ລາວຈະປັບປຸງຣະບົບ ເກັບພາສີໃຫ້ທັນສມັຍ

ສປປລາວ ຈະປັບປຸງ ຣະບົບການ ເກັບພາສີ ໃຫ້ທັນສມັຍຂື້ນ ແລະ ໃຫ້ໄດ້ ມາຕຖານສາກົນ.
ອະວາຣີ
2010-02-24
ອີແມວລ໌
ຄໍາເຫັນ
Share
ພິມ

ເມື່ອວັນທີ່ 22 ກຸມພາ ນີ້ ກົມພາສີ ຂອງລາວ ແລະ ອົງການ ສະຫະປະຊາຊາດ ເພື່ອການຄ້າ ແລະການພັທນາ ໄດ້ລົງນາມ ໃນຂໍ້ຕົກລົງ ກ່ຽວກັບການ ຕິດຕັ້ງຣະບົບ ການເກັບພາສີ ທີ່ທັນສມັຍ ຢູ່ລາວ. ທະນາຄານໂລກ ຈະໃຫ້ເງິນ ຊ່ວຍເຫລືອ 6 ລ້ານດອນລ່າ ສະຫະຣັຖ ເພື່ອປະຕິບັດ ຕາມຂໍ້ຕົກລົງ ດັ່ງກ່າວ ດັ່ງທ່ານ ສັນຕິພາບ ພົມວິຫານ ຫົວໜ້າກົມ ພາສີ ກະຊວງການເງິນ ຂອງລາວ ກ່າວຕອນນຶ່ງວ່າ:

“ທະນາຄານໂລກ ໄດ້ຕົກລົງ ໃຫ້ທຶນ ຊ່ວຍເຫລືອລ້າ ຈຳນວນ ຫົກລ້ານດອນລ່າ ໃນນັ້ນຈະນຳ ໃຊ້ທຶນ ຈຳນວນສີ່ລ້ານກວ່າ ດອນລ່າ ເຂົ້າໃນການ ຈັດຕັ້ງ ປະຕິບັດ ຣະບົບ Asycuda World ແລະ ສ່ວນທີ່ເຫລືອ ຈະນຳໃຊ້ ໃນການປັບປຸງ ວຽກງານນິຕິກັມ ແລະ ການຄຸ້ມຄອງ ບໍຣິຫານເພື່ອ ສນັບສນູນ ໃຫ້ມີຄວາມ ທັນສມັຍ.”

ຣະບົບ Asycuda ແມ່ນຣະບົບ ການເກັບພາສີ ແບບອັດຕະໂນມັດ ຕົວຢ່າງນັກ ທຸຣະກິດ ສາມາດຈ່າຍຄ່າພາສີ ທາງອິນເຕີແນ໊ຕ ໃຫ້ແກ່ຣັຖບານ ໄດ້ຢ່າງໄວວາ. ທາງການລາວ ຈະຕິດຕັ້ງ ຣະບົບດັ່ງກ່າວ ຕາມດ່ານພາສີ ແລະ ໃນຫ້ອງການ ເກັບພາສີອາກອນ ທຸກໆແຫ່ງ ທົ່ວປະເທດ.

ທ່ານ ສັນຕິພາບ ກ່າວອີກວ່າ ການຕິດຕັ້ງ ຣະບົບ ການເກັບພາສີ ທີ່ທັນສມັຍນີ້ ຈະຊ່ວຍພັທນາ ເສຖກິດຂອງລາວ ໃຫ້ຂຍາຍຕົວ ໄວຂື້ນ ເພື່ອເຮັດໃຫ້ ລາວ ຫລຸດພົ້ນ ຈາກຖານະ ການເປັນປະເທດ ທີ່ດ້ອຍພັທນາ ທີ່ສຸດ ໃນໂລກພາຍໃນປີ 2020. ກົມພາສີ ຈະໃຊ້ເງິນ ຊ່ວຍເຫລືອຈຳນວນ ດັ່ງກ່າວ ເພື່ອຕິດຕັ້ງ ຣະບົບການ ເກັບພາສີ ອັນທັນສມັຍນີ້ ໃຫ້ສຳເຣັດທົ່ວ ປະເທດພາຍ ໃນຫ້າປີຂ້າງໜ້າ.

ກົມພາສີ ຈະຝຶກອົບຣົມ ເຈົ້າໜ້າທີ່ ວິຊາການ ແລະ ຕິດຕັ້ງຄອມພິວເຕີ ໃຫ້ໄວເທົ່າ ທີ່ຈະໄວໄດ້. ການປັບປຸງ  ຣະບົບການເກັບ ພາສີ ໃຫ້ ມີປະສິດທິພາບ ຂື້ນນີ້ ເປັນເງຶ່ອນໄຂ ນຶ່ງທີ່ ສປປລາວ ຕ້ອງມີ ກ່ອນຈະໄດ້ ເຂົ້າສະມາຊິກ ຂອງອົງການ ການຄ້າໂລກ.

ເຕັມຫນ້າ