ລາງວັນ ສິລປິນ ນັກຮ້ອງ ປີ 2008

ງານ ໃຫ້ລາງວັນ ສິລປິນ ນັກຮ້ອງ ຄັ້ງທໍາອິດ ໃນວົງການບັນເທີງ ແລະ ເທສການດົນຕຣີ ທີ່ສປປລາວ.
ຈະເຣີນສຸກ ຣາຍງານ
2008-07-18
ອີແມວລ໌
ຄໍາເຫັນ
Share
ພິມ

ລາວ ຈະ​ຈັດ​ພິທີ ການ​ໃຫ້​ລາງວັນ ​ສິລປິນບັນ​ເທີ​ງ ປະ​ຈໍາປີ 2008 ຫລື Music Awards ​ຂຶ້ນ ເປັນ​ຄັ້ງ​ທໍາ​ອິດ ​ໃນຄໍ່າ​ຄືນ ວັນ​ເສົາ, ​ທີ 26 ​ເດືອນ​ກໍຣະກະດານີ້, ທີ່​ຫໍ​ວັທນະ​ທັມ​ແຫ່ງ​ຊາຕ, ​ພາຍ​ໃຕ້ ການ​ເປັນ​ເຈົ້າພາບ ຂອງ ບໍຣິສັດ ​ແສງ​ດາຣາ.

ທ່ານ ວິ​ລຸນ ​ແສງ​ດາຣາ, ຜູ້​ອໍານວຍ​ການ ບໍຣິສັດ ​ແສງ​ດາຣາ, ​ທີ່​ຮັບຜິດຊອບ​ ການຈັດ​ງານ ກ່າວ​ກ່ຽວ​ກັບ ຈຸດປະສົງ ວ່າ:

“ຢາ​ກສ​ເນີ ​ເພງ​ລາວ ​ໃຫ້​ທົ່ວ​ໂລກ​ນະ, ລະ​ຢາກ​ໃຫ້ ສິລປິນ ທຸກໆ​ທ່ານ ພັທນາ ສີມື ຂອງ​ໂຕ​ເອງ, ບໍ່​ວ່າ ຈະ​ເປັນ​ເຣື້ອງ​ແຕ່ງ​ເພງ ຫລື ​ເຣື້ອງ ວິທີ​ຮ້ອງ​ເພງ, ​ເຣື້ອງ​ແຕ່ງ​ເນື້ອ​ຫາ ຕ່າງໆ ​ໃຫ້​ຂະ​ເຈົ້າ ສູ້​ເພງ ຢູ່​ຕ່າງປະ​ເທດ​ໄດ້, ​ຢາກ​ຍົກຣະດັບ ສິລປິນ ຢູ່​ບ້ານ​ເຮົາ.”

ຄຽງ​ຄູ່ ກັບ​ການຈັດ​ງານ ດັ່ງກ່າວ ​ໃນ​ຕອນບ່າຍ ຈະ​ມີຣາຍການ​ເທສການ ດົນຕຣີ, ​ເຣີ້ມ​ແຕ່ ​ເວລາ 12 ​ໂມງ ຫາ 5 ​ໂມງ​ແລງ ທີ່​ເດີນ​ຈອດຣົດ ຫໍ​ວັທນະ​ທັມ​ແຫ່ງ​ຊາດ, ​ໃນ​ນັ້ນ ຮວມທັງ ການ​ຫລິ້ນ​ດົນຕຣີ, ຮ້ອງ​ເພງ, ​ເຕັ້ນ​ລໍາ ແລະ ບັນ​ເທີ​ງຕ່າງໆ. ​ເວລາ 7 ​ໂມງ​ແລງ ​​ເຣີ້ມພິທີ ການ​ໃຫ້​ລາງວັນ ສິລປິນນັກ​ຮ້ອງ, ພ້ອມ​ທັງ ຈະ​ມີ​ການສະ​ແດງ ​ແລະ ຮ້ອງ​ເພງ ຂອງສິລປິນ 10 ກ່ວາ​ຄົນ.

“ຫວັງ​ວ່າ, ຫລັງ​ຈາກງານນີ້ ວົງ​ການ​ເພງ​ລາວ ຊິ​ບໍ່​ຄື​ເກົ່າ​ເລີຍ, ຊິ​ກ້າວ​ແບບ​ທີ່​ບໍ່​ເຄີຍ​ຄິດ​ວ່າ  ​ເພງ​ລາວ ຊິ​ເປັນ​ແບບ​ຊິ​ນາ, ບໍ່​ວ່າ ຊິ​ເປັນ​ເພງ ອະ​ເມຣິກາ​, ​ເພງ​ຈີນ, ​ເພງ​ວຽດນາມ ກະ​ສູ້​ໄດ້​ເລີຍ.”

ງານ ຄັ້ງ​ນີ້ ຈະ​ມີ​ການ​ມອບ ລາງວັນ​ໃຫ້​ແກ່​ສິລປິນ ດີ​ເດັ່ນ 14 ຄົນ ທີ່​ມີ​ຜົນງານ ​ເປັນ​ທີ່​ນິຍົມ ​ໃນ​ສປປລາວ. ຫລັງ​ຈາກ ຈັດ​ງານ ດັ່ງກ່າວນີ້​ແລ້ວ, ທາງ​ບໍຣິສັດ ​ແສງ​ດາຣາ ມີ​ໂຄງການ ທີ່​ຈະ​ຈັດ ກິ​ຈກັມ ຕ່າງໆຂຶ້ນ​ອີກ ​​ໃນ​ອະນາຄົດ ​ເພື່ອ​ສົ່ງ​ເສີມ ວົງ​ການບັນ​​ເທີ​ງລາວ ​ໃຫ້​ກ້າວໜ້າ​ຂຶ້ນ​ໄປ.

ເຕັມຫນ້າ