ຮ່າງຍັດຕິ ເພື່ອຮຽກຮ້ອງ ໃຫ້ຣັຖບານໄທ ໂຈະການສົ່ງ ຊາວມົ້ງ ກັບຄືນ ປະເທດລາວ ແລະ ຮຽກຮ້ອງໃຫ້ ອົງການ ຂ້າຫລວງໃຫຍ່ ສະຫະ ປະຊາຊາດ ເຂົ້າໄປເບິ່ງແຍງ ຊາວລາວເຜົ້າມົ້ງ ຖືກສະເໜີຂື້ນ ສູ່ສະພາ ສະຫະຣັຖ ອາເມຣິກາ ແລ້ວ ໃນວັນພະຫັດ ຜ່ານມາ ໂດຍ ທ່ານ Patrick kennedy ສະມາຊິກ ສະພາຕໍ່າ ສະຫະຣັຖ ສັງກັດພັກ ດີໂມແກຣັດ ພາຍໃຕ້ ການສນັບສນູນ ຂອງສະມາຊິກ ສະພາຕໍ່າ ຄົນອື່ນໆ.
ເມື່ອເດືອນຜ່ານມາ ສະມາຊິກ ສະພາຕໍ່າ ສະຫະຣັຖ ຈໍານວນ 8 ຄົນ ໄດ້ເຮັດ ຈົດໝາຍ ເຖິງ ທ່ານ George W Bush ປະທານາທິບໍດີ ສະຫະຣັຖ ອາເມຣິກາ ເພື່ອຂໍຮ້ອງໃຫ້ ທາງການໄທ ບໍ່ໃຫ້ສົ່ງຊາວລາວເຜົ້າມົ້ງ ຈໍານວນ 8,000 ຄົນ ກັບຄືນໄປ ປະເທດລາວ. ສະພາຕໍ່າ ສະຫະຣັຖ
ຕ້ອງການ ຢາກໃຫ້ ຊາວເຜົ້າມົ້ງ ຢູ່ໃນປະເທດໄທ ຕໍ່ໄປ ຈົນກ່ວາ ເຂົາເຈົ້າ ສາມາດໄປ ຕັ້ງຖິ່ນຖານ ຢູ່ປະເທດທີ 3.
ຍັດຕິ ຍັງຮຽກຮ້ອງ ໄປຍັງ ກະສັດ ພູມີພົນ ອາດຸນຍະເດດ, ໄປຍັງ ຣັຖບານໄທ, ຕຣອດຮອດ ຝ່າຍທະຫານ ເພື່ອອານຸມັດ ໃຫ້ອົງການ ຂ້າຫລວງໃຫຍ່ ສະຫະ ປະຊາຊາດ ເຂົ້າໄປ ດູແລເບິ່ງແຍງ ຊາວເຜົ້າມົ້ງ ຈໍານວນ ດັ່ງກ່າວ ຢູ່ໃນສູນ ບ້ານຫ້ວຍນໍ້າຂາວ ແຂວງເພັດຊະບູນ.
ປະເທດໄທ ແລະ ທາງການລາວ ຖືວ່າ ຊາວເຜົ້າມົ້ງ ເລົ່ານີ້ ເປັນອົພຍົບ ໜີໄພເສຖກິດ ບໍ່ແມ່ນ ໜີໄພການເມືອງ ແລະ ເຂົ້າປະເທດ ແບບຜິດ ກົດໝາຍ ຈື່ງຕົກລົງກັນ ບໍ່ໃຫ້ ອົງການໃດໆ ເຂົ້າໄປຫຍຸ້ງກ່ຽວນໍາ. ນອກນັ້ນ ຮ່າງຍັດຕິ ໄດ້ຮຽກຮ້ອງ ໃຫ້ຣັຖບານລາວ ຍຸຕິ ການໃຊ້ ກຳລັງທະຫານ ໂຈມຕີ ຊາວເຜົ້າມົ້ງ ທີ່ລີ້ຊ້ອນ ຢູ່ໃນປ່າ, ຍຸຕິ ປາບປາມ ນັກເຄື່ອນໄຫວ ທາງດ້ານການເມືອງ, ກຸ່ມ ຖືສາສນາ
ກຸ່ມນ້ອຍ ໃນລາວ ແລະ ໃຫ້ປ່ອຍ ນັກສືກສາ ນິຍົມ ປະຊາທິປະໄຕ ທີ່ຖືກ ທາງການລາວ ຈັບ ເມື່ອປີ 1999 ຍ້ອນ ສະແດງ ຄວາມບໍ່ເຫັນພ້ອມ ນໍາການປົກຄອງ ແບບພັກດຽວ. ຮ່າງຍັດຕິ ນີ້ ມີຊື່ວ່າ H.R 1273.