ຮຽກຮ້ອງ ທາງການລາວ ຊ່ອຍຄົນງານ ເມເລເຊັຽ ໃນລາວ

ເມື່ອວັນທີ່ 26 ກັນຍາ ທີ່ຜ່ານມາ ອົງການທີ່ເຮັດວຽກ ດ້ານສິດທິມະນຸສ ແລະຍາດຕິພີ່ນ້ອງ ຂອງຄົນງານມາເລເຊັຽ ຜູ້ຖືກເຄາະຮ້າຍ ໄດ້ເດີນທາງໄປປະທ້ວງ ຢູ່ໜ້າສະຖານທູຕລາວ ປະຈໍາປະເທດມາເລເຊັຽ ເພື່ອຮຽກຮ້ອງໃຫ້ທາງການລາວ ດໍາເນີນການຊ່ອຍເຫຼືອຄົນງານມາເລເຊັຽ ປະມານ 700 ຄົນ ທີ່ຖືກຕົວະໄປເຮັດວຽກຢູ່ປະເທດລາວ ໃນຫຼາກຫຼາຍອາຊີບ.

ດັ່ງ ທ່ານ ດາຕຸກ ຮິສະມັດດິນ ຮາຊິມ (Datuk Hishamuddin Hashim) ເລຂາທິການ ອົງການເພື່ອມະນຸສຍະທັມ ລະຫວ່າງປະເທດ ແຫ່ງມາເລເຊັຽ ຫຼື Malaysia International Humanitarian Organization (MHO) ແລະຜູ້ຕາງໜ້າຍາດຕິພີ່ນ້ອງ ຂອງເຫຍື່ອ ກ່າວວ່າ:

“ໃນມື້ນີ້, ພວກເຮົາມາທີ່ໜ້າ ສະຖານທູຕລາວ ໃນນະຄອນຫຼວງກົວລາລຳເປີຣ໌, ປະເທດມາເລເຊັຽ. ຮຽກຮ້ອງໃຫ້ຣັຖບານລາວ ຊ່ອຍເຫຼືອພົລເມືອງມາເລເຊັຽ ຜູ້ທີ່ຕົກເປັນເຫຍື່ອຂອງກຸ່ມຕົ້ມຕຸ໋ນ ຕົວະໃຫ້ໄປເຮັດວຽກ ແລະ ຖືກກັກຂັງ, ທໍຣະມານ ແລະ ຖືກປະປ່ອຍໄວ້ທີ່ປະເທດລາວ.”

ທ່ານກ່າວຕື່ມວ່າ ເຖິງແມ່ນວ່າ ຜູ້ເຄາະຮ້າຍຈໍານວນຫຼາຍ ໄດ້ແຈ້ງຄວາມໄປຍັງເຈົ້າໜ້າທີ່ ຕໍາຣວດຂອງລາວ ແຕ່ການດໍາເນີນການ ໃຫ້ການຊ່ອຍເຫຼືອເຫຍື່ອ ແລະຕິດຕາມໂຕຜູ້ກະທໍາຄວາມຜິດ ຍັງບໍ່ທັນມີປະສິດທິຜົລເທື່ອ ເຮັດໃຫ້ຜູ້ຖືກເຄາະຮ້າຍ ຕ້ອງຫຼົບໜີອອກຈາກ ປະເທດລາວດ້ວຍໂຕເອງ 4 ຄົນ ແລະໄດ້ຮັບການຊ່ອຍເຫຼືອ ຈາກການແຊກແຊງ ຂອງສະຖານທູຕມາເລເຊັຽ ປະຈໍາປະເທດລາວ ອີກ 6 ຄົນ ຂະນະທີ່ ຄົນອື່ນໆ ທີ່ບໍ່ໄດ້ຮັບການຊ່ອຍເຫຼືອ ອາຈສ່ຽງຕໍ່ການ ຖືກຂູດຮີດແຮງງານ, ຕົກເປັນເຫຍື່ອຄ້າມະນຸສ ແລະເສັຍຊີວິຕ, ສະນັ້ນ ປະເດັນດັ່ງກ່າວນີ້ ຈຶ່ງຈໍາເປັນຕ້ອງໄດ້ ຜັກດັນຂຶ້ນສູ່ເວທີອາຊ້ຽນ ເພື່ອໃຫ້ປະເທດສະມາຊິກຮ່ວມກັນຫາລື ຍ້ອນຖ້າບໍ່ມີການແກ້ໄຂຢ່າງຈິງຈັງ ຊິເຮັດໃຫ້ບັນຫາທະວີ ຄວາມຫຍຸ້ງຍາກ ແລະຊັບຊ້ອນຫຼາຍຂຶ້ນ.

ອີງຕາມການຣາຍງານ ຂອງທາງການມາເລເຊັຽ ລະບຸວ່າ ໃນໄລຍະເດືອນຜ່ານມາ ມີຄົນງານມາເລເຊັຽ ຖືກຕົວະ ໄປເຮັດວຽກເປັນສະແກມເມີ້ຣ໌ 238 ຄົນ ແລະມີຜູ້ຖືກເຄາະຮ້າຍ ຕິດຄ້າງຢູ່ໃນຕ່າງປະເທດ 168 ຄົນ ຈົນມາຮອດວັນທີ່ 4 ກັນຍາ ທີ່ຜ່ານມາ ກະຊວງຕ່າງປະເທດ ຂອງມາເລເຊັຽ ໄດ້ຊ່ອຍເຫຼືອ ຄົນງານມາເລເຊັຽໄດ້ 87 ຄົນ ໃນນັ້ນ ຖືກຕົວະໄປເຮັດວຽກ ຢູ່ກັມພູຊາ 65 ຄົນ, ຢູ່ລາວ 10 ຄົນ, ຢູ່ພະມ້າ 2 ຄົນ ສ່ວນອີກ 10 ຄົນ ຖືກຕົວະໄປເຮັດວຽກຢູ່ໄທຍ.

ກ່ຽວກັບເຣື່ອງນີ້ ພາກສ່ວນທີ່ກ່ຽວຂ້ອງ ຄວນເລັ່ງດໍາເນີນການຊອກຫາ ແນວທາງແກ້ໄຂ ຢ່າງຮີບດ່ວນ ເພື່ອຊ່ອຍເຫຼືອຄົນງານ ມາເລເຊັຽຈໍານວນຫຼາຍ ທີ່ຖືກກັກຂັງຢູ່ພາຍໃນ ປະເທດລາວ ໃຫ້ສາມາດເດີນທາງກັບມາຍັງ ປະເທດມາເລເຊັຽ ໄດ້ຢ່າງປອດພັຍ.

ດັ່ງທ່ານ ຕັນ ສີ ມຸສາ ຮັສສັນ (Tan Sri Musa Hassan) ປະທານອົງການ ຢຽວຢາເຫຍື່ອອາຊຍາກັມ ໃນປະເທດມາເລເຊັຽ ຫຼື Malaysia Community Crime Care  ກ່າວວ່າ:

“ມັນກ່ຽວຂ້ອງກັບການຄ້າມະນຸສ ແລະ ພວກເຮົາຮູ້ສຶກວ່າ ໜ່ວຍງານທີ່ກ່ຽວຂ້ອງ ຂອງຣັຖບານ ຄວນເຮັດວຽກຢ່າງຮີບດ່ວນ ເພື່ອຊ່ອຍປົດປ່ອຍພົລເມືອງມາເລເຊັຽ ທີ່ຖືກກັກຂັງໃນປະເທດລາວ. ສະນັ້ນ, ໃນປັດຈຸບັນນີ້, ພວກເຮົາພວມເຮັດວຽກຢ່າງໃກ້ຊິດ ກັບກະຊວງການຕ່າງປະເທດ ແລະ ຕຳຣວດ. ພວກເຮົາພຍາຍາມຫາຂໍ້ມູນເພີ່ມ ຂອງພົລເມືອງມາເລເຊັຽ ທີ່ຖືກຕົວະໃຫ້ໄປເຮັດວຽກ ຢູ່ປະເທດລາວ ແລະ ເພື່ອໃຫ້ພວກເຂົາ ຖືກປ່ອຍໂຕ ກັບຄືນມາຫາຄອບຄົວ ທີ່ມາເລເຊັຽ.”

ທີ່ຜ່ານມາ ຂະບວນການຕົວະ ຄົນງານມາເລເຊັຽ ໄປເຮັດວຽກເປັນສະແກມເມີ້ຣ໌ ແລະອາຊີບອື່ນໆ ນາຍໜ້າຈະຫຼອກລໍ້ ດ້ວຍການແນະນໍາວ່າ ຈະພາເດີນທາງໄປເຮັດວຽກ ຢູ່ຕ່າງປະເທດ ໄດ້ລາຍໄດ້ດີ ບາງຄົນກໍຍື່ນຂໍ້ສເນີວ່າ ຈະອອກຄ່າໃຊ້ຈ່າຍ ໃນການເດີນທາງ ທັງໝົດໃຫ້ ແຕ່ເມື່ອເດີນທາງໄປຮອດ ສະຖານທີ່ເຮັດວຽກ ຄົນງານພັດຖືກນາຍໜ້າ ແລະນາຍຈ້າງ ຍຶດພາສປອດ ແລະໂທຣະສັບ ພ້ອມທັງຖືກບັງຄັບໃຫ້ເຮັດວຽກ ເປັນສະແກມເມີ້ຣ໌ ທີ່ກ່ຽວຂ້ອງກັບ ການພະນັນອອນລາຍນ໌, ການລົງທຶນ, ການຫຼອກລວງເຣື່ອງຄວາມຮັກ ແລະ ກິຈກັມທີ່ຜິດກົດໝາຍອື່ນໆ.

ໃນກໍຣະນີ ທີ່ຄອບຄົວຂອງເຫຍື່ອ ຕ້ອງການຮັບໂຕຜູ້ເຄາະຮ້າຍ ກັບປະເທດ ພວກເຂົາເຈົ້າ ຈະຕ້ອງຈ່າຍຄ່າໄຖ່ ເປັນເງິນປະມານ 50,000 ຫາ 100,000 ຣິງກິຕ (ຫຼືປະມານ 180,000,000 ກີບ ຫາ 360,000,000 ກີບ) ໃຫ້ແກ່ນາຍໜ້າ ແລະນາຍຈ້າງ ຂະນະທີ່ ຜູ້ຖືກເຄາະຮ້າຍບາງຄົນ ຖືກຂາຍຕໍ່ໄປຍັງບໍຣິສັດອື່ນໆ ແລະບາງສ່ວນ ຖືກຂາຍຕໍ່ໄປຍັງຕ່າງປະເທດ ແລະເຖິງແມ່ນວ່າ ຜູ້ເຄາະຮ້າຍຈໍານວນຫຼາຍ ໄດ້ແຈ້ງຄວາມ ໄປຍັງເຈົ້າໜ້າທີ່ຕໍາຣວດຂອງລາວ ແຕ່ພັດບໍ່ໄດ້ຮັບການຊ່ອຍເຫຼືອ ພໍເທົ່າໃດ ເຮັດໃຫ້ຄົນງານ ມາເລເຊັຽກຸ່ມດັ່ງກ່າວນີ້ ຢູ່ໃນສະພາບສ່ຽງ ຕໍ່ການຖືກຂູດຮີດແຮງງານ, ຕົກເປັນເຫຍື່ອຄ້າມະນຸສ ແລະອາຈເສັຍຊີວິຕ.
ມາຮອດປັດຈຸບັນ ຍັງມີຄົນງານມາເລເຊັຽ ຈໍານວນຫຼາຍ ແລະຄົນງານຈາກຕ່າງປະເທດອື່ນໆ ໃນອາຊ້ຽນດ້ວຍກັນ ຖືກຕົວະໄປເຮັດວຽກ ເປັນສະແກມເມີ້ຣ໌ ແລະອາຊີບອື່ນໆຢູ່ປະເທດລາວ ສ່ວນນຶ່ງ ຢູ່ເຂດເສຖກິຈພິເສດ ສາມຫຼ່ຽມຄໍາ ເມືອງຕົ້ນເຜິ້ງ ແຂວງບໍ່ແກ້ວ ຍັງບໍ່ທັນໄດ້ຮັບການຊ່ອຍເຫຼືອ ຈາກທາງການລາວ ແລະພາກສ່ວນ ທີ່ກ່ຽວຂ້ອງເທື່ອ.

ດັ່ງຄົນງານລາວ ທີ່ເຮັດວຽກ ຢູ່ພາຍໃນເຂດເສຖກິຈ ພິເສດສາມຫຼ່ຽມຄໍາ ທ່ານນຶ່ງ ກ່າວຕໍ່ວິທຍຸ ເອເຊັຽເສຣີ ເມື່ອວັນທີ່ 29 ກັນຍາ 2022 ນີ້ວ່າ:

“ຄົນມາເລເຊັຽນີ້ ໄດ້ຍິນຫຼາຍໆຄົນ ຄົນມາເລເຊັຽ ຄົນອີ່ຫຍັງກໍມີເບິດແຫຼະ ຂ້ອຍຮູ້ວ່າມີນ່າ ອ່າ ອັນມີຢູ່ຕິ ຄົນມາເລເຊັຽ ຖາມວ່າເຂົາຢູ່ຕຶກໃດ ເຄີຍໄດ້ຍິນຢູ່ວ່າ ເຄີຍໄດ້ຍິນຄົນວຽດ ຄົນພະມ້າ, ຄົນວຽດ, ຄົນມາເລເຊັຽຢູ່ໃນຫັ້ນ ຄົນຫຍັງກໍມີຢູ່ ອ່າ ຕ້ອງຮູ້ຕຶກກ່ອນເນາະ ອອກຈາກຕຶກແລ້ວ ຂະເຈົ້າຈະອອກມາໄດ້ ແຕ່ບໍ່ຮູ້ວ່າລາວຕຶກໃດຫັ້ນນ່າ.”

ເຖິງແມ່ນວ່າ ໃນໄລຍະຜ່ານມາ ທາງການລາວ ແລະພາກສ່ວນທີ່ເຮັດວຽກກ່ຽວກັບ ການຄຸ້ມຄອງຄົນງານ ພາຍໃນເຂດເສຖກິຈ ພິເສດສາມາຫຼ່ຽມຄໍາ ຈະເຂົ້າຊ່ອຍເຫຼືອຄົນງານລາວ ແລະຄົນງານຕ່າງປະເທດ ທີ່ຖືກຕົວະໄປເຮັດວຽກ ຢູ່ພາຍໃນເຂດເສຖກິຈ ພິເສດສາມຫຼ່ຽມຄໍາໄດ້ແລ້ວ ຈໍານວນນຶ່ງ ແຕ່ມາຮອດປັດຈຸບັນ ພັດຍັງມີຜູ້ຖືກເຄາະຮ້າຍ ອີກເປັນຈໍານວນຫຼາຍ ຍັງບໍ່ທັນໄດ້ຮັບການຊ່ອຍເຫຼືອ.

ດັ່ງຄົນງານລາວ ທີ່ເຄີຍຖືກຕົວະ ໄປເຮັດວຽກຢູ່ເຂດເສຖກິຈ ພິເສດສາມຫຼ່ຽມຄໍາ ແລະຫາກໍຖືກຊ່ອຍ ອອກມາ ໃນໄລຍະບໍ່ດົນນີ້ ທ່ານນຶ່ງ ກ່າວຕໍ່ວິທຍຸ ເອເຊັຽເສຣີ ໃນມື້ດຽວກັນນີ້ວ່າ:

“ເຮົາກໍໍເປັນຄົນນອກຄືກັນ ແຕ່ວ່າສະພາບຮວມກໍພໍຄ່ອຍຢູ່ ແຕ່ວ່າສະພາບໃນກໍບໍ່ຢາກກ່ຽວຂ້ອງ ກັບເຂົາແຫຼະ ເພາະວ່າເຮົາກໍຢ້ານເອີ່ ເຣື່ອງຂອງເຂົາ ເຮົາກໍບໍ່ຢາກຫຍຸ້ງຫັ້ນນ່າ ແຕ່ມັນກໍມີຢູ່ແຫຼະ ມັນກໍທັມມະດາຢູ່ແຫຼະ ມັນຕ້ອງມີ ແຕ່ວ່າບັນຫາທີ່ແບບ ມັນເກີດຮອດໃນລາວ ສ່ວນຫຼາຍມັນໃຫຍ່ເນາະ ໃນກາສິໂນມັນໃຫຍ່ຫັ້ນແຫຼະ ແຕ່ບໍ່ຮູ້ຄົນຂ້າງໃນຫັ້ນນ່າ ເຮົາກໍບໍ່ຮູ້ເຂົາໄປຢູ່ແຖວໃດຫັ້ນນ່າ ກວດບໍ່ໄດ້ເດ້ ເລີຍບໍ່ຮູ້ວ່າຄົນມັນຢູ່ໃສເດ້.”

ທີ່ຜ່ານມາ ຜູ້ທີ່ຖືກຕົວະໄປເຮັດວຽກດັ່ງກ່າວນີ້ ສ່ວນຫຼາຍພັດປະສົບ ຄວາມຫຍຸ້ງຍາກ ໃນການຂໍຄວາມຊ່ອຍເຫຼືອ ຍ້ອນຖືກນາຍຈ້າງຊາວຈີນ ຍຶດໂທຣະສັບ, ໜັງສືເດີນທາງ ແລະກັກຂັງຢູ່ພາຍໃນອາຄານ ແຕ່ຢ່າງໃດກໍຕາມ ຄົນງານຕ່າງປະເທດ ພັດປະສົບຄວາມຫຍຸ້ງຍາກ ຫຼາຍກ່ອນ ຍ້ອນບໍ່ສາມາດສື່ສານ ເພື່ອຂໍຄວາມຊ່ອຍເຫຼືອ ເປັນພາສາລາວໄດ້.

ດັ່ງຄົນງານລາວ ຜູ້ມີປະສົບການຖືກຕົວະ ໄປເຮັດວຽກ ເປັນສະແກມເມີ້ຣ໌ ຜູ້ດຽວກັນນີ້ ກ່າວວ່າ:

“ສົມມຸດວ່າ ຄົນຈີນເຮັດໃຫ້ຄືເຮົາເນາະ ເຮົາຕ້ອງແຈ້ງສະເພາະກິຈ ຢູ່ໃນພື້ນທີ່ແມ່ນແຫຼະ ແຕ່ວ່າເຂົາບໍ່ຮູ້ຫັ້ນນ່າ ຖ້າໂທໄປຫາໄທຍ ຫຼືວ່າໂທໄປຫາສະຖານທູຕ ຢູ່ຕ່າງປະເທດຫັ້ນນ່າ ຢູ່ປະເທດໂຕເອງ ມັນກໍຊ່ອຍເຫຼືອບໍ່ໄດ້ຢູ່ແລ້ວ ມັນກໍກະທັນຫັນມັກກໍຜ່ານໄປວັນນຶ່ງ ເຂົາກໍອອກຂາຍໄປແລ້ວ ເຂົາຕີເຂົາກໍຕີໄປແລ້ວ ມັນລໍາບາກຫັ້ນນ່າ ແຕ່ເຮົາກໍເຮັດໄປໃຫ້ເຂົາຫັ້ນແຫຼະ ຄົນຕ່າງປະເທດກໍຄົນຄືກັນ ເຂົາເປັນມະນຸສຄືກັນຫັ້ນແຫຼະ ແຕ່ວ່າຂໍໃຫ້ເຂົາຫັ້ນ ແຈ້ງສະເພາະກິຈພື້ນທີ່.”

ສໍາລັບຄົນງານມາເລເຊັຽທີ່ຖືກຕົວະໄປເຮັດວຽກ ຢູ່ພາຍໃນປະເທດລາວ ແລະຕ້ອງການຮັບການຊ່ອຍເຫຼືອນັ້ນ ພວກເຂົາເຈົ້າ ຈະຕ້ອງຕິດຕໍ່ແລະແຈ້ງຣາຍລະອຽດ ໄປຍັງປະເທດຕົ້ນທາງ ເພື່ອໃຫ້ທາງການຂອງປະເທດໂຕເອງ ປະສານງານມາຍັງທາງການລາວ ແລະພາກສ່ວນທີ່ກ່ຽວຂ້ອງ ເພື່ອດໍາເນີນການຊອກຫາໂຕຜູ້ຖືກເຄາະຮ້າຍ ແລະດໍາເນີນການທາງກົດໝາຍ ຕໍ່ຜູ້ກະທໍາຄວາມຜິດ.

ດັ່ງເຈົ້າໜ້າທີ່ ທີ່ກ່ຽວຂ້ອງຜູ້ ບໍ່ປະສົງອອກຊື່ ແລະສຽງ ທ່ານຶ່ງ ກ່າວວ່າ:

“ໃນໄລຍະຜ່ານມາ ເຫັນທາງສະຖານທູຕ ປະສານງານມາຍັງກະຊວງຕ່າງປະເທດ ຫຼືກົມຕໍາຣວດສາກົລ ເປັນເອກກະສານທາງການວ່າ ໃຫ້ຊ່ອຍເຫຼືອຄົນງານມາເລເຊັຽ ທີ່ໄປເຮັດວຽກຢູ່ແຂວງບໍ່ແກ້ວໃຫ້ອອກມາ ຊິໃຫ້ການຊ່ອຍເຫຼືອຕລອດ ເຫັນມີການແຈ້ງມາເລື້ອຍໆ ບໍ່ຮູ້ວ່າເຂົ້າທາງໃດ ແຕ່ຄັນຖ້າວ່າເຂົ້າມາ ສ່ວນຫຼາຍຈະເປັນສະແກມເມີ້ ຢູ່ແຂວງບໍ່ແກ້ວ.”

ກ່ຽວກັບເຣື່ອງນີ້ ວິທຍຸ ເອເຊັຽເສຣີ ໄດ້ພຍາຍາມຕິດຕໍ່ໄປຍັງ ສະຖານທູຕມາເລເຊັຽ ປະຈໍາປະເທດລາວ ຜ່ານທາງອີເມລ ເພື່ອສອບຖາມຕາມຂໍ້ມູນ ຈາກສະມາຊິກໃນຄອບຄົວ ຂອງຜູ້ຖືກເຄາະຮ້າຍ ເຊື່ອວ່າ ມີຄົນງານມາເລເຊັຽປະມານ 700 ຄົນ ຖືກກັກໂຕ ຢູ່ພາຍໃນປະເທດລາວ, ຖ້າຫາກທາງເອກອັກຄະຣາຊທູຕມາເລເຊັຽ ໄດ້ຮັບຮູ້ເຣື່ອງດັ່ງກ່າວນີ້ແລ້ວ ພາກສ່ວນທີ່ກ່ຽວຂ້ອງ ຈະດໍາເນີນການແນວໃດ ໃນລໍາດັບຕໍ່ໄປ ເພື່ອໃຫ້ຄວາມຊ່ອຍເຫຼືອ ຊາວມາເລເຊັຽກຸ່ມດັ່ງກ່າວນີ້ ຮວມເຖິງການເປີດເຜີຍ ຂະບວນການ ການຕົວະຕົ້ມດັ່ງກ່າວນີ້ ໃຫ້ສັງຄົມຮັບຮູ້ຕື່ມ ແຕ່ທາງສະຖານທູຕ ມາເລເຊັຽ ປະຈໍາປະເທດລາວ ຍັງບໍ່ທັນໃຫ້ຄວາມກະຈ່າງແຈ້ງ ໃຫ້ທັນທີເທື່ອ.

ທາງດ້ານອົງການຈັດຕັ້ງ ພາກປະຊາສັງຄົມ ທີ່ເຮັດວຽກກ່ຽວກັບ ສິດທິຄົນງານ ພາຍໃນປະເທດໄທຍ ແລະເຄີຍຕິດຕາມ ປະເດັນຄົນງານລາວ ຖືກຄ້າມະນຸສ ຢູ່ປະເທດມາເລເຊັຽ ໄດ້ກ່າວຕໍ່ວິທຍຸ ເອເຊັຽເສຣີ ເມື່ອວັນທີ່ 29 ກັນຍາ 2022 ນີ້ວ່າ ທີ່ຜ່ານມາໄດ້ດໍາເນີນການ ຕິດຕາມ ແລະໃຫ້ຄວາມຊ່ອຍເຫຼືອ ຄົນງານມາເລເຊັຽ ທີ່ຖືກນາຍໜ້າຊາວຈີນ ແລະຊາວໄທຍ ຕົວະວ່າ ຈະໃຫ້ມາເຮັດວຽກ ເປັນກັມມະກອນ ຢູ່ພາຍໃນປະເທດໄທຍ ແຕ່ພັດສົ່ງອອກ ໄປເຮັດວຽກເປັນສະແກມເມີ້ຣ໌ ຢູ່ປະເທດກັມພູຊາ ສ່ວນຄົນງານມາເລເຊັຽ ທີ່ຖືກຕົວະ ໄປເຮັດວຽກເປັນສະແກມເມີ້ຣ໌ ຢູ່ປະເທດລາວນັ້ນ ຍັງບໍ່ທັນມີຂໍ້ມູນທີ່ຄັກແນ່ ແຕ່ຈະເລັ່ງດໍາເນີນການ ປະສານງານ ໄປຍັງພາກສ່ວນທີ່ກ່ຽວຂ້ອງ ເພື່ອຕິດຕາມ ແລະໃຫ້ການຊ່ອຍເຫຼືອ ຕື່ມ.