ອົງການ ແມ່ນ້ຳສາກົນ ຊຶ່ງມີສຳນັກງານໃຫຍ່ ຢູ່ຣັດຄາລີຟໍເນັຍ ສະຫະຣັຖ ອະເມຣິກາ ອອກຣາຍງານເມື່ອວັນທີ່ 3 ເດືອນຕຸລານີ້ ວ່າ ປັດຈຸບັນ ປະເທດລາວ ມີເຂື່ອນໄຟຟ້າແລ້ວ 6 ແຫ່ງ ກຳລັງສ້າງຢູ່ 7ເຂື່ອນ ກຳລັງ ສຶກສາສຳຣວດ 12 ແຫ່ງ ແລະ ມີແຜນຈະສ້າງ ໃນອານາຄົດ 35 ແຫ່ງ.
ເຂື່ອນທັງໝົດ ຈະເຮັດໃຫ້ປະຊາຊົນລາວ ຈຳເປັນຕ້ອງໂຍ້ກຍ້າຍ ອອກຈາກບ້ານເຮືອນ ແລະ ບ່ອນທຳມາຫາກິນ ເຖິງນຶ່ງແສນຄົນ. ປັດຈຸບັນ ຫລາຍໝື່ນຄົນ ໄດ້ໂຍ້ກຍ້າຍ ອອກໄປແລ້ວ; ຫຼາຍພັນຄົນ ອອກຈາກເຂື່ອນ ນ້ຳເທີນສອງ ແລະ ຜູ້ທີ່ຍົກຍ້າຍ ກໍຍັງບໍ່ໄດ້ ຮັບການຊ່ວຍເຫລືອດີ ເທົ່າທີ່ຄວນ.
ອົງການ ແມ່ນ້ຳສາກົນ ຂຽນໃນບົດຄວາມໃໝ່ນີ້ ອີກວ່າ ເຂື່ອນຈະຕັນທາງຂື້ນລົງ ຂອງປາ; ຕາມທັມມະຊາດແລ້ວ ຍາມນ້ຳຂື້ນ ປາກໍຕ້ອງຂື້ນໄຂ່ ຍາມນ້ຳລົງ ປາກໍລົງ; ນັ້ນ ແມ່ນການດຳເນີນ ຊີວິດ ຂອງປາ ແຕ່ຖ້າແມ່ນ້ຳ ລຳຄອງ ຖືກຕັນ ການດຳເນີນ ຊີວິດ ຂອງປາ ກໍຈະຖືກຕັນ ຈະບໍ່ມີປາຂື້ນລົງ ເໝືອນເດີມ ປະຊາຊົນ ຈະຂາດເຂີນ ອາຫານ ການກິນ ແລະ ຣາຍໄດ້.
ແຕ່ຣັຖບານລາວ ພັດມີເຫດຜົນ ໃນການສ້າງເຂື່ອນ. ເຈົ້າໜ້າທີ່ ທາງການລາວ ກ່າວຢູ່ສເມີ ວ່າ ປະເທດລາວ ມີແມ່ນ້ຳລຳທານຫລາຍ ເໝາະສົມ ສຳຣັບການສ້າງເຂື່ອນໄຟຟ້າ ແລະ ໃນຂະນະດຽວກັນ ປະເທດໃກ້ຄຽງ ແລະ ປະເທດລາວເອງ ກໍຕ້ອງການໄຟຟ້າ. ລາວຍັງເປັນ ປະເທດທຸກຍາກ ຂາດເຂີນ ຣັຖບານຕ້ອງການ ຣາຍໄດ້ ເພື່ອສ້າງສາພັທນາ; ຣັຖບານລາວ ຄາດວ່າ ໂຄງການສ້າງເຂື່ອນ ທັງໝົດ ທີ່ກ່າວມານັ້ນ ຈະຊ່ວຍໃຫ້ ປະເທດລາວ ມີຣາຍໄດ້ ເຖິງນຶ່ງພັນລ້ານດອນລ່າ ສະຫະຣັຖ ຕໍ່ປີ.
ອົງການ ສາກົນ ແລະ ຣັຖບານ ຂອງຫລາຍປະເທດ ກໍສນັບສນູນ ການສ້າງເຂື່ອນ ຢູ່ລາວ ເຊັ່ນທະນາຄານໂລກ ແລະ ທະນາຄານ ພັທນາເອເຊັຍ. ຕໍ່ບັນຫາ ທີ່ວ່າ ເຂື່ອນຈະທຳລາຍ ສະພາບແວດລ້ອມນັ້ນ ເຈົ້າໜ້າທີ່ລາວ ກໍເວົ້າວ່າ ຕ້ອງຣະມັດຣະວັງ ຕ້ອງມີການສຶກສາ ສຳຣວດຢ່າງດີ ກ່ອນຈະສ້າງເຂື່ອນ.