ອະນຸຮັກຊີວະນາໆພັນ ເສຖກິດຈະເຂັ້ມແຂງ

ການປົກປັກ ຮັກສາ ຊີວະນາໆພັນ ຈະຊ່ວຍ ເສຖກິດ ຂອງອາຊຽນ ໃຫ້ໝັ້ນຄົງ ແລະເຂັ້ມແຂງ.
ໂພໄຊສວັດ
2010-10-07
Share

ກົດຟັງສຽງ

ຜູ້ຊ່ຽວຊານ ໄດ້ກ່າວ ໃນມື້ວັນພຸດທີ 6 ຕຸລາ 2010 ນີ້ວ່າອາຊຽນ ຄວນສົ່ງເສີມ ໃຫ້ຜແນກ ອຸດສາຫະກັມ ແລະທຸຣະກິດ ປົກປ້ອງຮັກສາ ພືດພັນ ແລະ ສັດປ່າທີ່ຫາຍາກ ໂດຍການເຮັດໃຫ້ ເຫັນວ່າ ຜົນກຳໄລ ທາງທຸຣະກິດ ສາມາດ ເກັບກຳໄດ້ຈາກ ຊີວະນາໆພັນ.

ທ່ານ Rodrigo Fuentes ຈາກສູນ ຊີວະນາໆພັນ ອາຊຽນ ໄດ້ກ່າວໄວ້ວ່າ: ອີກປະມານ 30 ຫາ 40 ປີ ຂ້າງໜ້າ ສັດປ່າຫາຍາກ ແລະ ພືດພັນທີ່ ອຸດົມສົມບູນ ໃນພູມີພາກ ກໍຈະສູນພັນໄປ ຫາກບໍ່ມີການ ເອົາມາຕການ ຄຸ້ມຄອງ ປົກປັກຮັກສາ. ທ່ານ Fuentes ເວົ້າໃນກອງປະຊຸມ ກ່ຽວດ້ານ ສິ່ງແວດລ້ອມ ໃນອາຊຽນ ຢູ່ນະຄອນຫລວງ ມະນີລາ ປະເທດ ຟິນລິບປິນ ອີກວ່າ:

“ເຮົາຕ້ອງໄດ້ຊັກຊວນ ໃຫ້ພາກເອກກະຊົນ ເຂົ້າຮ່ວມ ໃນໂຄງການ, ເຮົາຕ້ອງໄດ້ສ້າງ ລະບົບກົນໄກ ຕລາດ ທີ່ຈະສົ່ງເສີມໃຫ້ ຜແນກອຸດສາຫະກັມ ແລະທຸຣະກິດ ເຂົ້າມາໃນໂຄງການ ປົກປ້ອງຮັກສາ ພືດພັນ ແລະສັດປ່າຫາຍາກ ນີ້ໃຫ້ໄດ້”.

ເສຖກິດຂອງອາຊຽນ ຊຶ່ງປະກອບດ້ວຍ ປະເທດ: ບຣູໄນ, ກຳພູຊາ, ອິນໂດເນເຊັຍ, ລາວ, ມາເລເຊັຍ, ພະມ່າ, ຟິນລິບປິນ, ສິງກະໂປ ແລະໄທ ມີຕລາດທີ່ມີ ຜູ້ບໍລິໂພກ ຫລາຍກວ່າ 5 ຮ້ອຍລ້ານຄົນ.
ອາຊຽນ ມີພື້ນທີ່ ປະມານ 3 ສ່ວນຮ້ອຍຂອງໂລກ ແຕ່ພືດພັນ ທີ່ຫລາກຫລາຍ ແລະ ສັດປ່າຫາຍາກ ມີ 20 ສ່ວນຮ້ອຍຂອງໂລກ.

ທ່ານ Govindan Parayil ຜູ້ອຳນວຍການ ມະຫາວິທະຍາໄລ ສະຫະປະຊາຊາດ ທີ່ມີສູນກາງຢູ່ ກຸງໂຕກຽວ ປະເທດຍີ່ປຸ່ນ ກ່າວວ່າ:

“ມີຜົນປໂຍດ ຢ່າງໃຫຍ່ຫລວງຈາກ ການປົກປັກຮັກສາ ຊີວະນາໆພັນ, ຍ້ອນຢາຊນິດໃໝ່, ອາຫານ ແລະ ຊັພຍາກອນນາໆ ຊນິດສາມາດ ຜລິດອອກມາຈາກ ປ່າດົງພົງພັຍ ທ້ອງຖິ່ນນີ້ໄດ້”.

ທ່ານກ່າວ ມ້ວນທ້າຍວ່າ ມາຕການພິເສດ ຕ້ອງໄດ້ນຳ ອອກມາໃຊ້ ເພື່ອເຮັດໃຫ້ ຊຸມຊົນທ້ອງຖິ່ນ ໄດ້ຮັບຜົນປໂຍດ ຈາກການຄົ້ນພົບ ດ້ານວິທຍາສາດໃໝ່.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ