ກຸ່ມອາຊຽນຂໍຮ່ວມ ດ້ານສິດທິມະນຸດ

ອາຊຽນ ຈະເຂົ້າໄປ ມີສ່ວນຮ່ວມ ດ້ານສິດທິມະນຸດ ໃນປະເທດ ສະມາຊິກ
ຈະເຣີນສຸກ
2010-10-14
ອີແມວລ໌
ຄໍາເຫັນ
Share
ພິມ

ກົດຟັງສຽງ

ເລຂາທິການ ອາຊຽນ ດຣ. ສຸຣິນ ພິດສຸວັນ, ກ່າວຕໍ່ສື່ມວນຊົນ ໃນຣະຫວ່າງການປະຊຸມ ພາກປະຊາສັງຄົມ ເຣື້ອງ ສິດທິມະນຸດ ໃນອຸສາຄະເນ ໃນວັນທີ 14 ຕຸລານີ້ ວ່າ ອາຊຽນ ມີນະໂຍບາຍ ແລະ ພ້ອມທີ່ຈະສົ່ງເສີມ ຄວາມເຂົ້າໃຈ ເຣື້ອງສິດທິມະນຸດ ໃນຂົງເຂດ ປະເທດອາຊຽນ, ຊຶ່ງອາຊຽນ ຈະເຣີ້ມເຂົ້າໄປ ມີສ່ວນຮ່ວມ ໃນເຣື້ອງດັ່ງກ່າວ ໄດ້ສະເພາະ ບາງປະເທດ ສະມາຊິກກ່ອນ. ທ່ານ ກ່າວ ໃນຕອນນຶ່ງ ວ່າ:

ທ່ານ ກ່າວວ່າ … "ຖ້າເຮັດໄດ້ ໃນບາງປະເທດ ໃນພື້ນທີ່ ທີ່ບໍ່ມີຄວາມຂັດແຍ້ງຫລາຍ ໃນເຣື້ອງຄວາມຄິດເຫັນ, ແລ້ວຈະເຂົ້າໄປເບິ່ງ ໃນເຣື້ອງ ຂອງການ ທີ່ຈະປົກປ້ອງ, ຊຶ່ງເປັນໄປຕາມ ຂອບການປະຕິບັດງານ ຂອງຄນະກັມມາທິການ ຣະຫວ່າງ ຣັຖບານ".

ທ່ານ ກ່າວຕື່ມວ່າ ສິ່ງທີ່ ພາກປະຊາຊົນ ຄວນຈະຮ່ວມກັນ ປະຕິບັດ ໃນເວລານີ້ ກໍຄື ການຮວມຕົວກັນ ເພື່ອສະແດງອອກ, ຮວບຮວມຂໍ້ມູນ, ໃຫ້ຂໍ້ມູນ ເພື່ອສົ່ງຕໍ່ໃຫ້ ໜ່ວຍ ງານ ທີ່ເປັນກົນໄກ ຢ່າງເປັນທາງການ ຂອງອາຊຽນ ແລະ ຂອງຣັຖບານ ໃນແຕ່ລະປະເທດ ສະມາຊິກ, ຊຶ່ງໃນປະເທດ ສະມາຊິກ ກໍມີໜ່ວຍງານ ຄນະກັມມາທິການ ສິດທິມະນຸດ ພາຍໃນປະເທດ ຢູ່ແລ້ວ. ດັ່ງນັ້ນ ອົງການນີ້ ກັບນັກວິຊາການ ແລະ ພາກປະຊາສັງຄົມ ຕ້ອງປະຕິບັດງານ ຮ່ວມມກັນ, ຊຶ່ງຕ້ອງໃຊ້ເວລາ ແລະມີພັທນາການ ໃນຕົວມັນເອງ ຈຶ່ງຈະເຫັນຜົນ.

ນອກຈາກນັ້ນ, ປະຊາຄົມອາຊຽນ ແລະ ກຸ່ມປະເທດ ສະມາຊິກອາຊຽນ ຈະຕ້ອງປະຕິບັດ ຕາມປະຕິນຍາສາກົນ ວ່າດ້ວຍ ເຣື້ອງສິດທິມະນຸດ ຂອງ ສະຫະປະຊາຊາດ ຢ່າງຈິງຈັງ ເພື່ອໃຫ້ເກີດຄວາມ ໝັ້ນຄົງ ໃນກຸ່ມປະເທດ ແລະ ປະຊາຊົນ ຈົນກາຍເປັນສຽງ ແລະ ພະລັງ ທີ່ເຂັ້ມແຂງ.

ໃນປັດຈຸບັນ ກໍເຫັນແລ້ວ ວ່າ ກຸ່ມປະຊາຄົມ ອາຊຽນ ມີຄວາມຕື່ນຕົວ ມີການຈັດປະຊຸມ ເພື່ອແລກປ່ຽນ ຄວາມຄິດເຫັນ ເຣື້ອງສິດທິມະນຸດ ເຣື້ອງຄວາມໝັ້ນຄົງ ຂອງມະນຸດ ເຣື້ອງການສົ່ງເສີມ ແລະ ປົກປ້ອງ ປະຊາທິປະໄຕ ຢ່າງເປີດເຜີຍ, ຊຶ່ງໃນຖານະ ເລຂາທິການ ອາຊຽນ ກໍໄດ້ຮັບຮູ້ ຂໍ້ມູນ ແລະ ຄວາມຄິດເຫັນ ຈາກທຸກຝ່າຍ ແລະ ພ້ອມມີ ສ່ວນຊ່ອຍຜັກດັນ ໃຫປະຊາຄົມ ອາຊຽນ ເກີດຂຶ້ນ.

ເຕັມຫນ້າ