ສະມາຊິກສະພາສູງ ເປັນຫ່ວງນໍາຊາວມົ້ງລາວ

ທ່ານ Al Franken ສະມາຊິກ ສະພາສູງ ສະຫະຣັຖ ຈາກຣັຖ ມີນີໂຊຕ້າ ຍັງມີຄວາມ ເປັນຫ່ວງ ຕໍ່ຊະຕາກັມ ຂອງຊາວລາວ ເຜົ່າມົ້ງ ທີ່ຖືກສົ່ງ ຈາກໄທກັບຄືນ ສປປລາວ ເມື່ອທ້າຍເດືອນ ທັນວາ ປີກາຍນັ້ນຢູ່. ເຖິງແມ່ນວ່າ ພວກເຂົາເຈົ້າ ຈະຖືກສົ່ງກັບຄືນ ດົນນານ ຫລາຍເດືອນ ແລ້ວກໍຕາມ.

ເມື່ອເດືອນ ກໍຣະກະດາ ກາງປີນີ້ ທ່ານ Franken ແລະພັລຍາ ໄດ້ໄປຢ້ຽມຢາມ ຊາວເຜົ່າມົ້ງ ທີ່ຖືກສົ່ງ ກັບຄືນນັ້ນ ແລະເມື່ອວັນທີ່ 21 ກັນຍາ ນີ້ ທ່ານ Franken ໄດ້ຂຽນລົງ ໜັງສືພິມ St. Paul Pioneer ວ່າ ຊາວລາວເຜົ່າມົ້ງ ທີ່ອາໄສຢູ່ ຣັຖມີນີໂຊຕ້າ ແລະ ຕົວທ່ານເອງ ຍັງມີຄວາມຫ່ວງ ຕໍ່ຄວາມປອດໄພ ແລະ ຊີວິດການເປັນຢູ່ ຂອງຊາວເຜົ່າມົ້ງ ທີ່ອາໄສ ຢູ່ບ້ານພັທນາ ໃນລາວນັ້ນຢູ່.

ທ່ານ Franken ກ່າວວ່າ ທ່ານເສັຍໃຈທີ່ ທາງການລາວ ບໍ່ອະນຸຍາດ ໃຫ້ທ່ານ ແລະຜູ້ຕາງໜ້າ ອົງການ ແລະຣັຖບານ ຕ່າງປະເທດອື່ນໆ ໄດ້ພົບປະກັບ ຊາວເຜົ່າມົ້ງຫຼາຍ ກວ່ານັ້ນ. ທ່ານພຽງແຕ່ໄດ້ ນັ່ງຟັງຣາຍງານ ຂອງຜູ້ຕາງໜ້າ ຊາວເຜົ່າມົ້ງ ທີ່ທາງການລາວ ຈັດມາເທົ່ານັ້ນ.

ເຖິງຢ່າງໃດກໍດີ ທ່ານ Franken ໄດ້ຂໍຮ້ອງໃຫ້ ທາງການລາວ ຈັດສົ່ງ ການຊ່ວຍເຫລືອ ທາງດ້ານມະນຸສທັມ ຂອງຕ່າງປະເທດ ໄປໃຫ້ແກ່ ຊາວເຜົ່າມົ້ງ ເຫລົ່ານັ້ນດ້ວຍ ແລະ ທ່ານກໍໄດ້ ຂໍຣາຍຊື່ ຂອງຊາວເຜົ່າມົ້ງ ທີ່ຖືກສົ່ງ ກັບຄືນລາວ ທັງໝົດ ຈາກເຈົ້າໜ້າທີ່ ທາງການລາວ ເພື່ອຈະນຳໄປ ແຈ້ງໃຫ້ຊາວລາວ ເຜົ່າມົ້ງ ທີ່ພໍ່ແມ່ພີ່ນ້ອງ ຢູ່ສະຫະຣັຖ ອະເມຣິກາ ແລະ ປະເທດອື່ນໆຮູ້ ເພື່ອພວກເຂົາ ຈະສາມາດຕິດຕໍ່ ພົວພັນກັນ.

ບໍ່ພຽງເທົ່ານັ້ນ ທ່ານ Al Franken ຍັງຂຽນວ່າ ທ່ານແລະຍານາງ Hillary Clinton ຣັຖມົນຕຣີ ການຕ່າງປະເທດ ສະຫະຣັຖ ກໍໄດ້ເວົ້າກັບ ທ່ານທອງລຸນ ສີສຸລິດ ຮອງນາຍົກ ຣັຖມົນຕຣີ ແລະຣັຖມົນຕຣີ ການຕ່າງປະເທດ ສປປລາວ ໃນເວລາ ທ່ານທອງລຸນ ມາຢ້ຽມຢາມ ນະຄອນຫລວງ ວໍຊິງຕັ່ນ ເມື່ອບໍ່ດົນ ຜ່ານມາວ່າ ການທີ່ ສປປລາວ ຢາກປັບປຸງ ຄວາມສຳພັນກັບ ສະຫະຣັຖ ໃຫ້ດີຂື້ນນັ້ນ ຕ້ອງຂື້ນກັບ ທາງການລາວ ຈະປະຕິບັດ ຕໍ່ຊາວລາວ ເຜົ່າມົ້ງ ໄດ້ດີຂື້ນ ເທົ່າໃດ.