ເປີດຮ້ານຂາຍສຸຣາ ລັກຄ້າປະເວນີ

ແຫລ່ງຂ່າວ ທີ່ເຊື່ອຖືໄດ້ ໃນ ນະຄອນຫລວງ ວຽງຈັນ ຣາຍງານວ່າ ປັດຈຸບັນ ຮ້ານຂາຍເຫລົ້າເບັຍ ໃນເມືອງ ຫາດຊາຍຟອງ ບໍຣິເວນ ສົ້ນຂົວ ມິຕພາບ ລາວ-ໄທ ແຫ່ງທີ່ 1 ມີການລັກ ຄ້າປະເວນີ ມາດົນແລ້ວ ໂດຍ ທີ່ເຈົ້າຂອງຮ້ານ ໄດ້ໃຫ້ສິນບົນ ແກ່ເຈົ້າໜ້າທີ່ ຂັ້ນສູງ ຢູ່ເລື້ອຍໆ ເພື່ອບໍ່ໃຫ້ກວດ ແລະ ຈັບກຸມ:

“ກໍມີທັງຮ້ານ ກິນດືມ ຢູ່ທາງໜ້າ ນີ້ແລະ ກໍກວດກາຢູ່ ແຕ່ວ່າບາງເທື່ອ ຢ່າງວ່າ corruption ມັນຍັງຫລາຍຢູ່ ເຖິງກວດກາໄປ ກໍເອົາເງິນ ໃຕ້ໂຕະໃຫ້ ຍັດໃສ່ຊອງ ໄປໃຫ້ກ່ອນ ແລ້ວກໍໄປກັນ ບໍ່ເຂົາມາກວດ ຕົວຈິງ ຈັງຊີ້ນ໋າ”.

ທ່ານເວົ້າວ່າ ຮ້ານດັ່ງກ່າວ ຂາຍເບັຍ ເພື່ອບັງໜ້າ ໃນຕອນກາງຄືນ ຈະມີຜູ້ຍິງ ຈາກແຂວງ ພາກເໜືອ ແລະ ປະເທດໃກ້ຄຽງ ມາຂາຍ ບໍຣິການ ທາງເພດ ແກ່ນັກທ່ອງທ່ຽວ ຊຶ່ງເປັນທີ່ ນິຍົມ ຂອງ ພວກຂັບຣົຖ ບັນທຸກ ຊາວໄທ ເນື່ອງຈາກພວກ ຂັບຣົຖ ສົ່ງສິນຄ້າ ຈາກ ໄທມາລາວ ມັກຢຸດແວ່ ພັກຜ່ອນ ດື່ມເຫລົ້າເບັຍ ພ້ອມກັບຊື້ ບໍຣິການ ທາງເພດ ອີກດ້ວຍ.

ຢ່າງໃດກໍຕາມ ແຫລ່ງຂ່າວ ບໍ່ມີຂໍ້ມູນ ຢ່າງລະອຽດວ່າ ເຈົ້າໜ້າທີ່ ຣະດັບສູງ ທີ່ຮັບສິນບົນ ຈາກຮ້ານ ຂາຍເຫຼົ້ານັ້ນ ເປັນເຈົາໜ້າທີ່ ພາກສ່ວນໃດ ແຕ່ການກະທຳ ເຊັ່ນນັ້ນ ຖືເປັນການ ບົກຜ່ອງ ຕໍ່ໜ້າທີ່ ຢ່າງຮ້າຍແຮງ ພ້ອມກັບຍັງ ເປັນການສົ່ງເສີມ ການປະພຶດ ປະຕິບັດ ທີ່ຜິດຕໍ່ ກົດໝາຍ ບ້ານເມືອງ ຊຶ່ງບໍ່ມີໃຜ ເຫັນດີນຳ ນອກຈາກກຸ່ມ ທີ່ເຫັນແກ່ ຜົນປໂຍດສ່ວນ ສວຍໂອກາດ ຈາກ ປະຊາຊົນ ໃນເຂດ ຊົນນະບົດ ທີ່ ທຸກຍາກ ຂັດສົນ ໂດຍບໍ່ຄໍານືງ ເຖີງຜົນສະທ້ອນ ທີ່ຈະຕາມ ເຊັ່ນ: ສ້າງບັນຫາ ສ້າງຄວາມ ເຊື່ອມເສັຍ ຕໍ່ສັງຄົມ.