ການຈັດງານບຸນປີໃຫມ່ ທີ່ແຂວງຊຽງຂວາງ ຈະເລີ້ມ ໃນວັນທີ 12 ຫາ ວັນທີ 16 ເມສາ ໃນປີນີ້ ຈະເນັ້ນການທຳບຸນຕັກບາດ ຕາມວັດວາອາຣາມຕ່າງໆ ການຂໍພອນ ຈາກພຣະສົງ ອົງຄະເຈົ້າ ແລະ ຜູ້ອາວຸໂສ, ສຳລັບເຣື້ອງການເລີ້ນເລີງ ກໍຈະມີການກວດນາງສັງຂານ ແລະ ປະເພນີ ການສູ່ຂວັນ ຕຣອດຮອດພືຕິກຳ ຕ່າງໆ ຫລາຍຢ່າງ ໃນຊ່ວງບຸນປີໃຫມ່.
ທ່ານ ຄຳເພັດ ພົມມະດວງໄກສອນ ຫົວຫນ້າຫ້ອງການທ່ອງທ່ຽວ ແຂວງຊຽງຂວາງ ໄດ້ກ່າວ ກ່ຽວກັບຄວາມມ່ວນຊື່ນ ໃນການສລອງບຸນປີໃຫມ່ ທີ່ແຂວງຊຽງຂວາງ ວ່າ:
"ບຸນປີໃຫມ່ປີນີ້ ຖືວ່າ ພວກເຮົາ ຫ້າງຫາກະຕຽມ ເພື່ອປະກວດ ນາງສັງຂານ ກາຍຫີ້ນບຸນປີໃຫມ່ ຕາມຮີດຄອງປະເພນີ ມີພິທີສູ່ຂັວນ ໄປຕັກບາດ ຢາດນ້ຳ ໄປສົງການພຣະເຈົ້າ ຢູ່ວັດ."
ທ່ານກ່າວ ເພີ້ມອີກ ວ່າ ແຂວງຊຽງຂວາງ ເປັນແຂວງນອ້ຍ ສຖານທີ່ ທອ່ງທ່ຽວ ກໍ່ບໍ່ມີຫລາຍ ນັກທ່ອງທ່ຽວ ສ່ວນໃຫຍ່ ກໍ່ຈະມາທ່ຽວຊົມ ທົ່ງໃຫຫີນ, ນອກຈາກນັ້ນ ກໍ່ແມ່ນ ມາທ່ຽວຊົມ ທັມມະຊາດ ຊື່ງທາງການແຂວງ ກໍ່ຄາດວ່າ ໃນຊ່ວງບຸນປີໃຫມ່ນີ້ ອາດຈະມີນັກທ່ອງທ່ຽວ ເຂົ້າມາແຂວງຊຽງຂວາງ ເປັນຈຳນວນຫລວງຫລາຍ ເຫມືອນກັນ ແຕ່ກໍ່ຈະຫນ້ອຍກວ່າ ແຂວງຫລວງພຣະບາງ. ທາງການແຂວງ ຈະວາງມາຕການ ຢ່າງເຂັມງວດ ເພື່ອຮັກສາຄວາມປອດພັຍ ໃຫ້ແກ່ນັກທ່ອງທ່ຽວ ທີ່ຈະມາທ່ຽວ ແຂວງຊຽງຂວາງໃນຊ່ວງບຸນປີໃຫມ່. ທ່ານ ຄຳເພັດ ກ່າວກ່ຽວກັບ ການຮັກສາຄວາມປອດພັຍ ວ່າ:
"ພາກສ່ວນ ທີ່ປ້ອງກັນຄວາມປອດພັຍ ຂອງແຕ່ລະບ້ານ ຕາມສາຍທາງບ້ານໃດ ກໍ່ບ້ານນັ້ນ ຮັບຜີດຊອບເຣື້ອງຄວາມປອດພັຍ"
ງານບຸນປີໃຫມ່ ໃນລາວ ເປັນງານມະຫາກຳ ທາງດ້ານສາສານາ ປະເພນີ ວັທນະທັມ ຂອງລາວ ທີ່ໄດ້ປະຕິບັດ ກັນມາ ແຕ່ໂບຣານນະການ, ໃນປີນີ້ ກໍ່ເຫນືອນກັບ ປີທີ່ຜ່ານມາ ຄົນລາວ ກໍ່ຈະມີການສລອງກັນ ແບບລາວໆ ຢ່າງຄືກຄື້ນ ໂດນສເພາະ ທີ່ຫົວເມືອງໃຫຍ່ໆ ດັ່ງທີ່ຫລວງພຣະບາງ ວຽງຈັນ ສວັນນະເຂດແລະ ປາກເຊ ເປັນຕົ້ນ. ຣັຖບານລາວ ກໍ່ວາງມາຕການ ຢ່າງເຂັ້ມງວດ ເພື່ອຮັກສາຄວາມປອດພັຍ ໃຫ້ແກ່ທຸກພາກສ່ວນ ໂດຍສເພາະ ກຸ່ມນັກທ່ອງທ່ຽວ.