ຣັຖທັມມະນູນລາວ ແລະການປົກຄອງ ຣະບົບພັກດຽວ

ການກວດກາ ການເຄົາຣົບ ກົດໝາຍ ແລະ ການປະຕິບັດ ສິດກ່າວຟ້ອງ ເປັນສິດ ແລະໜ້າທີ່ຂອງ ອົງການໄອຍະການ ປະຊາຊົນ ຕາມທີ່ໄດ້ ກໍານົດໄວ້ ຢູ່ໃນ ຣັຖທັມມະນູນ ຂອງ ສປປລາວ ແຕ່ໃນພາກ ຕົວຈິງ ສິດແລະໜ້າທີ່ ທີ່ວ່ານັ້ນ ໄດ້ຮັບການ ປະຕິບັດໜ້ອຍ ຫລາຍພຽງໃດ ໃນເມື່ອ ປະເທດຊາດ ຖືກປົກຄອງ ດ້ວຍຣະບົບ ພັກດຽວ ເຄົ້າດຽວ ແລະ ຄວາມບໍ່ຊື່ສັດ ສຸດຈະຣິດ ຂອງພນັກງານ ໄອຍະການ ຈໍາພວກນຶ່ງ. ຈໍາປາທອງ ມີລາຍງານ ກ່ຽວກັບເຣື້ອງນີ້ ມາສເນີທ່ານ. ເຊີນທ່ານເປີດຟັງໄດ້ ໂດຍກົດ(Click) ຢູ່ບ່ອນທີ່ຂຽນວ່າ "ດາວໂລ້ດ"
ຈໍາປາທອງ
2010-02-24
ອີແມວລ໌
ຄໍາເຫັນ
Share
ພິມ

ນັບຕັ້ງແຕ່ ໄດ້ມີການ ສະຖາປະນາ ສາທາຣະນະຣັດ ປະຊາທິປະໄຕ ປະຊາຊົນລາວ ໃນປີ 1975 ມາ ອຳນາດການ ປົກຄອງປະເທດ ໄດ້ໃຊ້ແຕ່ ມະຕິ ຄຳສັ່ງ ຂອງພັກ ໃນການ ຄູ້ມຄອງຣັດ ຄຸ້ມຄອງສັງຄົມ. ຈົນມາຮອດ ປີ 1991 ຈຶ່ງໄດ້ມີ ຣັຖທັມມະນູນ ທີ່ກຳນົດ ຣະບົບການ ຈັດຕັ້ງ ກົງຈັກຣັດ ຊຶ່ງໃນນັ້ນ ຮວມທັງ ອົງການ ໄອຍະການ ປະຊາຊົນ ໂດຍໄດ້ ກຳນົດສິດ ແລະໜ້າທີ່ ໃນການກວດກາ ການເຄົາຣົບ ກົດໝາຍ ແລະ ການປະຕິບັດ ສິດກ່າວຟ້ອງ. ແຕ່ໃນພາກຕົວຈິງ ສິດແລະໜ້າທີ່ ທີ່ວ່ານັ້ນ ໄດ້ຮັບການ ປະຕິບັດ ໜ້ອຍຫຼາຍພຽງໃດ ໃນເມື່ອ ປະເທດຊາດ ຖືກປົກຄອງ ດ້ວຍຣະບົບ ພັກດຽວ ເຄົ້າດຽວ ແລະ ຍັງມີຄວາມ ບໍ່ຊື່ສັດ ສຸດຈະຣິດ ຂອງພນັກງານ ໄອຍະການ ຈຳພວກນຶ່ງ ທີ່ປະປົນຢູ່. ຣັຖທັມມະນູນ ບົ່ງເອົາໄວ້ວ່າ ອົງການ ໄອຍະການ ປະຊາຊົນ ມີສິດ ແລະໜ້າທີ່ 2 ຢ່າງ ຄື:

1. ກວດກາ ການເຄົາຣົບ ຣະບຽບກົດໝາຍ ຢ່າງຖືກຕ້ອງ ແລະ ເປັນເອກກະພາບ ຢູ່ໃນທຸກ ກະຊວງ, ອົງການທີ່ຂຶ້ນ ກັບຣັຖບານ, ອົງການຈັດຕັ້ງ ມະຫາຊົນ, ອົງການຈັດຕັ້ງ ສັງຄົມ, ອົງການ ບໍຣິຫານທ້ອງຖິ່ນ, ວິສາຫະກິດ, ຣັຖກອນ ແລະ ພົລເມືອງ.

2. ປະຕິບັດສິດກ່າວຟ້ອງ. ພ້ອມກັນນັ້ນ ກໍວ່າ ໃນເວລາ ປະຕິບັດ ໜ້າທີ່ຂອງຕົນ ນັ້ນ ອົງການ ໄອຍະການ ປະຊາຊົນ ມີແຕ່ ປະຕິບັດ ຕາມກົດໝາຍ ແລະ ຄຳສັ່ງຂອງ ໄອຍະການ ປະຊາຊົນ ສູງສຸດເທົ່ານັ້ນ.

ສົກປີ 2008–2009 ຜ່ານມາ ມີຂ່າວວ່າ ອົງການ ໄອຍະການ ປະຊາຊົນ ໄດ້ຈັດຕັ້ງ ປະຕິບັດ ພາລະໜ້າທີ່ ຂອງຕົນ ດ້ວຍຄວາມ ຮັບຜິດຊອບສູງ ແລະ ມີຜົນສຳເຣັດ ຫລາຍດ້ານ. ໃນນັ້ນ ໄດ້ມີການ ຕິດຕາມກວດກາ ການເຄື່ອນໃຫວ ຂອງຣັຖບານ, ຕິດຕາມກວດກາ ອົງການສືບສວນ ສອບສວນ ໃນການດຳເນີນ ຄະດີ, ປະຕິບັດສິດ ສົ່ງຟ້ອງຄະດີ ເປັນຕົ້ນຄະດີ ຢາເສບຕິດ, ຕິດຕາມກວດກາ ການປະຕິບັດ ກົດໝາຍ ໃນຄ້າຍ ຄຸມຂັງດັດສ້າງ ຮວມທັງມີ ການກວດກາ ຄວາມຜິດພາດ ໃນການ ປະຕິບັດ ໜ້າທີ່ ຂອງອົງການ ໄອຍະການ ປະຊາຊົນ ຂັ້ນຕ່າງໆ ນຳດ້ວຍ. ໃນນຶ່ງປີ ຜ່ານມາ ທ່ານ ສົມພັນ ແພງຄຳມີ ໄອຍະການ ປະຊາຊົນ ສູງສຸດ ເວົ້າວ່າ:

"ອົງການ ໄອຍະການ ປະຊາຊົນ ໄດ້ຮັບ ແລະ ແກ້ໄຂຄະດີ ອາຍາ ດັ່ງຢູ່ລຸ່ມນີ້ 1. ອົງການ ໄອຍະການ ປະຊາຊົນ ແຂວງ ນະຄອນ ໄດ້ຮັບສຳນວນ ຄະດີທັງໝົດ 3317 ເລື່ອງ ທຽບໃສ່ປີເກົ່າ ເພີ່ມຂຶ້ນ 600 ເລື່ອງ. ໄດ້ສົ່ງຟ້ອງ ຂຶ້ນສານແລ້ວ 2372 ເລື່ອງ".

ສຳລັບການ ພິຈາຣະນາ ກວດກາ ຄະດີແພ່ງ ໃນທົ່ວປະເທດ ສົກປີ 2008–2009 ຊຶ່ງກົມກວດກາ ຄະດີແພ່ງ ໄດ້ຮັບການແຈ້ງ ຄວາມຄະດີແພ່ງ ແລະ ການຍື່ນ ຄຳຮ້ອງທັງໝົດ 767 ເລື່ອງ ແລະໄດ້ຮັບ ຄຳຮ້ອງ ຂໍຮື້ຟື້ນ ຂໍກວດກາຄະດີ ທັງໝົດ 220 ເລື່ອງ ແລະແກ້ໄຂແລ້ວ 183 ເລື່ອງ.

ກ່ຽວກັບເລື່ອງນີ້ ທ່ານ ສອນສວັນ ແສງອະໄພ ຫົວໜ້າ ກົມກວດກາ ຄະດີແພ່ງ ເວົ້າວ່າ ໃນ 1 ປີ ຜ່ານມາ ໄອຍະການ ປະຊາຊົນ ສູງສຸດ ໄດ້ຮັບຄະດີແພ່ງ ທັງໝົດ 444 ເລື່ອງ, ແກ້ໄຂແລ້ວ 357 ເລື່ອງ ແລະ ຍັງກຳລັງ ຄົ້ນຄວ້າຢູ່ 87 ເລື່ອງ.

ທ່ານວ່າ ຄະດີສ່ວນໃຫຍ່ ທີ່ໄດ້ຮັບ ແຈ້ງຄວາມ ເປັນຄະດີ ສໍ້ໂກງ, ຄະດີ ຍັກຍອກຊັບ ຊຶ່ງສ່ວນຫລາຍ ຈະຖືກໄກ່ເກັ່ຍ ແກ້ໄຂ ຈົບລົງໂດຍດີ. ສຳລັບຄະດີ ທີ່ຍັງຄົງຄ້າງ ຢູ່ ໃນປັດຈຸບັນ ທາງກົມກວດກາ ຄະດີແພ່ງ ຈະແກ້ໄຂ ໃຫ້ສຳເຣັດ ພາຍໃນເດືອນ ຕຸລາ ປີ 2010 ນີ້. ສຳລັບແຂວງ ທີ່ມີການ ຟ້ອງຮ້ອງ ຄະດີແພ່ງ ຫລາຍທີ່ສຸດ ຄື ນະຄອນຫລວງ ວຽງຈັນ, ແຂວງ ສວັນນະເຂດ, ຈຳປາສັກ, ຫລວງພຣະບາງ, ຊຽງຂວາງ ແລະແຂວງ ຫລວງນ້ຳທາ.

ເວົ້າເຖິງບັນຫາ ທີ່ຄົງຄ້າງ ແລະ ຂໍບົກຜ່ອງ ສຳລັບອົງການ ໄອຍະການ ປະຊາຊົນ ກໍຍັງມີ ຢູ່ຫລາຍ ເປັນຕົ້ນການໃຫ້ ຄວາມຍຸຕິທັມ ໃນສັງຄົມ ດັ່ງທ່ານ ສົມພັນ ເວົ້າວ່າ ຍັງຕ້ອງໄດ້ ປັບປຸງ ຂໍ້ບົກຜ່ອງ ຫລາຍດ້ານ ຮວມທັງການ ເຄື່ອນໃຫວ ວຽກງານ ຂອງພນັກງານ ຈຳນວນນຶ່ງ:

"ເຫັນວ່າ ຍັງມີຫລາຍດ້ານ ຍັງບໍ່ທັນຕອບສນອງ ໄດ້ຢ່າງເລິກຊຶ່ງ ບັນຫາຄວາມ ໜັກແໜ້ນທາງດ້ານ ຄຸນສົມບັດ ສິນທັມປະຕິວັດ ຈັນຍາທັມ ຈັນຍາບັນ ຂອງພນັກງານ ຈຳນວນນຶ່ງ ບໍ່ທັນເລິກເຊິ່ງ ໜັກແໜ້ນ ເວົ້າສະເພາະ ແມ່ນການຕິດຕາມ ກວດກາການ ດຳເນີນຄະດີ ຍັງບໍ່ທັນສູງ".

ພ້ອມກັນນັ້ນ ທ່ານກໍວ່າ ໄອຍະການ ປະຊາຊົນ ຈຳນວນນຶ່ງ ມີແນວຄິດ ການເມືອງ ບໍ່ໜັກແໜ້ນ:

"ສວຍໃຊ້ຊ່ອງຫວ່າງ ຂອງກົດໝາຍ ເພື່ອ ສໍ້ຣາດບັງຫລວງ ກິນສິນບົນ".

ທ່ານວ່າ ສິ່ງທີ່ເກີດຂຶ້ນນັ້ນ ເປັນບັນຫາສຳຄັນ ທີ່ສົ່ງ ຜົນກະທົບ ຕໍ່ສັງຄົມ ເຮັດໃຫ້ເກີດ ຫາງສຽງອັນບໍ່ດີ ແລະ ປະຊາຊົນ ບໍ່ມີຄວາມພໍໃຈ ຕໍ່ວຽກງານຂອງ ໄອຍະການ. ດັ່ງນັ້ນ ຈຶ່ງຈຳເປັນຕ້ອງ ໄດ້ແກ້ໄຂ ຂໍ້ບົກຜ່ອງ ແລະ ປັບປຸງວຽກງານ ໃຫ້ດີຂຶ້ນ.

ທ່ານ ທອງສິງ ທັມມະວົງ ປະທານ ສະຫາແຫ່ງຊາດ ກໍໄດ້ເວົ້າ  ຢູ່ໃນກອງປະຊຸມ ກ່ຽວກັບວຽກງານ ໄອຍະການ ປະຊາຊົນ ທົ່ວປະເທດ ປະຈຳສົກປີ 2008–2009 ທີ່ຈັດຂຶ້ນ ເມື່ອວັນທີ 13 ມົກກະຣາ 2010 ໃນບາງຕອນວ່າ:

"ຜູ້ທີ່ມີຄວາມຜິດ ຕ້ອງໄດ້ຖືກ ລົງໂທດ ຜູ້ທີ່ບໍ່ມີ ຄວາມຜິດ ຕ້ອງບໍ່ໃຫ້ຖືກ ລົງໂທດ ອັນນີ້ແມ່ນ ຄວາມຍຸຕິທັມ ຂອງສັງຄົມ ຄວາມຍຸຕິທັມ ຂອງຣະບອບໃໝ່ ພວກເຮົາ ພຍາຍາມ ເຮັດໃຫ້ບັນຫານີ້ ຄ່ອຍມີຄຸນນະພາບ ດີຂຶ້ນ ດີຂຶ້ນຢູ່ເລື້ອຍໆ".

ທ່ານວ່າ ອົງການ ໄອຍະການ ທຸກຂັ້ນ ໄດ້ຄົ້ນຄວ້າ ຮ່າງມະຕິ ກົມການເມືອງ ສູນກາງ ວ່າດ້ວຍວຽກງານ ໄອຍະການ ປະຊາຊົນ…. ປັບປຸງກົດໝາຍ ວ່າດ້ວຍ ໄອຍະການ ປະຊາຊົນ ປັບປຸງອົງການ ໄອຍະການ ຂັ້ນເມືອງ ໂດຍໂຮມເອົາ ບັນດາອົງການ ໄອຍະການ ປະຊາຊົນ ເມືອງ 143 ເມືອງເຂົ້າເປັນ ອົງການ ໄອຍະການ ປະຊາຊົນເຂດ 39ເຂດ ໃນທົ່ວປະເທດ ພ້ອມທັງ ໃຫ້ເພີ່ມທະວີ ການນຳພາ ຂອງພັກ ຕໍ່ອົງການ ໄອຍະການ ປະຊາຊົນ ທຸກຂັ້ນ ແລະ ໃຫ້ອົງການ ໄອຍະການ ປະຊາຊົນ ທຸກຂັ້ນ ຄວນມີຣະບຽບ ແບບແຜນ ອັນຖືກຕ້ອງຕໍ່ພັກ ອັນໝາຍເຖິງ ໃຫ້ອົງການ ໄອຍະການ ປະຊາຊົນ ທຸກຂັ້ນ ຢູ່ພາຍໃຕ້ການ ຈັດຕັ້ງ, ຊີ້ນຳ, ນຳພາ ຂອງພັກ ຊຶ່ງເປັນພັກ ທີ່ໃຊ້ອຳນາດ ຜະເດັດການ ໃນສັງຄົມລາວ.

ຢູ່ປະເທດລາວ ໄດ້ມີການ ຈັດຕັ້ງ ໄອຍະການ ປະຊາຊົນ ສູງສຸດ, ໄອຍະການ ປະຊາ ຊົນ ແຂວງ, ເຂດ, ເມືອງ, ໄອຍະການ ທະຫານ ແລະ ທັງມີສູນ ພັທນາວຽກງານ ໄອຍະການ ນຳດ້ວຍ.

ໃນການເຄື່ອນໃຫວ ວຽກງານ ຂັ້ນນຳໄດ້ມອບໃຫ້ ອົງການ ໄອຍະການ ປະຊາຊົນລາວ ທຸກຂັ້ນ ປະຕິບັດຕາມ ຄຳຂັວນ 3 ມີ 4 ຮັບປະກັນ ຊຶ່ງເປັນຄຳຂວັນ ສະເພາະ ອົງການໄອຍະການ ດັ່ງທ່ານ ສົມພັນ ໄດ້ເວົ້າວ່າ:

"3 ມີ : ມີແນວຄິດ ການເມືງດີ, ມີການພັທນາດີ ແລະ ມີຄວາມ ສາມັກຄີດີ. 4 ຮັບປະກັນ : ຮັບປະກັນ ໃຫ້ຖືກກົດໝາຍ, ຮັບປະກັນ ໃຫ້ຖືກ ກຳນົດເວລາ, ຮັບປະກັນ ໃຫ້ຄວາມໂປ່ງໃສ, ຮັບປະກັນ ໃຫ້ຄວາມ ຍຸຕິທັມ".

ທີ່ເວົ້າມານັ້ນ ຄືພາລະໜ້າທີ່ ຂອງອົງການ ໄອຍະການ ປະຊາຊົນ ຊຶ່ງ ປະຕິບັດ ບໍ່ໄດ້ ເທົ່າທີ່ຄວນ ຖ້າສົມທຽບໃສ່ ພາລະບົດບາດ ອັນສຳຄັນ ຂອງຕົນ ທີ່ຖືກກຳນົດໄວ້ ຢູ່ໃນ ຣັຖທັມນູນ. ມີຫລາຍ ຫາງສຽງວ່າ ເຖິງແມ່ນ ພນັກງານ ໄອຍະການ ສ່ວນໃຫຍ່ ນັບຕັ້ງແຕ່ຂັ້ນເທິງ ຮອດຂັ້ນລຸ່ມ ຈະອອກ ເຮື່ອເທແຮງ ປະຕິບັດງານ ຕາມຄວາມຮູ້ ຄວາມສາມາດ ດ້ວຍຄວາມ ບໍຣິສຸດ ແນວໃດກໍດີ ແຕ່ຄວາມເປັນທັມ ໃນສັງຄົມລາວ ກໍບໍ່ອາດ ມີຂຶ້ນໄດ້ ຍ້ອນວ່າດ້ານນຶ່ງ ເປັນຍ້ອນ ພນັກງານ ໄອຍະການ ຈຳນວນນຶ່ງ ຍັງ ສໍ້ຣາສບັງຫລວງ ຮັບສິນບົນ ດັ່ງທີ່ທານ ສົມພັນ ແພງຄຳມີ ໄດ້ເວົ້າຜ່ານມາ ແລະອີກດ້ານນຶ່ງ ກໍເປັນຍ້ອນ
ອົງການ ໄອຍະການ ທຸກຂັ້ນ ບໍ່ມີຄວາມເປັນ ເອກກະຣາດ ໃນການເຄື່ອນໃຫວ ວຽກງານ ວິຊາສະເພາະ ຕາມພາລະ ໜ້າທີ່ ຊຶ່ງກຳນົດໄວ້ ຢູ່ໃນຣະບຽບ ກົດໝາຍ ທີ່ມີຢູ່ ຍ້ອນຖືກຄອບງຳ ແລະ ບົ່ງການຈາກ ຜູ້ມີອຳນາດ ເໜືອກົດໝາຍ.

ເຕັມຫນ້າ