ນາຍົກລາວຢາກເພີ້ມ ເຂດເສຖກິຈພິເສດ

ທ່ານ ບົວສອນ ບຸຜາວັນ ນາຍົກຣັຖມົນຕຣີ ສປປລາວ ກ່າວວ່າ ຣັຖບານລາວ ຢາກສ້າງເຂດເສຖກິດພິເສດ ໃຫ້ມີຫລາຍຂື້ນ ເພື່ອຊຸກຍູ້ສົ່ງເສີມ ໃຫ້ມີການລົງທຶນ.
ອາວະຣີ
2009-12-21
Share

ປັດຈຸບັນເສຖກິຈຂອງລາວ ກຳລັງໄດ້ຮັບຜົນກະທົບ ຈາກວິກິຕການເສຖກິດຂອງໂລກ ຣັຖບານຫວັງວ່າ ການສ້າງເຂດເສຖກິຈພິເສດ ແລະການລົງທຶນ ຄົງຈະຊ່ວຍຟື້ນຟູ ເສຖກິຈຂອງລາວໃຫ້ດີຂື້ນ ດັ່ງນາຍົກຣັຖມົນຕຣີ ບົວສອນ ບຸຜາວັນ ໄດ້ກ່າວຕອນນຶ່ງວ່າ:

“ໃນຫວ່າງບໍດົນມານີ້ ສະພາມີການຮັບຮອງເອົາ ກົດໝາຍວ່າດ້ວຍການລົງທຶນ ສະບັບໃໝ່ເພື່ອສ້າງຄວາມສະດວກ ແຕ່ວ່າ ການສ້າງສະພາບແວດລ້ອມ ໃຫ້ແກ່ການລົງທຶນ ມັນກໍຕ້ອງໄດ້ເຮັດຄົບຊຸດ ພວກຂ້າພະເຈົ້າ ພຍາຍມສ້າງໃຫ້ເກີດ ເຂດເສຖກິດພິເສດຢູ່ລາວ ໃຫ້ມັນຫລາຍຂື້ນ ເພື່ອເຮັດໃຫ້ນັກລົງທຶນ ຂະເຈົ້າໄປລົງທຶນ ຢູ່ບໍຣິເວນດັ່ງກ່າວ.”

ນາຍົກຣັຖມົນຕຣີລາວກ່າວອີກວ່າ ປັດຈຸບັນ ສປປລາວ ມີເຂດເສຖກິຈພິເສດ ແລ້ວສອງແຫ່ງ ຄືເຂດເສຖກິຈພິເສດສວັນ-ເຊໂນ ທີ່ແຂວງສວັນນະເຂດ ແລະ ເຂດເສຖກິຈພິເສດ ສາມຫລ່ຽມຄຳທີ່ແຂວງບໍ່ແກ້ວ ແຕ່ຣັຖບານຢາກສ້າງ ເຂດເສຖກິຈພິເສດ ຕື່ມອີກຢ່າງໜ້ອຍສອງແຫ່ງ ຄືແຫ່ງນຶ່ງ ທີ່ນະຄອນຫລວງວຽງຈັນ ແລະອີກແຫ່ງນຶ່ງ ທີ່ແຂວງຫລວງນ້ຳທາ. ເສຖກິດຂອງລາວຕົກຕ່ຳ ສ່ວນນຶ່ງກໍຍ້ອນ ສິນຄ້າສົ່ງອອກຂອງລາວ ມີຣາຄາຖືກລົງ ໃນຕລາດໂລກ. ນາຍົກຣັຖມົນຕຣີ ບົວສອນ ບຸຜາວັນ ອະທິບາຍເຣື່ອງນີ້ຕື່ມວ່າ:

“ເນື່ອງຈາກຣາຄາສິນຄ້າ ຢູ່ໃນຕລາດໂລກຕົກຕ່ຳ ສະເພາະຣາຄາທອງແດງ ຈາກເຄີຍມີຣາຄາ 8,000 ດອນລ່າຕໍ່ໂຕ່ນ ຍັງເຫລືອແຕ່ 3,600 ດອນລ່າແລະນອກຈາກນັ້ນ ພວກຂ້າພະເຈົ້າ ກໍສົ່ງອອກປະເພດສິນຄ້າ ກະສິກັມຣາຄາກໍຕົກ ແລະຄວາມຕ້ອງການ ຂອງຕລາດໂລກ ກໍຫລຸດລົງ.”

ເຖິງຢ່າງໃດກໍຕາມ ເປັນທີ່ຮູ້ກັນດີຢູ່ແລ້ວວ່າ ຜ່ານມາ ນັກທຸຣະກິຈ ກໍຍັງບໍ່ໄປລົງທຶນ ຢູ່ເຂດເສຖກິຈພິເສດ ທີ່ມີຢູ່ແລ້ວນັ້ນ ຫລາຍພໍເທົ່າໃດ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ