ໂຄງການສູນການຄ້າ ຊາວມົ້ງເມືອງ Fresno

ຕາມລາຍງານ ຂອງໜັງສືພິມ Fresno Bee ທີ່ອ້າງຕາມການ ເປີດເຜີຽຂອງທ່ານ Nelson Vang ນັກທຸຣະກິດ ຊາວມົ້ງ ເມື່ອວັນເສົາ ຜ່ານມານີ້. ທ່ານ Nelson Vang ອະທິບາຍ ຕໍ່ໜ້າຊາວມົ້ງ ຫລາຍຮ້ອຍຄົນ ວ່າຕາມແຜນການນັ້ນ ແມ່ນຈະຟື້ນຟູ ອາຄານ ໂຄງຮ່າງເຫລັກ 7 ຫລັງ ທີ່ເຄີຽເປັນເຂດ ໂຮງງານ ອຸດສະຫະກັມ ທີ່ຕັ້ງຢູ່ໃນເນື້ອທີ່ 20 ເອເກີ້ ໃຫ້ເປັນເມືອງ ຊາວມົ້ງ.

ທ່ານວ່າ ໃນຂນະທີ່ຊົນຊາດ ອື່ນໆໄດ້ພັທນາ ປະຊາຄົມ ຂອງເຂົາເຈົ້າໃຫ້ ອຸດົມສົມບູນໄປແລ້ວ ແຕ່ຊາວມົ້ງຍັງ ບໍ່ທັນ ໄດ້ພັທນາ ປະຊາຄົມຂອງຕົນ ໃຫ້ກ້າວໜ້າ ເທົ່າທີ່ຄວນ ຍ້ອນວ່າຊາວມົ້ງ ທີ່ອົພຍົບມາຈາກ ປະເທດລາວ ຫລັງສົງຄາມວຽດນາມ ໂດຍມາກເປັນ ຊາວໄຮ່ຊາວນາ. ຕໍ່ໂຄງການດັ່ງກ່າວນີ້ ທ້າວວັງເວົ້າວ່າ 80% ຂອງນັກທຸຣະກິດມົ້ງ ໃຫ້ຄວາມ ສນັບສນູນແລ້ວ.

ທ້າວແນວຊົນ ວັງ ອະທິບາຍວ່າ ບໍຣິສັດພັທນາ ສູນທຸຣະກິດ ຂອງລາວ ທີ່ຕັ້ງຂື້ນເມື່ອປີ 2008 ໄດ້ເຊົ່າສະຖານທີ່ ແຫ່ງນີ້ເປັນເວລາ 30 ປີ ແລະ ມີທາງເລືອກຊື້ ເນື້ອທີ່ 20 ເອເກີ້ທີ່ວ່ານີ້. ລາວວ່າ ການພັທນາ ພາກທີນື່ງ ຕ້ອງການໃຊ້ເງິນ ປະມານ 1 ລ້ານກັບ 5 ແສນໂດລາ ສະຫະຣັຖ ເພື່ອສ້ອມແປງ ອາຄານໂຄງຮ່າງເຫລັກ ທີ່ເກົ່າແກ່ ເພື່ອໃຊ້ເປັນຕລາດ ຂາຍເຄື່ອງ ໂດຍຈະເລີ້ມລົງມື ໃນປະມານ 2-3 ເດືອນຂ້າງໜ້ານີ້ ແລະຈະໃຫ້ສໍາເຣັດ ພາຍໃນຕົ້ນປີໜ້າ.

ເງິນທືນທີ່ຈະ ໃຊ້ກໍ່ສ້າງນີ້ ນອກຈາກການລົງທືນ ຂອງເອກກະຊົນແລ້ວ ສ່ວນນື່ງແມ່ນມາຈາກ ໂຄງການອຸດໜູນ ຈາກຣັຖບານກາງ ສະຫະຣັຖ ຊື່ງລາວໄດ້ຍື່ນ ຄໍາຮ້ອງຂໍແລ້ວ ແຕ່ບໍ່ທັນໄດ້ຮັບ ທຶນນັ້ນເທື່ອ.