້. ແມ່ນ, ແລ້ວກໍອີກສ່ວນໜຶ່ງ ກໍແມ່ນພວກທີ່ວ່າ ຍິງສາວ ທີ່ເຂົ້າມາ ເພື່ອຈະເອີ້ນວ່າ ປະກອບອາຊີບເປັນປະເວນີ ກໍຄືໃຫ້ບໍລິການທາງເພດ. ອັນນີ້, ພວກເຮົາກໍຕ້ອງຖືວ່າ ຢູ່ໃນຂອດການຄ້າມະນຸດ. ພວກເຮົາກໍຕ້ອງໄດ້ສະກັດກັ້ນ ແລະ ຕ້ອງໄດ້ປະກັນອອກ.”

ທ່ານກ່າວຕື່ມວ່າ ມີຄົນງານ ຈາກຕ່າງປະເທດ ເປັນຕົ້ນ ຄົນງານຈາກໄທ ແລະ ປະເທດອື່ນໆ ໃນພາກພື້ນເອເຊັຽຕາເວັນອອກສຽງໃຕ້ ລວມເຖິງບັນດາປະເທດ ອາຟຣິກາ ຫຼັ່ງໄຫຼເຂົ້າມາເຮັດວຽກ ຢູ່ພາຍໃນເຂດເສດຖະກິດພິເສດ ດັ່ງກ່າວນີ້ ເປັນຈຳນວນຫຼວງຫຼາຍ. ໃນນີ້, ປະກອບມີ ໂຄສະນາຊວນເຊື່ອວ່າ ພວກເຂົາເຈົ້າ ຈະໄດ້ຮັບ ສະຫວັດດີການທີ່ດີ ແລະ ໄດ້ຮັບຄ່າຈ້າງແຮງງານສູງ, ແຕ່ເມື່ອເດີນທາງ ມາເຮັດວຽກໂຕຈິງ ພັດບໍ່ເປັນໄປ ຕາມທີ່ໄດ້ຮັບຮູ້ ຜ່ານການໂຄສະນາໄວ້ ເຮັດໃຫ້ຄົນງານ ບໍ່ພໍໃຈ, ບໍ່ຢາກເຮັດວຽກຕໍ່ ແລະ ຕ້ອງການເດີນທາງ ກັບຄືນປະເທດຕົ້ນທາງ. ຂະນະທີ່ ການເດີນທາງມາເຮັດວຽກ ຢູ່ພາຍໃນເຂດດັ່ງກ່າວນີ້ ແມ່ນມີບໍລິສັດ ຈັດຫາງານ ແລະ ນາຍໜ້າ ທີ່ໄດ້ເກັບເງິນ ຄ່າດຳເນີນການລ່ວງໜ້າ ເຂົ້າມາກ່ຽວຂ້ອງ ຈຶ່ງເຮັດໃຫ້ຂະບວນການ ດັ່ງກ່າວນີ້ ແມ່ນກ່ຽວຂ້ອງ ກັບການຄ້າມະນຸດ.

ເຖິງແມ່ນວ່າ ພາຍໃນເຂດເສດຖະກິດພິເສດ 3 ຫຼ່ຽມຄຳ ຈະເຕັມໄປດ້ວຍ ຂະບວນການຄ້າະມນຸດ ໃນຮູບແບບຕ່າງໆ ເປັນຕົ້ນ ການຄ້າປະເວນີ ແລະ ການຄ້າມະນຸດ ດ້ານແຮງງານ, ແຕ່ບົດລາຍງານ ກ່ຽວກັບໂຕເລກ ທີ່ກ່ຽວຂ້ອງ ພັດຍັງເປັນຈຳນວນ ທີ່ໜ້ອຍຫຼາຍ. ສ່ວນໜຶ່ງ, ແມ່ນເປັນຍ້ອນລັດຖະບານລາວ ພັດພິຈາລະນາວ່າ ບັນຫາທີ່ເກີດຂຶ້ນດັ່ງກ່າວນີ້ ສ່ວນຫຼາຍ ແມ່ນເປັນຂໍ້ຂັດແຍ້ງ ທາງດ້ານແຮງງານ.

ແຕ່ໃນສະພາບໂຕຈິງແລ້ວ, ຂໍ້ຂັດແຍ້ງ ວ່າດ້ວຍສັນຍາການຈ້າງງານ ລະຫວ່າງນາຍຈ້າງ ແລະ ລູກຈ້າງ ທີ່ເກີດຂຶ້ນ ພາຍໃນເຂດເສດຖະກິດພິເສດ 3 ຫຼ່ຽມຄຳ ຈຳນວນຫຼາຍນັ້ນ, ແມ່ນກ່ຽວຂ້ອງກັບ ຂະບວນການຄ້າມະນຸດ. ດັ່ງນັກຊ່ຽວຊານ ດ້ານກົດໝາຍ ທີ່ຕິດຕາມ ສະຖານະການ ບັນຫາການຄ້າມະນຸດ ທີ່ເກີດຂຶ້ນ ພາຍໃນເຂດເສດຖະກິດພິເສດ 3 ຫຼ່ຽມຄຳ ທ່ານໜຶ່ງ ກ່າວຕໍ່ວິທຍຸເອເຊັຽເສຣີ ໃນມື້ດຽວກັນນັ້ນວ່າ:

“ກໍລະນີການເຂົ້າໄປເຮັດວຽກປັ໋ບ! ແລ້ວມີການ ຍຶດເອກະສານ ຫຼືບໍ່ມີການເຮັດສັນຍາ ອີ່ຫຍັງຕ່າງໆ, ມີການຍຶດເອກະສານ, ມີການຄວບຄຸມໂຕ ບັງຄັບໃຫ້ເຮັດວຽກຢ່າງໜັກ, ລ່ວງເກີນເວລາ, ບໍ່ຈ່າຍເງິນເດືອນ ນີ້ຖືວ່າ ເຂົ້າຂ່າຍກັບການຄ້າມະນຸດ ທັນທີນ່າ. ຈຸດປະສົງ ແລະ ເປົ້າໝາຍ ຂອງຜູ້ທີ່ກະທຳຜິດນີ້ ວ່າລາວເຮັດຖືກຕ້ອງ ຕາມກົດໝາຍບໍ່? ໂຕຢ່າງວ່າ ເອີ່, ຂ້ອຍຮັບລາວມາເຮັດວຽກ ຢ່າງເປີດເຜີຍ ທີ່ວ່າຂ້ອຍຕ້ອງມີແບບຟອມ ຊຸດເອກະສານສະໝັກງານ ແລ້ວກໍມີອັນນ່າ ສັນຍາຈ້າງງານ ວ່າຂ້ອຍຈ້າງເຈົ້ານີ້ ໃນໄລຍະ 1 ເດືອນທຳອິດ ຫຼືທົດລອງງານຈັກເດືອນ.​ ຫຼັງຈາກນັ້ນ, ຜ່ານງານແລ້ວ ເຈົ້າເຂົ້າເປັນ ພະນັກງານສົມບູນແລ້ວ ເຈົ້າໄດ້ຮັບນະໂຍບາຍ ເງິນເດືອນເທົ່າໃດ, ມັນຕ້ອງຊັດເຈນ ບ່ອນນີ້ຢູ່ແລ້ວ. ແລ້ວກໍບໍ່ໄດ້ບັງຄັບວ່າ ເຈົ້າຕ້ອງເຮັດອັນນີ້ໃຫ້ຂ້ອຍ, ເຈົ້າຕ້ອງອັນນັ້ນໃຫ້ຂ້ອຍ. ເອີ່, ຖ້າຫາກວ່າ ມີສັນຍາຢູ່, ແຕ່ເວລາທີ່ມີລູກຄ້າ ມີແຂກເຂົ້າມາ ໂຕຢ່າງວ່າ ການຄ້າໂສເພນີ. ເອີ້, ໂອເຄ ເຈົ້າໄປນອນນຳແຂກ ຜູ້ນີ້ເດີ້, ເຈົ້າຕ້ອງໄປ ຮ່ວມເພດກັບລາວເດີ້ ມັນຖືວ່າເປັນການຜິດ ຕໍ່ກົດໝາຍທັນທີ.”

ທ່ານກ່າວຕື່ມວ່າ ພາຍໃນເຂດເສດຖະກິດພິເສດ 3 ຫຼ່ຽມຄຳ ເຕັມໄປດ້ວຍວຽກງານ ທີ່ບໍ່ຖືກຕ້ອງ ຕາມກົດໝາຍ ຍ້ອນວ່າທຸລະກິດ ຈຳນວນຫຼາຍ ພາຍໃນເຂດນີ້ ແມ່ນເປັນທຸລະກິດ ເປັນລັກສະນະສີເທົາ ຂອງນັກລົງທຶນຕ່າງປະເທດ, ໂດຍສະເພາະຢ່າງຍິ່ງ ແມ່ນນັກລົງທຶນຈີນ. ເປັນທຸລະກິດ ທີ່ເປີດຂຶ້ນມາ ເພື່ອດຳເນີນການສໍ້ໂກງ ຊັບສິນພົນລະເມືອງ ຜ່ານຊ່ອງທາງອອນລາຍນ໌, ເຊິ່ງໃນຂະບວນການດັ່ງກ່າວນີ້ ມີສ່ວນກ່ຽວຂ້ອງ ກັບການບັງຄັບໃຊ້ແຮງງານ ແລະ ຂະບວນການຄ້າມະນຸດ.

ເຖິງແມ່ນວ່າ ລັດຖະບານລາວ ຈະມີກົດໝາຍ ກ່ຽວກັບການຕ້ານ ການຄ້າມະນຸດ ທີ່ລະບຸໄວ້ ໃນມາດຕາ 215 ຂອງກົດໝາຍອາຍາ ສະບັບປີ 2017 ທີ່ລະບຸວ່າ ການຄ້າມະນຸດ ເພື່ອການຄ້າປະເວນີ ແລະ ການຄ້າມະນຸດ ດ້ານແຮງງານ ເປັນການກະທຳ ທີ່ຜິດກົດໝາຍ. ຜູ້ກະທຳຜິດ ຈະຖືກຕັດອິດສະຫຼະພາບ 5 ປີ ຫາ 15 ປີ ແລະ ຈະຖືກປັບໃໝ 10 ລ້ານ ຫາ 100 ລ້ານກີບ ແລະ ຈະຖືກໂທດປັດໃໝ 100 ລ້ານ ຫາ 500 ລ້ານກີບ ຖ້າການກະທຳຜິດ ແມ່ນກ່ຽວຂ້ອງກັບເດັກ, ແຕ່ໃນສະພາບໂຕຈິງແລ້ວ ລັດຖະບານລາວ ຍັງບໍ່ທັນບັງຄັບໃຊ້ ກົດໝາຍດັ່ງກ່າວນີ້ ຢ່າງເຂັ້ມງວດ ພໍເທົ່າໃດ, ອີງຕາມບົດລາຍງານ ດ້ານການຄ້າມະນຸດ ຂອງກະຊວງການຕ່າງປະເທດ ສະຫະລັດອາເມຣິກາ ປະຈຳປີນີ້.

ບົດລາຍງານ ດ້ານການຄ້າມະນຸດ ຂອງກະຊວງການຕ່າງປະເທດ ສະຫະລັດອາເມຣິກາ ຍັງໄດ້ລະບຸອີກວ່າ ການອະນຸມັດ ໃຫ້ເປີດສະໜາມບິນສາກົນບໍ່ແກ້ວ ຂອງລັດຖະບານລາວ ແມ່ນມີສ່ວນພົວພັນ ກັບການຮັບເງິນທຶນບາງສ່ວນ ຈາກກຸ່ມນິຕິບຸກຄົນ ຈາກຕ່າງປະເທດ ທີ່ຜິດກົດໝາຍ ຂະນະທີ່ທາງການລາວ ພັດບໍ່ໄດ້ລາຍງານ ແນວທາງປ້ອງກັນ ເພື່ອສະກັດກັ້ນ ບໍ່ໃຫ້ສະໜາມບິນ ແຫ່ງດັ່ງກ່າວນີ້ ອຳນວຍຄວາມສະດວກ ໃຫ້ແກ່ຂະບວນການຄ້າມະນຸດ.

ສຳລັບຄົນງານຕ່າງປະເທດ ທີ່ຖືກຕວົະ ໃຫ້ມາເຮັດວຽກ ເປັນນັກຕົ້ມຕຸ໋ນທາງອອນລາຍນ໌ ຫຼືສະແກມເມີ້ ຢູ່ພາຍໃນເຂດເສດຖະກິດພິເສດ 3 ຫຼ່ຽມຄຳ ສ່ວນຫຼາຍ ແມ່ນມີການເດີນທາງ ມາຈາກປະເທດໄທ ແລະ ປະເທດເພື່ອນບ້ານ ກ່ອນເດີນທາງ ເຂົ້າມາຍັງປະເທດລາວ ດ້ວຍການຂີ່ເຮືອຮັບຈ້າງ ຂ້າມແມ່ນ້ຳຂອງ.

ອີງຕາມບົດລາຍງານ ດ້ານການຄ້າມະນຸດ ຂອງກະຊວງການຕ່າງປະເທດ ສະຫະລັດອາເມຣິກາ ປະຈຳປີນີ້ ລະບຸວ່າ ຜູ້ຄ້າມະນຸດ ມັກມີເປົ້າໝາຍ ເລືອກເອົາພວກຊາວໜຸ່ມ ທີ່ອາໄສຢູ່ໃນເຂດຫ່າງໄກ, ບໍ່ທັນມີໂອກາດ ດ້ານການສຶກສາ ແລະ ການເຮັດວຽກ. ຂະນະທີ່ ຜູ້ເສຍຫາຍ ຈາກການຄ້າມະນຸດ ທີ່ເປັນຄົນຕ່າງປະເທດ ມັກຖືກຕວົະ ໃຫ້ເດີນທາງມາຍັງປະເທດໄທ ດ້ວຍການສະເໜີວຽກງານປອມ. ຈາກນັ້ນ, ຜູ້ຄ້າມະນຸດ ຈະສົ່ງຕໍ່ພວກເຂົາເຈົ້າ ໄປຍັງເຂດເສດຖະກິດພິເສດ 3 ຫຼ່ຽມຄຳ ຜ່ານທາງເຮືອ. ຜູ້ເສຍຫາຍບາງຄົນ ຍັງຖືກຕວົະ ໃຫ້ເດີນທາງໂດຍກົງ ໄປຍັງສະໜາມບິນ ພາຍໃນປະເທດລາວ.

ໃນປີ 2023 ທີ່ຜ່ານມາ, ລັດຖະບານລາວ ລາຍງານວ່າ ມີຊາວຕ່າງປະເທດ ຈຳນວນ 28,300 ຄົນ ເຮັດວຽກຢູ່ພາຍໃນ ເຂດເສດຖະກິດພິເສດ 3 ຫຼ່ຽມຄຳ ຂະນະທີ່ຜູ້ສັງເກດການ ໃນບັນຫາດັ່ງກ່າວ ປະເມີນວ່າ ໃນສະພາບໂຕຈິງ ແມ່ນມີຈຳນວນ ທີ່ຫຼາຍກວ່າໂຕເລກ ທີ່ທາງການລາວ ເປີດເຜີຍຕໍ່ສາທາລະນະ.

ແລະ ໃນປີ 2022, ມີຄົນງານຈາກປະເທດຕ່າງໆ ຫຼາຍກວ່າ 20 ປະເທດ ຮ້ອງຂໍຄວາມຊ່ອຍເຫຼືອ ຍ້ອນມີນາຍຈ້າງ ພາຍໃນເຂດເສດຖະກິດພິເສດ 3 ຫຼ່ຽມຄຳ ກ່ຽວຂ້ອງກັບ ຂະບວນການຄ້າມະນຸດ ແລະ ສະແຫວງຫາຜົນປະໂຫຍດ ຈາກພວກເຂົາເຈົ້າ ທີ່ມາເປັນຄົນງານ ດ້ວຍການບັງຄັບ ໃຫ້ເຮັດວຽກ ເປັນນັກຕົ້ມຕຸ໋ນ ທາງອອນລາຍນ໌ ຫຼືສະແກມເມີ້, ໂດຍສະເພາະຢ່າງຍິ່ງ ກຸ່ມບຸກຄົນ ທີ່ມີຄວາມສາມາດ ໃນການໃຊ້ອິນເຕີເນັທ ແລະ ສື່ສັງຄົມອອນລາຍນ໌ ບໍ່ວ່າຈະເປັນເພດຊາຍ, ເພດຍິງ ແລະ ເດັກນ້ອຍ ຈາກປະເທດລາວ ແລະ ປະເທດອື່ນໆ ໃນເຂດພາກພື້ນເອເຊັຽ, ອາຟຣິກາ, ຢຸໂຣປ, ອາເມຣິກາເໜືອ ແລະ ອາເມຣິກາໃຕ້.

ນອກຈາກນີ້, ສະຖານທູດອິນເດຍ ປະຈຳປະເທດລາວ ທີ່ມີສຳນັກງານ ໃນນະຄອນຫຼວງວຽງຈັນ ກໍມັກຈະລາຍງານ ຜ່ານສື່ສັງຄົມອອນລາຍນ໌ ຊ່ອງທາງຕ່າງໆ ເຕືອນໃຫ້ພົນລະເມືອງອິນເດຍ ລະມັດລະວັງ ໃນການເດີນທາງມາປະເທດລາວ ຈາກການຖືກສະເໜີວ່າ ຈະໄດ້ວຽກງານທີ່ດີ ແລະ ທາງສະຖານທູດ ກໍມັກຈະແຈ້ງເລື້ອຍໆວ່າ ໄດ້ຊ່ອຍພົນລະເມືອງ ຂອງຕົນ ອອກມາຈາກ ເຂດເສດຖະກິດພິເສດ 3 ຫຼ່ຽມຄຳ ພາຍຫຼັງທີ່ພວກເຂົາ ຕົກເປັນເຫຍື່ອ ຂະບວນການຄ້າມະນຸດ. ສະບາຍດີ.