ກາຣສັບປ່ຽນຜູ້ນໍາ ຣະດັບທ້ອງຖິ່ນຢູ່ລາວ

ປັຈຈຸບັນ ກໍາລັງມີ ກາຣປ່ຽນຜູ້ນໍາ ຣຸ້ນໃໝ່ ໃນຣະດັບ ທ້ອງຖິ່ນ ຢູ່ ສປປລາວ.
ຫວາດ ສີມູນ
2010-09-01
ອີແມວລ໌
ຄໍາເຫັນ
Share
ພິມ

ໃນຂນະທີ່ ມີກາຣກະຕຣຽມ ກາຣປະຊຸມ ສມັຊຊາໃຫຍ່ ຄັ້ງທີ່ 9 ທີ່ມີກຳໜົດ ຈັດຂຶ້ນໃນຕົ້ນ ປີ 2011 ທີ່ຈະມາເຖິງ ນີ້ນັ້ນ ທາງກາຣ ສປປລາວ ກໍມີກາຣ ສັບປ່ຽນ ເອົາຜູ້ນຳຣຸ້ນໃໝ່ ທີ່ມີກາຣສຶກສາ ໃນຣະດັບສູງ ພ້ອມກັບຖືກຮັບ ຜ່ານກາຣອົບຮົມ ຈາກພັກ ປະຊາຊົນ ປະຕິວັຕລາວ ເປັນຢ່າງດີ ຫລາຍປີມາແລ້ວ ໃຫ້ເຂົ້າຮັບໜ້າທີ່ ເປັນຜູ້ນຳ ໃນຂັ້ນທ້ອງຖິ່ນ ຫລາຍແຫ່ງ ໃນທົ່ວປະເທສ.

ໜັງສືພິມ ຜູ້ຈັດກາຣ ຣາຍວັນໄທຽ ໄດ້ແຈ້ງ ໃນມື້ວັນທີ່ 31 ສິງຫາ ນີ້ວ່າ ກາຣແຕ່ງຕັ້ງ ແລະຍົກຍ້າຍ ເຈົ້າໜ້າທີ່ ຣະດັບທ້ອງຖິ່ນ ຈະຕ້ອງມີ ຜູ້ນຳຣະດັບສູງ ໃນກົມກາຣເມືອງ ສູນກາງພັກ ລົງໄປກຳກັບ ນຳຕລອດຣະຍະ ທີ່ຜ່ານມາ ຊຶ່ງໃນທ້າຍເດືອນ ສິງຫາ ນີ້ ແຂວງຫລວງພຣະບາງ ກໍມີກາຣ ເລື່ອນໜ້າທີ່ຂອງ ດຣ. ຄຳແພງ ໄຊສົມແພງ ຈາກກາຣເປັນ ຜູ້ຮອງເລຂາພັກ ແລະ ຮອງເຈົ້າແຂວງ ຂຶ້ນເປັນ ເລຂາທິກາຣພັກ ກັບເຈົ້າແຂວງ ຄົນໃໝ່ ແທນ ທ່ານບຸນເຮືອງ ດວງພະຈັນ ທີ່ກະສຽນ ອອກໄປ ພາຍຫລັງທີ່ກຳ ຕຳແໜ່ງມາໄດ້ກວ່າ 10 ປີ ແລ້ວນັ້ນ.

ສ່ວນຢູ່ແຂວງ ອຸດົມໄຊ ກໍມີກາຣເລື່ອນ ຕຳແໜ່ງ ຂອງທ່ານ ຄຳຫລ້າ ໜິ້ງລະສອນ ຂຶ້ນເປັນ ຜູ້ນຳພັກ ແລະເຈົ້າແຂວງ ຄົນໃໝ່ເຊັ່ນກັນ ແທນ ດຣ. ບຸນປອນ ບຸຕຕະນະວົງ ທີ່ເຂົ້າຮັບ ໜ້າທີ່ໃໝ່ ເປັນຫົວໜ້າ ສຳນັກງານ ຄນະກັມມະກາຣ ກາງຂອງພັກ ໃນເດືອນ ມີຖຸນາ ທີ່ຜ່ານມາ.

ນອກນັ້ນກໍມີ ກໍມີກາຣ ແຕ່ງຕັ້ງ ດຣ. ສົມກົດ ມັງໜໍ່ເມກ ຣັຖມົນຕຣີ ກະຊວງສຶກສາ ໄປເປັນ ຫົວໜ້າພັກ ແລະ ເຈົ້າແຂວງໆຊຽງຂວາງ ເຊັ່ນກັນ ຕລອດຮອດ ຫລາຍໆແຂວງ ໃນເຂຕ ພາຄໃຕ້ ກໍມີກາຣ ສັບປ່ຽນ ຫລືເລື່ອນໜ້າທີ່ ເປັນຜູ້ນຳ ຂອງພັກ ແລະ ເຈົ້າແຂວງ ເຊັ່ນກັນ ຕລອດມາ.

ເຕັມຫນ້າ