ສະພາແຫ່ງຊາດປິດປະຊຸມ

ມະນີຈັນ
2016-11-20
Share
F-pany ຍານາງ ປານີ ຢ່າທໍ່ຕູ້ ປະທານ ສະພາແຫ່ງຊາດ ສປປ ລາວ
Screen captured from Vientiane Times Video

ໃນ​ຕອນ​ບ່າຍ ​ຂອງວັນ​ທີ 18 ພຶ​ສ​ຈິ​ກາ 2016 ນີ້, ກອງ​ປະ​ຊຸມ ​ສ​ມັຍ​ສາ​ມັນ ​ເທື່ອ​ທີ 2 ຂອງ ​ສະ​ພາ ​ແຫ່ງ​ຊາ​ຕ ​ຊຸດ​ທີ 8 ໄດ້​ປິດ​ລົງ​​ ພາຍ​ໃຕ້​ການ ​ເປັນ​ປະ​ທານ​ຂອງ ຍາ​ນາງ ປາ​ນີ ຢ່າ​ທໍ່​ຕູ້, ປະ​ທານ ​ສະ​ພາ ​ແຫ່ງ​ຊາຕລາວ. ດັ່ງ ຍາ​ນາງ ​ໄດ້​ກ່າວ​ປິດ ກອງ​ປະ​ຊຸມ ໃນ​ຕອນນຶ່ງ ວ່າ:

"ມາຮອດນີ້ ໃນນາມປະທານ ກອງປະຊຸມ ຂ້າພະເຈົ້າຂໍປະກາດອັດກອງປະຊຸມມັຍສາມັນ ເທື່ອທີ 2 ຂອງ ສະພາແຫ່ງຊາຊຸດທີ 8 ຢ່າງ ເປັນທາງ ການ ນັບແຕ່ເວລານີ້ເປັນຕົ້ນໄປ, ຂໍຂອບໃຈ".

ໃນ​ຕອນ​ຕົ້ນ​ຂອງ ກອງ​ປະ​ຊຸມ, ມີຫລາຍບັນ​ຫາ ​ທີ່ສຳ​ຄັນ ​ໄດ້​ຖືກ​ ຍົກຂຶ້ນ​ມາ​ ຫາລື ເປັນຕົ້ນ ບັນ​ຫາ ​ການ​ສໍ້​ຣາ​ສ ​ບັງຫລວງ, ​ການ​ນຳ​ໃຊ້ ​ສານ​ເຄ​ມີ ​ໃນ​ສວນ​ກ້ວຍ​ຂອງ​ ນັກ​ລົງ​ທຶນ ​ຈີນ ທີ່ສ້າງ ຜົ​ລ​ກະ​ທົບ​ ຕໍ່ ສິ່ງ​ແວດລ້ອມ ແລະ ຜູ້ຄົນ​, ການ​ເບີກ​ຈ່າຍ ​ເງິນ​ເດືອນ​​ ພະ​ນັກ​ງານ ​ຄ​ຣູ ​​ຊັກ​ຊ້າ, ​ການ​ເອົາ ​ເສັ້ນທາງຫລວງ ​ໃຫ້​ ເອກ​ຊົນ​ສັມ​ປະ​ທານ, ບັນ​ຫາ ​ຣາ​ຄາ​ສິນ​ຄ້າ ​ຖີບ​ໂຕ​ສູງຂຶ້ນ ບໍ່​ສົມ​ຄູ່​ກັບ ​ເງິນ​ເດືອນ ແລະ ບັນ​ຫາ​ອື່ນໆ ຊຶ່ງ ທ່ານ​ ທອງລຸນ ສີ​ສຸ​ລິດ ນາ​ຍົກ ​ຣັ​ຖ​ມົນຕຣີ​ ໃຫ້​ຄຳ​ໝັ້ນ ​ສັນ​ຍາ ​ວ່າ ຄະນະ ​ຣັ​ຖ​ບານ ຂອງ​ທ່ານ ​ຈະ​ມີ​ມາ​ຕ​ການ ແກ້ໄຂ ພິເສດ ແມ່ນຈະ ຮັບ​ປະ​ກັນ ​ການ​ເບີກ​ຈ່າຍ ເງິນ​ເດືອນ​ ພະ​ນັກ​ງານ ​ຣັຖກອນ ​ໃນ ​ທົ່ວ​ປະ​ເທດ, ໂດຍ​ສະ​ເພາະ​​ພະ​ນັກ​ງານ ​ຄ​ຣູ ໃຫ້ຕ​ຣົງ​ເວ​ລາ ​ທຸກ​ເດືອນ ແລະ ທັງວ່າຈະໃຫ້ ມີ​ການ​ປະຢັ​ດ ຕ້ານ ​ການ​ຟຸມ​ເຟືອຍ​ ໃນ​ອົງ​ການ ​ຈັດ​ຕັ້ງ​ຣັ​ຖ​ ທຸກ​ຂັ້ນ, ​ເອົາ​ມາ​ຕ​ການ ​ອັນ​ເດັດ​ຂາດ ​ຕໍ່​ການ​ຣະ​ເມີດ ​ວິ​ນັຍ ​ການ​ເງິນ.

ກ່ຽວກັບເຣຶ່ອງດັ່ງກ່າວ ປະ​ຊາ​ຊົນ​ລາວ​ ຈຳ​ນວນນຶ່ງ ທີ່​ຕິດ​ຕາມ ກອງ​ປະ​ຊຸມ ​ສະ​ພາ ​ແຫ່ງ​ຊາ​ຕ​ ກໍ່ເຫັນວ່າ ເປັນ​ເຣື້ອງ​ທີ່​ດີ ​ທີ່ ຣັ​ຖ​ບານ ແລະ ສະ​ພາ ​ແຫ່ງ​ຊາຕ ​ຈະຮ່ວມ ກັນ ​ແກ້​ບັນ​ຫາ ​ຕ່າງໆ, ດັ່ງ ປະຊາຊົນ ທ່ານນຶ່ງ ເວົ້າວ່າ:

"ຄືຢາກໃຫ້ເພິ່ນຈິງຈັງຫັ້ນແຫຼະ ກ່ຽວກັບການສໍ້ຣາບັງຫຼວງ ນີ້ນ່າ ເພາະວ່າ ມັນຊິມີ ຜົລກະທົບ ຕໍ່ການເບີກຈ່າຍ ເງິນເດືອນຂອງພະນັກງານໄດ໋. ລະກະອີກຢ່າງນຶ່ງ, ເງິນັງກະຊິບໍ່ມີໃນການສ້ອມແຊມປະເທຊາເຮົາ, ເປັນຕົ້ນ ກະພວກນົນຫົນທາງ ນີ້ແຫຼະ ກະຍັງມີ ຫຼາຍໝູ່ບ້ານ ຫຼາຍແຂວງທີ່ວ່າມັນ ຂາດຫົນທາງ ທີ່ວ່າໄດ້ມາຖານໄດ້ຄຸນ​ນະພາບ ໜ້ອຍນຶ່ງ, ຫັ້ນນ່າ".

ໃນຂນະດຽວກັນ ຊາວ​ລາວ​ອີກ​ ທ່ານນຶ່ງ ທີ່​ແຂວງ ​ສວັນ​ນະ​ເຂດ ​ມີ​ຄວາມ​​ເຫັນ​ວ່າ ການ​ ສະ​ແດງ​ ​ຄວາມ​ຄິດ​ເຫັນ ​ຂອງ ​ປະ​ຊາ​ຊົນ​ລາວ​ ມີ​ຄວາມ​ ສຳ​ຄັນຫລາຍ ແລະ ຢາກ​ໃຫ້ ​ພາກ​ຣັ​ຖ ​ແກ້​ໄຂ ​ບັນ​ຫານີ້ ເພາະ​ ໃນ​ຣະ​ຍະ ​ຜ່ານ​ມາ ແມ່ນຍັງ​ຖືກ ​ຈຳ​ກັດ ​ຢູ່.

"ຈຸດສຳຄັນທີ່ສຸດໃນນາມນ້ອງເປັນ ປະຊາຊົນ ນ້ອງກະມີ ແຕ່ວ່າ ນະໂຍບາຍ ຕ່າງໆເນາະ ທາງຣັບານ ເພິ່ນມີເນາະ ກະຖືວ່າກະມີບາງຢ່າງໃນໜ້ອຍນຶ່ງ ກະຍັງບໍ່ທັນເປີດກວ້າງຈັ່ງຊີ້ນ່າອ້າຍ. ກະຢາກໃຫ້ເພິ່ນແກ້ໄຂໃນຈຸດນີ້".

ກອງ​ປະ​ຊຸມ​ສະ​ພາ​ແຫ່ງ​ຊາ​ຕ ​ເທື່ອນີ້ ໄດ້ດຳເນີນ​ໄປ ​ເປັນ​ເວ​ລາ 20 ມື້ ເຣີ່ມແຕ່ ວັນທີ 24 ຕຸລາ ຫາ 18 ພຶສຈິກາ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ