ເຈົ້າໜ້າທີ່ ກຳລັງດຳເນີນການຊ່ວຍເຫຼືອ ເດັກນ້ອຍລາວ ຢູ່ກາສິໂນຈີນ ໃນພະມ້າ

ຄວາມຄືບໜ້າ ເຣີື່ອງການຊ່ອຍເຫຼືອເດັກນ້ອຍລາວ ທີ່ຍັງຕິດຄ້າງ ຢູ່ໂຮງກາສິໂນຂອງຈີນ ໃນເມືອງເມັຽວະດີ ປະເທດພະມ້າ ເຊິ່ງປັດຈຸບັນ ທາງການລາວ ແລະພາກສ່ວນທີ່ກ່ຽວຂ້ອງ ກໍາລັງດໍາເນີນການສົ່ງຂໍ້ມູນ ຈໍານວນເດັກນ້ອຍລາວ ທີ່ຕິດຄ້າງ ແລະ ບ່ອນທີ່ເຂົາເຈົ້າຖືກກັກຂັງນັ້ນ ໃຫ້ກັບຝ່າຍທາງການພະມ້າ, ອີງຕາມຄວາມເວົ້າ ຂອງເຈົ້າໜ້າທີ່ ທີ່ກ່ຽວຂ້ອງທ່ານນຶ່ງ ທີ່ໄດ້ບອກກັບນັກຂ່າວ ວິທຍຸ ເອເຊັຽ ເສຣີ ໃນວັນທີ 30 ພຶສພາ 2023 ວ່າ ກອງປະຊຸມ ລະຫວ່າງ ທາງການລາວ ແລະ ສະຖານທູດພະມ້າ ປະຈໍານະຄອນຫຼວງວຽງຈັນ ໄດ້ສໍາເຣັດໄປແລ້ວ ໃນວັນທີ 25 ພຶສພາ ທີ່ຜ່ານມາ.

ສໍາລັບບັນດາ ພໍ່ແມ່ຜູ້ປົກຄອງ ຂອງເດັກນ້ອຍ ຢູ່ແຂວງຫຼວງນໍ້າທາ ທີ່ຮູ້ຂ່າວຄວາມຄືບໜ້າ ດັ່ງກ່າວນີ້ ເພິ່ນກໍຮູ້ສຶກດີໃຈ ທີ່ໄດ້ຍິນຂ່າວດີແບບນີ້.

ດັ່ງແມ່ຂອງເດັກນ້ອຍຄົນທີ 1 ທີ່ລູກຊາຍຖືກເຄາະຮ້າຍ ແລະຍັງຕິດຄ້າງ ຢູ່ປະເທດພະມ້າ ໄດ້ກ່າວຕໍ່ວິທຍຸ ເອເຊັຽ ເສຣີ ໃນວັນທີ 31 ພຶສພາ 2023 ວ່າ:

“ຄວາມຮູ້ສຶກ ຂອງແມ່ ກະດີໃຈຫຼາຍ ທີ່ວ່າ ເອີ່ ເຂົາຈະໄປຊ່ວຍລູກຂອງພວກພໍ່ ຂອງພວກແມ່ ເນາະ. ພໍ່ແມ່ກໍດີໃຈ ພູມໃຈ ທີ່ວ່າເອີ່ ເຈົ້າໜ້າທີ່ທາງນີ້ ຊິໄປຊ່ວຍເນາະ ຄັນເຂົາໄປຊ່ວຍແທ້ ຫັ້ນນ່າ, ແຕ່ວ່າ ບໍ່ແມ່ນວ່າເອີ່ ຈັ່ງຊັ້ນຈັ່ງຊີ້ເນາະ ຄັນເຂົາໄປຊ່ວຍແທ້ ກະດີໃຈນໍາຫັ້ນແຫຼະ.”

ແມ່ຂອງເດັກນ້ອຍ ຄົນທີ 2 ທີ່ລູກຊາຍຖືກເຄາະຮ້າຍ ແລະຍັງຕິດຄ້າງຢູ່ໃນປະເທດພະມ້າ ເຊັ່ນກັນ ແລະໄດ້ຮູ້ຂ່າວ ຄວາມຄືບໜ້າ ຈາກທາງການລາວ ເຣື່ອງກອງປະຊຸມ ທີ່ຫາກໍສໍາເຣັດລົງ ໃນວັນທີ 25 ພຶສພາຜ່ານມາ ກໍກ່າວຕໍ່ວິທຍຸ ເອເຊັຽ ເສຣີ ໃນມື້ດຽວກັນນີ້ວ່າ: ແມ່ດີໃຈສຸດ ທີ່ມີຄວາມຄືບໜ້າແບບນີ້ ເປັນແນວໃດ ກໍຂໍໃຫ້ທາງການເພິ່ນ ເລັ່ງດ່ວນໃຫ້ອີກແດ່.

ໃນຂະນະທີ່ ແມ່ຂອງເດັກນ້ອຍຍິງສາວ ຜູ້ນຶ່ງ ທີ່ລູກສາວຖືກເຄາະຮ້າຍ ແລະຍັງຕິດຄ້າງຢູ່ພະມ້າ ເຊິ່ງໄດ້ຮູ້ຂ່າວຄວາມຄືບໜ້າ ຈາກທາງການລາວ ເຣື່ອງການດໍາເນີນການ ຊ່ອຍເຫຼືອເດັກນ້ອຍລາວ ທີ່ຍັງຄ້າງຢູ່ປະເທດພະມ້າ ກໍກ່າວໃນທໍານອງດຽວກັນວ່າ:

“ແມ່ດີໃຈທີ່ສຸດເລີຍ ທີ່ລູກສົ່ງຂ່າວມາແນວນີ້ ໃຫ້ແມ່ຟັງ ເພາະວ່າ ລູກສາວແມ່ນີ້ ບໍ່ໂທຫາແມ່ ໄດ້ 5-6 ເດືອນແລ້ວ ຖ້າວ່າ ລູກຍັງໄດ້ຍິນຂ່າວ ການຄືບໜ້າແນວໃດ ກະສົ່ງຂ່າວມາໃຫ້ແມ່ແດ່ ດີໃຈສຸດໆເລີຍ ດຽວນີ້ຫັ້ນ ສາທຸ ໃຫ້ເປັນຄວາມຈິງແທ້ເດີ້.”

ເຖິງຢ່າງໃດກໍຕາມ ສໍາລັບຜູ້ເປັນພໍ່ ທີ່ລູກຊາຍຖືກເຄາະຮ້າຍ ແລະຍັງຕິດຄ້າງຢູ່ປະເທດພະມ້າ ກໍຢາກຂໍຝາກຄໍາຮ້ອງຮຽນນີ້ ເຖິງທາງການລາວ ວ່າ:

“ດຽວນີ້ຫັ້ນ ທາງພໍ່ແມ່ຜູ້ປົກຄອງນີ້ ຂໍໃຫ້ທາງຣັຖບານລາວເຮົານີ້ເນາະ ສົມທົບ ປຶກສາຫາລື  ກົມກຽວ ກັບຣັຖບານພະມ້ານີ້ ຫຼືວ່າ ອົງການທີ່ກ່ຽວຂ້ອງ ຂອງພະມ້ານີ້ ເອົາເດັກນ້ອຍ ຊາວແຂວງຫຼວງນໍ້າທາ ຂອງພວກເຮົາ ຈໍານວນ 30 ກວ່າຄົນນີ້ ອອກມາດ້ວຍຄວາມໄວ ເພາະວ່າທາງພໍ່ທາງແມ່ ກໍເປັນຫ່ວງເປັນໄຍ ຈົນວ່ານອນບໍ່ຫຼັບ ຮ້ອງໆໄຫ້ໆ ຈັກຊິເຮັດແນວໃດ ບໍ່ມີຜູ້ໃດຊິເພິ່ງພາອາສັຍ ແລ້ວກໍຂໍ້ໃຫ້ທາງຂັ້ນເທິງ ຊ່ວຍພໍ່ແມ່ ຜູ້ປົກຄອງນີ້ແດ່ເນາະ ຂໍນໍາແທ້ໆເດີ້.”

ພໍ່ຂອງເດັກນ້ອຍຊາຍຄົນນີ້ ກ່າວອີກວ່າ ຕາມທີ່ໄດ້ລົມກັບລູກຊາຍວ່າງບໍ່ດົນມານີ້ ລູກກໍໄດ້ເລົ່າສະພາບການເຮັດວຽກ ຢູ່ໃນໂຮງກາສິໂນ ນັ້ນໃຫ້ຟັງນໍາດ້ວຍ:

“ເຂົາເຈົ້າກະຖືກກັກຂັງ ຢູ່ໃນອັນນ່າ ກາສິໂນໂກໄຊ (ກະຊາຍ) ຢູ່ປະເທດພະມ້າ ຖ້າວ່າ ຜູ້ໃດເປີດບິນໄດ້ນິ່ ບໍ່ເປັນຫຍັງ ສົມມຸດວ່າ ດຽວນີ້ນິ່ ເຂົາເປີດບິນບໍ່ໄດ້ນ່າ ເດັກນ້ອຍບາງຄົນ ເປີດບິນບໍ່ໄດ້ນິ່ ຖືກເຂົາທຸບຕີທໍຣະມານ ຢ່າງຮ້າຍແຮງທີ່ສຸດ ເອົາໄຟຟ້າຊ໊ອດກະມີ ບາງຄົນກໍ ເອົານໍ້າໃສ່ກະຕຸກ 20 ລິດຫັ້ນ ໃຫ້ເປ້ (ໃຫ້ແບກ) 5 ເຖິງ 6 ຊົ່ວໂມງ ດຽວນີ້ເດັກນ້ອຍນັ້ນເກາະ ຖືກທໍຣະມານໜັກທີ່ສຸດ ຢູ່ໃນກາສິໂນ ໂກໄຊ (ກະຊາຍ) ຫັ້ນນ່າ.”

ພ້ອມດຽວກັນນີ້ ແມ່ຂອງເດັກນ້ອຍຊາຍອີກຄົນນຶ່ງ ທີ່ຖືກເຄາະຮ້າຍ ແລະຍັງຕິດຄ້າງຢູ່ປະເທດພະມ້າ ກໍຂໍຝາກເຖິງທາງການລາວ ເຣື່ອງການຊ່ອຍເຫຼືອເດັກນ້ອຍລາວ ທີ່ຍັງຄ້າງຢູ່ພະມ້ານັ້ນວ່າ:

“ເຮົາກໍເປັນປະຊາຊົນທັມມະດາ ເຮົາບໍ່ຮູ້ແນວຊິເຂົ້າໄປຊ່ວຍລູກເຮົາ ກະມີແຕ່ອາໃສທາງຂັ້ນເທິງ ທາງເຈົ້າໜ້າທີ່ຫັ້ນແຫຼະ ທີ່ວ່າ ຈະຊ່ວຍລູກ ພວກແມ່ໆໄດ້ຫັ້ນນ່າ ແນວໃດກະຂໍຮ້ອງຂໍທຸກ ນໍາເຈົ້າໜ້າທີ່ເດີ້ ຝາກຝັງເດີ້ ໃຫ້ຊ່ວຍລູກຂອງພວກແມ່ນີ້ ອອກມາໃຫ້ແດ່ ຊ່ວຍໄດ້ໄວ ທໍ່ໃດກະແຮງດີເນາະ.”

ສ່ວນເດັກນ້ອຍລາວ ທີ່ຍັງຕິດຄ້າງຢູ່ພະມ້າ ກໍໄດ້ລົມໃຫ້ນັກຂ່າວວິທຍຸ ເອເຊັຽ ເສຣີ ຟັງ ໃນວັນທີ 28 ພຶສພາ 2023 ວ່າ ຕອນນີ້ ຄົນຈີນ ເຣີ່ມກັບມາລົງໂທດ ພວກນ້ອງອີກແລ້ວ ເທື່ອນີ້ ເຂົາໃຫ້ພວກນ້ອງແບກຕຸກນໍ້າໄປໆມາໆ 10 ຊົ່ວໂມງ ບໍ່ໄດ້ຢຸດພັກຜ່ອນເລີຍ ໃຜຫາລູກຄ້າ ບໍ່ໄດ້ ແມ່ນຈະຖືກລົງໂທດແບບນີ້ ຖ້າໃຜຫາລູກຄ້າໄດ້ ກະບໍ່ຖືກລົງໂທດ ຢາກໃຫ້ທາງການລາວ ຊ່ອຍເຫຼືອພວກນ້ອງ ອອກໄປໄວໆແດ່ ເພາະພວກນ້ອງ ລໍຖ້າມາດົນແລ້ວ.