ນໍ້າຂອງບົກ, ຍາກ ໃນການແລ່ນເຮືອ
2008.12.29
ເຮືອບັນທຸກ ສິນຄ້າ ຂອງຈີນ ຈອດທຽບທ່າເຮືອ ຊຽງແສນ ທີ່ແຂວງຊຽງຮາຍ ປະເທດໄທ
ຕາມປົກກະຕິແລ້ວ ເຮືອສິນ ຂນາດອ່າວໃຫຍ່ແດ່ ທັງຂອງລາວ ແລະ ຈີນ ຈະສາມາດແລ່ນ ຂື້ນລົງໄດ້ຢ່າງສະດວກສະບາຍ ຕາມລຳແມ່ນ້ຳຂອງ ໂດຍສະເພາະ ຣະຫວ່າງ ທ່າເຮືອເມືອງຊຽງແສນ ແຂວງຊຽງຮາຍຂອງໄທ ແລະ ເມືອງຫ້ວຍຊາຍ ແຂວງບໍ່ແກ້ວ ຂອງລາວ.
ແຕ່ປັດຈຸບັນ ແມ້ແຕ່ ເຮືອຂນາດນ້ອຍ ກໍຍັງເກືອບວ່າ ບໍ່ສາມາດແລ່ນຂື້ນລົງ ໄດ້ເລີຍ. ເມື່ອປະມານ ສາມມື້ ທີ່ຜ່ານມາ ເຮືອສິນຄ້າ ຂອງລາວຫລາຍລຳ ແຕ່ລະລຳ ບັນທຸກສິນຄ້າ ປະມານ 300 ຕັ່ນ ໄດ້ພະຍາຍາມ ລ່ອງລົງ ຈາກເມືອງຊຽງແສນ ເພື່ອຈະໄປຫາ ນະຄອນຫລວງພະບາງ ແຕ່ເຮືອ ໄດ້ຕິດຄ້າງ ຢູ່ເທິງຫາດຊາຍ ຫລາຍໆບ່ອນ ເຊັ່ນໄດ້ຕິດຢູ່ ຫາດຊາຍ ທີ່ທ່າຕີນທາດ ແລະ ຫາດທ່າ ບ້ານກ້ອນຕົ້ນ. ປັດຈຸບັນ ເຮືອຫລາຍລຳ ກຳລັງລໍຖ້າ ໃຫ້ນ້ຳ ເຊາະດິນຊາຍອອກ ໃຫ້ເປັນຮ່ອງ ແລ້ວກໍຄ່ອຍ ແລ່ນເຮືອໄປ ເທື່ອລະເລັກລະນ້ອຍ ບໍ່ຮູ້ວ່າ ປານໃດ ຈະໄປເຖິງ ຈຸດໝາຍປານທາງ.
ໃນຣະຍະ ສີ່ຫ້າປີ ທີ່ຜ່ານມາ ໃນຍາມແລ້ງ ແມ່ນ້ຳຂອງ ໄດ້ບົກແຫ້ງລົງຫລາຍ ບາງບ່ອນ ແຫ້ງລົງ ເຖິງຂັ້ນຄົນ ກໍສາມາດ ຍ່າງຂ້າມໄປມາໄດ້. ນັກວິທະຍາສາດ ຕຳນິຕິຕຽນ ການຕັດໄມ້ ທຳຣາຍປ່າ ເປັນສາເຫດ ທີ່ສຳຄັນ ທີ່ພາໃຫ້ແມ່ນ້ຳລຳທານ ແຫ້ງແລ້ງ; ສ່ວນນັກພິພັກຮັກສາ ສະພາບແວດລ້ອມ ໂດຍສະເພາະ ນັກສະພາບແວດລ້ອມ ຢູ່ໄທ ຕິຕຽນ ການສ້າງເຂື່ອນ ຂອງຈີນ ໃສ່ແມ່ນ້ຳຂອງ ຊຶ່ງມັກປິດປະຕູເຂື່ອນ ໃນຍາມແລ້ງ ເຮັດໃຫ້ນ້ຳຂາດເຂີນ ໃນພາກລຸ່ມ.