ມີການນຳສິນຄ້າ ຂອງເກົາຫລີເໜືອ ວາງຂາຍ ຢູ່ສູນການຄ້າ ໃນ ສປປ ລາວ

ສິນຄ້າເກົາຫລີເໜືອ ທີ່ວາງຂາຍຢູ່ສູນການຄ້າລາວ ແມ່ນຂັດກັບມະຕິລົງໂທດ ຂອງສະຫະປະຊາຊາຕ. ສິນຄ້າບາງຢ່າງ ຈາກປະເທດເກົາຫລີເໜືອ ຖືກນໍາມາວາງຂາຍ ຢູ່ຮ້ານຊູເປີມາເກັດ ໃນສູນການຄ້າພາກຊັນລາວ (Parkson Laos) ທີ່ຕັ້ງຢູ່ໃຈກາງນະຄອນຫລວງວຽງຈັນ ເປັນຕົ້ນ ຊາສມຸນໄພເກົາຫລີເໜືອ, ໂສມເກົາຫລີເໜືອ ແລະອື່ນໆ ຊຶ່ງອີງຕາມຄໍາເວົ້າ ຂອງພະນັກງານຢູ່ສູນການຄ້າ ພາກຊັນນາງນຶ່ງ ຕໍ່ວິທຍຸ ເອເຊັຽ ເສຣີ ໃນມື້ວັນທີ 1 ສິງຫາ ນີ້ ແລ້ວແມ່ນວ່າ ນາງບໍ່ແນ່ໃຈກ່ຽວກັບເຣື່ອງທີ່ວ່ານີ້.

“ອັນນີ້ບໍ່ແນ່ໃຈຄືກັນ ເຈົ້າ. ຊາສມຸນໄພເຮົາ ມັນກະມີຫລາຍແບບ, ຂອງລາວກະມີ ຕ້ອງໄດ້ຖາມທາງຜແນກເຂົາເຈົ້າ.”

ຊາສມຸນໄພ ທີ່ນໍາເຂົ້າມາຈາກປະເທດເກົາຫລີເໜືອ ໄດ້ຖືກນໍາມາວາງຂາຍ ໃນສູນການຄ້າດັ່ງກ່າວ ຕັ້ງແຕ່ເດືອນສິງຫາ 2020 ເປັນຕົ້ນມາ ໂດຍເວົ້າວ່າ ເປັນຊາສມຸນໄພເພື່ອສຸຂພາບ, ແຕ່ບໍ່ຮູ້ຄັກແນ່ວ່າ ຊານັ້ນລາຄາເທົ່າໃດ ແລະນໍາເຂົ້າຫລາຍປານໃດໃນແຕ່ລະເດືອນ, ອີງຕາມຂໍ້ມູນຈາກເຟສບຸກຄ໌ ເພຈ  Parkson Laos.

ຜູ້ທີ່ຢູ່ໃນວົງການ ຊື້-ຂາຍຊາ ຢູ່ລາວນາງນຶ່ງ ເວົ້າໃນມື້ດຽວກັນນັ້ນ ເຖິງຊາສມຸນໄພ ແລະໂສມ ທີ່ນໍາຈາກປະເທດເກົາຫລີເໜືອ ເຂົ້າມານັ້ນວ່າ ຍັງບໍ່ທັນເປັນທີ່ນິຍົມ ຂອງຜູ້ບໍຣິໂພກໃນລາວເທື່ອ, ຫລາຍຄົນກໍຮູ້ພຽງແຕ່ວ່າ ແມ່ນຜລິຕພັນຈາກປະເທດເກົາຫລີເໜືອ ແລະກໍມີການສົ່ງໄປຂາຍຫລາຍປະເທດ.

“ບໍ່ເຄີຍກິນ ແລ້ວກະບໍ່ເຄີຍເຫັນ, ບໍ່ເຄີຍໄດ້ຍິນ ແລະບໍ່ເຄີຍເຫັນເນາະ ເພາະວ່າເປັນຄົນທີ່ວ່າບໍ່ຄ່ອຍກິນ. ໄດ້ຍິນເຂົາເຈົ້າກະຊິຂາຍ, ສົ່ງຂາຍຕ່າງປະເທດຢູ່ຕິເບາະ.”

ນອກຈາກສູນການຄ້າ ທີ່ວ່ານັ້ນແລ້ວ ຢູ່ນະຄອນຫລວງວຽງຈັນ ກໍຍັງມີຮ້ານອາຫານເກົາຫລີເໜືອ ທີ່ມີຊື່ວ່າ ຮ້ານອາຫານ ພຽງຢາງ (Pyongyang Restaurant) ຊຶ່ງຕັ້ງຢູ່ຖນົນໜອງບອນ ເມືອງໄຊເສດຖາ, ເປັນຮ້ານອາຫານ ທີ່ຈົດທະບຽນວິສາຫະກິຈ ຢ່າງຖືກຕ້ອງ ມາຕັ້ງແຕ່ເດືອນມົກກະຣາ 2010 ແລະກໍເປັນຮ້ານ ທີ່ໄດ້ນໍາເອົາຊາວເກົາຫລີເໜືອ ເຂົ້າມາເຮັດວຽກ ເປັນພະນັກງານປະຈໍາຮ້ານ.

ດັ່ງພະນັກງານ ຊາວເກົາຫລີເໜືອຄົນນຶ່ງ ເວົ້າເປັນພາສາລາວສັ້ນໆ ເຖິງເວລາເປີດ ແລະປິດຮ້ານນັ້ນວ່າ:

“ເອີ! ແມ່ນແລ້ວ. ເອີ!  ຢູ່ນີ້ກະເປີດ 11 ໂມງຫາຕອນແລງ 9 ໂມງ.”

ພ້ອມດຽວກັນນັ້ນ ພະນັກງານນໍາທ່ຽວນາງນຶ່ງ ກໍເວົ້າຕໍ່ວິທຍຸ ເອເຊັຽ ເສຣີ ເຖິງຮ້ານອາຫານເກົາຫລີເໜືອແຫ່ງນີ້ວ່າ ຍັງບໍ່ທັນເປັນທີ່ນິຍົມຂອງຊາວລາວ ແຕ່ຢ່າງໃດ, ສ່ວນຫລາຍມີແຕ່ຊາວຕ່າງປະເທດ ທີ່ໄປອຸດໜູນ ສັ່ງອາຫານໃນຮ້ານນັ້ນ ໂດຍສະເພາະແມ່ນກຸ່ມນັກທ່ອງທ່ຽວ ວຽດນາມ ທີ່ມັກພາກັນເຂົ້າໄປກິນເປັນກຸ່ມໃຫຍ່ ເນື່ອງຈາກອາຫານເກົາຫລີເໜືອ ບາງປະເພດ ທີ່ຂາຍໃນຮ້ານນີ້ ມີລັກສະນະໃກ້ຄຽງກັບອາຫານວຽດນາມ.

“ແມ່ນໆ ຢູ່ແຖວທາດຫລວງຫັ້ນແຫລະ. ກະເຄີຍໄປກິນຢູ່ ກະໂອເຄຢູ່ໃດລະ. ຄົນວຽດນາມກະໄປກິນຫລາຍໆ. ເປັນອາຫານວຽດນາມ ມັນກະຫລາຍ ມັນກະໂອເຄ. ຄົນວຽດກະໄປກິນຫລາຍ ທົວຣ໌ວຽດ.”

ນອກຈາກຮ້ານອາຫານ ທີ່ວ່ານີ້ແລ້ວ ຢູ່ນະຄອນຫລວງວຽງຈັນ ຍັງມີຮ້ານອາຫານເກົາຫລີເໜືອ ອີກແຫ່ງນຶ່ງທີ່ມີຊື່ວ່າ ຮ້ານອາຫານຄຶ່ມກ່າງຊານ ( Kumkangsan Restaurant ),  ຕັ້ງຢູ່ຖນົນອາຊຽນ ບ້ານສີສະຫວາດ ເມືອງຈັນທະບູຣີ, ເປັນຮ້ານ ທີ່ນໍາເອົາພະນັກງານຊາວເກົາຫລີເໜືອ ເຂົ້າມາເຮັດວຽກນໍາເຊັ່ນກັນ. ກ່ຽວກັບເຣື່ອງທີ່ວ່ານີ້ ອະດີດເຈົ້າໜ້າທີ່ລາວທ່ານນຶ່ງ ກ່າວຕໍ່ວິທຍຸ ເອເຊັຽ ເສຣີ ໃນມື້ວັນທີ 1 ສິງຫານີ້ ເຖິງສິນຄ້າ ແລະຮ້ານອາຫານເກົາຫລີເໜືອ ເຂົ້າມານະຄອນຫລວງວຽງຈັນວ່າ ກໍເປັນເຣື່ອງປົກກະຕິ ເພາະວ່າຣັຖບານ ຂອງທັງ 2 ປະ ເທດ ລາວ-ເກົາຫລີເໜືອ ເປັນປະເທດເພື່ອນມິຕກັນ ແລະຍັງມີລະບອບການປົກຄອງ ແບບສັງຄົມນິຍົມຄືກັນ, ແຕ່ຄວາມສໍາພັນລະຫວ່າງ ລາວ ແລະເກົາຫລີເໜືອ ບໍ່ຂຍາຍໂຕ ເທົ່າກັບຄວາມສໍາພັນ ລາວ-ຈີນ.

“ແມ່ນເພື່ອນມິດແຕ່ດົນແລ້ວ ໂອ໋ ມັນເປັນລະບົບດຽວກັນ ມີການແລກປ່ຽນແຕ່ວ່າບໍ່ລຽນຕິດຄືກັບຈີນ ບໍ່ ສມໍ່າສເມີດອກ ມີວຽກມີງານແນວໃດກໍປະສານກັນ ແລ້ວກໍສິນຄ້າບໍ່ ການແພດບໍ່ ໂຮງຮຽນບໍ່ ກະມີການຊ່ວຍກັນຢູ່.”

ກ່ອນໜ້ານີ້ ຄືເມື່ອວັນທີ 14 ມິຖຸນາ 2022 ວິທຍຸ ເອເຊັຽ ເສຣີ ເຄີຍຣາຍງານວ່າ ມີພະນັກງານແພດ-ໝໍຊາວເກົາຫລີເໜືອ 2 ຄົນ ເຂົ້າມາເຮັດວຽກ ໃນໂຮງໝໍ ລາວ-ອາຊຽນ ທີ່ຕັ້ງຢູ່ເຂດບ້ານດອນກອຍ ເມືອງສີສັດຕະນາກ ນະຄອນຫລວງວຽງຈັນ, ແຕ່ທາງໂຮງໝໍ ບໍ່ສະດວກທີ່ຈະເປີດເຜີຍຊື່, ເພດ ແລະຕໍາແໜ່ງ ແລະ ທັງບໍ່ສາມາດໃຫ້ຂໍ້ມູນໄດ້ວ່າ ເຂົ້າມາລາວແບບໃດ.

ໃນມື້ວັນທີ 13 ມົກກະຣາ 2021 ຄະນະບໍຣິຫານງານ ສູນກາງພັກແຮງງານເກົາຫລີ (ເໜືອ) ກໍໄດ້ສົ່ງໂທຣະເລກອວຍພອນ ມາຍັງພັກປະຊາຊົນ ປະຕິວັດລາວ ເນື່ອງໃນ ໂອກາດກອງປະຊຸມໃຫຍ່ ຄັ້ງທີ 9 ຂອງພັກ ແລະເຈົ້າໜ້າທີ່ ຈາກສູນກາງພັກແຮງງານເກົາຫລີ (ເໜືອ) ກໍໄດ້ເດີນທາງມາຢ້ຽມຢາມ ຣັຖບານລາວ ຢູ່ເລື້ອຍໆ, ເກົາຫລີເໜືອ ມີສະຖານທູດ ປະຈໍາ ສປປ ລາວ ທີ່ນະຄອນຫລວງວຽງຈັນ.