ຜົລກະທົບ ໃນແມ່ນໍ້າຂອງ ຈາກເຂື່ອນຂອງຈີນ

ອົງກາຣ ອະນຸຮັກ ສະພາບແວດລ້ອມ ຮຽກຮ້ອງ ໃຫ້ຣັຖບາລໄທຽ ຈັດກອງປະຊຸມ ຮ່ວມກັບຈີນ ກ່ຽວກັບ ຜົລກະທົບ ໃນແມ່ນໍ້າຂອງ ຈາກກາຣສ້າງ ເຂື່ອນ ຂອງຈີນ.
ຫວາດ ສີມູນ
2010-02-23
ອີແມວລ໌
ຄໍາເຫັນ
Share
ພິມ

ອົງກາຣຈັດຕັ້ງ ທີ່ບໍ່ຂຶ້ນກັບ ຣັຖບາລ ຫລື NGOs ທີ່ຮ່ວມກັນເປັນ ກຸ່ມອະນຸຮັກ ສະພາບ ແມ່ນ້ຳຂອງ ໄດ້ຮຽກຮ້ອງ ໃຫ້ຣັຖບາລ ໄທຽ ຈັດກອງປະຊຸມ ຮ່ວມກັບ ຣັຖບາລ ກຸງປັກກິ່ງ ເພື່ອຫາວິທີ ທາງແກ້ໄຂ ສະພາບ ແມ່ນ້ຳຂອງ ທີ່ມີຣະດັບ ນ້ຳຫລຸດລົງ ຢ່າງໜ້າເປັນຫ່ວງ.

ທາງອົງກາຣ ຮັກສາ ແມ່ນ້ຳຂອງ ໄດ້ອອກແຖລງກາຣ ໃນມື້ວັນຈັນ ຜ່ານມາ ເພື່ອຮຽກຮ້ອງ ໃຫ້ຣັຖບາລໄທຽ ຍົກເອົາບັນຫາ ຄວາມເດືອດຮ້ອນ ຂອງປະຊາຊົນ ຫລາຍລ້ານຄົນ ທີ່ຢູ່ອາສັຍ ຕາມເຂຕແຄມ ແມ່ນ້ຳຂອງ ທີ່ໄດ້ຮັບ ຜົລກະທົບຈາກ ກາຣສ້າງເຂື່ອນໃສ່ ໃນພາຄເໜືອ ຂອງຈີນ ພາຍຫລັງທີ່ ສ້າງເຂື່ອນ Manwan ສຳເຣັຈໃນປີ 1993 ເປັນຕົ້ນມາ ແລະເທົ່າ ປັຈຈຸບັນ ມີກາຣສ້າງເຂື່ອນ ໃສ່ແມ່ນ້ຳຂອງ ທີ່ສຳເຣັຈແລ້ວ 4 ແຫ່ງ ດ້ວຍກັນນັ້ນ.

ສ່ວນເຂື່ອນ Xiaowan ເປັນເຂື່ອນທີ່ 4 ໃນແມ່ນ້ຳຂອງ ທີ່ຈີນ ສ້າງສຳເຣັຈ ແລະ ເຣີ່ມຕັນນ້ຳໄວ້ ແຕ່ເດືອນຕຸລາ ຜ່ານມາ ຍິ່ງເປັນກາຣ ເຮັດໃຫ້ ແມ່ນ້ຳຂອງ ເຂຕລຸ່ມ ມີຣະດັບນ້ຳ ຫລຸດຕໍ່າລົງ ແບບຜິດປົກຕິ.

ທ່ານ Peerasak Intayos ຈາກກຸ່ມອະນຸຮັກ ແມ່ນ້ຳຂອງ ທີ່ມີຫ້ອງກາຣ ຢູ່ຊຽງຮາຍ ໄດ້ແຈ້ງວ່າ ຣະດັບນ້ຳ ໄດ້ຫລຸດຕໍ່າລົງ ເກີນຄາມໝາຍ ຈົນເຮັດໃຫ້ ກາຣແລ່ນ ເຮືອ ຈາກເມືອງຊຽງຂອງ ຫາເມືອງ ຫລວງພຣະບາງ ຕ້ອງໄດ້ ຍຸຕິກາຣ ໃຫ້ບໍຣິກາຣ ເພື່ອຄວາມປອດພັຍ.

ໃນຂະນະ ດຽວກັນນັ້ນ ທ່ານກໍວ່າ ຣະດັບນ້ຳຂອງ ແຕ່ເໜືອຕລອດໃຕ້ ກໍຢູ່ໃນຣະດັບ ຕໍ່າທີ່ສຸດ ເປັນກາຣສ້າງ ຜົລກະທົບ ຢ່າງຫລວງຫລາຍ ຕໍ່ປະຊາຊົນ ຈຶ່ງຢາກໃຫ້ ທາງຣັຖບາລ ແຕ່ລະປະເທສ ໄດ້ຫາຣືກັບ ທາງກາຣຈີນ ຢ່າງຮີບດ່ວນ ເພື່ອຫາວິທີ ທາງແກ້ໄຂ.

ເຕັມຫນ້າ