ຍິງສາວລາວ ຄ້າໂສເພນີ ຖືກຈັບ ຢູ່ໄທ

ເຈົ້າໜ້າທີ່ ຕໍາຣວດໄທ ເມືອງອຸດອນ ແຂວງອຸດອນທານີ ຈັບ ຍິງສາວລາວ ຈໍານວນ 15 ຄົນ ໃນຖານວ່າ ຈ່າວ ຄ້າຂາຍ ບໍຣິການ ທາງເພດ ຢູ່ຕາມຮິມຖນົນ.

ຣາຍງານຂ່າວ ​ຈາກ​ທ້ອງ​ຖິ່ນ​ວ່າ ​ເມື່ອ​ວັນ​ທີ 30 ກັນຍາ​ ຜ່ານ​ມານີ້, ​ເຈົ້າ​ໜ້າ​ທີ່ ​ຕໍາຣວດ​ ເມືອງ​ອຸດອນ​ ​ໃນ​ຂະນະ​ທີ່ ​ປະຕິບັດ​ງານ​ ລາດ​ຕາ​ເວນ ​ຕາມ​ຖນົນ ​ໄດ້​ພົບ​ເຫັນ ​ຍິງ​ສາວ ​ຈໍານວນ​ນື່ງ ຢືນ​ຢູ່​​ແຄມ ​ຖນົນ ທາງ​ຍ່າງ​ ໃນ​ຕົວ​ເມືອງ​ອຸດອນ ​ໂດຍ​ພາກັນ ​ຈ່າວ​ຂາຍ ​ບໍຣິການ ​ທາງ​ເພດ ​ໃຫ້​ຜູ້​ຊາຍ ​ທີ່​ຍ່າງ​ ຜ່ານ​ໄປຜ່ານ​ມາ​ ຕາມ​ຖນົນ. ​ເຈົ້າ​ໜ້າ​ທີ່ ​ຕໍາ​ຣວດ ສົງ​ໃສກໍ​ເລີຍ​ເຂົ້າ​ໄປ ​ຈັບ.

ຍິງ​ສາວ​ເລົ່າ​ນີ້ ສາຣະພາບ ​ວ່າ ​ເປັນ​ປະຊາຊົນ​ລາວ​ ມາ​ຈາກ ​ນະຄອນ​ວຽງ​ຈັນ, ທຸກ​ຄົນ ​ມີ​ໜັງສື​ເດີນທາງ​ເຂົ້າ​ປະ​ເທດ​ ຜ່ານ​ດ່ານ ​ຂົວ​ມິ​ຕະພາບແບບ​ຖືກຕ້ອງ. ຍິງ​ສາວ​ ຈໍ​ານວນ​ນີ້ມີ​ອາຍຸ​ ລະ​ຫ່ວາງ 19-32 ປີ. ຫລັງ​ຈາກ ​ຖືກ​ຈັບ​ແລ້ວ ​ເຈົ້າໜ້າ​ທີ່​ ຕໍາ​ຣວດ ​ກໍ​ໄດ້​ນໍາ​ຕົວ​ໄປ ​ແລະ ​ດໍາ​ເນີນ​ການ ​ຕາມ​ລະບຽບ​ ກົດໝາຍ ​ຂອງ​ປະ​ເທດ. ບັນຫາ​ ຜູ້ຍິງ​ລາວ ​ເດີນທາງ ​ເຂົ້າ​ມາ ຂາຍ​ບໍ​ຣິ​ການ ​ທາງ​ເພດ ​ໃນ​ປະທດ​ໄທ​ນີ້ມັນ​ໄດ້​ກາຍ​ເປັນ​ເຣື້ອງ ຊີວິດ​ການ​ເປັນ​ຢູ່ ​ຂອງຜູ້​ທີ່ ​ບໍ່​ມີທາງ​ເລືອກ​ ມາ​ໄດ້​ຫລາຍ​ປີ​ແລ້ວ.

ເມື່ອເຈົ້າ​ໜ້າ​ທີ່​ ສອບຖາມ ​ເຂົາ​ເຈົ້າ ກໍ​ບອກ​ ຄວາມ​ຈິງ ​ໂລດ​ວ່າຢູ່​ລາວ ​ບໍ່​ຮູ້​ວ່າ ​ຈະ​ຫາ​ຢູ່​ຫາ​ກິນ ​ແນວ​ໃດ, ບໍ່​ມີ​ວຽກ​​ເຮັດ. ຍິງ​ສາວ ທີ່​ດໍາຣົງ ກິດຈະ​ກໍາ ​ຊີວິດ​ ແບບ​ນີ້ ​ສ່ວນ​ມາກ ​ແມ່ນ​ມາ​ຈາກ ​​ເຂ​ດຊົນະ​ບົດ ຕ່າງ​ແຂວງ.

ໃນ​ວັນ​ດຽວ​ກັນ​ນີ້ ​ເຈົ້າ​ໜ້າ​ທີ່​ ດ່ານ​ຂົວ​ມິ​ຕະພາບ​ ຝັ່ງ​ເມືອງໜອງ​ຄາຍ ຂອງ​ໄທ ​ໄດ້​ຈັບ​ຜູ້ຍິງ​ລາວ​ ຈາ​ກ​ເມືອງ​ຫລວງ​ພະ​ບາງຄົນ​ນື່ງອາຍຸ 25 ປີ ​ໃນ​ຖານ​ລັກລອບ ​ຢາ​ບ້າ ​ເຂົ້າປະ​ເທດ. ​​ໃນ​ເວລາ​ທີ່ ​ເຈົ້າ​ໜ້າ​ທີ່​ດ່ານ​ກວດ​ຄົນ ​ເຂົ້າ​ເມືອງ ​ຂອງ​ໄທກວດ​ຕົວ ຜູ້ຍິງ​ລາວ ​ຄົນ​ນີ້​ ໄດ້​ພົບ​ເຫັນ ​ຢາ​ບ້າ ​ຈໍານວນ 504 ​ເມັດ ຊຸກ​ເຊື່ອງ​ໄວ້ ​ຢູ່​ໃນກັບ​ ເຂົ້າ​ແປ້ງ ​ເຄື່ອງ​ສໍາອາງ.

ລາວ​ໄດ້​ສາຣະພາບ​ວ່າ ​ໄດ້​ຮັບຈ້າງ​ຂົນ​ສົ່ງຢາ​ ຈາກ​ແມ່​ຄ້າ​ ໃນ​ນະຄອນຫລວງ​ວຽງ​ຈັນ​ ​ເປັນຈໍ​ານວນ​ເງິນ 10,000 ບາດ ​ໂດຍ​ ໄດ້​ຮັບ​ເງິນ​ລ່ວງ​ໜ້າ​ແລ້ວ 5,000 ບາດສ່ວນ​ເຫລືອ​ນັ້ນຈະ​ໄດ້​ຮັບ​ຈາກ​ລູກ​ຄ້າ​ຢູ່​ທີ່​ເມືອງ​ອຸດອນຜູ້​ທີ່​ ຈະ​ມາ​ຮັບ​ເອົາ​ຢາ​ຈາກ​ນາງ.