ບ້ານລາວໃນປະເທດໄທ (ຕອນ 31)

2007-11-20
ອີແມວລ໌
ຄໍາເຫັນ
Share
ພິມ

ສະບາຍດີ ທ່ານຜູ້ຟັງທີ່ເຄົາຣົບແລະຮັກແພງ

ໃນສັປະດາ ຜ່ານມາ ເຮົາ ໄດ້ສເນີ ເລື້ອງ ຄົນລາວ ຢູ່ ບ້ານໄຜ່ໜອງ ແຂວງອະຢຸດທະຍາ ມາເຖິງ ຕອນທີ່ ພາທ່ານໄປ ໃຫ້ພົບກັບ ສະພາບ ຕົວຈິງ ຂອງ “ບ້ານອະຣັນຢິກ” ຊຶ່ງໃນອາດີດ ແມ່ນ ບ່ອນຕັ້ງ ໂຮງພາສີ, ໂຮງບ່ອນເບັ້ຽ ແລະ ຕລາດ ທີ່ມີ ປະຊາຊົນ ເອົາ ສິນຄ້າ ພື້ນເມືອງ, ເຄື່ອງຢູ່, ເຄື່ອງກິນ ມາວາງຂາຍ ແລະ ກຸ່ມ ນາຍຊ່າງ ບ້ານໄຜ່ໜອງ ໄດ້ພາກັນ ມາຂາຍ ມີດພ້າ ຈົນເຮັດໃຫ້ ມີດ ຂອງ ພວກເຂົາເຈົ້າ ໄດ້ຊື່ວ່າ “ມີດອະຣັນຢິກ”.

ບ້ານ ອະຣັນຢິກ ຕັ້ງຢູ່ ໝູ່ 4 ຂອງ ຕາແສງ ປາກທ່າ ເມືອງທ່າເຮືອ ແຂວງ ພຣະນະຄອນ ສີອະຢຸດທະຍາ ເປັນຊຸມຊົນ ຂອງຄົນ ທີ່ນັບຖື ສາສນາ ອິດສະລາມ ແຕ່ຄົນໃນ ປະຈຸບັນ ຊ້ຳພັດ ບໍ່ຮູ້ຊ້ຳ ວ່າ ໂຮງພາສີ ແລະ ໂຮງ ບ່ອນເບັ້ຽ ນັ້ນ ຕັ້ງຢູ່ ບໍຣິເວນໃດ ຂອງບ້ານ.

ສັປະດານີ້ ເຮົາ ຈະພາທ່ານ ໄປພົບກັບ ສີລະປະ ແລະ ວັທນະທັມ ຂອງ ຄົນເຊື້ອລາວ ບ້ານໄຜ່ໜອງ.

(ສຽງແຄນ)

ຄົນ ບ້ານໄຜ່ໜອງ ໝົດບ້ານ ເປັນ ນາຍຊ່າງ, ທີ່ເດັ່ນ ກ່ວາໝູ່ ແມ່ນ ຊ່າງຕີມີດ-ຕີພ້າ ແລະ ຄົນບ້ານນີ້ ກໍສົມກັບ ໄດ້ຊື່ວ່າ ເປັນ ບ້ານນາຍຊ່າງເ ອົາແທ້ໆ, ເພາະ ນອກຈາກ ຈະເປັນ ບ້ານຄົນລາວ ທີ່ມີ ຄົນເວົ້າລາວ ແລະ ປະຕິບັດ ສາສນາ ມີບຸນ ຕ່າງໆ ສົມກັບ ທີ່ໄດ້ ຊື່ວ່າ ເປັນຊາວພຸດ ແລ້ວ, ກໍບໍ່ມີຫຍັງ ສແດງອອກ ອີກເລີຍວ່າ ຄົນບ້ານນີ້ ມີ ວຽກງານ ສີລະປະ ອື່ນ ໃດອີກ, ບໍ່ວ່າ ຈະເປັນ ການຟ້ອນ-ການແອ່ວ ຫຼື ການຮ້ອງ-ການລຳ ແມ່ນ ບໍ່ມີ ທັງນັ້ນ, ຊຶ່ງຕ່າງໄປ ຈາກ ບ້ານຄົນທົ່ວໄປ ທີ່ມີ ສີລະປະ ບໍ່ໜ້ອຍ ກໍຫຼາຍ ຫຼື ຢ່າງໜ້ອຍ ກໍຕ້ອງ ມີຄົນ ເສບດົນຕຣີ, ບໍ່ວ່າ ແຄນ ຫຼື ກະຈັບປີ່.

ຕາແສງ ບັນຢັດ ເວົ້າເຖິງ ຄວາມຂາດເຂີນ ວຽກງານ ສີລະປະ ວັທນະທັມ ຂອງຄົນ ບ້ານໄຜ່ໜອງ ວ່າ:

(ສຽງ ພໍ່ເຖົ້າ ບັນຍັດ)

ສ່ວນວຽກງານ ທີ່ພໍຈະຖືໄດ້ວ່າ ເປັນວຽກງານ ສີລະປະ, ກໍຕ້ອງແມ່ນ ວຽກງານ ທີ່ ກ່ຽວຂ້ອງ ກັບ ອາຊີບຕີມີດ-ຕີພ້າ ຂອງພວກກ່ຽວ ເທົ່ານັ້ນ ຄື ບຸນໄຫວ້ຄູ-ບູຊາເຕົາ ຊຶ່ງຈະຈັດ ໃຫ້ມີຂຶ້ນ  ໃນ ມື້ ວັນພະຫັດ ເດືອນ 6 ຂອງທຸກປີ ແລະ ບຸນດັ່ງກ່າວ ຖືວ່າ ເປັນບຸນ ຂອງນາຍຊ່າງ ຕີມີດ ທຸກຄົນ, ທັງຢູ່ ບ້ານໄຜ່ໜອງ ແລະ ບ້ານຕົ້ນໂພ.

ບຸນໄຫວ້ຄູ - ບູຊາເຕົາ ນີ້ ໄດ້ຖືກຈັດ ໃຫ້ເປັນພິທີ ສຳຄັນ ຂອງ ເທດສະບານ ຕຳບົນ ອະຣັນຢິກ ດັ່ງໄດ້ມີ ຄຳຂວັນ (motto) ປະຈຳ ເທດສະບານ ວ່າ: “ຫັດຖະກັມ ມີດລືລັ່ນ ບູຮານ ສຖານວັດໃຫຍ່ ເທບນິມິດ ວິຖີຊີວິດ ສອງຝັ່ງ ແມ່ນ້ຳປ່າສັກ ເອກກະລັກ ປະເພນີ ໄຫວ້ຄູ ບູຊາເຕົາ”.

(ສຽງແຄນ)

ສິ່ງຢຶດໜ່ຽວ ທາງຈິດໃຈ ທີ່ພາໃຫ້ ຄົນ ບ້ານໄຜ່ໜອງ ໄດ້ຊື່ວ່າ ເປັນຄົນ ນັບຖື ສາສນາພຸດ ກໍຄື ຢູ່ສິມ ຫຼື ໂບດ ຂອງ ວັດມະເຫຍົງ ຊຶ່ງເປັນ ວັດເກົ່າແກ່ ຂອງ ບ້ານໄຜ່ໜອງ ມີ ພຣະເຈົ້າໃຫຍ່ ຫຼື ພຣະປະທານ ເປັນ ພຣະພຸດທະຮູບ ທີ່ຄົນບ້ານໄຜ່ໜອງ ເຊື່ອກັນວ່າ ເປັນ ພຣະພຸດທະຮູບ ທີ່ ບັນພະບຸຣູສ ຄົນລາວ ໄດ້ນຳມາໄວ້ ຕັ້ງແຕ່ ຄັ້ງທີ່ອົບພະຍົກ ກັນມາ ຢູ່ສຍາມ ເທື່ອທຳອິດ.

ນອກຈາກ ພຣະປະທານ ຢູ່ໃນສິມແລ້ວ ຢູ່ກ້ອງໂບດ ຫຼື ກ້ອງສິມ ຍັງມີ ພຣະ ພຸດທະຮູບ ທີ່ມີ ຮູບຊົງ ເປັນສີລະປະ ແບບລາວ ອົງນ້ອຍໆ ໂອບ ຫຼື ຫຸ້ມເງິນ-ຫຸ້ມຄຳ ອີກ ຈຳນວນ 121 ອົງ ຊຶ່ງ ຂຸດຄົ້ນ ຂຶ້ນມາ. ດັ່ງ ຕາແສງ ບັນຢັດ ໄດ້ເວົ້າເຖິງ ຄວາມສຳຄັນ ຂອງພຣະເຈົ້າໃຫຍ່ ໃນສິມ ແລະ ພຣະພຸດ ທະຮູບ ອົງເລັກ ອົງນ້ອຍ ທີ່ຖືກຝັງຢູ່ ກ້ອງສິມ ວ່າ:

(ສຽງ ພໍ່ເຖົ້າ ບັນຍັດ)

ຢູ່ທາງໜ້າສິມ ມີ ພຣະພຸດທະຮູປ ອີກອົງນຶ່ງ ເປັນພຣະສັງກະຈາຍ ເຂົ້າໃຈວ່າ ຊ່າງຄົນຈີນ ໄດ້ສ້າງຂຶ້ນ ພາຍຫຼັງ ທີ່ສ້າງສິມ ຮຽບຮ້ອຍແລ້ວ ເນື່ອງຈາກ ພຣະ ພຸດທະຮູບ ທີ່ມີ ຮ່າງຄີງ ຕຸ້ຍ ພີອົງນີ້ ເຮັດມາ ຈາກເສດ ເຫຼືອ ຂອງດິນຈີ່ ແລະ ຊີມັງ ທີ່ໃຊ້ ໃນການສ້າງສິມ. ແລະ ທີ່ເຮັດໃຫ້ ເຊື່ອວ່າ ນາຍຊ່າງ ຄົນຈີນ ເປັນ ຜູ້ປັ້ນຂຶ້ນ ນັ້ນ ກໍເພາະວ່າ ພຣະສັງກະຈາຍ ເປັນສີລະປະ ແບບຈີນ ແລະ ຢູ່ເທິງ ຈົ່ວ ຫຼື ໜ້າບັນ ຂອງສິມນັ້ນ ກໍມີຮູປ ຕຸ໊ກຕາຈີນ.

ເລີຍ ພຣະສັງກະຈາຍ ໄປທາງຂວາ ຈະມີຮູບປັ້ນ ຂອງເທວະດາ ທີ່ເຊື່ອກັນວ່າ ເປັນ ເທວະດາ ທີ່ເປັນ ຈຸດກຳເໜີດ ຂອງອາຊີບ ນາຍຊ່າງ ຕ່າງໆ. ຮູບປັ້ນ ດັ່ງກ່າວ ຄື ທ້າວ ວິດສຸກັມ ຫຼື ພຣະ ວິດສະວະກັມ ຫຼື ວິດສະນຸກັມ ຫຼື ເວດສຸກັມ ຊຶ່ງຊື່ຕ່າງໆ ນີ້ ເປັນ ເທວະດາ ອົງດຽວກັນ ຊຶ່ງຄົນລາວ ຮ້ອງວ່າ “ທ້າວ ເພັຊສະຫຼູກັມ” ຊຶ່ງຖືວ່າ ເປັນເທວະດາ ທີ່ມີ ຄວາມສຳຄັນ ຕໍ່ອາຊີບ ນາຍຊ່າງ. ຕາແສງ ບັນຢັດ ເວົ້າເຖິງ ພຣະສັງກະຈາຍ ແລະ ພຣະເພັຊສະຫຼູກັມ ວ່າ:

(ສຽງ ພໍ່ເຖົ້າ ບັນຍັດ)

ແຕ່ຢ່າງໃດກໍຕາມ ເຖິງແມ່ນວ່າ ບ້ານໄຜ່ໜອງ ຈະດ້ອຍແດ່ ໃນເລື້ອງ ສີລະປະ ວັທນະທັມ ໂດຍສະເພາະ ສີລະປະ ທີ່ສະທ້ອນ ອອກເຖິງ ຄວາມເປັນລາວ ແຕ່ຄົນລາວ ບ້ານໄຜ່ໜອງ ກັບມີ ສິ່ງທີ່ເປັນ ເອກກະລັກ ຂອງ ຄວາມເປັນລາວ ຢ່າງສຳຄັນ ແລະ ໜ້ອຍນັກ ໜ້ອຍໜາ ທີ່ ບ້ານລາວ ໃນພາກສ່ວນ ຕ່າງໆ ຈະມີ ເຫມືອນກັນ ໄດ້ ຄື ຢູ່ທີ່ ວັດມະເຫຍົງ ບ້ານ ໄຜ່ໜອງ ມີທາດ ທີ່ມີຮູບຊົງ ແບບດຽວກັນ ກັບ “ຍອດ ພຣະທາດຫຼວງ”.

ທາດ ທີ່ມີຍອດ ເປັນຄື ຍອດພຣະທາດຫຼວງ ຢູ່ນະຄອນຫຼວງ ວຽງຈັນ ນີ້ ມີຢູ່ 2 ຍອດ ຄື ຕັ້ງຢູ່ ທາງຂວາ ແລະ ຊ້າຍຂອງສິມ ຊຶ່ງ ສັນນິຖານ ວ່າ ອາດຈະແມ່ນ ຝີມື ຂອງ ນາຍຊ່າງ ຄົນຈີນ ກຸ່ມທີ່ກໍ່ສ້າງສິມ ນັ້ນເອງ ໂດຍມີ ຄົນລາວ ເປັນຜູ້ອອກແບບ ທາດ ແລະ ເປັນຜູ້ຈ້າງ ໃຫ້ ນາຍຊ່າງ ຄົນຈີນ ສ້າງຂຶ້ນ.

ແລະ ເປັນທີ່ ໜ້າອອນຊອນ ຫຼາຍ ໃນມື້ ທີ່ເຮົາ ໄດ້ເຂົ້າໄປ ຢ້ຽມຢາມ ບ້ານໄຜ່ໜອງ ຕົ້ນຈຳປາ ທີ່ມີ ຜູ້ປູກໄວ້ ໃກ້ໆ ກັບ ອົງທາດ ນີ້ ພວມກຳລັງ ເບ່ງບານ ແລະ ສົ່ງກິ່ນຫອມ ອົບອວນ ຊວນໃຫ້ຄຶດຮອດບ້ານ, ຄຶດຮອດພໍ່ແມ່ ແລະ ພີ່ນ້ອງລາວ ແທ້ໆ. ພໍ່ເຖົ້າ ບັນຢັດ ເວົ້າເຖິງ ຍອດ ພຣະທາດຫຼວງ ທີ່ເປັນ ຄວາມພູມໃຈ ຂອງຄົນ ເຊື້ອລາວ ຢູ່ ວັດ ບ້ານໄຜໜອງ ວ່າ:

(ສຽງ ພໍ່ເຖົ້າ ບັນຍັດ ແລະ ສຽງແຄນ)

ທ່ານ ຜູ້ຟັງ ທີ່ຮັກແພງ, ເວລາ ສຳລັບ ລາຍການ ຂອງເຮົາ ໃນສັປະດານີ້ ໄດ້ສ້ຽງສຸດ ລົງແລ້ວ. ເຊີນທ່ານ ຮັບຟັງ ເລື້ອງລາວ ຂອງ “ບ້ານລາວໃນໄທ - ແຕ່ອາດີດຫາປະຈຸບັນ” ໄດ້ໃໝ່ ໃນ ສັປະດາໜ້າ ຊຶ່ງ ຈະໄດ້ ພາທ່ານ ໄປພົບກັບ ພິທີ ໄຫວ້ຄູ-ບູຊາເຕົາ ຊຶ່ງເປັນບຸນ ແລະ ພິທີ ທີ່ສຳຄັນ ຂອງ ນາຍຊ່າງ ຕີມີດ ຄົນເຊື້ອລາວ ບ້ານໄຜ່ໜອງ.

ສຳລັບ ສັປະດານີ້, ຂໍໄດ້ຮັບ ຄວາມປຣາຖໜາດີ ຈາກ ແສງແກ້ວ ແກ່ນທັມ ຜູ້ຮຽບຮຽງ, ແລະ ຂ້າພະເຈົ້າ ວຽງໄຊ ຜູ້ສເນີ, ສະບາຍດີ.

ເຕັມຫນ້າ