ມີກຸ່ມຄົນ ຊ່ອຍນັກໂທດ 5 ຄົນ ໜີອອກຈາກຄຸກ
2024.09.30
ນີ້ຄືຈຳນວນນັກໂທດທີ່ແຫກຄຸກ ນາໂນນາໄຫ ເມືອງໄຊເສດຖາ ນະຄອນຫຼວງວຽງຈັນ ໃນວັນທີ 27 ກັນຍາ 2024.
ຮູບພາບຈາກພົນລະເມືອງ
ໃນວັນທີ 27 ກັນຍາ 2024 ເວລາປະມານ 3 ໂມງແລງ ໄດ້ມີກຸ່ມຄົນຈໍານວນໜຶ່ງ ບຸກຊ່ອຍໂຕນັກໂທດ 5 ຄົນ ໃຫ້ໂຕນໜີອອກຈາກຄຸກ ນາໂນນາໄຫ ເມືອງໄຊເສດຖາ ນະຄອນຫຼວງວຽງຈັນ ເຊິ່ງເປັນນັກໂທດຄົນຊົນເຜົ່າ ຂໍ້ຫາຢາເສບຕິດ ເບື້ອງຕົ້ນ ກຸ່ມຄົນທີ່ບຸກເຂົ້າມາຊ່ອຍນັກໂທດຫຼົບໜີໄປນັ້ນ ພົບວ່າ ເປັນໝູ່ຂອງນັກໂທດ ໄດ້ຂັບລົດກະບະຣີໂວ້ ສີຂາວ ປ້າຍທະບຽນ 4859 ກໍາແພງນະຄອນ ເຂົ້າໄປພາຍໃນ ແລະເຮັດທໍາທ່າທີເຂົ້າຢ້ຽມຍາມປົກກະຕິ ເຊິ່ງກໍ່ຊື້ໃບຄິວເຂົ້າຢ້ຽມຢາມຕາມຂັ້ນຕອນ ແຕ່ພາຍຫຼັງ ທີ່ໝູ່ເຂົ້າມາຢ້ຽມຢາມ ແລ້ວໄດ້ຍື່ນອາວຸດປືນໃຫ້ນັກໂທດ ຈາກນັ້ນ ນັກໂທດກໍ່ໃຊ້ປືນສ້າງຄວາມວຸ້ນວາຍ ຍິງປືນເພື່ອສະກັດເຈົ້າໜ້າທີ່ ແລ້ວກໍ່ພາກັນແລ່ນຂຶ້ນລົດກະບະ ຫຼົບໜີໄປ ຂະນະທີ່ ເວລານັ້ນ ເຈົ້າໜ້າທີ່ມີການ ຜັດເວນປ່ຽນຍາມກັນພັກພໍດີ ຈຶ່ງບໍ່ສາມາດສະກັດນັກໂທດ ແລະສະກັດຜູ້ບຸກໄປຊ່ອຍນັກໂທດໄດ້, ດັ່ງເຈົ້າໜ້າທີ່ທ້ອງຖິ່ນ ໃນເມືອງໄຊເສດຖາ ທ່ານໜຶ່ງ ກ່າວຕໍ່ວິທຍຸເອເຊັຽເສຣີ ໃນວັນທີ່ 30 ກັນຍາ ນີ້ວ່າ:
“ກະນັກໂທດຢາເສບຕິດ ເປັນຊົນເຜົ່າມົ້ງ ເກີດຢູ່ຊັ້ນນອກ ມັນບໍ່ໄດ້ເກີດຢູ່ຊັ້ນໃນຫັ້ນນ່າ ຄຸກນາໂນ ມັນມີສອງຊັ້ນເນາະ ຜູ້ທີ່ຍາມຜູ້ຕ້ອງຫາ ນັ້ນແມ່ນຍາມຊັ້ນນອກ ຊັ້ນນອກບາດບໍ່ທີຜູ້ໝູ່ປ້ອງກັນ ພໍດີຖືກຊ້ວງກິນເຂົ້າສວຍເດ້ ມີຍາມປະຕູ ເຂົາເຈົ້າກໍ່ເອົາບໍ່ທັນດອກ ເພາະເຂົາເຈົ້າມີປືນເດ້ ເອົາລົດສ່ວນໂຕເຂົ້າໄປຂ້າງໃນພ້ອມ ຈີ້ເອົານັກໂທດເລີຍ ເອົາປືນຍິງ ລະກະນັກໂທດກະແລ່ນຂຶ້ນລົດເລີຍ.”
ກ່ຽວກັບເລື່ອງນີ້ ວິທຍຸເອເຊັຽເສຣີ ໄດ້ຕິດຕໍ່ໄປຍັງ ເຈົ້າໜ້າທີ່ຕໍາຫຼວດ ໃນນະຄອນຫຼວງວຽງຈັນ ເຈົ້າໜ້າທີ່ປະຕິເສດບໍ່ໃຫ້ຂໍ້ມູນ ບອກວ່າ ເປັນເລື່ອງຂອງພາຍໃນ ບໍ່ສາມາດໃຫ້ຂໍ້ມູນໄດ້.
ໃນຂະນະດຽວກັນ ເຈົ້າໜ້າທີ່ທີ່ກ່ຽວຂ້ອງ ຂັ້ນເມືອງໄຊເສດຖາ ທ່ານໜຶ່ງ ກໍ່ໄດ້ກ່າວຕໍ່ເຫດການນີ້ວ່າ ທ່ານກໍ່ພໍຮູ້ຂ່າວ ກໍ່ເປັນເລື່ອງຈິງແທ້ ທີ່ມີກຸ່ມຄົນມາບຸກຊ່ອຍນັກໂທດດັ່ງກ່າວໄປ ຈາກຄຸກນາໄຫນາໂນ ສ່ວນລາຍລະອຽດ ກໍ່ຍັງບໍ່ທັນຮູ້ເທື່ອ ເບື້ອງຕົ້ນ ເຈົ້າໜ້າທີ່ ກໍາລັງດໍາເນີນການຕາມຂັ້ນຕອງ ຫຼື ສືບສວນ-ສອບສວນ ເລື່ອງດັ່ງກ່າວຢູ່:
“ແມ່ນແຫຼະ ແມ່ນແຫຼະ ເລື່ອງໄທເຮົາຮູ້ ໄທເຮົາກະຮູ້ ເຂົາໂຕນຫັ້ນແຫຼະ ແຕ່ລາຍລະອຽດນີ້ ຍັງບໍ່ຮູ້ເທື່ອ ເຈົ້າໜ້າທີ່ເຂົາເຈົ້າ ຍັງດໍາເນີນຢູ່ ມັນຍັງຢູ່ໃນຂັ້ນຕອນເພິ່ນດໍາເນີນ ໄທເຮົາຍັງບໍ່ທັນມີຂໍ້ມູນຫຍັງເທື່ອ.”
ພ້ອມດຽວກັນນີ້ ອະດີດເຈົ້າໜ້າທີ່ຕໍາຫຼວດ ໃນນະຄອນຫຼວງວຽງຈັນ ທ່ານໜຶ່ງ ກໍ່ໃຫ້ຄວາມເຫັນເຖິງຂັ້ນຕອນ ການທີ່ໃຫ້ຍາດພີ່ນ້ອງ ເຂົ້າໄປຢ້ຽມນັກໂທດໃນຄຸກ ຍັງມີຊ່ອງວ່າງ ເພາະເຈົ້າໜ້າທີ່ ຈະບໍ່ໄດ້ກວດຄົ້ນໂຕຍາດພີ່ນ້ອງ ແຕ່ຈະກວດພຽງສິ່ງຂອງ ທີ່ຍາດພີ່ນ້ອງ ນໍາມາໃຫ້ນັກໂທດເທົ່ານັ້ນ:
“ມັນລະບຽບຄຸມຂັງເຂົາມີຢູ່ແລ້ວ ຍາດພີ່ນ້ອງ ເຄື່ອງໂຕໃດເຂົາຈະເອົາໃຫ້ນັກໂທດ ເຂົາກໍ່ຕ້ອງກວດ ເຄື່ອງລະບົບສ່ວນໂຕ ເຂົາກໍ່ບໍ່ກວດ ຂ້ອຍກໍ່ເຫັນວ່າອອກຂ່າວຢູ່ ແຕ່ກໍ່ບໍ່ຮູ້ວ່າ ຊັດເຈນວ່າແນວໃດ.”
ກ່ຽວກັບເລື່ອງທີ່ວ່ານີ້ ປະຊາຊົນລາວ ທ່ານໜຶ່ງທີ່ຮູ້ຂ່າວ ກໍ່ກ່າວວ່າ ໃນຄວາມເປັນຈິງ ເຈົ້າໜ້າທີ່ ຄວນຈະອອກຂ່າວ ເພື່ອໃຫ້ປະຊົນຊ່ອຍເປັນຫູເປັນຕາ ເພື່ອແຈ້ງເບາະແສ ແຕ່ນີ້ ກັບປິດງຽບ ເຊິ່ງກໍ່ຈະສະແດງໃຫ້ເຫັນວ່່າ ເປັນການປົກປິດນັກໂທດ ແລະຫຼີກຫຼ້ຽງການລົງໂທດເຈົ້າໜ້າທີ່ ທີ່ປ່ອຍໃຫ້ນັກໂທດໜີໄປໄດ້ ເພາະເຈົ້າໜ້າທີ່ບໍ່ມີຄວາມພ້ອມ ບໍ່ມີມາດຕະການປ້ອງກັນຄວາມປອດໄພ:
“ໄດ້ຍິນຂ່າວໃນໂຊຊຽວ ວ່າ ນັກໂທດໂຕນອອກມາ ທໍາມະດາ ກໍ່ຕ້ອງມີການຖະແຫຼງຂ່າວ ເພື່ອໃຫ້ປະຊາຊົນເປັນຫູ ເປັນຕາຊ່ອຍກັນ ອັນນີ້ ປິດຂ່າວໄວ້ກະຖືວ່າ ມີຄວາມປົກປິດ ຂອງນັກໂທດ ຫຼີ້ກຫຼ້ຽງການຈັບກຸມເຈົ້າໜ້າທີ່ ຄວາມປ້ອງກັນຂອງເພິ່ນບໍ່ພ້ອມພໍ ເຈົ້າໜ້າທີ່ບໍ່ຮອບຄອບ ແລະກໍ່ບໍ່ລະອຽດພໍ ຄວາມປອດໄພ ຂອງເຈົ້າໜ້າທີ່ບໍ່ເຂັ້ມແຂງ.”
ຂະນະທີ່ ຊາວລາວອີກນາງໜຶ່ງ ທີ່ລູກຂອງນາງຕິດຄຸກ ຢູ່ຄຸກນາໄຫນາໂນ ໄດ້ກ່າວເຖິງມາດຕະການຄວາມປອດໄພ ກໍ່ບໍ່ໄດ້ເຂັ້ມງວດ ແລະເຈົ້າໜ້າທີ່ ກໍ່ບໍ່ໄດ້ມີການຄົ້ນໂຕຍາດພີ່ນ້ອງແຕ່ຢ່າງໃດ ແລະຕອນທີ່ໄປຢ້ຽມລູກຊາຍ ຍັງຕ້ອງເສຍເງິນຄ່າຢ້ຽມ ເຊິ່ງມີການຢ້ຽມແບບທໍາມະດາ ຈະໄດ້ເວົ້າກັນຕາມປ່ອງນ້ອຍໆ ເສຍເງິນ 40 ພັນກີບ ແລະຢ້ຽມແບບພິເສດ ຈະໄດ້ຈັບມື ເຫັນໜ້າເຫັນຕາ ໄດ້ເສຍເງິນ 1 ແສນກີບ ເຊິ່ງນາງ ກໍ່ເລືອກຢ້ຽມແບບພິເສດ:
“ແມ່ໄປຢ້ຽມລູກຊາຍຫັ້ນ ເຂົາກໍ່ບໍ່ໄດ້ຄົ້ນໄປ ວ່າເອົາຫັຍງເຂົ້າໄປແນ່ ມີແຕ່ວ່າ ເຮົາໄປລໍຢູ່ບ່ອນພົບຍາດຫັ້ນ ຮອດຄິວ ແລ້ວເຂົາກະຮ້ອງເຂົ້າໄປ ມັນມີຢ້ຽມພິເສດເນາະ ລະແມ່ນແສນໜຶ່ງ ໄດ້ຈັບຕີນຈັບມື ໄດ້ລົມກັນ ກັບຢ້ຽມທໍາມະດາ 40 ພັນກີບ ລົມກັນເປັນປ່ອງນ້ອຍໆ.”
ຢ່າງໃດກໍ່ຕາມ ອີງຕາມຄໍາເວົ້າ ຂອງເຈົ້າໜ້າທີ່ທ້ອງຖິ່ນ ທ່ານດັ່ງກ່າວ ໄດ້ກ່າວວ່າ ປັດຈຸບັນ ເຈົ້າໜ້າທີ່ຕໍາຫຼວດ ຍັງບໍ່ສາມາດຈັບໂຕນັກໂທດ ແລະກຸ່ມຄົນທີ່ບຸກເຂົ້າໄປຊ່ອຍນັກໂທດນັ້ນໄດ້ ຄາດວ່າ ຫຼົບໜີອອກຈາກນະຄອນຫຼວງວຽງຈັນໄປແລ້ວ.
