ຜູ້ນໍາລາວສູງສຸດຄົນໃໝ່ ທ່ານ ທອງລຸນ ສີສຸລິດ

ຈໍາປາທອງ
2021-01-16
Share
ຜູ້ນໍາລາວສູງສຸດຄົນໃໝ່ ທ່ານ ທອງລຸນ ສີສຸລິດ ການປ່ອນບັດ ເອົາຄະນະບໍຣິຫານງານ ສູນກາງພັກ ປະຊາຊົນ ປະຕິວັດລາວ ສມັຍທີ 11
ພາບປະກອບ: ລາວ ມີເດັຽ

ກອງປະຊຸມຜູ້ແທນທົ່ວປະເທດ ຄັ້ງທີ 11 ຂອງພັກປະຊາຊົນປະຕິວັດລາວໄດ້ ດໍາເນີນໄປແຕ່ມື້ວັນທີ 13 ຫາ 15 ມົກກະຣາ ຕາມມະຕິຕົກລົງຂອງຄະນະບໍຣິຫານງານສູນກາງພັກ ວ່າດ້ວຍການອະນຸມັດໃຫ້ດໍາເນີນກອງປະຊຸມໃຫຍ່ຂອງພັກ ລົງວັນທີ 5 ມົກກະຣາ 2021.

ໃນມື້ວັນທີ 14 ມົກກະຣາ ກອງປະຊຸມໄດ້ເລືອກຕັ້ງຄະນະບໍຣິຫານງານສູນກາງພັກສໄມທີ 11 ຄື; ຄະນະບໍຣິຫານງານຊຸດໃໝ່ ທັງໝົດ 81 ຄົນ ຊຶ່ງໃນນັ້ນມີກັມມະການສູນກາງພັກ 71 ຄົນ (ຍິງ 12 ຄົນ) ແລະກັມມະການສໍາຮອງສູນກາງພັກ 10 ຄົນ (ຍິງ 2 ຄົນ) ຊຶ່ງດຣ. ບຸນທອງ ຈິດມະນີ ກັມມະການກົມການເມືອງສູນກາງພັກ ປະທານຄະນະກວດກາສູນກາງພັກ ຕາງໜ້າໃຫ້ຄະນະ ກອງປະຊຸມ ໄດ້ປະກາດຣາຍຊື່ ຜູ້ທີ່ໄດ້ຮັບເລືອກຕັ້ງເປັນຄະນະບໍຣິຫານງານສູນກາງພັກນັ້ນມາແລ້ວ ໃນມື້ວັນທີ 14 ມົກກະຣາ.

ເມື່ອທຽບໃສ່ຄະນະບໍຣິຫານງານສູນກາງພັກສໄມ ທີ 10 ທີ່ມີ 77 ຄົນ ຊຶ່ງໃນກໍາມະການສູນກາງພັກ 69 ຄົນ (ຍິງ 7 ຄົນ) ແລະ ກໍັມມະການສູນກາງພັກສໍາລອງ 8 ຄົນ (ຍິງ 2 ຄົນ) ກໍເຫັນວ່າມີຈໍານວນເພິ່ມຂຶ້ນ 4 ຄົນ ແລະສໍາລັບເພດຍິງກໍເພີ່ມຂຶ້ນພຽງ 5 ຄົນເທົ່ານັ້ນ.

ກອງປະປະຊຸມຄັ້ງປະຖົມມະເລີກ ຂອງຄະນະບໍຣິຫານງານສູນກາງພັກຊຸດໃໝ່ ຊຶ່ງໄດ້ຈັດຂຶ້ນໃນມື້ວັນທີ 15 ມົກກະຣາ ໄດ້ເລືອກຕັ້ງ ທ່ານ ທອງລຸນ ສິສຸລິດ ກັມມະການກົມການເມືອງສູນກາງພັກ ນາຍົກຣັຖມົນຕຣີຄົນປັດຈຸບັນ ເປັນເລຂາທິການໃຫຍ່ຄະນະບໍຣິຫານ ງານສູນກາງພັກປະຊາຊົນປະຕິວັດລາວ ດັ່ງທີ່ ທ່ານ ບຸນທອງ ຈິດມະນີ ໄດ້ກ່າວຕໍ່ກອງປະຊຸມວ່າ:

“ກອງປະຊຸມຄັ້ງປະຖົມລຶກຂອງ ຄະນະບໍຣິຫານງານ ສູນກາງພັກປະຊາຊົນປະຕິວັດລາວ ສມັຍທີ 11 ກໍໄດ້ເປັນເອກສັນຢ່າງສົມບູນ ເລືອກຕັ້ງເອົາສະຫາຍ ທອງລຸນ ສີສຸລິດ ເປັນເລຂາທິການໃຫຍ່ ຄະນະບໍຣິຫານງານສູນກາງພັກ ສມັຍທີ 11 ໂດຍເຫັນໄດ້ບົດຮຽນ ປະສົບການ ແລະຜົລສໍາເຣັດໃນການນໍາພາ ຊີ້ນໍາໃນຫລາຍຂົງເຂດ ຜ່ານມາໂດຍສະເພາະ ແມ່ນໃນຂົງເຂດວຽກງານພັກ ພະນັກງານ.”

ພ້ອມກັນນັ້ນ ທ່ານກໍໄດ້ອ່ານຣາຍຊື່ກັມມະການກົມການເມືອງສູນກາງພັກ ຊຶ່ງເປັນອົງການການເມືອງ ສູງສຸດຂອງລາວທີ່ວາງ ແນວທາງ, ແຜນນະໂຍບາຍ ແລະຈັດຕັ້ງ, ຊີ້ນໍານໍາພາ ວຽກງານຂອງພັກ ແລະ ຣັຖ ຕໍ່ກອງປະຊຸມວ່າ:

1.ສະຫາຍ ປອ ທອງລຸນ ສີສຸລິດ. 2. ສະຫາຍ ປອ ພັນຄໍາ ວິພາວັນ. 3. ສະ ຫາຍ ນາງ ປານີ ຢາທໍ່ຕູ້. 4. ສະຫາຍ ປອ ບຸນທອງ ຈິດມະນີ, 5. ສະຫາຍ ປອ ໄຊສົມພອນ ພົມວິຫານ, 6. ສະຫາຍ ພົນເອກ ຈັນສະໝອນ ຈັນຍາລາດ, 7. ສະຫາຍ ປອ ຄໍາພັນ ພົມມະທັດ, 8. ສະຫາຍ ປອ ສິນລະວົງ ຄຸດໄພທູນ, 9.ສະຫາຍ ສອນໄຊ ສີພັນດອນ, 10. ະຫາຍ ສຈ ປອ ກິແກ້ວ ໄຂຄໍາພິທູນ, 11. ສະຫາຍ ພົນໂທ ວິໄລ ຫຼ້າຄໍາຟອງ, 12. ສະຫາຍ ນາງ ສີໃສ ລືເດດມູນສອນ, 13. ສະຫາຍ ສະເຫຼີມໄຊ ກົມມະສິດ."

ກອງປະຊຸມໄດ້ເລືອກຕັ້ງເອົາຄະນະເລຂາທິການສູນກາງພັກ 9 ຄົນ, ເອົາທ່ານ ບຸນທອງ ຈິດມະນີ ເປັນຜູ້ປະຈໍາການຄະນະເລຂາ ທິການສູນກາງພັກແລະທ່ານ ຄໍາພັນ ພົມມະທັດ ເປັນປະທານຄະນະນະກວດກາສູນກາງພັກ ແລະຮອງປະທານຄະນະກວດກາ ສູນກາງພັກອີກ 6 ຄົນ.

ການເລືອກຕັ້ງຄະນະນໍາພັກຊຸດໃໝ່ນີ້ ປາກົດວ່າເຮັດໃຫ້ຫລາຍຄົນ ນັບທັງນັກວິຊາການ ຄາດການບໍ່ຖືກ ຫລາຍຄົນງົງໄປຕາມໆກັນ ເພາະຜົລອອກມາແບບພິກລ໊ອກ ບໍ່ເປັນໄປຕາມຫາງສຽງຂອງສັງຄົມຍ້ອນຄິດວ່າ ທ່ານ ບຸນຍັງ ຍັງຈະຢູ່ເປັນຫົວໜ້າພັກນັ້ນຕໍ່ໄປອີກ ສມັຍນຶ່ງ ເຖິງອາຍຸເພິ່ນຈະຂ້ອນຂ້າງສູງແດ່ ແຕ່ສຸຂພາບເພິ່ນກໍບໍ່ເຄີຍມີຂ່າວວ່າ ເພິ່ນມີບັນຫາ.

ເມື່ອເວົ້າເຖິງວ່າ ເປັນຫຍັງຈຶ່ງມີການປ່ຽນຜູ້ນໍາສູງສຸດຂອງພັກປະຊາຊົນປະຕິວັດລາວ ຈາກທ່ານ ບຸນຍັງ ວໍລະຈິດ ມາເປັນທ່ານ ທອງລຸນ ສີສຸລິດ ນັ້ນ ດຣ. ບຸນທອນ ຈັນທະລາວົງ-ວີເຊີ ປະທານອົງການພັນທະມິດເພື່ອປະຊາທິປະໄຕໃນລາວ ທີ່ມີສູນກາງຢູ່ ປະເທດເຢັຽຣະມັນ ກ່າວຕໍ່ວິທຍຸເອເຊັຽເສຣີ ກ່ອນໜ້າທີ່ທ່ານ ບຸນທອງ ຈິດມະນີ ຣາຍງານຜົລຂອງການເລືອກຕັ້ງໃນມື້ວັນທີ 15 ມົກກະຣາ ນັ້ນວ່າ:

”ຂ້າພະເຈົ້າເຫັນວ່າ ການປ່ຽນແປງຄັ້ງນີ້ສະແດງໃຫ້ເຫັນວ່າ ຢູ່ໃນພັກປະຊາຊົນປະຕິວັດລາວ ມີບັນຫາອັນໃຫຍ່ໂຕ ຊຶ່ງວ່າຄົງຈະ ມີຂໍ້ຂັດແຍ່ງຣະຫວ່າງກຸ່ມນິຍົມວຽດນາມ ແລະ ກຸ່ມນິຍົມຈີນ ຈຶ່ງອອກມາຮູບນີ້ເນາະ. ຍ້ອນມີຂໍ້ຂັດແຍ່ງຢູ່ບ່ອນວ່າ ທ່ານ ທອງລຸນ ສີສຸລິດ ຈະເຮັດທຸກຢ່າງເພື່ອແກ້ໄຂບັນຫາຂອງຊາດ ແທ້ບໍ໋ ຈະຍອມປ່ຽນແປງໃຫ້ເກີດ ສະພາບການໃນລາວໄປສູ່ປະຊາທິປະຕັຍ ໄດ້ບໍ໋ ຫລືຈະຍັງກົ້ມຫົວຮັບໃຊ້ ຄອມມິວນິສຈີນ ເພື່ອທໍາການໃຊ້ໜີ້ໃຊ້ສິນ ເປັນບັນຫາທີ່ພວກເຮົາຈະຕ້ອງໄດ້ຕິດຕາມ ໃນຂັ້ນຕໍ່ໄປ.”

ພ້ອມກັນນັ້ນ ທ່ານ ອິນຊີທອງ ຄະນະນໍາ ແລະທັງເປັນໂຄສົກອົງການລາວເສຣີ Free Lao Campagn ທີ່ສະຫະຣັຖ ອາເມຣິກາ ກໍກ່າວຕໍ່ວິທຍຸເອເຊັຍເສຣີວ່າ ການປັບປ່ຽນຄະນະ ນໍາພັກນັ້ນ ກໍເປັນແບບນໍ້າເກົ່າປ່ຽນແກ້ວໃໝ່:

"ຂ້າພະເຈົ້າເຫັນວ່າ ການປ່ຽນຜູ້ນໍາໃໝ່ຂອງພັກ ປະ ຊາຊົນປະຕິວັດລາວນີ໋ ການນໍາພາປະເທດນີ໋ ປ່ຽນແຕ່ຄົນຊື່ໆແຕ່ວ່າຣະບົບ ການປົກຄອງນີ້ ສິປ່ຽນແນວໃດກະຄືເກົ່າ ເພາະຄະນະນໍາມີນະໂຍບາຍແບບເກົ່າຢູ່ ຖືວ່າແນວຄິດການປົກຄອງ ທິສດີການນໍາພາ ມັນແບບເກົ່າເມິດ ຫັ້ນນາ ບໍ່ເຮັດໃຫ້ປະເທດປ່ຽນໄປສູ່ປະຊາທິປະຕັຍອັນແທ້ຈິງ ກະແບບເກົ່າຫັ້ນແລ້ວ ນໍ້າເກົ່າແກ້ວໃໝ່."

ແຕ່ເຖິງຢ່າງໃດກໍຕາມ ຕໍ່ກອງປະຊຸມ ພາຍຫລັງຖືກເລືອກຕັ້ງເປັນເລຂາທິການໃຫຍ່ຄະນະບໍຣິຫານງານສູນກາງພັກ ທ່ານ ທອງລຸນ ໄດ້ກ່າວເຖິງການຍຶດໝັ້ນ ທີ່ຈະເຮັດໃຫ້ປະເທດ ລາວ ກ້າວສູ່ສັງຄົມນິຍົມ ວ່າ:

“ພວກເຮົາຈະສືບຕໍ່ ຮໍ່າຮຽນ ເສີມຂຍາຍມູນເຊື້ອປະຕິວັດ ເດັດດ່ຽວ ແລະແບບຢ່າງອັນໃສແຈ້ງ ຂອງສະຫາຍ ພ້ອມກັນສາມັກຄີ ພາຍໃນໃຫ້ແໜ້ນ ນໍາເອົາພາຣະກິດປ່ຽນແປງ ໄລ່ກ້າວຂຶ້ນຢ່າງໜັກແໜ້ນ ຕາມຈຸດ ໝາຍສັງຄົມນິຍົມ.”

ເມື່ອເວົ້າເຖິງທ່ານ ບຸນຍັງ ວໍລະຈິດ ເລຂາທິການໃຫຍ່ຄະນະບໍຣິຫານງານສູນກາງພັກສມັຍທີ 10 ທີ່ບໍ່ມີຊື່ຢູ່ໃນບັນຊີຜູ້ສມັກຮັບ ເລືອກຕັ້ງເຂົ້າຢູ່ໃນ ຄະນະບໍຣິຫານງານສູນກາງພັກ ສມັຍທີ 11 ນີ້ນັ້ນ ທ່ານ ທອງລຸນ ສີສຸລິດ ກ່າວໂດຍບໍ່ເວົ້າເຖິງສາເຫດການບໍ່ສມັກຂອງທ່ານ ບຸນຍັງ ວ່າ:

"ໃນກອງປະຊຸມຄັ້ງນີ້ ສະຫາຍ ບຸນຍັງ ວໍລະຈິດ ເລຂາທີການໃຫຍ່ຄະນະບໍຣິຫານງານສູນກາງພັກສມັຍທີ 10 ໄດ້ສມັກໃຈບໍ່ສືບຕໍ່ ສມັກຮັບເລືອກຕັ້ງເປັນເລຂາທິການໃຫຍ່ ຄະນະບໍຣິຫານງານສູນກາງພັກສມັຍທີ 11 ອີກ”

ຢູ່ໃນບົດຣາຍງານການເມືອງຕໍ່ກອງປະຊຸມໃຫຍ່ ທ່ານ ບຸນຍັງ ວໍລະຈິດ ເລຂາ ທິການໃຫຍ່ຄະນະບໍຣິຫານງານສູນກາງພັກກ່ຽວກັບ ພັກປະຊາຊົນປະຕິວັດລາວ ທາງດ້ານສະຕິ ການຕື່ນຕົວ ແລະການປັບປຸງຕົນເອງ ຂອງພັກຕອນນຶ່ງວ່າ ພັກບໍ່ມີຄວາມສະດຸ້ງໄວ, ບໍ່ຍອມປັບປຸຸງຕົນເອງ:

“ພ້ອມ ກັນນັ້ນ ກໍຮັບຮູ້ຢ່າງເລິກເຊິ່ງ ຊຶ່ງວ່າພັກ ບໍ່ມີຄວາມສະດຸ້ງໄວ ບໍ່ຍອມປັບປຸງຕົນເອງ. ໃນທີ່ສຸດກໍກາຍເປັນ ພັກລ່າຫລັງ ສູນເສັຽຄວາມເຫລື້ອມໃສສັດທາ ແລະການສນັບສນູນ ຈາກມະຫາຊົນ.”

ເມື່ອເວົ້າເຖິງເຣື່ອງພັກ, ເວົ້າເຖິງຄະນະນໍາຂອງພັກ ຫລາຍຄົນເວົ້າວ່າ ປະຊາຊົນລາວສ່ວນຫລວງຫລາຍບໍ່ສົນໃຈນໍາພໍເທົ່າໃດວ່າ ພັກຈະເປັນແນວໃດ, ຜູ້ນໍາພັກຈະແມ່ນໃຜ ຈະປ່ຽນກັນແນວໃດ ນະໂຍບາຍຂອງພັກກໍຍັງແມ່ນອັນເກົ່າ ຊຶ່ງປະຊາຊົນລາວ ຜູ້ຂໍສງວນຊື່ວ່າ ຂະເຈົ້າບໍ່ສົນໃຈ ບ້ານເຮົາຜູ້ໃດສິເປັນຫຍັງ ກໍຢ່າການນໍາເພິ່ນ ຜູ້ໃດຈະອອກໄປຜູ້ໃດຈະເຂົ້າ ມາກໍຄືເກົ່າ:

”ໂອ໋ ສ່ວນນ້ອຍໆ ຂະເຈົ້າບໍ່ສົນໃຈ ບ້ານເຮົານະຜູ້ໃດສິເປັນຫຍັງ ກະຢ່າລະ ຄືເກົ່າຫັ້ນລະ”

ແລະອາດີດເຈົ້າໜ້າທີ່ທ່ານນຶ່ງ ກໍເວົ້າຕໍ່ວິທຍຸເອເຊັຍເສຣີ ໃນມື້ວັນທີ 15 ມົກກະ ຣານີ້ວ່າ ມີຄະນະບໍຣິຫານງານສູນກາງພັກຊຸດໃໝ່ ແຕ່ນະໂຍບາຍກໍຍັງແມ່ນນະໂຍບາຍເກົ່າ ຕ່າງແຕ່ວ່າປ່ຽນຜູ້ຮັບຜິດຊອບໃໝ່ເທົ່ານັ້ນ:

"ກໍຍັງແມ່ນນະໂຍບາຍເກົ່າຫັ້ນແຫຼະຄືເກົ່າ ຕ່າງແຕ່ວ່າ ປ່ຽນຜູ້ຮັບຜິດຊອບບໍ ຫຼື ຊິວ່າແນວໃດຫັ້ນນະ ເນື້ອແທ້ຂອງພັກປະຊາຊົນ ປະຕິວັດລາວ ມັນກະບໍ່ປ່ຽນແປງຫຼາຍເດ້, 7 ຂໍ້ ຄ້າງຄາແກ້ໄຂ ເພິ່ນເປັນປະທານປະເທດ ເພິ່ນກໍຕ້ອງໄດ້ສືບຕໍ່.’’

ເວົ້າເຖິງນະໂຍບາຍຂອງພັກຕໍ່ປະຊາຊົນ ຊາວລາວທ່ານນຶ່ງກໍຢາກໃຫ້ ເລຂາທິການໃຫຍ່ຂອງພັກຄົນໃໝ່ ແລະຄະນະບໍຣິຫານງານ ສູນກາງພັກຊຸດໃໝ່ ມີນະໂຍບາຍດູແລປະຊາຊົນ ໃນປະເທດເປັນຫລັກ ເພາະທີ່ຜ່ານມາບໍ່ດູແລພໍເທົ່າໃດ:

”ຕາມຈິດໃຈກໍຢາກໃຫ້ມີນະໂຍບາຍ ຢາກໃຫ້ເບິ່ງປະຊາຊົນເປັນພື້ນຖານຫັ້ນແຫຼະ, ຜ່ານມາກໍຖືວ່າພັກຣັຖຂັ້ນເທິງ ກໍດູແລປະຊາຊົນ ກໍບໍ່ພໍເທົ່າໃດຫັ້ນນະເນາະ, ຖ້າເບິ່ງປ່ຽນແປງໃໝ່ ກະຢາກໃຫ້ເພິ່ນເບິ່ງພໍ່ແມ່ປະຊາຊົນ ໃຫ້ຢູ່ດີມີສຸຂດີກວ່າເກົ່າ.”

ສໍາລັບເຣື່ອງຜູ້ທີ່ຈະໄດ້ເປັນປະທານປະເທດ, ປະທານສະພາແຫ່ງຊາດ ແລະນາຍົກຣັຖມົນຕຣີ ຂອງ ສປປລາວ ຄົນຕໍ່ໄປນັ້ນ ປະຊາຊົນ ລາວຜູ້ຂໍສງວນຊື່ທ່ານດຽວກັນນັ້ນ ທີ່ຕິດຕາມເຣື່ອງນີ້ ກ່າວຕໍ່ວິທຍຸເອເຊັຽເສຣີໃນມື້ວັນທີ 15 ມົກກະຣາ ນີ້ວ່າ, ຕາມຫາງວຽງຂອງຊາວບ້ານ ຜູ້ທີ່ຈະເປັນນາຍົກຣັຖມົນຕຣີ, ອາດແມ່ນ ທ່ານ ພັນຄໍາ ວິພາວັນ ແລະຜູ້ຈະເປັນປະທານປະເທດ ແມ່ນ ທ່ານ ທອງລຸນ ສີສຸລິດ ແລະ ຍານາງ ປານີ ຢາທໍ່ຕູ້ ເປັນຜູ້ຮອງ, ທ່ານ ໄຊສົມພອນ ພົມວິຫານ ອາດຈະເປັນ ປະທານ ສະພາແຫ່ງຊາດ:

"ພັນຄໍາ ວ່າຊັ້ນເດ໋ ປະທານປະເທດ ກະ, ທອງລຸນ ເລຂາທິການໃຫຍ່ລະແມ່ນ ທ່ານ ທອງລຸນ ລະວ່າແມ່ນ ປານີ ສິມາລອງ. ປະທານສະພາ ແມ່ນ ໄຊສົມພອນ.’’

ຕາມກົດໝາຍວ່າດ້ວຍສະພາແຫ່ງຊາດ ມາດຕຣາ 12, ສະພາແຫ່ງຊາດເລືອກຕັ້ງປະທານປະເທດ ແລະ ຮອງປະທານປະເທດ ຕາມການ ສເນີຂອງຄະນະປະຈໍາສະພາແຫ່ງຊາດ ແລະເລືອກຕັ້ງນາຍົກຣັຖມົນຕຣີ ຕາມການສເນີ ຂອງປະທານປະເທດ ຊຶ່ງ ມາເຖິງຂະນະນີ້ ທາງພັກປະຊາຊົນປະຕິວັດລາວ ກໍຍັງບໍ່ທັນເປີດເຜີຍໃຫ້ສາທາຣະນະຊົນຮູ້ ເຖິງແມ່ນວ່າໄດ້ຖືກກໍານົດໂຕໄວ້ ແລ້ວກໍຕາມ.

LAO HAKSAT
LAO HAKSAT says:
Jan 17, 2021 08:02 AM

Mr thongloon has became the head of the Lao PDR PRESIDENT as national election: President of Socialist republic of Vietnam ,president of the chinese republic and Cuba republic have promoted a worm welcome letter to Lao new president Thongloon. But the three communists countries are much diiference rule and chinese and vietnamese are emnamy between the south china sea torritory. China plan to take over Lao and vietnam and all the Asian's nation: Most of Lao high rang officials are turning thier faces to China because the political parties are the Same: very soon, lao will break to two parties 60-70 % will favor to chinese;

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ