ພວກຄ້າ ຢາເສບຕິດ ຊາວຈີນ ຖືກຈັບ ທີ່ສນາມບິນ ວັດໄຕ

ເຈົ້າໜ້າທີ່ ສນາມບິນ ວັດໄຕ ຊາວຈີນ ທີ່ເຊື່ອງ ຢາບ້າ ປະມານ 80 ພັນເມັດ ໃນລໍາໂພງ 2 ໜ່ວຍ ໃນຂະນະທີ່ ພວມເດີນທາງ ອອກຈາກ ນະຄອນຫລວງວຽງຈັນ.
ມະນີຈັນ ຣາຍງານ
2008-07-21
ອີແມວລ໌
ຄໍາເຫັນ
Share
ພິມ

ກະ​ແສ​ຂ່າວ ​ທ້ອງ​ຖີ່​ນ ຣາຍງານ ​ວ່າ ​​ໃນ​ວັນ​ທີ 11 ກໍຣະກະດາ​ນີ້ ເຈົ້າໜ້າທີ່ ພາສີ ສນາມ​ບິນ ​ວັດ​ໄຕ ນະຄອນຫລວງ ​ວຽງຈັນ ​ໄດ້​ຮັບ​ແຈ້ງ​ ຈາກ​ພະນັກງານ ສາງ​ຝາກ​ເຄື່ອງ ​ຜູ້​ໂດຍສານ ​ຂາ​ອອກ ວ່າ ມີ​ຜູ້​ໂດຍສານ 2 ຄົນ​ ມາ​ຝາກ​ເຄື່ອງ ​ແລະ ​ເມື່ອ​ຫີບເຄື່ອງ ​ຜ່ານ X-Ray ປາກົດ​ວ່າ ​ພົບ​ເຫັນ​ ເຄື່ອງ​ຜິດ​ປົກກະຕິ ຈໍານວນ​ນຶ່ງ.

​ໃນ​ການ​ເປີດ​ຫີບ ​ນັ້ນ ຕໍ່ໜ້າ​​ເຈົ້າຂອງ-ຜູ້​ໂດຍສານ ​ທັງ​ສອງ ກໍ​ພົບ ​​ຢາ​ເສບ​ຕິດ ປະ​ເພດ ​ຢາ​ບ້າ 80 ພັນ​ເມັດ ​ເປັນ​ຫໍ່​ຊຸກ​ເຊື່ອງ​ໄວ້ ​ຢູ່​ໃນ​ລໍາ​ໂພງ 2 ໜ່ວຍ ​ໃນ​ຫີບ ຈຶ່ງ​ຄວບ​ຄຸມ​ຕົວ ​ເພື່ອ​ໄປ​ ດໍາ​ເນີນ ​ຄະດີ ​ຕາມ​ກົດໝາຍ. ຜູ້​ຕ້ອງ​ຫາ​ ​ເປັນ​ຊາວ​ຈີນ ຊື່ Yu Tao Liu ອາຍຸ 38ປີ ​ອາຊີບ ​ນັກທຸຣະກິດ ​ແລະ Reu Xiang ອາຍຸ 20 ປີ ອາຊີບ​ກໍາມະກອນ.  ທັງ​ສອງ ຖື passport ຈີນ.

ນີ້ ​ກໍ​ເປັນ​ຂ່າວ ການ​ຈັບ​ຜູ້​ຕ້ອງ​ຫາ ​ຊາວ​ຕ່າງປະ​ເທດ ທີ່​ລັກລອບ ​ນໍາ​ຢາ​ເສບ​ຕິດ ຈາກ​ລາວ ຜ່ານ​ທາງ​ອາກາດ ​ເປັນ​ເທື່ອ​ທໍາ​ອິດ ທີ່​ອອກ​ຂ່າວ​ ເປັນ​ທາງ​ການ.

ຂ່າວ​ ຣາຍງານ ​ຕື່ມ​ວ່າ ຜ່ານ​ການຈັດ​ຕັ້ງ ​ປະຕິບັດ 4 ຄາດໝາຍ, 11 ຂະ​ບວນການ ທີ່​ກະຊວງ ​ປ້ອງ​ກັນ ​ຄວາມ​ສະ​ງົບ ວາງ​ອອກ ​ໃນ 6 ​ເດືອນ ຕົ້ນ​ປີ 2008 ຊຶ່ງ​ທາງ​ ປກສ ນະຄອນຫລວງ​ວຽງຈັນ ນໍາ​ມາ​ປະຕິບັດ ມີ​ຜົນງານ ​ຫລາຍ​ດ້ານ ​ເຊັ່ນ ຂະ​ບວນການ ​ສຸມ​ແກ້​​ໄຂບັນຫາ ຄ້າ-ຂາຍ-​ເສບ ຢາ​ເສບ​ຕິດ ​ໂດຍ​ມີ​ການ​ຕິດ​ຕັ້ງ ​ຕູ້​ຮັບ​ແຈ້ງ ​​ເບາະ​ແສ ​ກຸ່ມ​ແກ້ງ ​ຜູ້​ຊື້-ຂາຍ-​ເສບ 11ຈຸດ.  ຕິດຕາມ​ ກວດກາ ​ໄດ້ 120 ຄັ້ງ ຂຶ້ນ​ບັນຊີ ​ເປົ້າໝາຍ-ກ່ຽວພັນ​ ເລື່ອງ​ຢາ​ເສບ​ຕິດ 281 ຄົນ ​​ເປັນຜູ້ຍິງ 59 ຄົນ.

​ແຕ່​ເຖິງ​ຢ່າງ​ໃດ ​ກໍ​ດີ ຢາ​ເສບ​ຕິດ ​ປະ​ເພດ​ ຢາ​ບ້າ ຍັງ​ມີ​ ການ​ລັກລອບ​ຂາຍ ​ແລະ ​ຫາ​ຊື້​ໄດ້ ບໍ່​ຍາກ ​ໃນ​ນະຄອນຫລວງ ​ວຽງຈັນ -ຕາມ​ຄໍາ​ເວົ້າ ​ຂອງ​ຜູ້​ຄ້າ ​ຢາ​ເສບ​ຕິດ ​ຊາວ​ໄທ ຜູ້​ນຶ່ງ ​ແລະ ​ວ່າ ການ​ຈັບ​ກຸມ ​ໃນ​ລາວ ສ່ວນ​ໃຫຍ່ ​ເປັນລາຍ​ນ້ອຍ-ຂາຍ​ຫຍ່ອຍ.  ສ່ວນ​ລາຍ​ໃຫຍ່ ​ຫລື ນາຍທຶນ ​ຢູ່​ເບື້ອງ​ຫລັງ ບໍ່​ປາກົດ​ວ່າ​ ຖືກ​ຈັບ​ກຸມ ​ຫລື​ທໍາລາຍ ​ແຫ​ລ່ງຜລິດ​ເລີຍ.

ເຕັມຫນ້າ