ການປະກອບອາຊີບ ທີ່ຜິດກົດໝາຍໃນລາວ

ໃນສມັຍນີ້ ຄົນລາວ ຫລາຍຄົນ ມັກຫາລ້ຽງຊີບ ດ້ວຍວິທີ ທີ່ຜິດກົດໝາຍ ເຊັ່ນການ ສໍ້ຣາສບັງຫລວງ ຄ້າໄມ້ເຖື່ອນ ຢາເສບຕິດ ແລະ ສັດປ່າ. ອາວະຣີ ມີຣາຍງານ… ເຊີນທ່ານເປີດຟັງໄດ້ ໂດຍກົດ(Click) ຢູ່ບ່ອນທີ່ຂຽນວ່າ "ດາວໂລ້ດ"
ອະວາຣີ
2010-06-08
Share
F-Monkey ລີງໃນເມືອງລາວ ທີ່ຖືກຈັບມາຈາກປ່າ ແລະນໍາໄປຂາຍ ຕາມຕລາດ
AFP PHOTO/ HOANG DINH Nam

ປະຊາຊົນລາວ ຫລາຍໆຄົນ ຄິດວ່າ ປັດຈຸບັນ ສປປລາວ ກຳລັງຈະເຣີນ ກ້າວໜ້າ ຊາວລາວທີ່ຢູ່ ໃນເມືອງເກືອບທຸກຄົນ ມີໂທຣະສັບ ມືຖື ແລະຫລາຍຄົນມີ ຣົດຄັນດີໆ ງາມໆຂີ່ແລະ ມີເຮືອນຫລັງ ໃຫຍ່ງາມຢູ່. ທ່ານຜູ້ຟັງອາດ ຈະຖາມວ່າ ຊາວລາວເຫລົ່ານັ້ນ ເອົາເງິນມາຈາກໃສ ມາຊື້ໂທຣະສັບ ຣົດ ເຮືອນແລະໃຊ້ຈ່າຍ ຢ່າງຟຸມເຟືອຍ. 

ປະຊາຊົນລາວ ສ່ວນຫລາຍຈະຕອບ ຄຳຖາມນັ້ນວ່າ ພວກລວຍໆນັ້ນ ລ້ວນແລ້ວແຕ່ ຫາເງິນຫລືຫາລ້ຽງຊີບ ຢ່າງຜິດກົດໝາຍ ທັງນັ້ນ. ຖ້າແມ່ນ ເຈົ້າໜ້າທີ່ ຣັຖບານກໍ ສໍ້ຣາສບັງຫລວງ ຖ້າແມ່ນພວກພໍ່ຄ້າ ແມ່ຄ້າຫລືປະຊາຊົນ ທັມມະດາສາມັນ ກໍຄ້າໄມ້ເຖື່ອນ ຄ້າຢາເສບຕິດ ແລະສັດປ່າ.

ພັກປະຊາຊົນ ປະຕິວັດລາວ ແລະ ຣັຖບານລາວ ມີຣະບຽບພາຍໃນ ຢ່າງເຄັ່ງຄັດ ຫ້າມສະມາຊິກພັກ ແລະເຈົ້າໜ້າທີ່ ຣັຖບານ ສໍ້ຣາສບັງຫລວງ. ບໍ່ເທົ່ານັ້ນ ເມື່ອສອງ ສາມປີກ່ອນ ສປປລາວ ກໍອອກກົດໝາຍ ຕ້ານການ ສໍ້ຣາສບັງຫລວງ. ແຕ່ປະກົດວ່າ ຍິ່ງມີ ຣະບຽບກົດໝາຍ ປາບປາມການ ສໍ້ຣາສບັງຫລວງ ເຄັ່ງຄັດປານໃດ ສະມາຊິກພັກ ແລະເຈົ້າໜ້າທີ່ ຣັຖບານກໍຍິ່ງ ສໍ້ຣາສບັງຫລວງ ຫລາຍເທົ່ານັ້ນ. ເຈົ້າໜ້າທີ່ເກືອບ ທຸກຂັ້ນແລະເກືອບ ທຸກຄົນຕ້ອງມີ ວິທີທຳມາ ຫາກິນແບບລັບໆ ແລະ ການທຳມາຫາກິນ ແບບລັບໆ ທີ່ວ່ານີ້ກໍແມ່ນ ການສໍ້ຣາສບັງຫລວງ ໃນຮູບແບບຕ່າງໆ ເຊັ່ນການສໍ້ໂກງ ເອົາເງິນຂອງຣັຖ ໂດຍກົງຫລືລັກໂລບ ເອົາທາງອ້ອມ ເຈົ້າໜ້າທີ່ຫລາຍ ຄົນຮັບເງິນສິນບົນ ແມ້ແຕ່ເຈົ້າໜ້າທີ່ ໃນວິຊາອາຊີບ ທີ່ແຕ່ກ່ອນໆ ບໍ່ຄ່ອຍມີທາງຈະ ສໍ້ຣາສບັງຫລວງ ແຕ່ປັດຈຸບັນ ກໍສໍ້ຣາສບັງຫລວງ ຫລາຍເຊັ່ນກັນ ຕົວຢ່າງ ນາຍຄຣູອາຈານ ແລະເຈົ້າໜ້າທີ່ ໃນໂຮງຮຽນຫລື ມະຫາວິທະຍາໄລ ຕ່າງໆ ຮັບເງິນຄ່າຈ້າງເຂົ້າ ຈາກນັກຮຽນນັກສຶກສາ ຈົນໃນສມັຍນີ້ ກ່ອນຈະໄດ້ເຂົ້າ ໂຮງຮຽນບໍ່ວ່າ ໃນຣະດັບໃດ ກໍຕາມ ນັກຮຽນນັກສຶກສາ ຕ້ອງຈ້າງເຂົ້າ ຜູ້ລະຫລາຍລ້ານກີບ ແຕ່ສ່ວນຫລາຍແລ້ວ ພວກເພິ່ນຈະບໍ່ ເວົ້າເປັນເງິນກີບ ມັກເວົ້າເປັນເງິນບາດ ຫລືເງິນດອນລ່າ ສະຫະຣັຖ ຫລາຍກວ່າ.

ເຈົ້າໜ້າທີ່ ຢູ່ໃນຂແນງການ ທີ່ສ່ວນພົວພັນ ກັບເງິນໂດຍກົງ ແຮງລ້ຳລວຍໄວ ຕົວຢ່າງ ເຈົ້າໜ້າທີ່ການເງິນ ແລະ ດ່ານພາສີອາກອນ. ສະມາຊິກ ສະພາແຫ່ງຊາດລາວ ກໍຍົກບັນຫາ ການສໍ້ຣາສບັງຫລວງ ຂອງເຈົ້າໜ້າທີ່ ເຫລົ່ານີ້ຂື້ນມາ ສໍ້ຖາມຣັຖບານ ເລື້ອຍໆ ສເນີໃຫ້ມີ ມາດຕະຖານແກ້ໄຂ ໂດຍດ່ວນ ເຊັ່ນຕ້ອງຍົກຍ້າຍ ເຈົ້າໜ້າທີ່ ດ່ານພາສີອາກອນ ເລື້ອຍໆ ຫລືຕ້ອງມີການ ກວດກາຢ່າງເຂັ້ມງວດ ດັ່ງສະມາຊິກ ສະພາ ທ່ານນຶ່ງເວົ້າວ່າ:

"ແຕ່ປະກົດວ່າ ມາດຕະການ ທີ່ກ່າວມານັ້ນ ຫລືມາດຕະການ ໃດກໍຕາມ ກໍບໍ່ສາມາດ ປາບປາມການ ສໍ້ຣາສບັງຫລວງ ຂອງບັນດາ ສະມາຊິກພັກ ແລະພະນັກງານ ຂອງຣັຖໄດ້ເລີຍ".

ເຈົ້າໜ້າທີ່ຂັ້ນສູງ ຍິ່ງກິນຫລາຍ ຕົວຢ່າງຫົວໜ້າ ໂຄງການສ້າງ ຖນົນຫົນທາງ ສ້າງເຂື່ອນໄຟຟ້າ ແລະສ້າງ ໂຮງຮຽນໂຮງໝໍ ຍິ່ງມີວິທີສໍ້ໂກງ. ຖ້າເງິນທຶນ ສຳຣັບໂຄງການ ເຫລົ່ານີ້ມາຈາກ ການຊ່ວຍເຫລືອ ຂອງຕ່າງປະເທດ ເຈົ້າໜ້າທີ່ກໍຍິ່ງ ສໍ້ໂກງໄດ້ງ່າຍ ເຈົ້າໜ້າທີ່ອົງການ ທີ່ບໍ່ຂື້ນກັບ ຣັຖບານທີ່ ປະຕິບັດໜ້າທີ່ ຢູ່ສປປລາວ ຄາດຄະເນວ່າ ເງິນຊ່ວຍເຫລືອຂອງ ຕ່າງປະເທດເຖິງ 20 ສ່ວນຮ້ອຍ ສູນເສັຍໄປຍ້ອນ ການສໍ້ຣາສບັງຫລວງ ຂອງເຈົ້າໜ້າທີ່.

ການສໍ້ຣາສບັງຫລວງ ຢູ່ລາວ ບໍ່ພຽງ ແຕ່ແພ່ຣະບາດ ຢ່າງກວ້າງຂວາງ ແຕ່ຍັງເພິ້ມຄວາມ ຮ້າຍແຮງຂື້ນເລື້ອຍໆ ຜ່ານມາ ຫລາຍຄົນອາດຈະ ຮູ້ພຽງແຕ່ວ່າ ມີແຕ່ນັກ ຮຽນ ແລະນັກສຶກສາ ເທົ່ານັ້ນຊື້ຈ້າງ ເຂົ້າໂຮງຮຽນ ແລະເມື່ອຮຽນຈົບແລ້ວ ກໍຕ້ອງຈ້າງເຂົ້າ ເຮັດການ ແຕ່ປັດຈຸບັນ ແມ້ແຕ່ໜ້າທີ່ ຕຳແໜ່ງ ລວມທັງ ຕຳແໜ່ງສູງໆ ກໍສາມາດຊື້ ຈ້າງເອົາໄດ້. ພວກພໍ່ຄ້າແມ່ຄ້າ ຕລອດເຖິງ ປະຊາຊົນ ທັມມະດາສາມັນ ກໍຍຸທ່າງຊື້ຈ້າງ ຈອບອອຍເຈົ້າໜ້າທີ່ ວ່າແຕ່ແນວໃດ ຈະໄດ້ຜົນປໂຍດ ແກ່ຕົນ ພວກເຂົາກໍໃຫ້ ເງິນສິນບົນແກ່ ເຈົ້າໜ້າທີ່ຢ່າງ ບໍ່ອັ້ນ ທັງຜູ້ໃຫ້ເງິນ ສິນບົນແລະຜູ້ຮັບ ຕ່າງກໍບໍ່ ກະໜຽມໃຈເລີຍວ່າ ການກະທຳແບບ ນັ້ນເປັນການ ລະເມີດກົດໝາຍ. ຄວາມຈິງແລ້ວ ພນັກງານຂອງຣັຖ ເຂົ້າເຮັດການກັບ ຣັຖບານ ບໍ່ແມ່ນເພື່ອອາໃສ ແຕ່ເງິນເດືອນ ເທົ່ານັ້ນ ແຕ່ສ່ວນຫລາຍແລ້ວ ຈະອາໃສຈະມີ ຣາຍໄດ້ຈາກ ການສໍ້ ຣາສບັງຫລວງ ນັ້ນຫລາຍກວ່າ. ຄົນງານຜູ້ນຶ່ງ ຈົ່ມກ່ຽວກັບເຣື່ອງນີ້ວ່າ:

"ການຫາເງິນ ອີກຢ່າງນຶ່ງທີ່ເປັນ ການລະເມີດກົດໝາຍ ທີ່ຊາວລາວ ຫລາຍຄົນມັກໃຊ້ ວິທີນີ້ເພື່ອລ້ຳລວຍ ກໍແມ່ນ ການຄ້າໄມ້ເຖື່ອນ. ແຕ່ກ່ອນ ປະເທດລາວ ອຸດົມ ສົມບູນ ໄປດ້ວຍປ່າໄມ້ ແລະຕົ້ນໄມ້ ແຕ່ໃນຣະຍະ ປະມານສາມສິບປີ ທີ່ຜ່ານມາ ພັກຣັຖ ແລະປະຊາຊົນ ຕັດໄມ້ຂາຍຫລາຍ ຈົນປ່າໄມ້ແລະ ຕົ້ນໄມ້ໃກ້ຈະ ໝົດແລ້ວ. ການຕັດໄມ້ຂາຍນັ້ນ ສ່ວນຫລາຍ ເປັນການຕັດໄມ້ ຂາຍໄມ້ຢ່າງຜິດ ກົດໝາຍ. ຜູ້ເປັນເຈົ້າໜ້າທີ່ ຂອງຣັຖບານ ທີ່ມີໜ້າທີ່ ປົກປັກຮັກສາ ປ່າໄມ້ ກໍແຮງເປັນໂຕການ ໃຫຍ່ ໃນການທຳລາຍ ປ່າໄມ້. ວິທີ່ນຶ່ງ ພວກເຂົາຮັບເງິນ ສິນບົນຈາກ ພວກພໍ່ຄ້າແມ່ຄ້າ ໄມ້ເຖື່ອນ ແລະສົມຮູ້ຮ່ວມຄິດ ກັບພວກພໍ່ຄ້າແມ່ຄ້າ ຕັດໄມ້ແລະ ຂາຍໄມ້ ຕົວຢ່າງ ກ່ອນຈະຂໍໃບ ອະນຸຍາດຕັດໄມ້ ໄດ້ຫ້າແມັດກ້ອນ ພໍ່ຄ້າຕ້ອງໃຫ້ ເງິນສິນບົນ ແກ່ເຈົ້າໜ້າທີ່ ແລ້ວນຳ ໃບອະນຸຍາດ ນັ້ນໄປຕັດໄມ້ ແຕ່ສ່ວນຫລາຍຈະຕັດ ເກີນກຳນົດ ເຊັ່ນຕັດເຖິງ ສິບແມັດກ້ອນ ຫລາຍກວ່າໃບ ອະນຸຍາດ ເຖິງສອງເທົ່າ ໃນເວລາເຈົ້າໜ້າທີ່ ກວດພົບ ພໍ່ຄ້າກໍເອົາເງິນ ຫລາຍໝື່ນບາດ ອັດປາກເຈົ້າໜ້າທີ່ ກໍແລ້ວໄປ. ບາດພໍ່ຄ້ານຳໄມ້ ມາວາງຂາຍ ເຂົາກໍຈະວາງຂາຍ ແຕ່ຫ້າແມັດກ້ອມ ຕາມທີ່ໄດ້ ອະນຸຍາດມາ ສ່ວນອີກຫ້າແມັດກ້ອນ ນັ້ນຊຸກເຊື່ອງໄວ້.

ສ່ວນປະຊາຊົນລາວ ຜູ້ບໍ່ເປັນເຈົ້າໜ້າທີ່ ແລະ ພໍ່ຄ້າແມ່ຄ້າ ກໍຫາກິນນຳການ ຕັດແລະຂາຍ ໄມ້ເຖື່ອນນີ້ຫລາຍ. ຊາວບ້ານ ຜູ້ຊຳນິຊຳນານ ໃນເຂດທ້ອງຖິ່ນ ຮູ້ວ່າໄມ້ ແຂງດີໆງາມໆຢູ່ໃສ ພວກເຂົາກໍຂື້ນ ພູຜາໄປຕັດ ແລ້ວແກ່ລາກມາ ແຄມທາງ ຂາຍໃຫ້ພວກ ພໍ່ຄ້າແມ່ຄ້າ.

ເຂດທີ່ ປະຊາຊົນ ທ້ອງຖິ່ນໄປຕັດ ນັ້ນສ່ວນນຶ່ງເປັນ ປ່າສງວນຫລື ປ່າຫວງຫ້າມ. ເມື່ອປີກາຍປີກ່ອນ ມີຂ່າວວ່າ ເຈົ້າໜ້າທີ່ທ້ອງຖິ່ນ ສົມຮູ້ຮ່ວມຄິດ ກັບພວກ ພໍ່ຄ້າ ແມ່ຄ້າໄມ້ ພາກັນສັກຢາ ເບື່ອໃສ່ຕົ້ນໄມ້ ດີໆງາມໆ ເພື່ອຈະມີຂໍ້ອ້າງ ໃນການຕັດໄມ້ ຕົ້ນນັ້ນໄປຂາຍ ແລະຣາຍໄດ້ ກໍແບ່ງປັນກັນ.

ນອກຈາກນັ້ນ ຊາວລາວຈຳນວນນຶ່ງ ຍັງມັກຫາລ້ຽງຊີບ ດ້ວຍການລັກລອບ ຄ້າຢາເສບຕິດ ຊຶ່ງກໍເປັນການ ກະທຳທີ່ຜິດກົດໝາຍ ຢ່າງຮ້າຍແຮງ ເຊັ່ນກັນຢູ່ລາວ. ຂ່າວໄທອອກຣາຍງານ ເລື້ອຍໆວ່າ ເຈົ້າໜ້າທີ່ ຕຳຣວດໄທຈັບ ຄົນລາວ ທີ່ລັກລອບຂົນສົ່ງ ຢາບ້າຂ້າມຝັ່ງຂອງ ເພື່ອນຳສົ່ງໄປ ໃຫ້ແກ່ພວກຄ້າ ຢາເສບຕິດ ຣາຍໃຫຍ່ ຢູ່ໄທ. ຄົນລາວບາງຄົນ ຊຸກເຊື່ອງຢາບ້າໄວ້ ໃນທີ່ລັບໆ. ເມື່ອວັນສຸກ ວັນທີ່ 4 ມິຖຸນານີ້ ເຈົ້າໜ້າທີ່ຕຳຣວດ ແຂວງອຸບົນ ຣາຊທານີຂອງໄທ ກໍຈັບຄົນລາວ ໄດ້ສາມຄົນ ທີ່ລັກລອບຂົນສົ່ງ ຢາບ້າເກືອບ 3,000 ເມັດ ຈາກເມືອງສອງຄອນ ແຂວງສວັນນະເຂດ ເຂົ້າເຂດເມືອງ ເຂັມມະຣາຊ ແຂວງ ອຸບົນຣາຊທານີ. ຄົນລາວທັງສາມ ເວົ້າກັບເຈົ້າໜ້າທີ່ ຕຳຣວດວ່າ ພວກເຂົາຮັບຈ້າງ ລັກລອບຂົນສົ່ງ ຢາບ້າໃຫ້ແກ່ ພໍ່ຄ້າຢາເສບຕິດ ຣາຍໃຫຍ່ຢູ່ແຂວງ ອຸບົນ ຫລາຍເທື່ອແລ້ວ. ຢູ່ລາວເມື່ອ ຖາມວ່າ ເຮືອນຫລັງນີ້ແມ່ນ ເຮືອນໃຜ ຄືມາໃຫຍ່ ມາງາມແທ້ ຊາວລາວ ຜູ້ຖືກຖາມຕອບວ່າ ເຈົ້າຂອງເຮືອນຫລັງ ນັ້ນຄ້າຢາເສບຕິດ ມີເງິນຫລາຍ ລ້ານບາດ ບໍ່ພຽງແຕ່ມີ ເຮືອນຫລັງນີ້ ເທົ່ານັ້ນ ແຕ່ຍັງມີຣົດວິ ໂກ້ຂີ່ຄັນໃໝ່ ອ່ຽມນຳອີກ.

ການຫາລ້ຽງຊີບ ອີກຢ່າງນຶ່ງທີ່ ລ້ຳລວຍໄວລອງ ຈາກການຄ້າ ຢາເສບຕິດ ກໍແມ່ນ ການຄ້າສັດປ່າ. ສັດປ່າທຸກຊນິດ ມີຣາຄາແພງ ເປັນຕົ້ນ ເສືອໂຕນຶ່ງ ຈະໄດ້ຣາຄາ ເຖິງ 70,000 ດອນລ່າ ສະຫະຣັຖ ຢູ່ລາວ. ປະຊາຊົນລາວ ຫລາຍຄົນມັກຍຶດ ອາຊີບຊອກຫາ ແລະຂາຍສັດປ່າ ຫລືບາງຄົນກໍ ເປັນຮັບຈ້າງຂົນສົ່ງ. ຊາວນາລາວ ຫລັງຈາກໝົດຣະດູ ເຮັດນາແລ້ວ ຫລາຍຄົນພາກັນ ຊອກຫາສັດປ່າ ເຊັ່ນເຕົ່າ ແລນ ເສືອແລະຫລິ່ນ ເພື່ອສົ່ງຂາຍໃຫ້ ແກ່ພວກ ພໍ່ຄ້າແມ່ຄ້າ. ຊາວນາຜູ້ນຶ່ງ ເວົ້າວ່າ ການຫາສັດປ່າ ຂາຍເປັນອາຊີບ ທີ່ສອງຂອງພວກ ເຂົາເຈົ້າແລ້ວ ໃນປັດຈຸບັນ.

ຊາວລາວຫລາຍຄົນ ທີ່ຮັ່ງມີເປັນດີ ໄວຢ່າງຜິດ ປົກກະຕິ ຢູ່ແຄມຂອງ ແມ່ນຍ້ອນ ມີອາຊີບຮັບຂົນ ສົ່ງສັດປ່າຜ່ານລາວ ອອກໄປວຽດນາມ. ປັດຈຸບັນ ການລັກລອບ ຫລິ່ນ ເປັນການລັກລອບ ສັດປ່າຈາກຝັ່ງໄທ. ອົງການພິພັກ ຮັກສັດປ່າເຊື່ອວ່າ ຫລິ່ນຖືກລັກລອບ ມາຈາກມາເລເຊັຍ ຫລືອິນໂດນີເຊັຍ ເຂົ້າໄທ ແລ້ວເຂົ້າລາວ.

ຊາວລາວຈະເປັນ ຜູ້ຮັບລັກລອບ ຂົນສົ່ງຜ່ານລາວ ຊຶ່ງເຈົ້າໜ້າທີ່ລາວ ບໍ່ມີກຳລັງຈະ ປາບປາມເຄັ່ງຄັດໄດ້. ອາດີດນາຍ ທະຫານກອງທັບ ປະຊາຊົນລາວ ແລະ ສະມາຊິກພັກ ທ່ານນຶ່ງກ່າວສລຸບ ການທຳມາຫາກິນ ຂອງຊາວລາວຫລາຍໆຄົນ ໃນປັດຈຸບັນວ່າ ສປລາວ ຍັງເປັນປະເທດ ທີ່ທຸກຍາກຢູ່ ສະນັ້ນ ພັກແລະຣັຖຈຶ່ງ ອະນຸໂລມ ໃຫ້ປະຊາຊົນ ທຳມາຫາກິນ ຢ່າງຜິດກົດໝາຍໄດ້ ເຊັ່ນຈະ ສໍ້ຣາສບັງຫລວງ ກໍໄດ້ ຈະຄ້າໄມ້ເຖື່ອນ ກໍໄດ້ ຈະຂາຍສັດປ່າ ກໍບໍ່ເປັນຫຍັງ ແຕ່ຂໍຢ່າງດຽວ ຫ້າມຄ້າ ຢາເສບຕິດ.

Anonymous says:
Jun 08, 2010 01:50 PM

ແຕ່ໝູ່ຂ້ອຍທີ່ຮຽນຫາກໍ່ຈົບ ຂະເຈົ້າໄດ້ວຽກຍ້ອນຄວາມສາມາດ ລ້ວນໆໄດ໋ ລວມທັງຂ້ອຍນຳ

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ