ເມື່ອເວລາ ປະມານ 8 ໂມງເຊົ້າ ຂອງວັນທີ່ 23 ເດືອນສິງຫານີ້ ອຳນາດການປົກຄອງ ແຂວງບໍ່ແກ້ວ ໄດ້ອະນຸຍາດ ແລະ ຈັດສົ່ງ ແມ່ຍິງລາວ ບັນດາຊົນເຜົ່າ ຈຳນວນ 60 ຄົນ ໄປ ເມືອງຊຽງຂອງ ແຂວງຊຽງຮາຍ ເພື່ອເຂົ້າຮ່ວມ ການຝຶກອົບຣົມ ວິທີປຸງແຕ່ງ ອາຫານເສີມ ແລະ ການປຸງແຕ່ງ ສະໝຸນໄພ ທີ່ໂຮງແຮມ ຣິມກົກ ຣີຊອດ.
ການສັມມະນາ ແລະ ການຝຶກອົບຮົມ ດັ່ງກ່າວ ໄດ້ດຳເນີນໄປ ເປັນເວລາສອງມື້ ຄືໃນວັນເສົາ ແລະ ວັນອາທິດ ທີ່ຜ່ານມາ ຊຶ່ງກົງກັບ ວັນທີ່ 23 ແລະ 24 ສິງຫານີ້. ສຳຣັບຄ່າໃຊ້ຈ່າຍ ເຊັ່ນ ຄ່າຣົດ ຄ່າເຮືອ ຄ່າໂຮງແຮມ ຕລອດເຖິງ ຄ່າອາຫານ ການກິນ ຝ່າຍໄທ ເຈົ້າພາບ ເປັນຜູ້ຮັບຜິດຊອບ ທັງໝົດເລີຍ.
ແຂວງບໍ່ແກ້ວ ແລະ ແຂວງຊຽງຮາຍ ຂອງໄທ ມີຄວາມສຳພັນ ແລະ ການຮ່ວມມືກັນ ດີຕລອດມາ; ປັດຈຸບັນ ຖນົນ ໝາຍເລກທີ່ R3A ກໍສ້າງ ສຳເຣັດແລ້ວ ຊຶ່ງເປັນຖນົນຫລວງ ເຊື່ອມຕໍ່ ຣະຫວ່າງສອງແຂວງ ແລະ ເນັ່ງຂື້ນ ໄປຫາ ພາກໃຕ້ ຂອງຈີນ; ອີກປະມານ ສອງສາມປີ ກໍຈະມີ ຂົວມິດຕະພາບ ລາວ-ໄທ ແຫ່ງທີ່ສີ່ ຊຶ່ງຈະເປັນຂົວ ຂ້າມແມ່ນ້ຳຂອງຣ ະຫວ່າງເມືອງຫ້ວຍຊາຍ ແຂວງບໍ່ແກ້ວ ແລະເມືອງຊຽງຂອງ ແຂວງຊຽງຮາຍ ຂອງໄທ.
ຫລັງຈາກ ສ້າງຂົວ ສຳເຮັດແລ້ວ ຄວາມສຳພັນ ການຮ່ວມມື ການໄປມາຫາສູ່ ແລະ ການຄ້າ ຣະຫວ່າງ ແຂວງບໍ່ແກ້ວ ແລະ ແຂວງຊຽງຮາຍ ຂອງໄທ ຍິ່ງຈະຂຍາຍຕົວອອກ. ຊາວໄທ ກໍຈະໄປຫລິ້ນ ໄປທ່ຽວຝັ່ງລາວ ຫລາຍຂື້ນ; ປັດຈຸບັນ ລາວ ກຳລັງ ສ້າງໂຮງແຮມແລະ ກາຊີໂນ ຢູ່ເມືອງຫ້ວຍຊາຍ ເພື່ອຮອງຮັບ ນັກທ່ອງທ່ຽວໄທ.