ເຈົ້າໜ້າທີ່ຄະນະກັມມະການ ຄວບຄຸມຢາເສບຕິດແຂວງຫົວພັນ ເປີດເຜີຽວ່າການແຜ່ລະບາດ ຂອງຢາບ້າໃນແຂວງຫົວພັນມີຢູ່ ຢ່າງກ້ວາງຂວາງ, ແລະ ມີຫລາຍກ່ວາຢາເຮໂຣອີນ, ແລະ ວ່າຍັງຂາດເຂີນ ພາຫານະ ຫລາຍຢ່າງ ທີ່ຈໍາກັດ ຄວາມສາມາດ ຂອງເຈົ້າໜ້າທີ່, ແຕ່ກໍໄດ້ ພະຍາຍາມ ປາບປາມສຸດຂີດ.
"ບັນຫາ ທີ່ ວ່າ ຢູ່ ແຂວງ ຫົວພັນ ຍັງ ຕ້ອງ ເອົາ ໃຈ ໃສ່ ແມ່ນ ບັນຫາ ຢາ ບ້າ . ບັນຫາ ຢາ ບ້າ ຈະ ມີ ການ ແຜ່ ຂະຫຍາຍ ຫລາຍ ກ່ວາ . ຢາ ເຮ ໂຣອີນ ມັນ ກໍ ຍັງ ມີ ຢູ່ ໃນ ຂອບ ເຂດ ຈໍ າກັດ ຢາ ບ້າ ມີ ການ ແຜ່ ກ້ວາງ ຫລາຍ ກ່ວາ "
ທ່ານວ່າການປາບປາມ ຢາເຮໂຣອີນ ສະດວກກ່ວາປາບປາມຢາບ້າເພາະວ່າຢາເຮໂຣອີນ ມັນມີ ຢູ່ໃນຂອບເຂດ ຈໍາກັດ, ສ່ວນ ຢາບ້ານັ້ນມັນແຜ່ລາມ ໄປໝົດ ທຸກເຂດໝູ່ບ້ານ. ທ່ານວ່າ ການນໍາເອົາ ຢາບ້າເຂົ້າມາ ໃນແຂວງຫົວພັນນີ້ໂດຍມາກແມ່ນ ເອົາມາ ທາງຣົຖ, ຣົຖໂດຍສານແລະ ຣົຖສ່ວນຕົວໂດຍແມ່ນບຸກຄົນ ໃນແຂວງນີ້ ຈໍານວນນື່ງສົມທົບກັບ ພວກຄ້າຢາບ້າມາແຕ່ແຫ່ງອື່ນ.
"ພໍ່ຄ້າ ໃຫ່ຽ ທີ່ ເປັນ ຄົນ ຕ່າງ ຊາດ ຖື ວ່າ ຢູ່ ທາງ ແຂວງ ຫົວພັນ ບໍ່ ທັນມີ . ຕົວ ແທນ ເຂົ້າ ໄປ ແຕ່ ວ່າ ສ່ວນ ຫລາຍ ເປັນ ຄົນ ທ້ອງ ຖິ່ນ ແລະ ກໍ ຄົນ ຕ່າງ ແຂວງ . ບາງ ເທື່ອ ກໍ ຄົນ ໝູ່ ບ້ານ ໄປ ຮັບ ມາ ແລ້ວ ກໍ ຂາຍ ແຍກ ກັນ ."
ເຈົ້າໜ້າທີ່ ປາບປາມຢາເສບຕິດລາວ ວ່າການປາບປາມ ຢາເສບຕິດ ໃນແຂວງຫົວພັນ ນີ້ ກໍມີ ຄວາມຍຸ່ງຍາກ ສົມຄວນຍ້ອນວ່າ ຍັງຂາດເຂີນພາຫານະ ຫລາຍຢ່າງ ເຊັ່ນວ່າຣົຖເຄື່ອງມື ຕິດຕໍ່-ສື່ສານພະນັກງານ ໃຫ້ຂ່າວເປັນຕົ້ນ. ການປາບປາມ ຢາເສບຕິດ ໃນບາງປະເທດນັ້ນອາໃສເຄື່ອຄ່າຍ ຂອງການຈັດຕັ້ງ ມວນຊົນ ໃນແຕ່ລະທ້ອງຖິ່ນ ເປັນຫລັກ.