ຄະນະກຳມະການ ເພື່ອການພັດທະນາຊົນນະບົດ ແລະ ຫລຸດຜ່ອນ ຄວາມທຸກຍາກ ແຫ່ງຊາດ ຂອງລາວໄດ້ສຳຫລວດ ເຫັນວ່າປະຊາຊົນລາວຫລາຍກວ່າ 1 ລ້ານ 5 ແສນຄົນ ເທົ່າກັບຈຳນວນປະຊາຊົນລາວ ໃນທົ່ວປະເທດ 27.1 ສ່ວນຮ້ອຍມີຊີວິດການປັນຢູ່ ຕ່ຳກວ່າຂີດໝາຍຂອງຄວາມທຸກຍາກ, ຕາມຣາຍງານຂອງອົງການຂ່າວຊິນຫົວຂອງທາງການຈີນ ໃນວັນທີ 30 ມິຖຸນາ 2009 ນີ້.
ການສຳຫລວດ ທີ່ວ່ານັ້ນແມ່ນໄດ້ປະຕິບັດ ໃນລະຫວ່າງປີ 2007 ແລະ 2008. ການສຳຫລວດ ແບບນີ້ ແມ່ນມີການດຳເນີນໄປ ໃນແຕ່ລະ 5 ປີ. ທ່ານສີວິໄຊໄຊຊະນະວົງເພັດ,ຜູ້ອຳນຍການຝ່າຍບໍລິຫານຂອງກອງທຶນຫລຸດຜ່ອນຄວາມທຸກຍາກຂອງລາວກາວວ່າຄວາມທຸກຍາກ ຂອງປະເທດຊາດມີສາເຫດ ມາຈາກຫລາຍປັດໃຈຮວມທັງມາຕຖານ ການສຶກສາຕ່ຳ, ຄວາມຫຍູ້ງຍາກທາງດ້ານພູມີປະເທດ, ຂາດໂຄງສ້າງພື້ນຖານ ແລະ ບໍ່ມີໂອກາດ ເຂົ້າເຖິງການພັດທະນາ.
ຢູ່ ເຂດພາກເໜືອຂອງສ.ປ.ປ.ລາວປະຊາຊົນ 51 ສ່ວນຮ້ອຍມີຊີວິດການເປັນຢູ່ ໃນສະພາບ ທີ່ທຸກຍາກ.
ຢູ່ເຂດພາກກາງມີ 32 ສ່ວນຮ້ອຍ ແລະ ໃນເຂດພາກໃຕ້ມີ 17 ສ່ວນຮ້ອຍ ຂອງຈຳນວນ ປະຊາຊົນທັງໝົດ, ຕາມຄຳເວົ້າຂອງທ່ານອ່ອນເນື້ອພົມມະຈັນຣັດຖະມົນຕຣີປະຈຳສຳນັກ ນາຍົກຣັດຖະມົນຕຣີສ.ປ.ປ.ລາວ.
ຢູ່ປະເທດລາວມີປະຊາຊົນປະມານ 80 ສ່ວນຮ້ອຍ ເປັນຊາວກະສິກອນ. ຜົນລະປູກ ໄດ້ຮັບຜົນກະທົບ ຢ່າງເປັນປະຈຳຈາກຝົນຕົກ ທີ່ບໍ່ເປັນປົກກະຕິ ແລະ ຈາກສັດຕູພືດ.