ກົດໝາຍການ ປົກປ້ອງຜູ້ຊົມໃຊ້

ສະມາຊິກ ສະພາຈາກເຂດ ເລືອກຕັ້ງຕ່າງໆ ສເນີໃຫ້ກະຊວງ ອຸດສາຫະກັມ ການຄ້າ ແກ້ໄຂຂໍ້ບົກຜ່ອງ ບາງຂໍ້ໃນ ຮ່າງກົດໝາຍ ວ່າດ້ວຍການ ປົກປ້ອງ ຜູ້ຊົມໃຊ້.
ມະນີຈັນ
2010-06-29
ອີແມວລ໌
ຄໍາເຫັນ
Share
ພິມ

ພາຍຫລັງ ກະຊວງອຸດສາຫະກັມ ການຄ້າ ໄດ້ສເນີຕໍ່ສະພາ ກ່ຽວກັບຮ່າງກົດໝາຍ ວ່າດ້ວຍການປົກປ້ອງ ຜູ້ຊົມໃຊ້ ບັນດາ ສະມາຊິກສະພາ ຈາກເຂດເລືອກ ຕັ້ງຕ່າງໆກໍໄດ້ ປະກອບຄວາມຄິດເຫັນ ແລະສເນີໃຫ້ ກະຊວງ ອຸດສາຫະກັມ ການຄ້າ ແກ້ໄຂຂໍ້ບົກຜ່ອງ ໃນຮ່າງກົດໝາຍ ດັ່ງກ່າວ. ທ່ານຄໍາເຫລັກ ແກ້ວສົມພັນ ຜູ້ແທນເຂດ ເລືອກຕັ້ງ ທີ 8 ແຂວງຫົວພັນ ໄດ້ກ່າວຕໍ່ກອງ ປະຊຸມສມັຍສາມັນ ຄັ້ງທີ 9 ຂອງສະພາແຫ່ງຊາດ ຊຸດທີ 6 ວ່າ:

"ຂ້າພະເຈົ້າ ຄິດວ່າ ຢູ່ໃນຂແນງການ ຕ່າງໆ ກ່ຽວກັບການປົກປ້ອງ ຜູ້ຊົມໃຊ້ ຄືບໍ່ຄົບ ຄືຕົວຢ່າງວ່າ ອົງການ ຊັພຍາກອນນໍ້າ ແລະສິ່ງແວດລ້ອມ ຄວນໃສ່ບໍ່ ສອງມາ ກໍໄຟຟ້າ ຂແນງການອື່ນໆ ທີ່ພົວພັນຕາມ ພົລບົດບາດ ກໍມີຢູ່ ແຕ່ວ່າສິ່ງແວດລ້ອມ ກັບອົງການນໍ້ານີ້ ບໍ່ຄວນໃສ່ບໍ່".

ທ່ານ ຄໍາເຫລັກ ຊີ້ແຈງຕໍ່ໄປວ່າ ເຖິງແມ່ນວ່າ ຈະມີການສນອງ ນໍ້າປະປາໃຫ້ ປະຊາຊົນ ຕາມນະໂຍບາຍ ຂອງຣັຖບານແລ້ວ ແຕ່ກໍມີບັນຫາ ເລື່ອງ ນໍ້າປະປາບໍ່ໃຫລ ຫລືມີສິ່ງເປື້ອນ ປະປົນຢູ່. ພ້ອມດຽວກັນ ການສນອງໄຟຟ້າ ໃຫ້ປະຊາຊົນ ກໍມີບັນຫາເກີດຂຶ້ນ  ຊຶ່ງເມື່ອຕິດຕັ້ງແລ້ວໆ ຜູ້ຕິດຕັ້ງ ກໍບໍ່ສົນໃຈ ກັບບັນຫາໃດໆ ທີ່ເກີດຂຶ້ນ ແລະຜູ້ຮັບເຄາະ ກໍຄືປະຊາຊົນ. ດັ່ງນັ້ນ ສອງຂແນງການ ດັ່ງກ່າວ ມີຄວາມຈໍາເປັນ ຕ້ອງຣະບຸ ຄວາມຮັບຜິດຊອບ ຕໍ່ຜູ້ຊົມໃຊ້ ໃນກົດໝາຍ ວ່າດ້ວຍການ ປົກປ້ອງ ຜູ້ຊົມໃຊ້. ທ່ານ ອາມີ ສົມຍາເລິງ ສະມາຊິກ ສະພາແຫ່ງຊາດ ຈາກເຂດເລືອກຕັ້ງທີ 7 ແຂວງໄຊຍະບູຣີ ກໍໄດ້ກ່າວເຖິງ ບັນຫາ ຊື່ຂອງ ກົດໝາຍນັ້ນວ່າ:

"ກ່ຽວກັບຜູ້ຊົມໃຊ້ ເພາະວ່າ ຖ້າເປັນຢ່າງນັ້ນ ຂ້າພະເຈົ້າ ຈຶ່ງໃສ່ວ່າ ກົດໝາຍວ່າດ້ວຍ ຜູ້ບໍຣິໂພກ ຕື່ມຍໍ້າຄືນຫົວຂໍ້ ຜູ້ຊົມໃຊ້ ມັນບໍ່ໄດ້ກວມເອົາ ຜູ້ບໍຣິໂພກ ຖ້າວ່າທາງ ອະນຸກັມມະການ ຍັງຢືນຢັນການ ບໍຣິໂພກນີ້ ແມ່ນຢູ່ໃນການ ຊົມໃຊ້ ກໍຕ້ອງຕີຄວາມໝາຍ ຢູ່ໃນການ ອະທິບາຍ ສັບໃຫ້ມັນແຈ້ງໂລດ".

ຈາກການປະກອບ ຄວາມຄິດຄວາມເຫັນ ກ່ຽວກັບຮ່າງກົດໝາຍ ວ່າດ້ວຍການປົກປ້ອງ ຜູ້ຊົມໃຊ້ ຂອງສະມາຊິກ ສະພາ ຈາກເຂດເລືອກຕັ້ງຕ່າງໆ ແລ້ວນັ້ນ ທາງ ກະຊວງ ອຸດສາຫະກັມ ການຄ້າ ຈະຕ້ອງໄດ້ ສຶກສາ ຄົ້ນຄວ້າຕື່ມ ເພື່ອແກ້ໄຂ ແລະປັບປຸງໃຫ້ ດີຂຶ້ນກວ່າເກົ່າ.

ເຕັມຫນ້າ