ຄຣູອາສາ ຢູ່ແຂວງຊຽງຂວາງ ລາອອກ ຈຳນວນຫຼາຍຂຶ້ນ

ທ່ານ ບຸນເລື່ອນ ວັນນາຮັກ ຫົວໜ້າຜແນກສຶກສາທິການ ແລະ ກິລາ ແຂວງຊຽງຂວາງ ໃຫ້ສັມພາດຜ່ານຣາຍການ ຮອບບ້ານຜ່ານເມືອງ ຂອງວິທຍຸກະຈາຍສຽງ ແຫ່ງຊາຕລາວ ເມື່ອບໍ່ດົນມານີ້ພາຍໃນແຂວງ ມີຄຣູອາສາສະມັກ ລາອອກແລ້ວ ຈຳນວນຫຼາຍ ເຮັດໃຫ້ປັດຈຸບັນ ທົ່ວແຂວງ ຍັງເຫຼືອຄຣູອາສາສະມັກ ຈຳນວນໜ້ອຍ.

ດ້ານເຈົ້າໜ້ທີ່ ທີ່ກ່ຽວຂ້ອງ ແຂວງຊຽງຂວາງ ກ່າວວ່າພາຍຫຼັງຜົລສອບເສັງ ຮັບຣັຖກອນຄຣູ ອອກມາໃນນັ້ນຄຣູອາສາສະມັກ ຈຳນວນນຶ່ງເສັງບໍ່ຜ່ານ ເຮັດໃຫ້ປີນີ້ເຫຼືອຄຣູອາສາສະມັກ ທົ່ວແຂວງພຽງ 124 ຄົນ ຈາກປີກ່ອນ 165 ຄົນ ຈຶ່ງຄາດວ່າ ຈະເຮັດໃຫ້ການຮຽນ-ການສອນ ບໍ່ມີຄຸນນະພາບ ຍ້ອນຄຣູທີ່ເຫຼືອໜ້ອຍ ໂດຍສະເພາະ ລະດັບຊັ້ນອະນຸບານ ແລະ ປະຖົມສຶກສາ ຕ້ອງໄດ້ສອນຫ້ອງຄວບ ແລະ ຄຣູຊັ້ນມັທຍົມ ສອນກາຍຊົ່ວໂມງ ຕໍ່ສັປດາ.

ດັ່ງເຈົ້າໜ້າທີ່ ທີ່ກ່ຽວຂ້ອງ ແຂວງຊຽງຂວາງ ກ່າວຕໍ່ວິທຍຸເອເຊັຽເສຣີ ໃນວັນທີ 16 ຕຸລາ ນີ້ວ່າ:

“ຜົລເສັງອອກມາແລ້ວ ເຂົາເຈົ້າທະຍອຍອອກ ແລ້ວກໍມ່ຮອດສົກຮຽນນີ້ ເສັງອີກໄດ້ 8 ໂຕເລກຫັ້ນ ກໍທະຍອຍອອກ ມາຮອດປັດຈຸບັນນີ້ ກໍມີແຕ່ 124. ກໍມີຜົລກະທົບແຫຼະ ເພາະວ່າມັນກໍເກີດມີຫ້ອງຄວບເນາະ ຫຼັງຈາກທີ່ຄຣູອາສາອອກໄປ ພວກເຮົາກໍໄດ້ເອົາຄຣູເຂົ້າໄປ ມ.ຕົ້ນ, ມ.ປາຍ ກໍມີຊົ່ວໂມງເກີນກໍານົດ ໃຫ້ສອນ ມ.ຕົ້ນ ເຖິງ ມ.ປາຍ 16-18 ຊົ່ວໂມງ ເຂົາກໍກາສອນກາຍ 18 ຊົ່ວໂມງຂຶ້ນໄປຫັ້ນແຫຼະ ກໍຕ້ອງຄິດໄລ່ຊົ່ວໂມງ ເກີນໃຫ້ເຂົາເຈົ້າ.”

ດ້ານຜູ້ປົກຄອງ ຂອງຄຣູອາສາສະມັກ ຈາກເມືອງພູກູດ ແຂວງຊຽງຂວາງ ກ່າວວ່າ ລູກຂອງໂຕເອງເຮັດວຽກ ເປັນຄຣູສອນພາສາລາວ ຢູ່ໂຮງຮຽນປະຖົມສຶກສາ ແຫ່ງນຶ່ງ ມາດົນກວ່າ 9 ປີແລ້ວ ບໍ່ໄດ້ໂຄຕ້າ ຣັຖກອນຄຣູ ບວກກັບສະພາບປັດຈຸບັນ ເສຖກິຈຝືດເຄືອງ ຄ່າຄອງຊີບສູງ ແລະ ບໍ່ມີເງິນເດືອນ ລູກຈຶ່ງຕັດສິນໃຈ ລາອອກຈຈາກການເປັນຄຣູອາສາສະມັກ ໄປເປັນເຮັດວຽກ ຢູ່ປະເທດເກົາຫຼີໃຕ້ ຍ້ອນລູກເປັນເສົາຫຼັກ ຂອງຄອບຄົວ ພ້ອມທັງເປັນແມ່ລ້ຽງດ່ຽວ ແລະມີລູກສາວທີ່ຕ້ອງສົ່ງເສັຍ ລ້ຽງລູກໃຫ້ຮຽນຈົບຊັ້ນສູງ.

ດັ່ງຍານາງກ່າວ ໃນມື້ດຽວກັນນີ້ວ່າ:

“ບໍ່ໄດ້ໂຄຕ້າຣັຖກອນເນາະ ບໍ່ມີເງິນໃຫ້ລູກບໍ່ໄດ້ຢູ່ຫ້ອງການເດ້ເນາະ ເປັນຄຣູສອນກໍບໍ່ໄດ້ ແລ້ວກໍຄອບຄົວຫຍຸ້ງຍາກ ກໍຕັດສິນໃຈໄປເຮັດວຽກ ຢູ່ເກົາຫຼີ ໄປຖືກກົດໝາຍ ໄປຜ່ານກົມແຮງງານເຮົານີ້ແຫຼະ ກໍຢາກວ່າແມ່ນເສົາຫຼັກເນາະ ມີລູກຜູ້ນຶ່ງ ກໍຮ້າງຜົວ. ເສຖກິຈແນວນີ້ມັນແຮງຝືດເຄືອງເນາະ ເສຖກິຈກໍບໍ່ໄດ້ ອັນໃດກໍແພງໝົດນ່າ.”

ຄຣູອາສາສະມັກ ຈາກເມືອງຄໍາ ແຂວງຊຽງຂວາງ ກ່າວວ່າ ການຕັດສິນໃຈ ລາອອກຈາກຄຣູ ຍ້ອນອົດທົນ ສຸດແລ້ວ ແລະກໍຍັງຄົງຄິດຮອດນັກຮຽນ ຢູ່ແຕ່ວ່າ ໂຕເອງຖ້າໂຄຕ້າຣັຖກອນມາ 5 ປີແລ້ວ ບໍ່ໄດ້ເປັນຣັຖກອນຄຣູ, ທັງບ້ານກັບໂຮງຮຽນຫ່າງໄກກັນ ຫຼາຍສິບກິໂລແມັດ ເຮັດໃຫ້ຄິດຮອດລູກ ຈຶ່ງອອກມາເບິ່ງແຍງລູກ ແລະ ເຮັດໄຮ່ສາລີ ອີກທັງໝົດຫວັງ ທີ່ໂຄຕ້າຣັຖກອນຄຣູ ມີຈຳນວນໜ້ອຍ ຂະນະທີ່ຄຣູອາສາສະມັກ ຢູ່ເມືອງຄຳ ຕໍ່ຄີວລໍຖ້າໂຄຕ້າ ຣັຖກອນເຖິງ 18 ຄົນ.

ດັ່ງຍານາງກ່າວ ໃນມື້ດຽວກັນນີ້ວ່າ:

“ສຸດໆ ແລ້ວນັກຮຽນຄິດຮອດຢູ່ຫັ້ນແຫຼະ ແຕ່ວ່າຖ້າຫຼາຍປີ ເອົາລູກເອົາຜົວແດ່ ຜົວບໍ່ໃຫ້ໄປສອນຫັ້ນນ່າ ໄປເຮັດທຳທຸຣະກິຈຄອບຄົວເລີຍ ຢູ່ໂຕເມືອງເນາະ ແລ້ວໄປສະມັກຢູ່ດອນ ເຂດນອກຫັ້ນນ່າ ການເດີນທາງ ບໍ່ການສນັບສນູນ ຂອງບ້ານກໍມີຢູ່ ແຕ່ວ່າໄປກໍໄປນອນຫໍພັກຫັ້ນນ່າ.”

ດ້ານຜູ້ປົກຄອງ ຈາກເມືອງແປກ ແຂວງຊຽງຂວາງກ່າວວ່າໂຕ ຮູ້ສຶກເສັຍດາຍ ທີ່ບັນດາຄຣູອາສາສະມັກ ລາອອກ ຍ້ອນພວກເຂົາເຈົ້າທຸ້ມເທຄວາມຮູ້ ຄວາມສາມາດ ແລະ ທຶນສ່ວນໂຕ ເພື່ອຊ່ອຍ ພັກ-ຣັຖ ແຕ່ສຸດທ້າຍແລ້ວ ເຂົາເຈົ້າບໍ່ໄດ້ໂຄຕ້າຣັຖກອນຄຣູ ບວກກັບປະເທດລາວ ປະເຊີນກັບສະພາບ ເສຖກິຈທີ່ຝືດເຄືອງ ເຊິ່ງເປັນປັດໄຈສຳຄັນ ທີ່ເຮັດໃຫ້ຄຣູອາສາສະມັກ ພາກັນອອກ ຈຳນວນຫຼາຍ.

“ເຣື່ອງຄຣູອາສານີ້ ຄັນຊິເວົ້າແລ້ວ ກໍໃຊ້ທຶນຂອງໂຕເອງແຫຼະ ຮັບໃຊ້ນັກຮຽນນີ້ນ່າ ແຕ່ສຸດທ້າຍມັນໄປໄດ້ຕາມຈຸດປະສົງ ຂອງເຂົ້າເຈົ້າຫັ້ນນ່າ. ເຂົາເຈົ້າກໍເລີຍທໍ້ ໂດຍສະເພາະບວກກັບ ວິກິດເສຖກິຈ ທຸກມື້ນີ້ ນີ້ແຫຼະ. ມັນກໍໄປບໍ່ລອດ ເສັຍດາຍທີ່ເຂົາເຈົ້າ ໄດ້ທຸ້ມເທ ຜູ້ທີ່ວ່າມີເງິນເດືອນໜ້ອຍ ຂ້າຣາຊການ, ທະຫານ, ຕຳຣວດ ມີເງິນເດືອນໜ້ອຍ ແຕ່ມັນຍັງທໍ້ ແຕ່ວ່າຜູ້ບໍ່ມີກໍແຮງທໍ້ ຄ່າຄອງຊີບນີ້ແຫຼະ. ດຽວນີ້ມັນຄູນສາມເທົາໂຕເດ້.”

ທ່ານກ່າວຕື່ມວ່າ ຢາກໃຫ້ພາກສ່ວນທີ່ກ່ຽວຂ້ອງ ແກ້ໄຂບັນຫາການໃຊ້ເສັ້ນສາຍ ເພື່ອເອົາລູກຫຼານ ຂອງໂຕເອງເຂົ້າ ເປັນຣັຖກອນຄຣູ.

“ຢາກໃຫ້ຄໍານືງເຖິງເບິ່ງວ່າເຣື່ອງ ເຂົາເຈົ້າໄດ້ຕັດສິນໃຈນ່າ ແມ່ນອາຊີບທີ່ເຂົາເຈົ້າມັກ ສ່ວນຫຼາຍມັນກໍເວົ້າເຣື່ອງ ເຣື່ອງເສັ້ນ ເຣືອງສາຍ ເຣື່ອງຈຸ້ມ ເຣື້ອງເຈື້ອ ນ່າ ໂດຍສະເພາະພາກສ່ວນ ທີ່ບໍ່ມີເສັ້ນ-ມີສາຍ ພາກສ່ວນລູກພໍ່ໄຮ່ ຊາວນາ ພໍ່ແມ່ ບໍ່ເປັນເຈົ້າ-ເປັນນາຍ ນີ້ແຫຼະ. ມາສະມັກເຮັດ ກໍຫວັງວ່າມາປະກອບສ່ວນ ຊ່ອຍພັກ ຊ່ອຍຣັຖ ແລ້ວກໍຄິດວ່າ ຢາກເປັນສ່ວນນຶ່ງ ທີ່ມີຜົລງານໃຫ້ພັກ ໃຫ້ຣັຖ ແຕ້ສຸດທ້າຍ ມັນກໍບໍ່ໄປ. ໄປໄດ້.”

ທາງການ ແຂວງຊຽງຂວາງ ມີແຜນບຸຣິມະສິດ ອັນດັບທໍາອິດ ຄືຈະພະຍາຍາມລະດົມ ໃຫ້ຄຣູອາສາສະມັກ ທີ່ຍັງເຫຼືອຢູ່ ໃຫ້ສອນນັກຮຽນຕໍ່ໄປ ໂດຍກຳນົດນຶ່ງນະໂຍບາຍ ໃນມະຕິຕົກລົງເລຂທີ 09/ລບ ເຫັນດີ ໃຫ້ປະຕິບັດເງິນເດືອນ ແກ່ຄຣູອາສາສະມັກ ຕາມຊັ້ນຂັ້ນເງິນເດືອນ ຄືກັບຄຣູທີ່ເປັນຣັຖກອນ ແລະ ຫວັງວ່າຈະໄດ້ຕາມທີ່ມະຕິນັ້ນ.

ດັ່ງເຈົ້າໜ້າທີ່ ທີ່ກ່ຽວຂ້ອງ ແຂວງຊຽງຂວາງ ກ່າວວ່າ:

“ເພິ່ນກໍຊິມິນະໂຍບາຍເດ້ ໃຫ້ຄຣູອາສານ່າຄິດໄລ່ ຕາມຂັ້ນ ຊັ້ນໃຫ້ເຂົາເຈົ້າຫັ້ນນ່າ ເງິນເດືອນ ເງິນອຸດໜູນ ກໍຈະແມ່ນເງິນນະໂຍບາຍຫັ້ນແຫຼະ ເງິນຊ່ອຍເຫຼືອແຫຼະ ກໍແລ້ວແຕ່ເພິ່ນ. ພວກເຮົາກໍໄດ້ປໄປຮ່ວມກັບກົມຈັດຕັ້ງ ໄປຮ່າງຂໍ້ຕົກລົງ ນະໂຍບາຍຄຣູອາສາ. ພວກເຮົາຮ່າງແລ້ວ ແຕ່ວ່າມັນຊິໄດ້ຕາມທີ່ຮ່າງໄປຫັ້ນບໍ່ ການຄິດຫຼອກຄິດໄລ່ ກໍຕິດໄລ່ຕາມມະຕິ 09 ທີ່ເພິ່ນບົ່ງອອກມາຫັ້ນແຫຼະ.”

ທ່ານ ບຸນເລື່ອນ ວັນນາຮັກ ກ່າວເຖິງບັນຫາດັ່ງກ່າວວ່າ ເພື່ອແກ້ໄຂຄຣູອາສາສະມັກ ທີ່ຍັງເຫຼືອທາງແຂວງ ຈະສືບຕໍ່ຄັດເລືອກ ເອົາເປັນຣັຖກອນຄຣູ ຕາມຈຳນວນໂຄຕ້າທີ່ຣັຖບານມອບໃຫ້ ໃນແຕ່ລະປີ ຕາມເງື່ອນໄຂ ແລະ ມາຕຖານ ທີ່ກະຊວງສຶກສາທິການ ແລະກິລາ ວາງອອກ ຢ່າງຖືກຕ້ອງ ຕາມລະບຽບການ.

ກະຊວງສຶກສາທີການ ແລະ ກິລາ ໄດ້ແຈ້ງໃຫ້ຮູ້ວ່າ ຈໍານວນຄຣູອາສາສະມັກ ປັດຈຸບັນມີ 7,693 ຄົນ ໃນນັ້ນ ຊັ້ນການສິດສອນ ກ່ອນໄວຮຽນ 1,417 ຄົນ, ປະຖົມສຶກສາ 2,601 ຄົນ, ມັທຍົມຕອນຕົ້ນ 1,372 ຄົນ ແລະ ຊັ້ນມັທຍົມສົມບູນ 2,303 ຄົນ. ໃນນີ້ເປັນອາສາສະມັກມາໄດ້ 8-9 ປີ ຈຳນວນ 38 ຄົນ, 6-7 ປີ ຈຳນວນ 1,636 ຄົນ ແລະ 3-5 ປີ ຈຳນວນ 6,019 ຄົນ.