ສິລປິນລາວ ຈະໄປສະແດງ ຄອນເສີຣດທ໌ ທີ່ບາງກອກ ປະເທດໄທ ທ້າຍສັປດານີ້

• ຈະເຣີນສຸກ ຣາຍງານ…
  2009-05-12

ການສະແດງຄັ້ງນີ້ ຂອງສິລປິນລາວ ຖືກວ່າ ເປັນຄັ້ງຍິ່ງໃຫຍ່ ເພາະມີສິລປິນ ຫລາຍໆວົງ ເຂົ້າຮ່ວມສະແດງ ດັ່ງ ອາທິສັກ ຣັຕນະວົງ, ສິລປິນ ນັກຮ້ອງ ວົງແຊວລ໌ ເລົ່າສູ່ຟັງ ວ່າ: 

“ເພື່ອສລອງຄົບຮອບ 5 ປີ ຂອງອິນດີ, ຊຶ່ງສິລປິນ ກໍມີ ແຊວລ໌, ໂມເດິນແດນສ໌, ໄອໂດລ ສິລປິນ ບອຍແບນ ໜ້າໃໝ່ ແລະ ກໍມີ ແອວລ ໂອ ຈີ, ຊຶ່ງດຽວນີ້ ກໍາລັງໄດ້ຮັບຄວາມນິຍົມ ໃນປະເທດໄທ.”

ອິນດີ ຣີຄອດ ຊຶ່ງເປັນຄ້າຍເພງລາວ ທີ່ໄດ້ເຊັນສັນຍາ ກັບຄ້າຍເພງ ຂອງໄທ ເພື່ອສົ່ງເສີມ ແລະ ຈໍາໜ່າຍ ເພງລາວ ໃນປະເທດໄທ ເມື່ອ 2-3 ປິຜ່ານມາ. ພ້ອມດຽວກັນນັ້ນ, ຫລາຍໆສິລປິນ ຈາກຄ້າຍເພງ ດັ່ງກ່າວ, ໂດຍສະເພາະ, ວົງແຊວລ໌ ກໍໄດ້ໄປສະແດງ ຄອນເສີຣດທ໌ ໃນປະເທດໄທ ເປັນປະຈໍາ, ນອກຈາກນັ້ນ, ຜົນງານເພງ ຂອງສິລປິນ ຄ້າຍເພງ ອິນດີ ຣີຄອຣອທ໌ ຍັງຖືກເປີດອອກ ທາງວິທຍຸ ຂອງໄທ ຫລາຍໆສະຖານນີ, ຊຶ່ງເຮັດໃຫ້ ສື່ສຽງ ຂອງສິລປິນລາວ ເປັນທີ່ນິຍົມ ໃນປະເທດໄທ ມາແລ້ວ. ອະທິສັກ ຣັຕນະວົງ ກ່າວມ້ວນທ້າຍ ວ່າ:

“ຢາກເຊື້ອເຊີນ ໃຫ້ຊາວລາວ, ທັງລາວແທ້, ລາວ ຊອດໄທ ກະໄດ້ ນໍ໋ ຫລືວ່າ ລາວອິສານ ຊາວຕາເວັນອອກສຽງເໜືອ ທີ່ຟັງພາສາລາວ ເຂົ້າໃຈ, ມ່ວນກັບພາສາລາວ, ລະກະນິຍົມ ແລະ ມັກໃນເພງຂອງພວກເຮົາ ລະກະມາຮ່ວມມ່ວນຊື່ນນໍາກັນ.”

ຣາຍການ ເຈັດສີ ຄອນເສີຣດທ໌ ຂອງໄທ, ຖ່າຍທອດ ອອກທາງໂທຣະທັດ ທຸກໆວັນເສົາ ເວລາວ 12:00 ຕອນທ່ຽງ ຫາບ່າຍໂມງ, ຜ່ານມາ ກໍເຄີຍມີ ສິລປິນລາວ ຫລາຍຄົນມາອອກຣາຍການ ເປັນຕົ້ນແມ່ນ ອາເລັກແຊນດຣາ ບຸນຊ່ວຍ ແລະ ວົງຊັບຟາຍເອີ. ສໍາລັບ ວັນເສົານີ້ ຖືວ່າ ເປັນຄັ້ງຫຍິ່ງໃຫຍ່ ທີ່ສຸດ ເພາະມີສິລປິນ ຫລາຍວົງ ມາສະແດງຮ່ວມກັນ.