ປກສ ຂ.ສວັນນະເຂດ ລົງວິໄນ ນາຍຕຳຣວດ

ສຸພັດຕາ
2021-05-11
Share
ປກສ ຂ.ສວັນນະເຂດ ລົງວິໄນ ນາຍຕຳຣວດ ກອງບັນຊາການ ປກສ ແຂວງສວັນນະເຂດ ປະຕິບັດວິໄນ ນາຍຕໍາຣວດ ທີ່ຂຶ້ນກັບ ກອງບັນຊາການ ປກສ ແຂວງສວັນນະເຂດ ເປັນປະທານໂດຍ ທ່ານ ພອ ສົມໝາຍ ພົມມະຈັນ ຫົວໜ້າກອງບັນຊາການ ປກສ ແຂວງ,
ປກສ ແຂວງສວັນນະເຂດ

ເມື່ອວັນທີ 7 ພຶສພາ ທີ່ຜ່ານມານີ້ ກະຊວງປ້ອງກັນຄວາມສງົບ ໄດ້ອອກຂໍ້ຕົກລົງ ວ່າດ້ວຍ ການປະຕິບັດວິນັຍ ຕໍ່ນາຍຕໍາຣວດ ຊື່ ຮ້ອຍເອກ ພູໃສ ສີສະຫວັນ ອາຍຸ 34 ປີ ສັງກັດກອງບັນຊາການ ປກສ ແຂວງສວັນນະເຂດ ຊຶ່ງມີຄວາມຜິດ ໃນໂທດຖານ ເມີນ ເສີຍ ແລະ ປ່ອຍປະລະເລີຍ ໃຫ້ຄົນຕ່າງປະເທດ ລັກເຂົ້າມາໃນລາວ ແລະມີການພົວພັນ ກັບ ຄົນຕ່າງປະເທດ ແບບບໍ່ຖືກກົດໝາຍ ອັນເປັນສາເຫດໃຫ້ເກີດການແຜ່ຣະບາດ ຂອງເຊື້ອໂຄວິດ-19 ຢູ່ລາວ ໃນປັດຈຸບັນ ອີກທັງຍັງມີຄວາມຜິດ ໃນໂທດຖານ ພົວພັນກັບ ການຫຼີ້ນການພະນັນເຖື່ອນ ແລະຄ້າ-ຂາຍເຖື່ອນ.

ໃນຂນະດຽວກັນ ກົມໃຫຍ່ການເມືອງ ປກສ ກະຊວງປ້ອງກັນຄວາມສງົບ ກໍໄດ້ປະຕິບັດວິນັຍ ຮ້ອຍໂທ ສອນອາໄລ ໂພທິລາດ ອາຍຸ 33 ປີ ສັງກັດກອງບັນຊາການ ປກສ ເມືອງສອງຄອນ ແຂວງສວັນນະເຂດ ມີຄວາມຜິດໃນໂທດຖານ ສວຍໃຊ້ຕໍາແໜ່ງ ສິດອໍານາດ ໜ້າທີ່ ເພື່ອຫາຜົລປໂຍດສ່ວນໂຕ, ພົວພັນກັບກຸ່ມຄ້າຢາເສບຕິດ, ຫຼີ້ນການພະນັນເຖື່ອນ, ຄ້າ-ຂາຍເຖື່ອນ ແລະມີການພົວພັນກັບຄົນ ຕ່າງປະເທດ ຊຶ່ງເປັນສາເຫດ ໃຫ້ເກີດການແຜ່ຣະບາດເຊື້ອໂຄວິດ-19 ຢູ່ລາວ.

ກ່ຽວກັບເຮື່ອງນີ້ ວິທຍຸເອເຊັຽເສຣີ ໄດ້ຕິດຕໍ່ຫາ ກະຊວງປ້ອງກັນຄວາມສງົບ ແລະ ກອງບັນຊາການ ປກສ ແຂວງສວັນນະເຂດ ເພື່ອ ຖາມຣາຍຣະອຽດເພີ່ມຕື່ມ ກ່ຽວກັບການ ປະຕິບັດວິນັຍຕໍ່ຕໍາຣວດ 2 ຄົນດັ່ງກ່າວ, ແຕ່ເຈົ້າໜ້າທີ່ ທີ່ກ່ຽວຂ້ອງ ບໍ່ສາມາດໃຫ້ຂໍ້ມູລຫຼາຍ ໄປກວ່ານີ້ໄດ້.

ຢ່າງໃດກໍຕາມ ເຈົ້າໜ້າທີ່ແຂວງສວັນນະເຂດທ່ານນຶ່ງ ທີ່ຂໍສງວນຊື່ແລະຕໍາແໜ່ງ ກ່າວຕໍ່ວິທຍຸເອເຊັຽເສຣີ ໃນວັນທີ 11 ພຶສພາ ນີ້ວ່າ ພາຍຫຼັງທີ່ຕໍາຣວດ ທັງ 2 ຄົນ ຖືກສັ່ງປົດອອກ ຈາກກອງກໍາລັງປ້ອງກັນຄວາມສງົບແລ້ວ ທາງພາກສ່ວນທີ່ກ່ຽວຂ້ອງ ກໍຈະມີການ ດໍາເນີນຄະດີ ກັບຜູ້ກ່ຽວເພີ່ມຕື່ມ ເນື່ອງຈາກເປັນຄວາມຜິດຂັ້ນຮ້າຍແຮງ ແລະສ້າງຄວາມເສັຽຫາຍຕໍ່ປະເທດ, ແຕ່ຍັງບໍ່ມີຣາຍຣະອຽດ ຄັກແນ່ວ່າ ປັດຈຸບັນ ໄດ້ເນີນການໄປຮອດໃສແລ້ວ, ດັ່ງທ່ານກ່າວວ່າ:

“ເອົາອອກແລ້ວ ລະກະຍັງຊິດໍາເນີນຄະດີອີກ ສົ່ງອັຍການຟ້ອງ ຖືກຄະດີມາດຕຣາ ທີ່ເທົ່າໃດ ທໍ່ໃດ ກະຕາມຄະດີຫັ້ນແຫຼະ ຜູ້ໃດທີ່ ພົວພັນກັບການ ທີ່ນໍາພຍາດຕິດແປດມານີ້ນ່າ ເຮັດໃຫ້ສັງຄົມ ເຮັດໃຫ້ເສຖກິຈ ຖືກຫຼຸດໜ້ອຍຖອຍລົງຫັ້ນແຫຼະ ມັນກະມີມາດຕຣາ ມັນຢູ່ເດ້.”

ທ່ານກ່າວຕື່ມວ່າ ກ່ອນໜ້ານີ້ ເຖິງແມ່ນວ່າກອງບັນຊາການ ປກສ ແຂວງສວັນນະເຂດ ໄດ້ຖແລງຂ່າວຊີ້ແຈງວ່າ ຜູ້ກ່ຽວບໍ່ມີສ່ວນພົວ ພັນກັບຄົນໄທຍ ທີ່ລັກລອບເຂົ້າມາໃນລາວ ກໍຕາມ, ແຕ່ເມື່ອພາກສ່ວນທີ່ກ່ຽວຂ້ອງ ໄດ້ມີການສອບສວນຜູ້ກ່ຽວ ໃນເວລາຕໍ່ມາ ຜູ້ກ່ຽວ ກໍຮັບສາຣະພາບວ່າ ມີການພົວພັນກັບຄົນໄທຍ ທີ່ລັກເຂົ້າມາລາວ ຮວມທັງພົວພັນ ກັບສິ່ງຜິດກົດໝາຍອື່ນໆ ຈຶ່ງຖືກປະຕິບັດ ວິນັຍ, ສ່ວນຣາຍຣະອຽດຄວາມຄືບໜ້າ ຂອງການດໍາຄະດີຕໍ່ຕໍາຣວດ 2 ຄົນດັ່ງກ່າວນັ້ນ ຕ້ອງລໍຖ້າໃຫ້ກອງບັນຊາການາ ປກສ ແຂວງ ສວັນນະເຂດ ອອກມາຊີ້ແຈງແບບເປັນທາງການ.

ກ່ຽວກັບເຣື່ອງທີ່ວ່ານີ້ ຊາວລາວທ່ານນຶ່ງກ່າວວ່າ ຫຼັງຈາກທີ່ຮູ້ຂ່າວວ່າ ທາງການໄດ້ສັ່ງປົດ ແລະຕຽມດໍາເນີນຄະດີກັບຕໍາຣວດ 2 ຄົນ ດັ່ງກ່າວ ກໍຮູ້ສຶກວ່າເໝາະສົມແລ້ວ ທີ່ຜູ້ກ່ຽວໄປຮັບ ການປະບັດແນວນັ້ນ ຊຶ່ງເຊື່ອວ່າທາງພາກສ່ວນທີ່ກ່ຽວຂ້ອງ ມີຫຼັກຖານແບບ ໜັກ ແໜ້ນ ແລະຕັດສິນແບບຖືກຕ້ອງແລ້ວ, ດັ່ງທ່ານກ່າວ ໃນມື້ດຽວກັນນີ້ວ່າ:

“ມັນສົມຄວນຢູ່ ເພາະວ່າ ຜູ້ທີ່ເພິ່ນຕັດສິນ ເພິ່ນກະໜ້າຈະ ມີເຫດຜົລຫຼາຍກວ່ານີ້ ຫຼືວ່າຮູ້ຂ່າວ ຂໍ້ມູລມັນອາຈຈະມີຫຼາຍໆເຣື່ອງ.”

ໃນຂນະທີ່ ຊາວລາວນາງນຶ່ງ ກ່າວວ່າ ກໍຄິດວ່າ ເໝາະສົມແລ້ວ ທີ່ຕໍາຣວດ 2 ຄົນດັ່ງກ່າວ ຖືກປະຕິບັດວິນັຍໃນເບື້ອງຕົ້ນ ສ່ວນວ່າ ຈະມີການດໍາເນີນຄະດີແນວໃດຕື່ມນັ້ນ ກໍປ່ອຍໃຫ້ເປັນວຽກ ຂອງພາກສ່ວນທີ່ກ່ຽວຂ້ອງ, ແຕ່ຖ້າພົບວ່າ ມີຄວາມຜິດຮ້າຍແຮງ ກໍສົມ ຄວນໃຫ້ລົງໂທດສັ່ງຂັງຄຸກ, ດັ່ງຍານາງ ກ່າວວ່າ:

“ແລ້ວແຕ່ຣະບຽບການ ເພິ່ນຫັ້ນນ່າ ແລ້ວແຕ່ກົດໝາຍເພິ່ນ ເຮົາບໍ່ແມ່ນເຈົ້າໜ້າທີ່ ເຮົາກໍບໍ່ຮູ້ເພິ່ນຊິປະຕິບັດຣະບຽບແບບໃດ ມັນກໍ ຕ້ອງມີກົດໝາຍເນາະ ຄັນເຈຕນາ ກໍຍາກໃຫ້ມີການລົງໂທດ ແບບວ່າ ຈັບໃສ່ຄຸກ.”

ຊາວລາວອີກທ່ານນຶ່ງ ໄດ້ສະແດງຄວາມຄິດເຫັນຜ່ານສື່ສັງຄົມອອນລາຍວ່າ ນອກຈາກມີການປົດອອກ ແລະດໍາເນີນຄະດີ ກັບຜູ້ກ່ຽວ ແລ້ວ ຄວນມີການຍຶດ ຊັພສິນ ຂອງນາຍຕໍາຣວດ 2 ຄົນ ດັ່ງກ່າວນັ້ນນໍາ ເພື່ອບໍ່ໃຫ້ຕໍາຣວດຄົນອື່ນໆ ເອົາເປັນໂຕຢ່າງ.

ທາງດ້ານຊາວວຽດນາມ ທ່ານນຶ່ງ ທີ່ເຮັດທຸຣະກິຈ ຢູ່ແຂວງສວັນນະເຂດກ່າວວ່າ ຕົນຮູ້ສຶກພໍໃຈ ທີ່ພາກສ່ວນກ່ຽວຂ້ອງ ປະຕິບັດວິນັຍ ຕໍ່ຕໍາຣວດ 2 ຄົນດັ່ງກ່າວ ຍ້ອນມີສ່ວນ ອໍານວຍຄວາມສະດວກໃຫ້ຄົນໄທຍ 2 ຄົນ ລັກເຂົ້າມາແຜ່ເຊື້ອໂຄວິດ-19 ໃນລາວ ຈົນເຮັດ ໃຫ້ຫຼາຍພາກສ່ວນ ໄດ້ຮັບຜົລກະທົບ ທັງທາງດ້ານເສຖກິຈ ແລະດ້ານອື່ນໆນໍາ, ດັ່ງທ່ານກ່າວວ່າ:

“ແມ່ນແລ້ວເພິ່ນລັກເອົາຄົນໄທຍ ເຂົ້າມາ 2 ຄົນ ແຕ່ລະມື້ນັ້ນແຫຼະ ໂຄວິດ ກໍມີຢູ່ທົ່ວໄປ ເຂົາສັ່ງປິດເໝິດ ເຂົາບໍ່ໃຫ້ເຮັດ ແຕ່ຮ້ານ ກາເຟຊື່ໆ ປິດແຕ່ເຫິງແລ້ວ.”

ກ່ຽວກັບຄວາມຜິດຂອງຕໍາຣວດ 2 ຄົນດັ່ງກ່າວນັ້ນ ໃນເບື້ອງຕົ້ນ ຮ້ອຍເອກ ພູໃສ ສີສະຫວັນ ໄດ້ມີການກະທໍາຜິດ ຕໍ່ຣະບຽບ ກົດ ໝາຍວ່າດ້ວຍ ກໍາລັງປ້ອງກັນຄວາມສງົບ ພາກທີ່ 5 ມາດຕຣາ 39 ຂໍ້ 1 ແລະ ມາດຕຣາ 6 ຂໍ້ 5 ແລະປະມວນກົດໝາຍອາຍາ ມາດຕຣາ 141, 244 ຍ້ອນປ່ອຍປະລະເລີຍ ໃຫ້ຄົນຕ່າງປະເທດ ເຂົ້າມາເຄື່ອນໄຫວ ແບບບໍ່ໄດ້ຮັບ ອະນຸຍາດໃນພື້ນທີ່ຮັບຜິດຊອບ ແລະມີສ່ວນພົວພັນ ກັບການຫຼີ້ນການພະນັນເຖື່ອນ ແລະຊື້-ຂາຍເຖື່ອນ.

ສ່ວນຮ້ອຍໂທ ສອນອາໄລ ໂພທິລາດ ໄດ້ມີການກະທໍາຜິດຕໍ່ຣະບຽບ ກົດໝາຍວ່າດ້ວຍ ກໍາລັງປ້ອງກັນຄວາມສງົບພາກທີ່ 5 ມາດ ຕຣາ 39 ຂໍ້ 8 ແລະປະມວນກົດໝາຍອາຍາ ມາດຕຣາ 141, 244 ຍ້ອນໃຊ້ຕໍາແໜ່ງສິດໜ້າທີ່ ເພື່ອຫາຜົນປໂຍດສ່ວນໂຕ, ພົວ ພັນກັບກຸ່ມແກ້ງ ຄ້າຢາເສບຕິດ, ຫຼີ້ນການພະນັນເຖື່ອນ ແລະຄ້າ-ຂາຍເຖື່ອນ ແລະພົວພັນກັບ ຄົນຕ່າງປະເທດ ທີ່ລັກເຂົ້າມາໃນລາວ ຊຶ່ງເປັນສາເຫດໃຫ້ເກີດການແຜ່ຣະບາດຂອງເຊື້ອໂຄວິດ-19.

ນອກຈາກນັ້ນແລ້ວ ປັດຈຸບັນ ທາງການລາວ ຍັງຢູ່ໃນຣະຫວ່າງການດໍາເນີນຄະດີ ກັບແມ່ຍິງລາວອີກ 2 ຄົນ ປະກອບດ້ວຍ ນາງ ມອນມີນາ ສຸດທິດາ ຫຼືຕິນ່າ ແລະນາງ ພາວະດີ ວິພາກອນ ທີ່ເປັນເອື້ອຍຮັກ ຂອງນາງ ມອນມີນາ ໃນຂໍ້ຫາ ມີສ່ວນພົວພັນ ກັບ ຄົນໄທຍ 2 ຄົນ ທີ່ລັກລອບເຂົ້າມາໃນລາວແລ້ວແຜ່ເຊື້ອໂຄວິດ-19 ຊຶ່ງແມ່ຍິງ ທັງ 2 ຄົນດັ່ງກ່າວ ຍັງມີສ່ວນພົວພັນກັບຮ້ອຍເອກ ພູໃສ ສີສະຫວັນ ນໍາດ້ວຍ, ແຕ່ປັດຈຸບັນ ພາກສ່ວນທີ່ກ່ຽວຂ້ອງ ຍັງບໍ່ໄດ້ເປີດເຜີຍຄວາມຄືບໜ້າ ຂອງການດໍາເນີນຄະດີເທື່ອ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ