ຜູ້ຕ້ອງຫາວາງແຜນ ໂຄ່ນລົ້ມຣັຖບານລາວ ຖືກເພີ້ມຂໍ້ຫາ

ເມື່ອວັນທີ່ 24 ມິຖຸນາ ສານຣັຖບານກາງ ສະຫະຣັຖ ທີ່ເມືອງ Sacremento ຣັຖຄາລີຟໍເນັຍ ສະຫະຣັຖ ອະເມຣິກາ ປະກາດຕູ່ຫາຄະດີ ຕື່ມຕໍ່ພວກຕ້ອງຫາ ຄະດີ ວາງແຜນໂຄ້ນລົ້ມ ຣັຖບານ ສປປລາວ. ຄຳຕູ່ຫາໃໝ່ ບົ່ງໄວ້ວ່າ ພວກຕ້ອງຫາທັງ 12 ຄົນໃນຄະດີ ວາງແຜນໂຄ່ນລົ້ມ ຣັຖບານສປປລາວ ຊຶ່ງໃນນັ້ນເປັນ ຊາວລາວ ເຜົ່າມົ້ງ 11 ຄົນ ແລະອີກຄົນນຶ່ງ ເປັນອາດີດນາຍ ທະຫານ ອະເມຣິກັນ ໄດ້ສົມຮູ້ຮ່ວມຄິດ ຈັດຫາແລະຈັດ ສົ່ງອາວຸດ ເງິນແລະຄົນ ໄປຊ່ວຍກຳລັງ ຕໍ່ຕ້ານຣັຖບານ ຢູ່ໃນສປປລາວ.

ກ່ອນນີ້ ໄອຍະການ ຣັຖບານກາງ ສະຫະຣັຖ ຕູ່ຫາພວກຕ້ອງຫາ ທັງ 12 ຄົນນີ້ພ້ອມກັບ ນາຍພົນວັງປາວວ່າ ໄດ້ຮ່ວມກັນວາງແຜນ ໂຄ່ນລົ້ມຣັຖບານ ລາວ; ເປັນທີ່ສັງເກດວ່າ ໃນຄຳຕູ່ຫານີ້ ພວກຕ້ອງຫາພຽງ ແຕ່ວາງແຜນເທົ່ານັ້ນ ສ່ວນໃນຄຳຕູ່ ຫາໃໝ່ ຝ່າຍໂຈດຕູ່ຫາຕື່ມວ່າ ພວກຕ້ອງຫາໄດ້ ຈັດຫາແລະຈັ ດສົ່ງ ອາວຸດ ເງິນແລະຄົນໄປ ຊ່ວຍກຳ ລັງທີ່ເຄື່ອນໄຫວ ຕໍ່ຕ້ານຣັຖບານລາວ ຢູ່ໃນປະເທດລາວ. ເມື່ອປີກາຍ ນາຍພົນ ວັງປາວ ໄດ້ພົ້ນຄຳຕູ່ຫາໄປ ຍັງເຫລືອແຕ່ພວກ ຕ້ອງຫາ 12 ຄົນ.

ປັດຈຸບັນ ພວກຕ້ອງຫາ 12 ຄົນນີ້ ຖືກປະກັນຕົວ ອອກຈາກຄຸກ ແລະ ກຳລັງຕໍ່ສູ້ຄະດີຢູ່. ເມື່ອບໍ່ດົນຜ່ານມາ ທະນາຍ  ຄວາມຂອງພວກເຂົາ ໄດ້ຮຽກຮ້ອງໃຫ້ ສານ ຍົກເລີກຄຳ ຕູ່ຫາ ເພາະຫລັກຖານທີ່  ຝ່າຍໂຈດສເນີ ຕໍ່ສານນັ້ນ ເປັນຫລັກຖານທີ່ ໄດ້ມາຈາກການ ກະທຳທີ່ຜິດ ຣັຖທັມມະນູນ ຂອງສະຫະຣັຖ ຄືເຈົ້າໜ້າທີ່  ຣັຖບານ ສະຫະຣັຖໄດ້ ປອມຕົວເປັນພວກ ຄ້າອາວຸດ ແລ້ວຕົວະຍົວະໃຫ້ ພວກຕ້ອງຫາຊື້ ໝາຍຄວາມວ່າ ເຈົ້າໜ້າທີ່ບັງຄັບ ໃຫ້ພວກຕ້ອງຫາ ກະທຳຜິດກົດໝາຍ  ບໍ່ແມ່ນ ພວກເຂົາຕັ້ງມີ ເຈຕະນາກະທຳຜິດ ກົດໝາຍແຕ່ຢ່າງໃດ. ສ່ວນຕໍ່ຄຳຕູ່ຫາ ໃໝ່ນີ້ ທະນາຍຄວາມ ຂອງພວກຕ້ອງຫາ ເວົ້າວ່າ ຝ່າຍໂຈດປ່ຽນແປງ ຄຳຕູ່ຫາເລື້ອຍໆ.