ນັກຂ່າວໄທ ໄດ້ອະນຸຍາດ ໄປຢ້ຽມມົ້ງຢູ່ລາວ

ນັກຂ່າວໄທ ໄປຢ້ຽມຢາມ ຊາວລາວເຜົ່າມົ້ງ ທີ່ຖືກສົ່ງກັບຄືນ ລາວ ເມື່ອທ້າຍເດືອນ ທັນວາ ປີກາຍ.
ອະວາຣີ
2010-02-25
ອີແມວລ໌
ຄໍາເຫັນ
Share
ພິມ

ທາງການລາວ ແລະໄທ ເຊີນສື່ມວນຊົນ ໄທໄປຢ້ຽມຢາມ ຊາວລາວເຜົ່າມົ້ງ ກ່ອນຈະເຊີນ ນັກຂ່າວ ປະເທດອືນໆ ດັ່ງ ເຈົ້າໜ້າທີ່ ທີ່ກ່ຽວຂ້ອງຂອງລາວ ທ່ານນຶ່ງເວົ້າວ່າ:

“ຄືວ່າໃນຊ່ວງນີ້ ເພິ່ນຍັງບໍ່ທັນ ອະນຸຍາດ ໃຫ້ສື່ຂອງທາງ ຕ່າງປະເທດ ເຂົ້າໄປເອົາ ຂ່າວໄດ້ເນີ່ ເພິ່ນຈະ ອະນຸຍາດ ພິເສດ ໃຫ້ສະເພາະສື່ ຂອງທາງຝ່າຍໄທ ຈັດສັນມາຮັ່ນ.”

ນັກຂ່າວໄທ ຈຳນວນນຶ່ງ ໄດ້ເດີນທາງໄປ ສປປລາວ ແລ້ວເມື່ອ ວັນພະຫັດ ວັນທີ່ 25 ກຸມພານີ້ ແລະໄປເຖິງລາວ ໃນຕອນບ່າຍ ຂອງວັນດຽວກັນ. ຫລັງຈາກນັ້ນ ເຈົ້າໜ້າທີ່ ລາວແລະໄທ ຈະເປີດຖແລງຂ່າວ ກ່ຽວກັບ ຄວາມສຳເຣັດ ຂອງການຈັດສົ່ງ ຊາວລາວເຜົ່າມົ້ງ ກັບຄືນປະເທດ. ຕໍ່ໄປຜູ້ຕາງໜ້າ ຊາວເຜົ່າມົ້ງ ທີ່ກັບຄືນ ຈະກ່າວ ຄວາມຮູ້ສຶກຂອງເຂົາ ກ່ຽວກັບຊີວິດ ການເປັນຢູ່ ແລະ ບ່ອນຢູ່ອາໃສໃໝ່.

ໃນມື້ຕໍ່ໄປ ຄືໃນວັນທີ່ 26 ທາງການລາວ ຈະພານັກຂ່າວໄທ ແລະ ເຈົ້າໜ້າທີ່ໄທ ຂີ່ເຮລີກອບເຕີ່ ໄປສູນຕັ້ງ ຖິ່ນຖານໃໝ່ ຂອງຊາວເຜົ່າມົ້ງ ທີ່ບ້ານໂພນຄຳ ແຂວງ ບໍຣິຄຳໄຊ. ເຈົ້າໜ້າທີ່ລາວ ອະທິບາຍວ່າ ເຫດຜົນທີ່ ຈຳເປັນຕ້ອງ ຂີ່ເຮລີກອບເຕີໄປ ກໍເພາະວ່າ ຖນົນ ໄປສູນແຫ່ງນັ້ນ ຍັງບໍ່ ສະດວກສະບາຍເທື່ອ.

ຈຸດປະສົງ ໃນການເຊີນ ນັກຂ່າວໄທ ໄປຢ້ຽມຢາມ ຊາວເຜົ່າມົ້ງ ເທື່ອນີ້ ກໍແມ່ນເພື່ອຢາກໃຫ້ ນັກຂ່າວເຫັນວ່າ ຊາວເຜົ່າມົ້ງ ທີ່ກັບຄືນ ປະເທດນັ້ນມີ ຄວາມຢູ່ດີກິນດີ ແລະ ມີຄວາມປອດໄພດີ ທຸກປະການ.

ສຳຣັບນັກຂ່າວ ຈາກປະເທດອື່ນໆນັ້ນ ຕ້ອງລໍຖ້າ ຈົນກວ່າຈະສ້ອມແປງ ຖນົນຫົນທາງ ແລະ ສະຖານທີ່ ຮຽບຮ້ອຍກ່ອນ ດັ່ງ ເຈົ້າໜ້າທີ່ ທ່ານດຽວກັນນັ້ນ ເວົ້າວ່າ:

“ຫລັງຈາກເພິ່ນ ຕຽມສະຖານທີ່ ອີ່ຫຍັງໃຫ້ ເຂົາເຈົ້າຢູ່ພັກເຊົາ ເປັນຣະບຽບ ຮຽບຮ້ອຍໝົດແລ້ວ ເພິ່ນຈຶ່ງຈະ ໜັງສືເຊີນສື່ ຕ່າງປະເທດ ເຂົ້າໄປ.”

ບ່ອນຢູ່ອາໃສໃໝ່ ທີ່ບ້ານໂພນຄຳ ມີຊາວເຜົ່າມົ້ງ ອາໃສຢູ່ ປະມານ 3,000 ຄົນ.

ເຕັມຫນ້າ