ທາງການລາວຖແລງຂ່າວ ມົ້ງລາວທີ່ກັບປະເທດ

ເຖິງວ່າຊາວມົ້ງລາວ ສີ່ພັນກວ່າຄົນ ຈາກບ້ານຫ້ວຍນ້ຳຂາວ ແລະໜອງຄາຍ ຈະຖືກສົ່ງກັບຄືນ ປະເທດທັງໝົດ ແລ້ວກໍ່ຕາມ ແຕ່ບັນຫາກໍຍັງ ບໍ່ຈົບສິ້ນເທື່ອ ເນື່ອງຈາກປະຊາຄົມ ສາກົນຍັງໃຫ້ຄວາມສົນໃຈ ຢ່າງບໍ່ລົດລະ ແລະຄົງເປັນເຫດນີ້ເອງ ທາງການລາວຈຶ່ງໄດ້ ເຊີນສຳນັກຂ່າວທີ່ຕິດຕາມຣາຍງານ ກ່ຽວກັບບັນຫານີ້ ໃນບາງກອກ ແລະ Hanoi ໄປຮ່ວມປະຊຸມ ຖແລງຂ່າວໃນວັນຈັນ 25 ມົກຣາ ທີ່ນະຄອນວຽງຈັນ ໂດຍພົນຈັດຕະວາ ບົວສ້ຽງ ຈຳປາພັນ ປະທານອານຸກັມມາການການຮ່ວມມືຊາຍແດນລາວ-ໄທ… ອັນດັບຕໍ່ໄປ ວຽງໄຊ ຈະສເນີການວິຈັຍ ກ່ຽວກັບບັນຫາດັ່ງກ່າວ
ວຽງໄຊ
2010-01-22
ອີແມວລ໌
ຄໍາເຫັນ
Share
ພິມ

ບັນຫາຊາວມົ້ງລາວ ໃນສູນກັກຂັງຊົ່ວຄາວ ບ້ານຫ້ວຍນ້ຳຂາວ ໃນແຂວງເພັດຊະບູນ ແລະຫ້ອງກັກຂັງ ຂອງຕຳຣວດ ກວດຄົນເຂົ້າເມືອງໆໜອງຄາຍ ຂອງໄທ ທີ່ຍືດເຍື້ອມາ 5-6 ປີແລ້ວນັ້ນ ຈະຈົບລົງໄດ້ແທ້ບໍ່ ໃນເມື່ອບັດນີ້ ພວກເຂົາເຈົ້າທັງໝົດ ໄດ້ກັບໄປເຖິງ ປະເທດລາວແລ້ວ ຫລືຍັງຈະຍິ່ງທວີະຄູນຂຶ້ນ ເນື່ອງຈາກບໍ່ມີ ອົງການເອກກະຣາຊໃດ ໄດ້ຣັບອະນຸຍາດໃຫ້ ພົບພໍ້ແລະໂອລົມກັບພວກ ທີ່ຖືກສົ່ງກັບຢ່າງເສຣີ ແທນທີ່ຈະໄປເບິ່ງ ແຕ່ບ້ານພັທນາຜາຫລັກ ຊຶ່ງເປັນທີ່ອາໃສຂອງ ຊາວມົ້ງພຽງ 4-5 ຮ້ອຍຄົນທີ່ຖືກສົ່ງກັບ ຈາກໄທ 20 ກວ່າເທື່ອແລ້ວນັ້ນ ແລະໄດ້ເວົ້າຖາມທຸກສຸກ ນຳພວກທີ່ທາງການລາວ ຕຣຽມມາໃຫ້ພໍ້ເທົ່ານັ້ນ ດັ່ງປະສົປການ ຂອງນັກການທູຕ ຕ່າງປະເທດໃນລາວ ແລະລ້າສຸດ ສະມາຊິກຣັຖສະພາ ສາຫະຣັຖນັ້ນ?

ເຫດການສົ່ງຊາວມົ້ງລາວ 4 ພັນກ່ວາຄົນກັບປະເທດ ໃນວັນທີ່ 28 ແລະ 29 ທັນວາຜ່ານມາ ໄດ້ສ້າງກະແສ ຕໍ່ຕ້ານຢ່າງຮຸນແຮງ ຈາກປະຊາຄົມສາກົນ ໂດຍສະເພາະອົງການ ປົກປ້ອງສິດທິມະນຸດ ແລະສະຫະປະຊາຊາຕ ເຖິງວ່າການສົ່ງນີ້ ເປັນໄປຕາມການ ຕົກລົງຣະຫວ່າງ ລາວແລະໄທ ອັນທີ່ທັງສອງຝ່າຍ ເອີ້ນວ່າ ‘ພວກຄົນເຂົ້າເມືອງຜິດກົດໝາຍ’ ນັ້ນຕ້ອງຖືກສົ່ງກັບ ປະເທດເດີມ ກ່ອນທ້າຍປີ 2009.

ສິ່ງທີ່ພາໃຫ້ເກີດ ກະແສຕໍ່ຕ້ານ ແລະການຕິຕຽນຢ່າງແຮງນັ້ນ ບໍ່ແມ່ນການສົ່ງກັບ ປະເທດເດີມ ແຕ່ແມ່ນວິທີ ທີ່ສົ່ງກັບນັ້ນຕ່າງຫາກ. ເພາະໃນທັງໝົດ 4ພັນກວ່າ ຄົນນັ້ນ ມີຈໍານວນນຶ່ງ ເປັນຜູ້ອົພຍົບການເມືອງ ແລະຕ້ອງມີອັນຕະຣາຍ ຖ້າຖືກສົ່ງກັບຄືນສປປລາວ ແລະ158ຄົນ ທີ່ຖືກຄັງຢູ່ໜອງຄາຍນັ້ນ ສ່ວນຫລາຍກໍ່ຖືກ ອົງການສະຫະປະຊາຊາຕ ສັມພາດແລ້ວ ແລະຮັບຮູ້ເປັນຜູ້ອົພຍົບ ທີ່ມີສິດເດີນທາງໄປ ຕັ້ງຖິ່ນຖານ ໃນປະເທດທີ່3ໄດ້ ແລະມີ4ປະເທດສເນີ ຣັບເອົາແລ້ວ ຄື: Netherlands, Australia, Canada, ແລະສະຫະຣັຖ ອະເມຣິກາ ແຕ່ທາງການໄທ ຫາກບໍ່ອະນຸຍາດໃຫ້ໄປ ໂດຍໃຫ້ເຫດຜົນວ່າ ໃຫ້ກັບໄປລາວ ປະກອບເອກສານ ຢ່າງຖືກຕ້ອງເສັຍກ່ອນ ແລ້ວຈຶ່ງໄປ ວ່າດັ່ງນັ້ນ.

ຊາວມົ້ງລາວໃນສູນ ບ້ານຫ້ວຍນ້ຳຂາວ ທັງໝົດອ້າງວ່າພວກຕົນ ຜ່າຍໜີຈາກການ ປະຫັດປະຫານ ຂອງທາງການລາວ ເນື່ອງຈາກວ່າຕົວເອງ ຫລືບຸພະກາຣີ ເຂົ້າຂ້າງ ສະຫະຣັຖອະເມຣິກາ ຕໍ່ສູ້ກັບພວກປະເທດລາວ communist ໃນເວລາສົງຄາມວຽດນາມ ຜູ້ຊຶ່ງບັດນີ້ໄດ້ກາຍເປັນ ຜູ້ປົກຄອງປະເທດ ຕັ້ງແຕ່ປີ 1975 ເປັນຕົ້ນມາ.

ບໍ່ມີຜູ້ໃດສາມາດ ເວົ້າໄດ້ວ່າ ຄຳກ່າວອ້າງຂອງຊາວມົ້ງນີ້ ຖືກຕ້ອງ ຕາມຄວາມເປັນຈິງ ທຸກປະການ ໃນຈຳນວນ 4ພັນກວ່າຄົນນັ້ນ ຍ້ອນວ່າທາງການໄທ ບໍ່ເຄີຍອະນຸຍາດ ໃຫ້ອົງການຈັດຕັ້ງໃດໆ ເຂົ້າໄປສຳຣວດ ໃນສູນບ້ານຫ້ວຍນ້ຳຂາວເລີຍ ມີແຕ່ ຄະນະແພດບໍ່ມີພົມແດນ ທີ່ໃຫ້ການປິ່ນປົວ ແກ່ຊາວມົ້ງລາວ ໃນສູນດັ່ງກ່າວເທົ່ານັ້ນ ທີ່ເວົ້າວ່າຄົນເຈັບບາງຄົນ ທີ່ເຂົ້າໄປຮັບ ການປິ່ນປົວນັ້ນ ມີສະເກັດຣະເບີດ ຝັງໃນຮ່າງກາຍ ແລະມີອາການຢ້ານກົວ ແລະຂວັນເສັຍ ທີ່ເປັນການສະແດງອອກ ເຖິງປະສົປການ ທີ່ຮ້າຍແຮງໜ້າຢ້ານກົວ.

ເຖີງວ່າການສຳຣວດ ຈະແມ່ນທາງການໄທ ດຳເນີນໄປພຽງຝ່າຍດຽວ ກໍຕາມ ແຕ່ກໍຍັງມີຜົນສລຸບໄດ້ວ່າ 8ສ່ວນຣ້ອຍຂອງ ຈຳນວນຊາວມົ້ງລາວ ໃນສູນບ້ານຫ້ວຍ ນ້ຳຂາວທັງໝົດ ຫລືປະມານ ພັນກວ່າຄົນ ເປັນຜູ້ລີ້ພັຍການ ເມືອງແທ້ ແລະທາງທະຫານໄທ ກໍໄດ້ສົ່ງລາຍຊື່ ຂອງພວກດັ່ງກ່າວໄປໃຫ້ ສະພາຄວາມໝັ້ນຄົງ ຂອງໄທ ຜູ້ຊຶ່ງເປັນຜູ້ຊີ້ຂາດ ໃນເຣື້ອງນີ້ ພິຈາຣະນາຕໍ່ໄປ. ແຕ່ບໍ່ເປັນຈັ່ງບຸນ ທາງການໄທບໍ່ໄດ້ ແຍກປະເພດແຕ່ຢ່າງໃດ ແຕ່ໄດ້ຕີລວດກວດ ພຽງວ່າທັງໝົດເປັນ ຄົນເຂົ້າເມືອງແບບຜິດກົດໝາຍ ແລະຕາມກົດໝາຍແລ້ວ ໄທມີສິດສົ່ງກັບຄືນໄດ້.

ເປັນຫຍັງຣັຖບານໄທ ຈຶ່ງຕັດສີນໃຈດັ່ງນັ້ນ ທັ້ງໆທີ່ຮູ້ດີວ່າ ຈະເສື່ອມເສັຍພາບພົດ ໃນສາຍຕາຂອງປະຊາຄົມໂລກ? ໂດຍສະເພາະໃນເວລາ ທີ່ໄທເປັນປະທານ ຂອງສະມາຄົມ ASEAN ແລະຕັ້ງໂຕເປັນນຶ່ງ ໃນຈຳນວນຜູ້ນຳຂົງເຂດ ໃນຫລາຍໆດ້ານ ແລະພຍາຍາມຢູ່ສເມີ ທີ່ຈະຮັກສາພາບພົດ ແລະຊື່ສຽງຂອງຕົນ ຢູ່ຕລອດມາ .

ເພື່ອຈະເຂົ້າໃຈວ່າ ເປັນຫຍັງໄທຈຶ່ງຍອມ ປະຕິບັດຕາມຄວາມ ປະສົງຂອງລາວ ເຮົາກໍຕ້ອງເບິ່ງ ສະຖານະການໆເມືອງ ໃນໄທປັດຈຸບັນ ຊຶ່ງຫຍຸ້ງຍາກພໍສົມຄວນ ບໍ່ວ່າການເມືອງພາຍໃນ ຫລືການເມືອງຕ່າງປະເທດ.

ຂ້າພະເຈົ້າເຄີຍຖາມ ເຈົ້າໜ້າທີ່ອາວຸໂສໄທ ທ່ານນຶ່ງ ວ່າເປັນຫຍັງໄທ ຄືຈັ່ງວ່າເອົາໃຈລາວ ຫລາຍແທ້ ໂດຍສະເພາະກ່ຽວກັບ ບັນຫາມົ້ງ ທ່ານຕອບພຽງສັ້ນໆ ແຕ່ເຂົ້າໃຈງ່າຍວ່າ ປັດຈຸບັນ ຄວາມສຳພັນຂອງໄທ ກັບປະເທດເພື່ອນບ້ານ ບໍ່ຄ່ອຍດີປານໃດ ຍົກເວັ້ນແຕ່ລາວ ຊຶ່ງພໍເວົ້າກັນໄດ້ຢູ່ ເພາະສະນັ້ນໄທ ຈຶ່ງຈະບໍ່ເຮັດ ໃຫ້ລາວຜິດໃຈ ແລະໄທຈະບໍ່ປິດປະຕູ ໂດດດ່ຽວຕົວເອງ ຖ້າມກາງປະເທດອະມິຕ. ໄດ້ຍິນເທົ່ານີ້ ກໍ່ເຂົ້າໃຈແລ້ວ ວ່າຜົນປະໂຫຍດດ້ານ ຄວາມໝັ້ນຄົງຂອງໄທເອງ ຕ້ອງມາກ່ອນຢ່າງອື່ນໝົດ ຈະແມ່ນເຣື້ອງປະຊາທິປະໄຕ ສິດທິມນຸດ ຫລືອື່ນໆ, ເພາະສະນັ້ນ ຖ້າເບິ່ງໃນແງ່ຂອງໄທ ບັນຫາມົ້ງລາວ ເປັນບັນຫາທີ່ບໍ່ແມ່ນໄທ ເປັນຜູ້ສ້າງຂຶ້ນມາ ແຕ່ໄທຕ້ອງເປັນ ຜູ້ຮັບພາລະ ມາເປັນເວລາດົນນານ ເຂົ້າທຳນອງທີ່ໂບຮານ ກ່າວໄວ້ວ່າ ‘ຊີ້ນບໍ່ໄດ້ກິນ ໜັງບໍ່ໄດ້ນັ່ງ ກະດູກຊໍ້າພັດແຂວນຄໍ’ ນັ້ນເອງ.

ບັດນີ້ ຊາວມົ້ງລາວ 4ພັນກວ່າຄົນ ອັນຮວມທັງ 158ຄົນຈາກໜອງຄາຍ ຊຶ່ງນາຍົກໄທ ທ່ານອາພິສິຕ ເວຊຊາຊີວະ ເວົ້າວ່າຈະໄດ້ອອກໄປ ຕັ້ງຖິ່ນຖານ ໃນປະເທດ ທີ່ສາມພາຍໃນ30ມື້ນັ້ນ ກໍ່ໄດ້ກັບໄປຮອດ ເມືອງລາວໝົດແລ້ວ ແລະຕ້ອງຮັບຮູ້ວ່າລາວ ຊຶ່ງເປັນນຶ່ງ ໃນປະເທດທີ່ທຸກຍາກ ທີ່ສຸດໃນໂລກ ກໍ່ຍັງ ພຍາຍາມ ສຸດຄວາມສາມາດ ຕ້ອນຮັບເຂົາເຈົ້າ ຢ່າງດີເທົ່າທີ່ຈະເຣັດໄດ້ ແຕ່ຊໍ້າພັດຂໍຜັດ ເວລາອອກໄປ ເມື່ອຜູ້ແທນຂອງ ຂ້າຫລວງໃຫຍ່ ສະຫະປະຊາຊາຕ ຝ່າຍຜູ້ອົພຍົບ UNHCR ຂໍໄປພົບກັບພວກ ທີ່ຖືກສົ່ງກັບຄືນໄປນັ້ນ ແລະການຮ້ອງຂໍນີ້ ກໍມີຂຶ້ນອີກ ຫລັງຈາກທີ່ທາງການ ລາວຖແລງວ່າ ຊາວມົ້ງຫລາຍຮ້ອຍຄົນ ທີ່ກັບໄປນັ້ນ ຮ່ວມທັງພວກ 158 ຄົນຈາກໜອງຄາຍ ປ່ຽນໃຈບໍ່ຢາກໄປ ຕ່າງປະເທດອີກແລ້ວ ແຕ່ສມັກໃຈຢູ່ໃນລາວ ວ່າດັ່ງນັ້ນ.

ທາງ UNHCR ກໍຍິນດີຮັບຮູ້ ທີ່ທາງການລາວເວົ້າວ່າ ເປັນການປ່ຽນໃຈ ຂອງຊາວມົ້ງ ຊຶ່ງສ່ວນຫລາຍຢືນຢັນ ຕລອດມາ ວ່າຍອມຕາຍດີກວ່າ ຈະກັບໄປລາວນັ້ນ ແຕ່ກໍຍັງຢາກມີ ໂອກາດພີສູດວ່ານັ້ນ ເປັນຄວາມປະສົງ ອັນແທ້ຈິງຂອງເຂົາເຈົ້າ ແລະບໍ່ຖືກບັງຄັບ ແຕ່ຢ່າງໃດ.

ເຫດຜົນນຶ່ງອີກ ທີ່ເຮັດໃຫ້ທາງການລາວ ບໍ່ຍອມໃຫ້ UNHCR ເຂົາມາພົວພັນ ກັບຊາວມົ້ງກຸ່ມນີ້ ກໍເພາະຖືວ່າເຂົາເຈົ້າ ບໍ່ແມ່ນ ຜູ້ລີ້ພັຍການເມືອງ ເພາະສົງຄາມສີ້ນສຸດລົງ 30ກວ່າປີແລ້ວ ປັດຈຸບັນ ບໍ່ມີການຕໍ່ສູ້ກັນ ໃນລາວແລ້ວຈຶ່ງຖືວ່າ ຊາວມົ້ງລາວ ທີ່ລັກເຂົ້າໄປໄທ ຢ່າງບໍຖືກຕ້ອງ ຕາມກົດໝາຍນັ້ນ ຖືກຕົວະຍົວະວ່າ ໄປຮອດໄທແລ້ວ ຈະໄດ້ໄປປະເທດທີ່3 ໂດຍສະເພາະ ສະຫະຣັຖອະເມຣິກາ ບ່ອນຊຶ່ງຫລາຍຄົນ ມີພີ່ນ້ອງຮອງຮັບຢູ່ແລ້ວ.

ຄຳກ່າວອ້າງຂອງທາງການລາວ ມີມູນຄວາມຈິງບາງສ່ວນ ດັ່ງຂ້າພະເຈົ້າ ໄດ້ພິສູດມາແລ້ວ ໂດຍໄດ້ຜ່ານການ ໂອ້ລົມກັບຊາວມົ້ງ ຫລາຍຄົນຢູ່ສູນບ້ານ ຫ້ວຍນ້ຳຂາວ ຊຶ່ງທາງການໄທ ໄດ້ຈັດມາໃຫ້ສຳພາດ ເວລາຂ້າພະເຈົາ ໄປຢ້ຽມຢາມ ແຕ່ບໍ່ແມ່ນທັງ 4ພັນກວ່າຄົນ ຢູ່ໃນກຸ່ມນີ້. ຂ້າພະເຈົ້າເຊື່ອວ່າ UNHCR ສົນໃຈນຳກຸ່ມ 158ຄົນຈາກໜອງຄາຍ ແລະ 8ສ່ວນຮ້ອຍ ຫລືຢ່າງໜ້ອຍພັນກວ່າຄົນ ຊຶ່ງທາງການໄທ ເຫັນວ່າມີເງື່ອນໄຂພຽງພໍ ທີ່ບໍ່ຄວນສົ່ງກັບຄືນ ປະເທດລາວ ເພາະອາດຈະເປັນ ອັນຕະຣາຍໄດ້ນັ້ນ.

ບໍ່ມີໃຜປະຕິເສດໄດ້ ວ່າດຽວນີ້ບໍ່ມີ ເສິກເສືອເໜືອໃຕ້ແລ້ວຢູ່ລາວ ແຕ່ນັ້ນກໍບໍໄດ້ ໝາຍຄວາມວ່າ ເມືອງລາວຈະສງົບ ສະບາຍຕລອດລະຍະ 30ກວ່າປີຜ່ານມາ ເຖິງວ່າທາງການລາວ ຈະວ່າດັ່ງນັ້ນ ແລະປະຕິເສດສະເມີມາວ່າ ບໍ່ມີຂະບວນຕໍ່ຕ້ານ ຢູ່ໃນລາວປານໃດກໍດີ ດັ່ງທີ່ເຄີຍມີມາແລ້ວ ຫລາຍໆເທື່ອ ເຊັ່ນການວາງ     ລະເບີດຫລາຍເທື່ອ ໃນນະຄອນຫລວງວຽງຈັນ ໃນຊຸ່ມປີ 1990 ການບຸກຍຶດດ່ານວັງເຕົາ ໃນແຂວງຈໍາປາສັກ ການພຍາຍາມເດີນຂະບວນ ຂອງນັກສຶກສາ ແລະປະຊາຊົນ ການຈັບແລະເນຣະເທດ ຜູ້ແທນ Europe ທີ່ປະທ້ວງ ການຈັບກຸມເຂົາເຈົ້າ ແລະລ້າສຸດການວາງລະເບີດ ໄວ້ຫລາຍຈຸດ ເວລາການແຂ່ງຂັນກິລາ SEA Games ທີ່ຫາກໍຜ່ານພົ້ນໄປ ຢ່າງສງ່າງາມ. ແຕ່ການຕໍ່ຕ້ານທີ່ຕໍ່ເນື່ອງ ແລະຍາວນານທີ່ສຸດແມ່ນ ຂອງຂະບວນການ ຂອງຊາວມົ້ງ ທີ່ຍັງມີຢູ່ໃນ ປ່າທຶບ ດົງໜາ ດັ່ງພວກນັກຂ່າວ ຕ່າງປະເທດໄດ້ໄປພໍ້ ແລະບັນທຶກພາບ Video ອອກມາເຜີຍແພນັ້ນ. ຖ້າຂ້າພະເຈົ້າຕວງບໍ່ຜິດ 1ສ່ວນ3 ຫລື1ສ່ວນ4 ຂອງຈຳນວນ ທັງໝົດທີ່ທາງການໄທ ສົ່ງເມືອນັ້ນ ເປັນທີ່ສົນໃຈຂອງ UNHCR ທີ່ຢາກຮູ້ໃຫ້ໝັ້ນໃຈວ່າ ພວກເຂົາເຈົ້າປອດພັຍ ບໍ່ຖືກປະຫັດປະຫານ ແຕ່ທາງການລາວ ໄດ້ອາພັຍໂທດ ໃຫ້ເຂົາເຈົ້າ ດັ່ງທີ່ພົນຈັຕວາ ບົວສ້ຽງ ຈໍາປາພັນ ໄດ້ກ່າວສັນຍາ ຢູ່ທີ່ສູນບ້ານຫ້ວຍນ້ຳຂາວ ໃນເວລາໄປຊັກຊວນ ໃຫ້ເຂົ້າເຈົ້າກັບຄືນ ເມືອງລາວ ດ້ວຍຄວາມສມັກໃຈນັ້ນ.

ຕາບໃດທີ່ທາງການລາວ ບໍ່ອະນຸຍາດ ໃຫ້ນັກຂ່າວອິສຣະ ແລະ ອົງການຈັດຕັງສາກົນ ເຂົ້າໄປພົບ ແລະໂອ້ລົມກັບຊາວມົ້ງ ທີ່ຖືກສົ່ງກັບລາວ ຢ່າງເສຣີແລ້ວ ຄວາມລະແວງສົງໃສ ກ່ຽວກັບເຈຕນາ ຂອງສປປລາວ ກໍຍັງຈະຍືດເຍື້ອຢູ່ຕໍ່ໄປ ຢ່າງບໍ່ມີວັນສິ້ນສຸດ.

ເຖິງວ່າຣັຖບານ ສະຫະຣັຖ ຈະໃຫ້ຄວາມສຳຄັນ ແກ່ບັນຫາມົ້ງໜ້ອຍ ຫລາຍປານໃດກໍ່ຕາມ ແຕ່ທີ່ແນ່ນອນ ກໍ່ແມ່ນວ່ານັກການເມືອງ ໃນສັງຄົມເປີດໃດໆ ກໍ່ຕາມ ຍ່ອມຈະໃຫ້ຄວາມສຳຄັນ ແກ່ຄະແນນສຽງ ຫລາຍແສນສຽງ ເພື່ອເວລາມີການ ເລືອກຕັ້ງເອົາ ຕໍ່າແໜ່ງສຳຄັນ ໂດຍສະເພາະ ໃນສະຫະຣັຖອະເມຣິກາ ຊຶ່ງການແຂ່ງຂັນ ຣະຫວ່າງພັກ Democrat ແລະພັກ Republican ກຳລັງດຳເນີນໄປ ຢ່າງສູສີຢູ່ນີ້.

ເພາະສະນັ້ນຈຶ່ງຫວັງວ່າ ການຖແລງຂ່າວ ຂອງ ພົນຈັຕວາ ບົວສ້ຽງ ຈຳປາພັນ ໃນວັນຈັນ 25 ທີ່ຈະມາເຖິງນີ້ ຈະມີການເປີດເຜີຍ ທາງອອກທີ່ງົດງາມ ແກ່ບັນຫາມົ້ງ ທັງຈະເປັນຜົນງານ ອັນໜ້າຍິນດີນຳ ຂອງທ່ານນາຍພົນ ກ່ອນຈະເຖິງວາຣະ ກະສຽນບຳນານ ຂອງທ່ານເອງນັ້ນ.

ເຕັມຫນ້າ